សន្និសីទទូទៅ
ជ្រាលជ្រៅ​ក្នុង​ដួងចិត្ត​យើង
កំណត់ចំណាំ​នៅ​បាត
បាវចនា

ជ្រាលជ្រៅ​ក្នុង​ដួងចិត្ត​យើង

​ព្រះអម្ចាស់​កំពុង​ព្យាយាម​ជួយ​យើង—គឺ​យើង​ទាំងអស់​គ្នា—ធ្វើ​ឲ្យ​ដំណឹងល្អ​កាន់តែ​មាន​ភាព​ជ្រាលជ្រៅ​នៅក្នុង​ដួងចិត្ត​យើង ។

បងប្អូនប្រុសស្រី វា​ជា​ពេលវេលា​ដ៏​រុងរឿង​ណាស់​ដែល​យើង​រស់នៅ​នេះ ។ កាលដែល​យើង​អបអរ​ការចាប់​ផ្ដើម​នៃ​ការស្ដារ​ឡើងវិញ នោះ​វា​ក៏​សមរម្យ​ផងដែរ​ដើម្បី​អបអរ​ការស្ដារ​ឡើងវិញ​ដែល​កំពុង​បន្ត​ដែល​យើង​កំពុង​តែ​ធ្វើ​ជា​សាក្សី​នេះ ។ ខ្ញុំ​រីករាយ​ជាមួយ​បងប្អូន​ដែល​បាន​រស់នៅ​ក្នុង​ជំនាន់​នេះ ។ តាមរយៈ​ព្យាការី​របស់​ទ្រង​ព្រះអម្ចាស់​បន្ត​ប្រទាន​អ្វីៗ​ទាំងអស់​ដែល​ត្រូវការ​ដើម្បី​ជួយ​យើង​ឲ្យ​រៀបចំ​ទទួល​ទ្រង់ ។

តម្រូវការ​មួយ​ក្នុង​ចំណោម​នោះ​គឺ​ការផ្ដួចផ្ដើម​កម្មវិធី កុមារ និង​យុវវ័យ ថ្មី ។ ពួក​បងប្អូន​ភាគច្រើន​គឺ​បាន​ស្គាល់​ពី​ការសង្កត់​ធ្ងន់​របស់​កម្មវិធី​នេះ​ហើយ ទៅលើ​ការដាក់​គោលដៅ ទៅលើ​តំណាង​ថ្មី​នៃ​ភាពម្ចាស់ការ និង​ទៅលើ​សន្និសីទ ដើម្បី​កម្លាំង​នៃ​យុវជន ។ ប៉ុន្តែ​យើង​មិនត្រូវ​អនុញ្ញាត​ឲ្យ​ការណ៍​ទាំងនោះ​រារាំង​យើង​ពី​ការមើល​ឃើញ​គោលការណ៍​ទាំងឡាយ​ដែល​កម្មវិធី​នេះ​ស្ថាបនា​លើ និង​គោលបំណង​របស់​វា​ឡើយ គឺ ៖ ដើម្បី​ជួយ​ធ្វើ​ឲ្យ​ដំណឹងល្អ​របស់​ព្រះយេស៊ូវ​គ្រីស្ទ​ជ្រួតជ្រាប​យ៉ាង​ជ្រាលជ្រៅ​ទៅក្នុង​ដួងចិត្ត​កុមារ និង​យុវវ័យ​របស់​យើង ។

ខ្ញុំ​ជឿ​ថា កាល​ដែល​យើង​ឃើញ​ពី​គោលការណ៍​ទាំងនេះ​កាន់​តែច្បាស់​ឡើង នោះ​យើង​នឹង​ស្គាល់​ការណ៍​នេះ​ថា​វា​មិន​គ្រាន់តែ​ជា​កម្មវិធី​មួយ​សម្រាប់​សមាជិក​អាយុ​ពី ៨ ទៅ ១៨ ឆ្នាំ​នោះទេ ។ យើង​នឹង​ឃើញ​ពី​របៀប​ដែល​ព្រះអម្ចាស់​កំពុង​ព្យាយាម​ជួយ​យើង—គឺ​យើង​ទាំងអស់​គ្នា—ធ្វើ​ឲ្យ​ដំណឹងល្អ​របស់​ទ្រង់​កាន់តែ​មាន​ភាព​ជ្រាលជ្រៅ​នៅក្នុង​ដួងចិត្ត​យើង ។ ខ្ញុំ​សូម​អធិស្ឋាន​ថា ព្រះវិញ្ញាណ​បរិសុទ្ធ​នឹង​ជួយ​យើង​ឲ្យ​រៀន​ជាមួយ​គ្នា ។

