សូមមើលទៅព្រះយេស៊ូវគ្រីស្ទ

ដោយអែលឌើរ គីម ប៊ី ក្លាក

ក្នុងពួកចិតសិបនាក់

ប្រសិនបើយើងមើលទៅព្រះយេស៊ូវគ្រីស្ទ នោះទ្រង់នឹងជួយយើងឲ្យរស់នៅតាមសេចក្ដីសញ្ញារបស់យើង ហើយតម្កើងការហៅរបស់យើងជាពួកអែលឌើរក្នុងអ៊ីស្រាអែល ។

កាលព្រះយេស៊ូវយាងដើរលើផ្លូវមួយជិតស្រុកកាពើណិម^១ ដោយមានមនុស្សកុះករព័ទ្ធជុំវិញទ្រង់ នោះមានស្ត្រីម្នាក់ដែលបានរងទុក្ខដែលមានជំងឺធ្ងន់ធ្ងរអស់រយៈពេល ១២ ឆ្នាំបានឈោងទៅប៉ះនឹងជាយព្រះពស្ត្ររបស់ទ្រង់ ។ រំពេចនោះ គាត់បានជាសះស្បើយ ។^២

បទគម្ពីរកត់ត្រាថា ព្រះយេស៊ូវដោយដឹងថា « ថា [ ព្រះចេស្ដា ] ចេញផ្សាយពី [ ទ្រង់ ] »^៣ « ងាកបែរព្រះអង្គក្នុងហ្វូងមនុស្ស »^៤ ហើយ « ទត …រកអ្នកណាដែលបានធ្វើការនោះ » ។^៥ « កាលស្ត្រីនោះបានឃើញថា លាក់ខ្លួនមិនកំបាំងទេ »^៦ នោះគាត់ « ទម្លាក់ខ្លួនក្រាបចុះនៅចំពោះទ្រង់ ទូលតាមត្រង់ទាំងអស់ » ។^៧

ព្រះយេស៊ូវបានមានព្រះបន្ទូលទៅគាត់ថា « កូនស្រីអើយ ដ្បិតសេចក្តីជំនឿនាងបានសង្គ្រោះនាងហើយ ចូរទៅដោយសុខសាន្តចុះ » ។^៨

ព្រះយេស៊ូវគ្រីស្ទបានសង្គ្រោះស្ត្រីនោះ ។ គាត់ត្រូវបានព្យាបាលខាងសាច់ឈាម ប៉ុន្តែនៅពេលព្រះយេស៊ូវបានងាកមករកគាត់ គាត់បានប្រកាសសេចក្ដីជំនឿរបស់គាត់លើទ្រង់ ហើយទ្រង់បានព្យាបាលដួងចិត្តរបស់គាត់ ។^៩ ទ្រង់បានមានបន្ទូលទៅគាត់ដោយសេចក្ដីស្រឡាញ់ ដោយអះអាងចំពោះគាត់នូវការអនុមតិរបស់ទ្រង់ ហើយបានប្រទានពរគាត់ជាមួយនឹងសេចក្ដីសុខសាន្តរបស់ទ្រង់ ។^១០

បងប្អូនប្រុស ក្នុងនាមជាអ្នកកាន់បព្វជិតភាពដ៏បរិសុទ្ធ យើងបានចូលប្រឡូកនៅក្នុងកិច្ចការនៃសេចក្ដីសង្គ្រោះ ។ នៅឆ្នាំមុន ព្រះអម្ចាស់បានប្រទានការទទួលខុសត្រូវដ៏ចម្បងសម្រាប់កិច្ចការនេះដល់ពួកអែលឌើរក្នុងអ៊ីស្រាអែល ។^១១ យើងមានការបង្គាប់ដ៏បំផុសគំនិតមួយមកពីព្រះអម្ចាស់—ដោយធ្វើការជាមួយនឹងពួកបងប្អូនស្រីរបស់យើង នោះយើងត្រូវធ្វើការងារបម្រើតាមរបៀបដ៏បរិសុទ្ធជាងមុន ពន្លឿនការប្រមូលផ្ដុំនៃអ៊ីស្រាអែលនៅសងខាងនៃវាំងនន ស្ថាបនាគេហដ្ឋានរបស់យើងជាជម្រកនៃសេចក្ដីជំនឿ និងការរៀនសូត្រដំណឹងល្អ ហើយរៀបចំពិភពលោកនេះសម្រាប់ការយាងមកជាលើកទីពីររបស់ព្រះយេស៊ូវគ្រីស្ទ ។^១២

