យុវនារីនៅក្នុងកិច្ចការ
យុវនារីគ្រប់រូបនៅក្នុងសាសនាចក្រគួរតែមានអារម្មណ៍ថាមានតម្លៃ មានឱកាសជាច្រើនដើម្បីបម្រើ ហើយមានអារម្មណ៍ថានាងមានអ្វីមួយមានតម្លៃដើម្បីបរិច្ចាគនៅក្នុងកិច្ចការនេះ ។
មួយឆ្នាំកន្លងទៅ នៅក្នុងសម័យប្រជុំបព្វជិតភាពទូទៅក្នុងសន្និសីទ ប៊ីស្សព ហ្គែរ៉ល កូសសែ បាននិយាយទៅកាន់បុរសនៅក្នុងសាសនាចក្រ ពិពណ៌នាអំពីរបៀបដែលអ្នកកាន់បព្វជិតភាពអើរ៉ុន និងបព្វជិតភាពមិលគីស្សាដែកគឺជាដៃគូជិតស្និតនៅក្នុងការសម្រេចកិច្ចការនៃសេចក្ដីសង្គ្រោះ ។១ សារលិខិតនោះជាពរជ័យដ៏មហិមាមួយនៅក្នុងការជួយដល់យុវជនដែលកាន់បព្វជិតភាពអើរ៉ុនមើលឃើញចំណែកដែលពួកគេមាននៅក្នុងការស្ថាបនានគររបស់ព្រះនៅលើផែនដីនេះ ។ ការបម្រើរួមគ្នារបស់ពួកគេពង្រឹងដល់សាសនាចក្រ ហើយនាំមកនូវការប្រែចិត្តជឿ និងការតាំងចិត្តកាន់តែមុតមាំនៅក្នុងដួងចិត្តរបស់យុវជនយើង នៅពេលពួកគេមើលឃើញតម្លៃនៃការបរិច្ចាគរបស់ពួកគេ និងសារៈសំខាន់នៃកិច្ចការនេះ ។
ថ្ងៃនេះ ខ្ញុំចង់បន្ថែមការនិយាយរបស់ខ្ញុំទៅលើសារលិខិតនោះ នៅពេលខ្ញុំនិយាយអំពីយុវនារីក្នុងសាសនាចក្រដែលចាំបាច់ និងសំខាន់ដូចគ្នានៅក្នុងការសម្រេចកិច្ចការរបស់ព្រះអម្ចាស់នៅក្នុងក្រុមគ្រួសារ និងនៅក្នុងសាសនាចក្ររបស់ទ្រង់ ។
ក៏ដូចជាប៊ីស្សព កូសសែ ដែរ ខ្ញុំរស់នៅក្នុងសាខាតូចមួយអំឡុងពេលដ៏ល្អនៃយុវវ័យរបស់ខ្ញុំ ហើយជាញឹកញាប់ ខ្ញុំត្រូវបានសុំឲ្យបំពេញការចាត់តាំង និងការហៅដែលជាធម្មតាត្រូវធ្វើដោយមជ្ឈិមវ័យ ។ ឧទាហរណ៍ ពួកយើងដែលនៅក្នុងកម្មវិធីយុវវ័យ ជាញឹកញាប់ជួយរៀបចំ ហើយដឹកនាំសកម្មភាព និងព្រឹត្តការណ៍ពិសេសរបស់យើង ។ ពួកយើងសរសេររឿងសម្ដែង បង្កើតក្រុមចម្រៀងដើម្បីនាំការកម្សាន្ដក្នុងសកម្មភាពសាខា ហើយចូលរួមពេញលេញនៅក្នុងការប្រជុំទាំងអស់ ។ ខ្ញុំត្រូវបានហៅឲ្យធ្វើជាអ្នកដឹកនាំភ្លេងក្នុងសាខា ហើយដឹកនាំការច្រៀងនៅក្នុងការប្រជុំសាក្រាម៉ង់រាល់សប្ដាហ៍ ។ វាជាបទពិសោធន៍ដ៏ល្អចំពោះយុវនារីអាយុ ១៦ ឆ្នាំឈរនៅចំពោះមុខមនុស្សគ្រប់រូបក្នុងសាខារាល់ថ្ងៃអាទិត្យ ដឹកនាំពួកគេច្រៀងទំនុកតម្កើង ។ ខ្ញុំមានអារម្មណ៍ថាសំខាន់ ហើយដឹងថាខ្ញុំមានអ្វីមួយដើម្បីបរិច្ចាគ ។ មនុស្សពឹងផ្អែកមកលើខ្ញុំដើម្បីមានវត្តមាននៅទីនោះ ហើយខ្ញុំចូលចិត្តអារម្មណ៍ថាខ្លួនមានប្រយោជន៍ ។ បទពិសោធន៍នោះបានជួយស្ថាបនាទីបន្ទាល់របស់ខ្ញុំអំពីព្រះយេស៊ូវគ្រីស្ទ ដូចជាអ្វីមានចំពោះប៊ីស្សព កូសសែ វាបានជួយពង្រឹងជីវិតខ្ញុំនៅក្នុងការបម្រើក្នុងដំណឹងល្អ ។