ចំណង​ទាក់ទង—« នៅ​ជាមួយ​ពួកគេ »

គោលការណ៍​ទីមួយ​គឺ ចំណងទាក់ទង ។ ដោយសារ​ចំណងទាក់ទង​ទាំងនោះ​គឺជា​ផ្នែក​ដ៏​ធម្មជាតិ​មួយ​របស់​សាសនាចក្រ​នៃ​ព្រះយេស៊ូវគ្រីស្ទ នោះ​ពេលខ្លះ​យើង​ភ្លេច​ពី​សារសំខាន់​នៃ​ចំណងទាក់ទង​នៅក្នុង​ការប្រែចិត្ត​ជឿ​ដែល​កំពុង​បន្ត​របស់​យើង​ទៅ​កាន់​ព្រះគ្រីស្ទ ។ យើង​មិន​ត្រូវបាន​រំពឹង​ឲ្យ​ស្វែងរក ឬ​ដើរ​លើ​ផ្លូវ​នៃ​សេចក្តីសញ្ញា​តែ​ឯង​ឡើយ ។ យើង​ត្រូវការ​សេចក្ដី​ស្រឡាញ់ និង​ការគាំទ្រ​ពី​ឪពុក​ម្ដាយ សមាជិក​គ្រួសារ​ផ្សេង​ទៀត មិត្តភក្ដិ និង​ថ្នាក់ដឹកនាំ ដែល​កំពុង​ដើរ​នៅលើ​ផ្លូវ​នេះ​ផងដែរ ។

ចំណងទាក់ទង​ប្រភេទ​នេះ​ត្រូវការ​ពេលវេលា ។ ពេលវេលា​ដើម្បី​នៅ​ជាមួយ​គ្នា ។ ពេលវេលា​សម្រាប់​សើច​លេង​រៀន និង​បម្រើ​ជាមួយ​គ្នា ។ ពេលវេលា​ដើម្បី​ពេញចិត្ត​ចំណាប់​អារម្មណ៍ និង​ឧបសគ្គ​របស់​គ្នា​ទៅវិញ​ទៅមក ។ ពេលវេលា​ដើម្បី​បើកចិត្ត និង​ស្មោះត្រង់​នឹង​គ្នា​ទៅវិញ​ទៅមក កាលដែល​យើង​ពុះពារ​ដើម្បី​បាន​កាន់​តែ​ប្រសើរ​ឡើង​ជាមួយ​គ្នា ។ ចំណងទាក់ទង​ទាំងនេះ​ជា​គោលបំណង​មួយ​ក្នុង​គោលបំណង​ទាំងឡាយ​នៃ​ការប្រមូល​ផ្ដុំ​ជា​ក្រុមគ្រួសារ កូរ៉ុម ថ្នាក់ និង​ក្រុម​ជំនំ ។ វា​គឺ​ជា​គ្រឹះនៃ​ការងារ​បម្រើ​ដ៏​មាន​ប្រសិទ្ធភាព ។

អែលឌើរ ឌេល ជី រេនឡាន់ បាន​ផ្ដល់​ដល់​យើង​នូវ​គន្លឹះ​មួយ​ដល់​ការបង្កើត​ចំណងទាក់ទង​នេះ ពេល​លោក​បាន​មាន​ប្រសាសន៍​ថា « ដើម្បី​បម្រើ​មនុស្ស​ដទៃ​ឲ្យ​មាន​ប្រសិទ្ធភាព យើង​ត្រូវ​មើល​ឃើញ​ពួកគេ…តាមរយៈ​ព្រះនេត្រ​របស់​ព្រះវរបិតា​សួគ៌ ។ នៅ​ពេល​នោះ​ហើយ​ទើប​យើង​អាច​ចាប់ផ្ដើម​យល់​ពី​តម្លៃ​ដ៏​ពិត​នៃ​ព្រលឹងមួយ ។ មាន​តែ​ពេល​នោះហើយ​ទើប​យើង​ទទួល​អារម្មណ៍​ពី​សេចក្ដី​ស្រឡាញ់​ដែល​ព្រះវរបិតា​សួគ៌​មាន​ចំពោះ​កូនចៅ​របស់​ទ្រង់​ទាំងអស់ » ។