ដូចជាព្រះអង្គសង្គ្រោះបានបង្ហាញយើងពីរបៀបនោះគ្រប់រឿងទាំងអស់ថា យើងចាំបាច់ត្រូវមើលទៅ ហើយបម្រើព្រះយេស៊ូវគ្រីស្ទ ដូចជាទ្រង់បានមើលទៅ ហើយបម្រើព្រះវរបិតារបស់ទ្រង់ដែរ ។^១៣ ព្រះអង្គសង្គ្រោះបានមានបន្ទូលពីការណ៌នោះតាមរបៀបនេះទៅកាន់ព្យាការីយ៉ូសែបថា ៖

« ចូរមើលមកឯយើងដោយនូវគ្រប់ទាំងគំនិត ចូរកុំសង្ស័យ កុំខ្លាចឡើយ ។

« ចូរមើលស្នាមទាំងឡាយដែលនៅចំហៀងយើង ហើយព្រមទាំងស្នាមដែកគោលនៅដៃ និងជើងរបស់យើងចុះ ចូរមានចិត្តស្មោះត្រង់ កាន់តាមបញ្ញត្តិទាំងឡាយរបស់យើង នោះអ្នករាល់គ្នានឹងគ្រងនគរស្ថានសួគ៌ទុកជាមរតក » ។^១៤

នៅក្នុងជីវិតមុនឆាកជីវិតនេះ ព្រះយេស៊ូវបានសន្យានឹងព្រះវរបិតារបស់ទ្រង់ថា ទ្រង់នឹងធ្វើតាមព្រះទ័យរបស់ព្រះវរបិតានៃទ្រង់ ព្រមទាំងជាព្រះអង្គសង្គ្រោះ និងព្រះប្រោសលោះរបស់យើង ។ នៅពេលព្រះវរបិតារបស់ទ្រង់ទូលសួរថា « តើយើងនឹងចាត់អ្នកណា ? » ^១៥ ព្រះយេស៊ូវមានបន្ទូលតបដូចនេះ ៖

« ទូលបង្គំនៅឯណេះហើយ សូមចាត់ទូលបង្គំចុះ^១៦។

« ព្រះវរបិតាអើយ សូមឲ្យព្រះហឫទ័យរបស់ព្រះអង្គបានសម្រេច ហើយសូមឲ្យសិរីល្អរបស់ព្រះអង្គបានជារបស់ផងព្រះអង្គរហូត » ។^១៧

នៅក្នុងជីវិតរមែងស្លាប់របស់ទ្រង់ ព្រះយេស៊ូវបានរស់នៅតាមការសន្យានោះ ។ ទ្រង់បានបង្រៀនគោលលទ្ធិរបស់ព្រះវរបិតាទ្រង់ ហើយបានធ្វើកិច្ចការរបស់ព្រះវរបិតាទ្រង់ដោយព្រះចេស្ដា និងសិទ្ធិអំណាចដែលព្រះវរបិតាទ្រង់បានប្រទានចំពោះទ្រង់ នៅក្នុងភាពរាបសា ភាពស្លូតបូត និងសេចក្ដីស្រឡាញ់ ។^១៨

ព្រះយេស៊ូវបានប្រទានដួងចិត្តរបស់ទ្រង់ថ្វាយព្រះវរបិតាទ្រង់ ។ ទ្រង់បានមានបន្ទូលថា ៖

« ខ្ញុំស្រឡាញ់ដល់ទ្រង់ ។^១៩

ខ្ញុំចេះតែធ្វើការដែលគាប់ដល់ព្រះហឫទ័យទ្រង់ជាដរាប ។^២០

ខ្ញុំបាន…មក មិនមែននឹងធ្វើតាមចិត្តខ្ញុំទេ គឺតាមបំណងព្រះហឫទ័យនៃ [ ព្រះវរបិតា ] វិញ ដែលទ្រង់ចាត់ឲ្យខ្ញុំមក » ។^២១

ក្នុងការរងទុក្ខនៅសួនច្បារគែតសេម៉ានី ទ្រង់បានអធិស្ឋានថា « កុំតាមទូលបង្គំឡើយ សូមតាមតែព្រះហឬទ័យទ្រង់វិញ » ។^២២