សមាជិកម្នាក់ៗគួរតែដឹងថាគាត់សំខាន់ប៉ុណ្ណា ។ មនុស្សម្នាក់ៗមានអ្វីមួយសំខាន់ដើម្បីបរិច្ចាគ ហើយមានទេពកោសល្យ និងសមត្ថភាពពិសេសដើម្បីជួយកំរិលកិច្ចការសំខាន់នេះឆ្ពោះទៅមុខ ។ យុវជនរបស់យើងមានកាតព្វកិច្ចបព្វជិតភាពអើរ៉ុន ត្រូវបានគេមើលឃើញ ដែលបានពិពណ៌នានៅក្នុងគោលលទ្ធិ និង សេចក្តីសញ្ញា ។ ឪពុកម្ដាយ និងថ្នាក់ដឹកនាំរបស់ពួកគេ អាចនឹងពុំសូវមើលឃើញយុវនារីនៅក្នុងសាសនាចក្រ ចាប់តាំងពីពេលពួកគេទទួលបុណ្យជ្រមុជទឹក យុវនារីបានចុះសេចក្ដីសញ្ញាមានការទទួលខុសត្រូវដើម្បី « ទួញយំជាមួយនឹងអ្នកណាដែលទួញយំ មែនហើយ ហើយកម្សាន្តទុក្ខដល់អស់អ្នកណាដែលកំពុងត្រូវការកម្សាន្តទុក្ខ ហើយឈរជាសាក្សីដល់ព្រះនៅគ្រប់ពេល និងគ្រប់សេចក្ដី និងគ្រប់ទីកន្លែងដែល [ ពួកគេ ] បាននៅរហូតដល់ពេលស្លាប់ » ។២ យុវនារីមានឱកាសដើម្បីបំពេញការទទួលខុសត្រូវទាំងនេះនៅក្នុងវួដ និងសាខា និងនៅពេលពួកគេបម្រើនៅក្នុងគណៈប្រធានថ្នាក់ នៅក្នុងក្រុមប្រឹក្សាយុវវ័យ និងនៅក្នុងការហៅបម្រើដទៃទៀត ។ យុវនារីគ្រប់រូបនៅក្នុងសាសនាចក្រគួរតែមានអារម្មណ៍ថាមានតម្លៃ មានឱកាសជាច្រើនដើម្បីបម្រើ ហើយមានអារម្មណ៍ថានាងមានអ្វីមួយមានតម្លៃដើម្បីបរិច្ចាគនៅក្នុងកិច្ចការនេះ ។
នៅក្នុង ក្បួនខ្នាតភាគ ២ យើងបានរៀនថា កិច្ចការនៃសេចក្ដីសង្គ្រោះនៅក្នុងវួដរបស់យើងរួមមាន « កិច្ចការអ្នកផ្សព្វផ្សាយសាសនារបស់សមាជិក ការថែរក្សាអ្នកផ្លាស់ប្រែចិត្តជឿ ការធ្វើឲ្យសមាជិកមិនសូវសកម្មឲ្យសកម្មឡើងវិញ កិច្ចការព្រះវិហារបរិសុទ្ធ និងកិច្ចការពង្សប្រវត្តិ និងការបង្រៀនដំណឹងល្អ » ។៣ កិច្ចការនេះ ត្រូវបានដឹកនាំដោយប៊ីស្សពស្មោះត្រង់របស់យើង ដែលកាន់កូនសោបព្វជិតភាពសម្រាប់វួដរបស់ពួកគាត់ ។ អស់ជាច្រើនឆ្នាំមកហើយ ឥឡូវគណៈប្រធានរបស់យើងបានសួរសំណួរថា « តើមានផ្នែកណាមួយដែលបានលើកឡើងទាំងនេះ គួរតែយុវនារីរបស់យើង កុំ ចូលរួម ? » ចម្លើយគឺថា កិច្ចការទាំងឡាយមានអ្វីមួយដើម្បីបរិច្ចាគនៅក្នុង គ្រប់ ផ្នែកទាំងអស់នៃកិច្ចការនេះ ។