ការមើល​ឃើញ​មនុស្ស​ដទៃ​ដូចជា​ព្រះ​ទត​មើល​ពួកគេ គឺ​ជា​អំណោយទាន​មួយ ។ ខ្ញុំ​សូម​អញ្ជើញ​យើង​គ្រប់គ្នា​ឲ្យ​ស្វែងរក​អំណោយទាន​នេះ ។ កាលដែល​ភ្នែក​របស់​យើង​ត្រូវបាន​បើក​ឲ្យ​មើលឃើញនោះ​យើង​នឹង​អាច​ជួយ​អ្នក​ផ្សេង​ទៀត​ឲ្យ​មើលឃើញ​ខ្លួន​ពួកគេ​ដូច​ព្រះ​ទតឃើញ​ពួកគេ​ផងដែរ ។ ប្រធាន ហិនរី ប៊ី អាវរិង បាន​មាន​បញ្ជាក់​ពី​អំណាច​នេះ​កាល​លោក​មាន​ប្រសាសន៍​ថា « អ្វី​ដែល​នឹង​សំខាន់​បំផុត គឺ​ជា​អ្វី​ដែល [ អ្នកដទៃ ] រៀន​ពី [ បងប្អូន ] ថា​ពួកគេ​ជា​នរណា​ពិត​ប្រាកដ និង​អ្វី​ដែល​ពួកគេ​អាច​ប្រែក្លាយ​ជា​ប្រាកដ ។ ខ្ញុំ​ទាយ​ថា​ពួកគេ​នឹង​មិន​រៀន​បាន​ច្រើន​មកពី​ការបង្រៀន​ទ្រឹស្ដី​នោះ​ទេ ។ ពួកគេ​នឹង​រៀន​តាមរយៈ​អារម្មណ៍ ថា​បងប្អូន​ជា​នរណា ថា​បងប្អូន​គិត​ថា​ពួកគេ​ជា​នរណា និង​ថា​បងប្អូន​គិត​ថា​ពួកគេ​អាច​ប្រែក្លាយ​ជា​អ្វី » ។ ការជួយ​អ្នកដទៃ​ឲ្យ​យល់​ពី​អត្តសញ្ញាណ​និង​គោលបំណង​ពិត​របស់​ពួកគេ​គឺ​ជា​អំណោយ​ដ៏​អស្ចារ្យ​បំផុត​មួយ​ដែល​យើង​អាច​ផ្តល់​ឲ្យ ។១០ ការមើលឃើញ​អ្នកដទៃ​និង​ខ្លួន​យើង​ដូច​ជា​ព្រះ​បាន​ធ្វើ​ឲ្យ​មាន​ចិត្ត​« រួមគ្នា​ដោយ​សាមគ្គីភាព​ហើយ​ស្រឡាញ់​គ្នា » ។១១

ជាមួយ​នឹង​កម្លាំង​ខាង​លោកិយ​ដែល​ចេះតែ​កើន​ឡើង​ឥត​ឈប់​ដែល​មាន​ឥទ្ធិពល​លើ​យើង នោះ​យើង​ត្រូវការ​កម្លាំង​ដែល​បាន​មក​ពី​ចំណង​ទាក់ទង​ដ៏​ពោរពេញ​ដោយ​ក្ដីស្រឡាញ់ ។ ដូច្នេះ កាល​ដែល​យើង​ដាក់ផែនការ​សកម្មភាព ការប្រជុំ និង​ការប្រមូល​ផ្ដុំ​ផ្សេងៗ​ទៀត ចូរ​ចងចាំ​ពី​គោលបំណង​ដ៏​សំខាន់​នៃ​ការប្រមូល​ផ្ដុំ​ទាំងនេះ គឺ​ដើម្បី​បង្កើត​ចំណង​ទាក់ទង​សេចក្តីស្រឡាញ់​ដែល​បង្រួម យើង​និង​ជួយ​ធ្វើ​ឲ្យ​ដំណឹងល្អ​របស់​ព្រះយេស៊ូវ​គ្រីស្ទ​ជ្រួតជ្រាប​យ៉ាង​ជ្រាលជ្រៅ​ទៅក្នុង​ដួងចិត្ត​យើង ។១២

