Magmatinud-anon, Dili ang Kawalay Pagtuo
Kita kinahanglan gayud nga mogahin og panahon sa matag adlaw aron mobiya gikan sa pagkakalibutanon ug mokonektar sa langit.
Dili pa lang dugay mimata ko ug nangandam sa pagtuon sa mga kasulatan. Gipunit nako akong smartphone ug milingkod sa lingkuranan tupad sa akong katre, sa tumong nga moabli sa Gospel Library app. Akong gi-unlock akong telepono ug sa dihang magtuon na nakakita ko og tunga sa dosena nga notification alang sa mensahe sa text ug mga email nga nangabut pagkagabii. Naghunahuna ko nga, “susihon lang nakog kadali kadtong mga mensahe, ug magtuon na dayon sa kasulatan.” Nah, milapas nang duha ka oras nagbasa lang gihapon ko sa mga mensahe sa text, mga email, mugbong mga balita, ug mga post sa social media. Sa dihang nakaamgo ko unsa na kadtong orasa, nagkabuang nako sa pagdali-dali og pagpangandam alang nianang adlawa. Nianang buntaga nakapalta ko sa pagtuon sa kasulatan, ug agig sangputanan wala koy espiritwal nga pag-alima nga akong gilauman.
Espiritwal nga Pag-alima
Sigurado ako nga kadaghanan kaninyo nakasinati og sama niana. Ang modernong mga teknolohiya makapanalangin kanato sa daghang mga paagi. Makakonektar kini nato uban sa atong mga higala ug pamilya, sa impormasyon, ug sa mga balita mahitungod sa kasamtangang panghitabo sa tibuok kalibutan. Hinoon, makabalda usab kini kanato gikan sa labing importante nga koneksyon: ang atong koneksyon sa langit.
Akong usbon unsay gisulti sa atong propeta, si Presidente Russell M. Nelson: “Nagpuyo kita sa kalibutan nga komplikado ug nagka-anam ka mabingkilon. Ang padayon nga paggamit sa social media ug ang 24 oras nga mga balita naghan-ok kanato og walay hunong nga mga mensahe. Kon gusto kitang makaangkon og paglaum nga makaayag sa daghang mga opinyon ug sa mga pilosopiya sa katawhan nga nag-atake sa kamatuoran, kinahanglan makakat-on kita sa pagdawat og pagpadayag.”
Mitudlo si Presidente Russell M. Nelson, “Sa umaabut nga mga adlaw, dili na posible ang espirituhanong pagsugakod kon wala ang paggiya, pagdumala, paghupay, ug makanunayon nga impluwensya sa Espiritu Santo.”1
Mga tuig nang milabay, si Presidente Boyd K. Packer misugilon kabahin sa panon sa mga osa nga, tungod sa baga nga pag-snow, natanggong sa gawas sa natural niini nga pinuy-anan ug nag-atubang og posible nga pagkalaming. Daghang buotan nga mga tawo, naningkamot sa pagluwas sa osa, nagdiskarga og puno sa trak nga dagami diha sa palibut—dili man kadto maoy sagad nga kaunon sa osa, apan milaum sila nga maayo nalang nga makalahutay ang osa sa tingtugnaw. Subo lang, nga kadaghanan sa mga osa nakaplagan nga nangamatay. Nangaon tuod sila sa dagami, apan wala kini nakaalima kanila, ug sila nalaming hangtud namatay nga puno ang tiyan.2
Kadaghanan sa mga mensahe nga gipangbato ngari kanato sa panahon sa impormasyon mao ang espiritwal nga tugbang sa pagpakaon sa osa—makakaon ta sa tibuok adlaw, apan dili kini moalima kanato.
Asa man nato makaplagi ang tinuod nga pag-alima? Kadaghanan, dili mao ang unsay uso diha sa social media. Ato kining makit-an kon kita “mopadayon sa [atong] dalan ngadto sa unahan” sa dalan sa pakigsaad, “padayon nga maggunit sa gunitanan nga puthaw,” ug mokaon sa bunga sa kahoy sa kinabuhi.3 Kini nagpasabut nga kita kinahanglan gayud nga motuyo sa paggahin og panahon sa matag adlaw sa pagbiya gikan sa pagkakalibutan ug mokonektar sa langit.
Sa iyang damgo, nakita ni Lehi ang mga tawo kinsa mikaon sa bunga apan dayon mibiya niini tungod sa impluwensya sa dako ug lapad nga gambalay, ang garbo sa kalibutan.4 Posible kini alang sa batan-ong katawhan nga magdako diha sa panimalay sa Santos sa Ulahing mga adlaw, motambong sa tanang mga miting ug mga klase sa Simbahan, gani moapil sa mga ordinansa sa templo, ug dayon mobiya “ngadto sa gidili nga dalan ug [dayon] nangawala”5 Nganong mahitabo man kini? Sa kasagaran ang hinungdan niini mao nga, samtang sila minunot sa panon sa espiritwalidad, wala gayud sila makabig sa tinud-anay. Gipakaon sila apan wala gialima.