ឧទាហរណ៍ ថ្មីៗនេះខ្ញុំបានជួបនឹងយុវនារីជាច្រើននៅតំបន់ ឡាស្វេហ្គាស ដែលត្រូវបានហៅឲ្យបម្រើជាពួកអ្នកផ្ដល់ប្រឹក្សាកិច្ចការព្រះវិហារបរិសុទ្ធ និងពង្សប្រវត្តិវួដ ។ ពួកគេមានភាពក្លៀវក្លាអំពីរឿងដែលពួកគេអាចបង្រៀន និងជួយសមាជិកក្នុងវួដរបស់ពួកគេស្វែងរកជីដូនជីតាពួកគេនោះ ។ ពួកគេមានជំនាញដ៏មានតម្លៃខាងកុំព្យូទ័រ បានរៀនអំពីរបៀបប្រើកម្មវិធី FamilySearch ហើយមានចិត្តរំភើបដើម្បីចែកចាយចំណេះដឹងនោះជាមួយអ្នកដទៃ ។ វាបង្ហាញច្បាស់ថា ពួកគេមានទីបន្ទាល់ និងការយល់ដឹងអំពី សារៈសំខាន់នៃការស្វែងរកឈ្មោះសម្រាប់ជីដូនជីតាដែលស្លាប់ទៅរបស់យើង ដើម្បីឲ្យពិធីបរិសុទ្ធនៃការសង្គ្រោះដ៏សំខាន់ៗអាចត្រូវបានធ្វើឡើងសម្រាប់ពួកគេនៅក្នុងព្រះវិហារបរិសុទ្ធ ។
ជាច្រើនខែកន្លងទៅ ខ្ញុំមានឱកាសដើម្បីសាកល្បងគំនិតមួយជាមួយនឹងយុវនារីអាយុ ១៤ ឆ្នាំម្នាក់ ។ ខ្ញុំទទួលបានសំណៅរបៀបវារៈក្រុមប្រឹក្សាវួដជាក់ស្ដែងចំនួនពីរ ហើយបានឲ្យទៅ អិមម៉ា និង មែកហ្គី ម្នាក់មួយច្បាប់ ។ ខ្ញុំសុំឲ្យពួកគេអានរបៀបវារៈ ហើយមើលថាតើមានសកម្មភាពណាមកពីក្រុមប្រឹក្សាវួដដែលពួកគេអាចធ្វើការបម្រើ ។ អិមម៉ាបានមើលឃើញថា គ្រួសារថ្មីបានផ្លាស់មកក្នុងវួដ ហើយនាងនិយាយថា នាងអាចជួយពួកគេរៀបចំអីវ៉ាន់ចូលផ្ទះ ។ នាងបានគិតថា នាងអាចធ្វើជាមិត្តនឹងកូនៗក្នុងគ្រួសារនោះ ហើយបង្ហាញពួកគេអំពីសាលារៀនថ្មីរបស់ពួកគេ ។ នាងបានមើលឃើញថាមានការទទួលទានអាហារពេលល្ងាចជាវួដនៅពេលខាងមុខ ហើយមានអារម្មណ៍ថា មានរបៀបជាច្រើនដែលនាងអាចធ្វើការបម្រើ ។
មែកហ្គី បានមើលឃើញថា មានមនុស្សចំណាស់ជាច្រើននៅក្នុងវួដដែលត្រូវការការទៅសួរសុខទុក្ខ និងការតាមដាន ។ នាងបាននិយាយថា នាងចូលចិត្តទៅសួរសុខទុក្ខ ហើយធ្វើជាជំនួយដល់សមាជិកចំណាស់ៗដ៏ល្អៗទាំងនេះ ។ នាងក៏មានអារម្មណ៍ផងដែរថា នាងអាចជួយបង្រៀនសមាជិកវួដអំពីរបៀបបង្កើត និងប្រើគណនីគេហទំព័រប្រព័ន្ធផ្សព្វផ្សាយសង្គម ។ នៅក្នុងរបៀបវារៈទាំងនោះពុំមានអ្វីណាមួយដែលថាយុវនារីទាំងពីរនាក់នេះពុំអាច ជួយនោះទេ !