វិវរណៈ សិទ្ធិជ្រើសរើស និង​ការប្រែចិត្ត—« ភ្ជាប់​ពួកគេ​នឹង​ស្ថានសួគ៌ »១៣

ពិតមែន​ហើយ វា​មិន​គ្រប់គ្រាន់​ទេ​ក្នុង​ការគ្រាន់តែ​ភ្ជាប់​ទំនាក់ទំនង​គ្នា​នោះ ។ មាន​ក្រុម និង​អង្គការ​ជា​ច្រើន​ដែល​សម្រេច​បាន​នូវ​សាមគ្គីភាព​ជុំវិញ​បុព្វហេតុ​ផ្សេងៗ ។ ប៉ុន្តែ សាមគ្គីភាព​ដែល​យើង​ស្វែងរក​គឺ​ដើម្បី​ក្លាយ​ជា​តែមួយ​នៅក្នុង​ព្រះគ្រីស្ទ ដើម្បី​ភ្ជាប់​ខ្លួន​យើង​នឹង​ទ្រង់ ។១៤ ដើម្បី​ភ្ជាប់​ដួងចិត្ត​យើង​នឹង​ស្ថានសួគ៌ យើង​ត្រូវការ​បទពិសោធន៍​ខាង​វិញ្ញាណ​ផ្ទាល់​ខ្លួន​អែលឌើរ​អាន់ឌើរសិន​ទើប​តែ​បាន​និយាយ​ជា​មួយ​យើង​យ៉ាងរាក់ទាក់ ។១៥ បទពិសោធន៍​ទាំងនោះ​បាន​មក ពេល​ព្រះវិញ្ញាណ​នាំ​ព្រះបន្ទូល និង​សេចក្ដី​ស្រឡាញ់​របស់​ព្រះ​មកកាន់​គំនិត និង​ដួងចិត្ត​យើង ។១៦

វិវរណៈ​នេះ​បាន​មក​ដល់​យើង​តាមរយៈ​ខគម្ពីរ ជា​ពិសេស​ព្រះគម្ពីរ​មរមន តាមរយៈ​ពាក្យ​សម្ដី​ដ៏​បំផុស​គំនិត​របស់​ពួក​ព្យាការី​នៅរស់ និង​ពួកសិស្ស​ដ៏​ស្មោះត្រង់​ផ្សេងៗ​ទៀត និង​តាមរយៈ​សម្លេង​ដ៏​តូច​រហៀង ។១៧ ពាក្យពេចន៍​ទាំងនេះ​គឺ​លើស​ពី​ទឹកប៊ិច​នៅលើ​ក្រដាស រលក​សម្លេង​ក្នុង​ត្រចៀក​យើង ឬ​ការគិត​នៅក្នុង​គំនិត និង​ដួងចិត្ត​យើង​ទៅទៀត ។ ព្រះបន្ទូល​របស់​ព្រះ​គឺ​ជា​អំណាច​ខាង​វិញ្ញាណ ។១៨ វា​គឺ​ជា​សេចក្ដី​ពិត និង​ពន្លឺ ។១៩ វា​គឺ​ជា​របៀប​ដែល​យើង​ស្តាប់​ឮ​ទ្រង់ ! ពាក្យពេចន៍​ផ្ដួចផ្ដើម និង​បង្កើន​សេចក្ដី​ជំនឿ​យើង​លើ​ព្រះគ្រីស្ទ ហើយ​បញ្ឆេះ​បំណង​ប្រាថ្នា​នៅក្នុង​យើង​ឲ្យ​ប្រែក្លាយ​កាន់តែ​ដូច​ជា​ព្រះអង្គ​សង្គ្រោះ—គឺ​ថា​ដើម្បី​ប្រែចិត្ត និង​ដើរ​លើ​ផ្លូវ​នៃ​សេចក្ដី​សញ្ញា ។២០