Sa pagtandi, nakahimamat ko sa kadaghanan kaninyo mga batan-ong Santos sa ulahing mga Adlaw kinsa mga maalam, lig-on ug matinud-anon. Kamo nasayud nga mga anak kamo sa Dios ug nga Siya adunay ipabuhat kaninyo. Kamo mohigugma sa Dios sa tibuok ninyo nga “kasingkasing, gahum, hunahuna ug kusog.”6 Motuman sa inyong mga pakigsaad ug moserbisyo sa uban, sugod sa panimalay. Mopakita og hugot nga pagtuo, maghinulsol, ug mopalambo sa matag adlaw, ug kini maghatud og malungtaron nga kalipay. Nangandam kamo alang sa mga panalangin sa templo ug sa ubang mga oportunidad nga inyong maangkon isip mga tinuod nga sumusunod sa Manluluwas. Ug kamo nagtabang sa pag-andam sa kalibutan alang sa Ikaduha nga Pag-anhi, nagdapit sa uban sa pagduol kang Kristo ug modawat sa mga panalangin sa Iyang Pag-ula. Konektado kamo sa langit.
Oo, kamo nag-atubang og mga hagit. Apan mao usab ang matag henerasyon. Kini mao ang atong panahon, ug kita kinahanglan nga magmatinud-anon, dili kawalay pagtuo. Mopamatuod ko nga ang Ginoo nasayud sa atong mga hagit, ug pinaagi sa pagpangulo ni Presidente Nelson, Siya miandam kanato sa pagsugat kanila. Motuo ako nga ang bag-ong panawagan sa propeta alang sa nakasentro sa panimalay nga Simbahan, inabagan sa unsay atong gihimo diha sa atong mga gambalay,7 gidisenyo sa pagtabang kanato sa paglahutay—gani sa paglambo—niining panahon sa espirituwal nga malnutrisyon.
Nakasentro sa Panimalay
Unsa ang gipasabut nga mahimong nakasentro sa panimalay nga simbahan? Ang mga panimalay mahimong lahi na kaayo sa tibuok kalibutan. Mahimong nahisakop kamo sa usa ka pamilya kinsa diha na sa Simbahan sulod sa daghang henerasyon. O tingali ikaw lang ang miyembro sa Simbahan diha sa imong pamilya. Tingali minyo ka o dili pa minyo, nga dunay kauban nga bata o nag-inusara sa panimalay.
Bisan pa sa inyong kahimtang, makahimo kamo sa inyong panimalay nga maoy sentro sa pagkat-on sa ebanghelyo ug pagpakabuhi. Yano kining nagpasabut sa pagdawat og personal nga responsibilidad alang sa inyong pagkakabig ug espiritwal nga paglambo. Nagpasabut kini sa pagsunod sa tambag ni Presidente Nelson “sa pagbag-o sa inyong panimalay ngadto sa usa ka santuwaryo sa pagtuo.”8
Ang kaaway mosulay sa pag-dani kaninyo nga wala kinahanglana ang espiritwal nga pag-alima o, sa mas maliputon nga paagi, nga kini makahulat ra. Siya ang agalon sa pagbalda ug tigpasiugda sa pag-unya-unya. Siya modala sa mga butang nga ingon og dinalian, apan sa pagkatinuod, dili ingon ka importante. Gusto siya nga mahimo kang “malibog ug nagkapuliki sa daghang mga butang” nga imong gibaliwala ang “usa ka butang [nga] gikinahanglan.”9
Pagkamapasalamaton nako sa akong “mga matarung nga ginikanan,”10 kinsa mibuhi sa ilang pamilya diha sa panimalay nga makanunayon ang espiritwal nga pag-alima, mahigugmaong mga relasyon, ug makalingaw nga mga kalihokan. Ang mga pagtulun-an nga ilang gihatag sa akong kabatan-on maoy kinamaayohan para nako. Mga ginikanan, palihug lig-una ang mga relasyon uban sa inyong mga anak. Nagkinahanglan sila og dugang sa inyong panahon, dili minus.