នៅពេលព្រះអម្ចាស់អំពាវនាវឲ្យពួកអែលឌើរក្នុងអ៊ីស្រាអែលឲ្យ « មើលមកឯយើងដោយនូវគ្រប់ទាំងគំនិត » និង « មើលស្នាមទាំងឡាយ » នៅក្នុងព្រះកាយរបស់ទ្រង់ដែលមានព្រះជន្មរស់ឡើងវិញ វាគឺជាការអំពាវនាវមួយឲ្យងាកចេញឆ្ងាយពីអំពើបាប និងពិភពលោកនេះ ហើយត្រឡប់មករកទ្រង់ ព្រមទាំងស្រឡាញ់ ហើយគោរពប្រតិបត្តិតាមទ្រង់ ។ វាគឺជាការអំពាវនាវមួយដើម្បីបង្រៀនពីគោលលទ្ធិរបស់ទ្រង់ ហើយធ្វើកិច្ចការរបស់ទ្រង់តាមរបៀបរបស់ទ្រង់ ។ ដូច្នេះហើយ វាគឺជាការអំពាវនាវមួយដើម្បីទុកចិត្តទាំងស្រុងទៅលើទ្រង់ ថ្វាយឆន្ទៈរបស់យើង ហើយបង្វែរដួងចិត្តរបស់យើងទៅរកទ្រង់ ហើយតាមរយៈព្រះចេស្ដាដ៏ប្រោសលោះរបស់ទ្រង់ប្រែក្លាយកាន់តែដូចជាទ្រង់ ។^២៣

បងប្អូនប្រុស ប្រសិនបើយើងមើលទៅព្រះយេស៊ូវគ្រីស្ទ នោះទ្រង់នឹងប្រទានពរយើងឲ្យក្លាយជាពួកអែលឌើរ របស់ទ្រង់ ក្នុងអ៊ីស្រាអែល—រាបសា ស្លូតបូត ងាយប្រដៅ ពេញដោយសេចក្ដីស្រឡាញ់របស់ទ្រង់ ។^២៤ ហើយយើងនឹងនាំយកសេចក្ដីអំណរ និងពរជ័យនៃដំណឹងល្អ និងសាសនាចក្ររបស់ទ្រង់ដល់ក្រុមគ្រួសាររបស់យើង ព្រមទាំងបងប្អូនប្រុសស្រីរបស់យើងនៅសងខាងនៃវាំងនន ។

ប្រធាន រ័សុល អិម ណិលសុន បានអំពាវនាវឲ្យយើងមើលទៅព្រះយេស៊ូវគ្រីស្ទតាមរបៀបដូចគ្នានេះថា ៖ « គ្មានអ្វីដែលងាយស្រួល ឬដោយស្វ័យប្រវត្តិអំពីការប្រែក្លាយជាពួកសិស្សដ៏មានឥទ្ធិពលបែបនោះទេ ។ ការផ្ដោតរបស់យើងត្រូវតែផ្អែកយ៉ាងរឹងមាំទៅលើព្រះអង្គសង្គ្រោះ និងដំណឹងល្អរបស់ទ្រង់ ។ វាតម្រូវឲ្យមានការខិតខំខាងសតិអារម្មណ៍យ៉ាងខ្លាំងដើម្បីមើលទៅទ្រង់ គ្រប់ គំនិត ។ ប៉ុន្តែនៅពេលដែលយើងធ្វើវាបាន នោះភាពសង្ស័យ និងការភ័យខ្លាចរបស់យើងនឹងរលត់បាត់អស់ » ។^២៥

ពាក្យភ្ជាប់ គឺជាពាក្យដ៏អស្ចារ្យមួយ ។ វាមានន័យថា ការធ្វើឲ្យមានសុវត្ថិភាពយ៉ាងរឹងមាំ ការទាញ ហើយសង្កត់ឲ្យជាប់ទាំងស្រុង ។^២៦ យើងភ្ជាប់ការផ្ដោតរបស់យើងលើព្រះយេស៊ូវគ្រីស្ទ និងដំណឹងល្អរបស់ទ្រង់តាមរយៈការរស់នៅតាមសេចក្ដីសញ្ញារបស់យើង ។