កាលពី​ខែ​មេសា​មុន ប្រធាន រ័សុល អិម ណិលសុន បាន​ជួយ​យើង​ឲ្យ​យល់​ពី​តួនាទី​ដ៏​សំខាន់​នៃ​ការប្រែចិត្ត​ក្នុង​ដំណើរ​វិវរណៈ​នេះ ។២១ លោក​បាន​មាន​ប្រសាសន៍​ថា « នៅពេល​យើង​ជ្រើសរើស​ប្រែចិត្ត នោះ​យើង​ជ្រើសរើស​ផ្លាស់ប្ដូរ ! យើង​អនុញ្ញាត​ឲ្យ​ព្រះអង្គសង្គ្រោះ​ផ្លាស់ប្រែ​យើង​ទៅ​កំណែថ្មី​ដ៏​ល្អ​បំផុត​នៃ​ខ្លួន​យើង ។… យើង​ជ្រើសរើស​ប្រែក្លាយ​កាន់តែ​ដូចជា​ព្រះយេស៊ូវ​គ្រីស្ទ ! »២២ ដំណើរការ​នៃ​ការផ្លាស់ប្ដូរ​នេះ ដែល​ត្រូវបាន​បញ្ឆេះ​ដោយ​ព្រះបន្ទូល​នៃ​ព្រះ ជា​របៀប​ដែល​យើង​ភ្ជាប់​នឹង​ស្ថានសួគ៌ ។

ដោយ​ផ្តោត​លើការអញ្ជើញ​របស់​ប្រធាន​ណិលសុន​ឲ្យ​ប្រែចិត្ត គឺ​ជា​គោលការណ៍​នៃ​សិទ្ធិជ្រើសរើស ។ យើង​ត្រូវ​ជ្រើសរើស​ប្រែចិត្ត​សម្រាប់​ខ្លួន​យើង​ផ្ទាល់ ។ ដំណឹងល្អ​មិន​អាច​បង្ខំ​ចិត្ត​យើង​ឡើយ ។ ដូច​ដែល​អែលឌើរ រេនឡាន់ បាន​មាន​ប្រសាសន៍​ថា « គោលបំណង​របស់​ព្រះវរបិតាសួគ៌​យើង​ក្នុងការ​ធ្វើ​ជា​ឪពុកម្តាយ គឺ​ពុំ​គ្រាន់តែ​ឲ្យ​បុត្រាបុត្រី​របស់​ទ្រង់​ធ្វើអ្វី​ដែល​ត្រូវ​ប៉ុណ្ណោះ​ទេ គោលបំណង​របស់​ទ្រង់​គឺ​ឲ្យ​បុត្រាបុត្រី​របស់​ទ្រង់​ជ្រើសរើសធ្វើ​អ្វី​ដែល​ត្រឹមត្រូវ » ។២៣

នៅក្នុង​កម្មវិធី​ទាំងឡាយ​ដែល​ត្រូវបាន​ជំនួស​ដោយ​កម្មវិធី កុមារ និង​យុវវ័យ មាន​នូវ​តម្រូវការ​ជាង ៥០០ ខុសៗ​គ្នា​ដែល​ត្រូវ​បញ្ចប់ ដើម្បី​ទទួល​បាន​នូវ​ការទទួល​ស្គាល់​ផ្សេងៗ​គ្នា ។២៤ សព្វថ្ងៃ​នេះ ចាំបាច់​មាន​តែ​មួយ ។ វា​ជា​ការអញ្ជើញ​មួយ​ដើម្បី ជ្រើសរើស ប្រែក្លាយ ដូចជា ព្រះអង្គ សង្គ្រោះ ឲ្យ កាន់តែ ខ្លាំង ។ យើង​ធ្វើ​បែបនេះ​ដោយ​ការទទួល​យក​នូវ​ព្រះបន្ទូល​នៃ​ព្រះ​តាមរយៈ​ព្រះវិញ្ញាណ​បរិសុទ្ធ​និង​អនុញ្ញាត​ឲ្យ​ព្រះគ្រីស្ទ​ផ្លាស់ប្តូរ​យើង​ទៅ​ជា កំណែថ្មី​ដ៏​ល្អ​បំផុត​នៃ​ខ្លួន​យើង ។

នេះ​គឺ​ហួស​ពី​ការអនុវត្ត​នៅក្នុង​ការដាក់​គោលដៅ ឬ​ការអភិវឌ្ឍ​ផ្ទាល់​ខ្លួន​ទៅទៀត ។ គោលដៅ​ធម្មតា​ជា​ឧបករណ៍​មួយ​ជួយ​យើង​ភ្ជាប់​នឹង​ស្ថានសួគ៌​តាមរយៈ​វិវរណៈ សិទ្ធិជ្រើសរើស និង​ការប្រែចិត្ត—ដើម្បី​មក​ឯ​ព្រះគ្រីស្ទ និង​ទទួល​ដំណឹងល្អ​របស់​ទ្រង់​កាន់តែ​ជ្រាលជ្រៅ​នៅក្នុង​ដួងចិត្ត​យើង ។