Gisuportahan sa Simbahan
Kon kamo mobuhat, ang Simbahan anaa aron mosuporta ninyo. Ang atong mga kasinatian sa simbanan makapalig-on sa espiritwal nga pag-alima nga mahitabo sa panimalay. Hangtud niining tuig, nakita nato kining matang nga suporta sa Simbahan diha sa Sunday School ug sa Primary. Makakita pa kita og mas daghan niini diha sa Aaronic nga Pagkapari ug sa mga miting sa Young Women usab. Sugod sa Enero, ang kurikulum alang niini nga mga miting dunay gamay nga kausaban. Tutokan gihapon niini ang mga hilisgutan sa ebanghelyo, apan kadtong mga hilisgutan gipahiuyon sa Dali, Sunod Kanako—Alang sa mga Indibidwal ug mga Pamilya. Gamay ra kini nga kausaban, apan makahimo kini og dakong epekto sa espiritwal nga pag-alima sa kabatan-onan.
Unsa pay laing matang sa suporta ang gihatag sa Simbahan? Sa Simbahan moambit kita sa sakramento, nga makatabang kanato sa pag-establisar sa atong pasalig ngadto sa manluluwas matag semana. Ug sa Simbahan magpundok kita uban sa laing mga tumutuo kinsa nakahimo og samang pakigsaad. Ang mahigugmaon nga mga relasyon nga atong gipalambo uban sa isig ka disipulo ni Jesukristo mahimong usa ka gamhanang abag sa atong nakasentro sa panimalay nga pagkadisipulo.
Sa 14 pa ko, ang akong pamilya mibalhin sa bag-ong kasilinganan. Karon, kini mahimong dili ingon niana ka makapaguol diha ninyo, apan sa akong hunahuna, nianang higayuna, makahugno kadto. Nagpasabut kini nga mapalibutan sa mga tawo nga wala ko kaila. Nagpasabut kini nga ang ubang mga young men sa akong ward lahi na ang ilang tambongan nga eskwelahan kay sa nako. Sa akong 14-anyos nga panghunahuna, nakaingon ko, “nganong nahimo man kini sa akong ginikanan ngari nako?” Pamati nako nga daw naguba na ang akong kinabuhi.
Hinoon, pinaagi sa among mga kalihokan sa Young Men, nakapalig-on ko og mga relasyon uban sa laing mga sakop sa akong korum, ug sila nahimo nakong mga higala. Dugang pa, ang mga sakop sa bishopric ug mga tigtambag sa Aaronic nga Pagkapari misugod sa pagka-intersado sa akong kinabuhi. Mitambong sila sa akong mga kalihokan sa pagka-atleta. Misulat sila nako og mga makapadasig nga sulat nga akong gitipigan hangtud karon. Mipadayon sila sa pakigsulat kanako human sa kolehiyo ug sa dihang mibiya ko para sa misyon. Ang usa nila misugat pa gani nako sa airport sa dihang nauli nako. Hangtud sa hangtud ko nga mapasalamaton niining maayo nga mga igsoon ug sa ilang kombinasyon sa gugma ug sa taas nga gilauman. Sila mitudlo kanako padulong sa langit, ug ang kinabuhi nadan-agan, malipayon ug alegre.
Unsaon man nato, isip mga ginikanan ug mga lider sa pagtabang sa mga kabatan-onan nga masayud nga sila wala nag-inusara samtang sila nagsubay sa dalan sa pagkigsaad? Agig dugang sa paglig-on sa personal nga mga relasyon, ato silang dapiton sa pagpundok sa dinagko ug sa ginagmay—gikan sa mga komperensya sa Alang sa Kalig-on sa mga Kabatan-onan ug sa mga youth camps hangtud sa senimana nga korum o mga kalihokan sa klase. Ayaw gayud ipakaubos ang kalig-on nga maggikan sa panagpundok sa pagbarug sa uban kinsa naningkamot usab nga molig-on. Mga bishop ug ubang mga lider, palihug tutuki ang pag-alima sa mga bata ug mga kabatan-onan sa inyong ward. Nagkinahanglan sila og dugang sa inyong panahon, dili minus.
Ma-lider ka man, usa ka silingan, usa ka sakop sa korum, o yanong isig ka Santos, kon duna kay oportunidad sa pagtandog sa kinabuhi sa batan-on, tabangi siya nga makonektar sa langit. Ang imong impluwensya lagmit eksakto nga “abag sa Simbahan” nga gikinahanglan sa batan-on.
Mga kaigsoonan, ako mopamatuod, nga si Jesukristo mao ang pangulo niining Simbahan. Nagdasig Siya sa atong mga lider ug naggiya kanato sa espiritwal nga pag-alima nga atong gikinahanglan aron mabuhi ug molahutay sa ulahing mga adlaw. Kana nga espiritwal nga pag-alima motabang kanato nga magmatinud-anon ug dili kawalay pagtuo. Sa ngalan ni Jesukristo, amen.