នៅពេលយើងរស់នៅតាមសេចក្ដីសញ្ញារបស់យើង វាជះឥទ្ធិពលដល់អ្វីៗគ្រប់យ៉ាងដែលយើងនិយាយ និងធ្វើ ។ យើងរស់នៅក្នុងជីវិតនៃសេចក្ដីសញ្ញាមួយ^២៧ ពោរពេញដោយសកម្មភាពនៃសេចក្ដីជំនឿដ៏សាមញ្ញជារៀងរាល់ថ្ងៃ ដែលធ្វើឲ្យយើងផ្តោតលើព្រះយេស៊ូវគ្រីស្ទ ៖ ការអធិស្ឋានចេញពីចិត្តនៅក្នុងព្រះនាម របស់ទ្រង់  ការទទួលទានបន្ទូល របស់ទ្រង់ ការងាកទៅរក ទ្រង់ ដើម្បីប្រែចិត្តពីអំពើបាបរបស់យើង ការរក្សាបទបញ្ញត្តិ របស់ទ្រង់ ការទទួលទានសាក្រាម៉ង់ និងការរក្សាថ្ងៃឈប់សម្រាក របស់ទ្រង់ ឲ្យបរិសុទ្ធ ការថ្វាយបង្គំនៅក្នុងព្រះវិហារបរិសុទ្ធ របស់ទ្រង់ ឲ្យបានញឹកញាប់តាមដែលយើងអាចធ្វើបាន និងការអនុវត្តបព្វជិតភាពដ៏បរិសុទ្ធ របស់ទ្រង់ ដើម្បីបម្រើបុត្រាបុត្រីរបស់ព្រះ ។

ទង្វើនៃការលះបង់ខាងសេចក្ដីសញ្ញាទាំងនេះបើកដួងចិត្ត និងគំនិតរបស់យើងទៅរកព្រះចេស្ដាដ៏ប្រោសលោះរបស់ព្រះអង្គសង្គ្រោះ និងព្រះចេស្ដាបន្សុទ្ធនៃព្រះវិញ្ញាណបរិសុទ្ធ ។ មួយបន្ទាត់ម្តងៗ ព្រះអង្គសង្គ្រោះផ្លាស់ប្ដូរនិស្ស័យរបស់យើង យើងកាន់តែមានការប្រែចិត្តជឿយ៉ាងជ្រាលជ្រៅចំពោះទ្រង់ ហើយសេចក្ដីសញ្ញារបស់យើងមានភាពរស់រវើកនៅក្នុងដួងចិត្តរបស់យើង ។^២៨

ការសន្យាដែលយើងធ្វើចំពោះព្រះវរបិតាសួគ៌នៃយើងក្លាយជាការតាំងចិត្តដ៏រឹងមាំ ជាបំណងប្រាថ្នាដ៏ស៊ីជម្រៅបំផុតរបស់យើង ។ ការសន្យារបស់ព្រះវរបិតាសួគ៌ចំពោះយើងធ្វើឲ្យយើងពោរពេញដោយអំណរគុណ និងអំណរ ។^២០ សេចក្ដីសញ្ញារបស់យើងឈប់ក្លាយជាច្បាប់ដែលយើងធ្វើតាម ហើយក្លាយជាគោលការណ៍ដ៏គួរឲ្យស្រឡាញ់ដែលបំផុស ហើយដឹកនាំយើង ព្រមទាំងភ្ជាប់ការផ្ដោតរបស់យើងលើព្រះយេស៊ូវគ្រីស្ទ ។^៣០

ទង្វើនៃការលះបង់ទាំងនេះមានចំពោះមនុស្សទាំងអស់ ទាំងចាស់ទាំងក្មេង ។ ក្មួយៗដែលជាយុវជនកាន់បព្វជិតភាពអើរ៉ុន អ្វីៗគ្រប់យ៉ាងដែលខ្ញុំបាននិយាយនៅរាត្រីនេះអនុវត្តចំពោះក្មួយៗដែរ ។ ខ្ញុំសូមអរគុណព្រះចំពោះក្មួយៗ ។ ក្មួយៗធ្វើឲ្យពិធីបរិសុទ្ធ និងសេចក្ដីសញ្ញាពិសិដ្ឋៗកើតមានចំពោះពួកបរិសុទ្ធថ្ងៃចុងក្រោយរាប់លាននាក់រៀងរាល់សប្ដាហ៍ ។ នៅពេលក្មួយរៀបចំ ប្រសិទ្ធពរ ឬចែកសាក្រាម៉ង់ ធ្វើការងារបម្រើ ជ្រមុជទឹកក្នុងព្រះវិហារបរិសុទ្ធ អញ្ជើញមិត្តម្នាក់មកសកម្មភាពមួយ ឬសង្គ្រោះសមាជិកម្នាក់ក្នុងកូរ៉ុមរបស់ក្មួយ នោះក្មួយកំពុងធ្វើកិច្ចការនៃសេចក្ដីសង្គ្រោះ ។ ក្មួយក៏អាចមើលទៅព្រះយេស៊ូវគ្រីស្ទ ហើយរស់នៅតាមសេចក្ដីសញ្ញារបស់ក្មួយរៀងរាល់ថ្ងៃបានដែរ ។ ខ្ញុំសូមសន្យានឹងក្មួយៗថា ប្រសិនបើក្មួយធ្វើការណ៍នោះ ក្មួយនឹងក្លាយជាអ្នកបម្រើរបស់ព្រះដែលបានទុកចិត្តនៅពេលនេះ និងជាពួកអែលឌើរដ៏ខ្លាំងក្លាក្នុងអ៊ីស្រាអែលនៅថ្ងៃខាងមុខ ។