ការចូលរួម និង​ការលះបង់—« ចូរ​ឲ្យ​ពួកគេ​ដឹកនាំ »២៥

ជា​ចុងក្រោយ ដើម្បី​ឲ្យ​ដំណឹងល្អ​របស់​ព្រះយេស៊ូវគ្រីស្ទ​ជ្រួតជ្រាប​ក្នុង​ដួងចិត្ត​យើង យើង​ត្រូវតែ​ចូលរួម​ចំណែក—គឺ​ផ្ដល់​ពេលវេលា និង​ទេពកោសល្យ​របស់​យើង គឺ​លះបង់​ដើម្បី​វា ។២៦ យើង​ទាំងអស់​គ្នា​ចង់​រស់នៅ​ក្នុង​ជីវិត​មួយ​ដ៏​មាន​អត្ថន័យ ហើយ​ជាពិសេស​គឺ​វា​ពិត​ចំពោះ​ជំនាន់​ដែល​កំពុង​តែ​ធំ​ឡើង​នេះ ។ ពួកគេ​ប្រាថ្នា​ចង់បាន​បុព្វហេតុ​មួយ ។

ដំណឹងល្អ​នៃ​ព្រះយេស៊ូវគ្រីស្ទ គឺជា​បុព្វហេតុ​ដ៏​អស្ចារ្យ​បំផុត​នៅក្នុង​ពិភពលោក​នេះ ។ ប្រធាន អ៊ែសរ៉ា ថាហ្វ ប៊ែនសឹន បាន​មាន​ប្រសាសន៍​ថា « ពួក​យើង​ត្រូវ​បាន​បង្គាប់​ដោយ​ព្រះ​ឲ្យ​ផ្សាយ​ដំណឹងល្អ​ទៅ​កាន់​ពិភពលោក​ទាំងមូល ។ នោះ​គឺជា​បុព្វហេតុ​ដែល​ត្រូវតែ​បង្រួប​បង្រួម​យើង​នៅ​សព្វថ្ងៃ​នេះ ។ មាន​តែ​ដំណឹងល្អ​ប៉ុណ្ណោះ​ដែល​នឹង​សង្គ្រោះ​ពិភពលោក​នេះ​ពី​គ្រោះមហន្តរាយ​របស់​ការបំផ្លាញ​ខ្លួនឯង​របស់​វា​ផ្ទាល់ ។ មានតែ​ដំណឹងល្អ​ប៉ុណ្ណោះ​ដែល​នឹង​បង្រួប​បង្រួម​បុរស [ និង​ស្ត្រី ] នៃ​គ្រប់​ពូជសាសន៍ និង​សញ្ជាតិ​ទាំងអស់​នៅក្នុង​ភាពសុខសាន្ត ។ មានតែ​ដំណឹងល្អ​ប៉ុណ្ណោះ​ដែល​នឹង​នាំ​មក​នូវ​អំណរ សុភមង្គល និង​សេចក្ដី​សង្គ្រោះ​ដល់​គ្រួសារ​មនុស្ស​លោក » ។២៧

អែលឌើរ ដេវីឌ អេ បែដណា បាន​មាន​សន្យា​ថា « កាលដែល​យើង​ផ្ដល់​អំណាច​ដល់​យុវវ័យ ដោយ​ការអញ្ជើញ និង​ការអនុញ្ញាត​ឲ្យ​ពួកគេ​ធ្វើ​សកម្មភាព នោះ​សាសនាចក្រ​នឹង​ឈាន​ឆ្ពោះ​ទៅមុខ​ក្នុង​របៀប​ដ៏​មហស្ចារ្យ » ។២៨ ជា​ញឹកញាប់​ណាស់ យើង​មិន​បាន​អញ្ជើញ និង​អនុញ្ញាត​យុវវ័យ​ឲ្យ​លះបង់​សម្រាប់​បុព្វហេតុ​នៃ​ព្រះគ្រីស្ទ​ដ៍​អស្ចារ្យ​នេះ ។ អែលឌើរ នែល អេ ម៉ាក់ស្វែល បាន​សង្កេត​ឃើញ​ថា « ប្រសិន​បើ យុវវ័យ [ របស់​យើង ] មិន​បានលើក​ទឹកចិត្ត​ឲ្យ​ស្ងើច​សរសើរ [ ដោយ​កិច្ចការ​របស់​ព្រះ ] ទេ នោះ​ពួកគេ​ទំនង​ជា​នឹង​ត្រូវបាន​បំពុល​ដោយ​លោកិយ​នេះ » ។២៩

កម្មវិធី​កុមារ និង​យុវវ័យ​ផ្ដោត​លើ​ការផ្ដល់​អំណាច​ដល់​យុវវ័យ ។ ពួកគេ​ជ្រើសរើស​គោលដៅ​របស់​ខ្លួន​ពួកគេ​ផ្ទាល់ ។ គណៈប្រធាន​កូរ៉ុម និង​គណៈប្រធាន​ថ្នាក់​ត្រូវបាន​ដាក់​ក្នុង​តួនាទី​ត្រឹមត្រូវ​របស់​ពួកគេ ។ ក្រុមប្រឹក្សា​យុវវ័យ​ប្រចាំ​វួដ គឺ​ដូច​ជា​ក្រុមប្រឹក្សា​វួដ​ដែរ ផ្ដោត​ទៅលើ​កិច្ចការ​នៃ​សេចក្ដី​សង្គ្រោះ និង​ការលើក​តម្កើង ។៣០ ហើយ​កូរ៉ុម និង​ថ្នាក់​ចាប់ផ្ដើម​ការប្រជុំ​របស់​ពួកគេ​ដោយ​ការប្រឹក្សា​អំពី​របៀប​ធ្វើ​កិច្ចការ​ដែល​ព្រះ​បាន​ប្រទាន​ដល់​ពួកគេ ។៣១

ប្រធាន​ណិលសុន​បាន​មាន​ប្រសាសន៍​ទៅកាន់​យុវវ័យ​របស់​សាសនាចក្រ​ថា « បើ​ក្មួយៗ​ជ្រើសរើស បើ​ក្មួយៗ​ចង់…ក្មួយៗ​អាច​មានចំណែក​ដ៏ធំ​នៅក្នុង​កិច្ចការដ៏ធំ ដ៏​មហិមា ដ៏​មហស្ចារ្យ !… ក្មួយៗ​គឺ​ជា​មនុស្ស​ល្អបំផុត​ដែល​ព្រះអម្ចាស់​ធ្លាប់​បាន​បញ្ជូន​មក​កាន់​លោកិយ​នេះ ។ ក្មួយៗ​មាន​សមត្ថភាព​ដើម្បី​កាន់តែ​ឆ្លាត និង​កាន់តែ​ឈ្លាសវៃ ហើយ​មាន​ឥទ្ធិពល​ទៅលើ​ពិភពលោក​ជាង​ជំនាន់​មុនៗ ! »៣២ នៅក្នុង​ឱកាស​មួយ​ផ្សេង​ទៀត ប្រធាន​ណិលសុន​បាន​ប្រាប់​យុវវ័យ​ថា « ខ្ញុំ​មាន​ទំនុកចិត្ត​ទាំងស្រុង​លើ​ក្មួយៗ ។ ខ្ញុំ​ស្រឡាញ់​ក្មួយៗ ហើយ​ព្រះអម្ចាស់​ក៏​ស្រឡាញ់​ក្មួយៗ​ផងដែរ ។ យើង​គឺ​ជា​ប្រជាជន​របស់​ទ្រង់ ចូល​រួម​គ្នា​ក្នុង​កិច្ចការ​ដ៏បរិសុទ្ធ​របស់​ទ្រង់ » ។៣៣ ក្មួយៗ​អើយ តើ​ក្មួយៗ​អាច​ទទួល​អារម្មណ៍​ពី​ការទុកចិត្ត​ដែល​ប្រធាន​ណិលសុន​មាន​ចំពោះ​ក្មួយៗ និង​ថា​ក្មួយៗ​សំខាន់​យ៉ាង​ណា​នៅក្នុង​កិច្ចការ​នេះ​ដែរ​ឬ​ទេ ?