បងប្អូនប្រុស ខ្ញុំដឹងថា រឿងទាំងនេះប្រហែលជាស្ដាប់ទៅគួរឲ្យខ្លាច ។ ប៉ុន្តែសូមចងចាំបន្ទូលទាំងនេះរបស់ព្រះអង្គសង្គ្រោះថា « ខ្ញុំមិននៅតែឯកឯងទេ គឺមានព្រះវរបិតាគង់ជាមួយនឹងខ្ញុំដែរ » ។^៣១ វាក៏អនុវត្តដូចគ្នាចំពោះយើងដែរ ។ យើងពុំបាននៅតែឯងទេ ។ ព្រះអម្ចាស់ព្រះយេស៊ូវគ្រីស្ទ និងព្រះវរបិតាសួគ៌របស់យើងស្រឡាញ់យើង ហើយពួកទ្រង់គង់នៅជាមួយយើង ។^៣២ ដោយសារព្រះយេស៊ូវបានមើលទៅព្រះវរបិតារបស់ទ្រង់ ហើយបានបំពេញពលិកម្មធួនដ៏ធំនោះ យើងអាចមើលទៅព្រះយេស៊ូវគ្រីស្ទដោយមានការធានាអះអាងថា ទ្រង់នឹងជួយយើង ។

យើងគ្រប់គ្នាពុំល្អឥតខ្ចោះនោះទេ ។ ពេលខ្លះយើងជាប់គាំង។ យើងមានការអូសទាញ ឬការបាក់ទឹកចិត្ត ។ យើងមានកំហុស ។ ប៉ុន្តែប្រសិនបើយើងមើលទៅព្រះយេស៊ូវគ្រីស្ទដោយដួងចិត្តកែប្រែមួយ នោះទ្រង់នឹងលើកយើងឡើង សម្អាតយើងពីអំពើបាប អភ័យទោសយើង ហើយព្យាបាលដួងចិត្តរបស់យើង ។ ទ្រង់មានព្រះទ័យល្អ ហើយអត់ធ្មត់ សេចក្ដីស្រឡាញ់ដ៏ប្រោសលោះរបស់ទ្រង់គ្មានទីបញ្ចប់ ហើយពុំដែលបាត់បង់ឡើយ ។^៣៣ ទ្រង់នឹងជួយយើងឲ្យរស់នៅតាមសេចក្ដីសញ្ញារបស់យើង ហើយតម្កើងការហៅរបស់យើងជាពួកអែលឌើរក្នុងអ៊ីស្រាអែល ។

ហើយព្រះវរបិតានឹងប្រទានពរយើងនូវអ្វីៗគ្រប់យ៉ាងដែលចាំបាច់ដើម្បីសម្រេចព្រះរាជបំណងរបស់ទ្រង់ ៖ « គ្រប់…ទាំងនៅលើស្ថានសួគ៌ និងនៅលើផែនដីផង ឯជីវិត និងពន្លឺ ព្រះវិញ្ញាណ និងព្រះចេស្ដា ត្រូវបានចាត់ឲ្យមកដោយសារបំណងព្រះហឫទ័យរបស់ព្រះវរបិតា តាមរយៈព្រះយេស៊ូវគ្រីស្ទ ជាព្រះរាជបុត្រារបស់ទ្រង់ » ។^៣៤