ឪពុក​ម្ដាយ និង​ថ្នាក់ដឹកនាំ​ដែល​ជា​មជ្ឈិមវ័យ​អើយ ខ្ញុំ​សូម​អញ្ជើញ​បងប្អូន​ឲ្យ​មើល​ទៅ​យុវវ័យ​របស់​យើង​ដូចជា​ប្រធាន​ណិលសុន​មើល​ទៅ​ពួកគេ​ដែរ ។ កាលដែល​យុវវ័យ​ទទួល​អារម្មណ៍​នៃ​សេចក្ដី​ស្រឡាញ់ និង​ការទុកចិត្ត​របស់​បងប្អូន កាលដែល​ដែល​បងប្អូន​លើក​ទឹកចិត្ត និង​បង្រៀន​ពួកគេ​ពី​របៀប​ដើម្បី​ដឹកនាំ—ហើយ​បន្ទាប់​មក​ចេញ​ពី​ផ្លូវ​របស់​ពួកគេ—នោះ​ពួកគេ​នឹង​ធ្វើ​ឲ្យ​បងប្អូន​ស្ងើច​ជាមួយ​នឹង​ការយល់ដឹង សមត្ថភាព និង​ការតាំងចិត្ត​របស់​ពួកគេ​ចំពោះ​ដំណឹងល្អ ។៣៤ ពួកគេ​នឹង​ទទួល​អារម្មណ៍​ពី​អំណរ​នៃ​ការជ្រើសរើស​ដើម្បី​ចូលរួម និង​ការលះបង់​សម្រាប់​បុព្វហេតុ​នៃ​ព្រះគ្រីស្ទ ។ ដំណឹងល្អ​របស់​ទ្រង់​នឹង​កាន់តែ​ជ្រួតជ្រាប​យ៉ាង​ជ្រាលជ្រៅ​ទៅក្នុង​ដួងចិត្ត​ពួកគេ ហើយ​កិច្ចការ​នេះ​នឹង​ឈាន​ឆ្ពោះ​ទៅមុខ​ក្នុង​របៀប​ដ៏​មហស្ចារ្យ ។

ការសន្យា និង​ទីបន្ទាល់

ខ្ញុំ​សូម​សន្យា​ថា​កាលដែល​យើង​ផ្ដោត​ទៅលើ​គោលការណ៍​ទាំងនេះ—គឺ​ចំណងទាក់ទង វិវរណៈ សិទ្ធិជ្រើសរើស ការប្រែចិត្ត និង​ការលះបង់—ដំណឹងល្អ​របស់​ព្រះយេស៊ូវគ្រីស្ទ​នឹង​ជ្រួតជ្រាប​កាន់តែ​ជ្រាលជ្រៅ​ទៅក្នុង​ដួងចិត្ត​យើង​ទាំងអស់​គ្នា ។ យើង​នឹង​ឃើញ​ការស្ដារ​ឡើងវិញ​ឈាន​ឆ្ពោះ​ទៅ​មុខ​ទៅកាន់​គោលបំណង​ដ៏​ខ្ពស់​បំផុត​របស់​វា គឺ​ការប្រោសលោះ​វង្សអ៊ីស្រាអែល និង​ការស្ថាបនា​ក្រុង​ស៊ីយ៉ូន៣៥ ដែល​ជា​ទីកន្លែង ដែល​ព្រះគ្រីស្ទ​នឹង​គ្រងរាជ​ជា​ស្តេច ។

ខ្ញុំ​សូម​ថ្លែង​ទីបន្ទាល់​ថា ព្រះ​បន្ត​ធ្វើ​កិច្ចការ​ទាំងអស់​ដែល​ចាំបាច់ ដើម្បី​រៀបចំ​រាស្ត្រ​របស់​ទ្រង់​សម្រាប់​ថ្ងៃ​នោះ ។ សូម​ឲ្យ​យើង​មើល​ឃើញ​ព្រះហស្ដ​របស់​ទ្រង់​នៅក្នុង​កិច្ចការ​នេះ កាលដែល​យើង​ទាំងអស់​គ្នា​ពុះពារ​ដើម្បី « មករក​ព្រះគ្រីស្ទ ហើយ​ឲ្យ​បាន​ល្អ​ឥតខ្ចោះ​ក្នុង​ទ្រង់ » ។៣៦ នៅក្នុង​ព្រះនាម​នៃ​ព្រះយេស៊ូវ​គ្រីស្ទ អាម៉ែន ៕