នៅពេលពន្លឺ និងព្រះចេស្ដានៃព្រះចូលមកក្នុងជីវិតរបស់អ្នក នោះរឿងដ៏អស្ចារ្យបីយ៉ាងកើតឡើង ៖

ទីមួយ យើងអាចមើលឃើញ ! តាមរយៈវិវរណៈយើងចាប់ផ្ដើមមើលឃើញដូចដែលព្រះយេស៊ូវបានទតឃើញស្ត្រីម្នាក់នោះ ៖ ហួសពីរូបរាងខាងក្រៅ ហើយចូលទៅក្នុងដួងចិត្ត ។^៣៥ នៅពេលយើងមើលឃើញដូចជាព្រះយេស៊ូវបានទតមើលឃើញ នោះទ្រង់ប្រទានពរយើងឲ្យចេះស្រឡាញ់មនុស្សដែលយើងបម្រើជាមួយនឹងសេចក្ដីស្រឡាញ់របស់ទ្រង់ ។ ដោយមានជំនួយរបស់ទ្រង់ មនុស្សដែលយើងបម្រើនឹងមើលឃើញព្រះអង្គសង្គ្រោះ ហើយទទួលអារម្មណ៍ពីសេចក្ដីស្រឡាញ់របស់ទ្រង់ ។^៣៦

ទីពីរ យើងមានអំណាចបព្វជិតភាព ! យើងមានសិទ្ធិអំណាច និងអំណាចដើម្បីធ្វើកិច្ចការក្នុងព្រះនាមរបស់ព្រះយេស៊ូវគ្រីស្ទ ដើម្បីផ្ដល់ពរជ័យ« ដឹកនាំ ការពារ ពង្រឹង ហើយព្យាបាលអ្នកដទៃ ព្រមទាំងនាំអព្ភូតហេតុដល់អស់អ្នកដែលយើងស្រឡាញ់ ហើយរក្សាអាពាហ៍ពិពាហ៍ និង គ្រួសាររបស់យើងឲ្យមានសុវត្ថិភាព » ។^៣៧

ទីបី ព្រះយេស៊ូវគ្រីស្ទយាងទៅជាមួយនឹងយើង ! ទោះយើងទៅទីណា នោះទ្រង់នឹងយាងទៅជាមួយយើង ។ នៅពេលបង្រៀន នោះទ្រង់បង្រៀន ។ នៅពេលយើងលួងលោមចិត្ត នោះទ្រង់លួងលោមចិត្ត ។ នៅពេលយើងប្រសិទ្ធពរ នោះទ្រង់ប្រទានពរ ។^៣៨

បងប្អូនប្រុស តើយើងគ្មានបុព្វហេតុដែលត្រូវរីករាយទេឬអី ? យើងពិតជាមាន ! យើងកាន់បព្វជិតភាពបរិសុទ្ធរបស់ព្រះ ។ នៅពេលយើងមើលទៅព្រះយេស៊ូវគ្រីស្ទ រស់នៅតាមសេចក្ដីសញ្ញារបស់យើង ហើយភ្ជាប់ការផ្ដោតអារម្មណ៍យើងទៅលើទ្រង់ នោះយើងនឹងចូលរួមជាមួយនឹងបងប្អូនស្រីរបស់យើង ហើយធ្វើការងារបម្រើតាមរបៀបមួយដ៏បរិសុទ្ធជាង ប្រមូលផ្ដុំអ៊ីស្រាអែលដែលខ្ចាត់ព្រាត់នៅសងខាងនៃវាំងនន ពង្រឹង ហើយផ្សារភ្ជាប់ក្រុមគ្រួសាររបស់យើង ហើយរៀបចំពិភពលោកនេះសម្រាប់ការយាងមកជាលើកទីពីររបស់ព្រះអម្ចាស់ព្រះយេស៊ូវគ្រីស្ទ ។ វានឹងកើតឡើង ។ ខ្ញុំសូមថ្លែងទីបន្ទាល់ពីការណ៍នេះ ។

ខ្ញុំសូមបញ្ចប់ជាមួយនឹងការអធិស្ឋានចេញពីដួងចិត្តរបស់ខ្ញុំថា យើងទាំងអស់គ្នា យើងគ្រប់គ្នានឹងមើលទៅព្រះយេស៊ូវគ្រីស្ទនៅគ្រប់គំនិត ។ ចូរកុំសង្ស័យឡើយ ។ ចូរកុំខ្លាចឡើយ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។