តើអ្នកដែលអង្គុយនៅក្នុងក្រុមប្រឹក្សាវួដ ឬមានការហៅបម្រើដទៃទៀតនៅក្នុងវួដ មើលឃើញយុវនារីទាំងនេះជាធនធានដ៏មានតម្លៃដើម្បីជួយបំពេញតម្រូវការជាច្រើននៅក្នុងវួដរបស់យើងឬទេ ? តាមធម្មតា មានបញ្ជីដ៏វែងអំពីស្ថានភាពដែលតម្រូវឲ្យមាននរណាម្នាក់បម្រើ ហើយជាញឹកញាប់យើងគិតតែអំពីមជ្ឈិមវ័យនៅក្នុងវួដដើម្បីបំពេញតម្រូវការទាំងនោះប៉ុណ្ណោះ ។ ក៏ដូចជាអ្នកកាន់បព្វជិតភាពអើរ៉ុនរបស់យើងត្រូវបានអញ្ជើញឲ្យធ្វើការជាមួយនឹងឪពុករបស់ពួកគេ និងបុរសដទៃទៀតក្នុងបព្វជិតភាពមិកគីស្សាដែកដែរ យុវនារីរបស់យើងត្រូវបានហៅឲ្យផ្ដល់ការបម្រើ ហើយបម្រើដល់សេចក្ដីត្រូវការរបស់សមាជិកវួដជាមួយនឹងម្ដាយពួកគេ ឬបងប្អូនស្ត្រីជាគំរូដទៃទៀត ។ ពួកគេមានសមត្ថភាព ចង់ធ្វើការ ហើយមានឆន្ទៈដើម្បីធ្វើយ៉ាងច្រើនជាងការគ្រាន់តែមកចូលរួមក្នុងព្រះវិហារនៅថ្ងៃអាទិត្យទៅទៀត !
នៅពេលយើងពិចារណាអំពីតួនាទីដែលយុវនារីរបស់យើងនឹងរំពឹងទុកឲ្យធ្វើការនៅពេលខាងមុខ នោះយើងអាចសួរខ្លួនយើងអំពីបទពិសោធន៍ប្រភេទណាដែលយើងអាចផ្ដល់ទៅឲ្យពួកគេនាពេលនេះ ដែលនឹងជួយរៀបចំពួកគេដើម្បីធ្វើជាអ្នកផ្សព្វផ្សាយសាសនា អ្នកចេះដឹងខាងដំណឹងល្អ ថ្នាក់ដឹកនាំក្នុងសាសនាចក្រ អង្គការជំនួយ អ្នកធ្វើកិច្ចការក្នុងព្រះវិហារបរិសុទ្ធ ជាភរិយា ជាម្ដាយ ជាអ្នកប្រឹក្សា គំរូ និងជាមិត្ត ។ តាមធម្មតា ពួកគេអាចចាប់ផ្ដើមក្នុងពេលឥឡូវនេះ ដើម្បីបំពេញតួនាទីជាច្រើនទាំងនោះ ។ ជាញឹកញាប់ យុវវ័យត្រូវបានសុំឲ្យជួយបង្រៀនមេរៀននៅថ្ងៃអាទិត្យនៅក្នុងថ្នាក់របស់ពួកគេ ។ ឥឡូវមានឱកាសជាច្រើនសម្រាប់យុវនារីរបស់យើងធ្វើការបម្រើនៅក្នុងព្រះវិហារបរិសុទ្ធដែលពីមុនបំពេញដោយអ្នកធ្វើពិធីក្នុងព្រះវិហារបរិសុទ្ធ ឬអ្នកស្ម័គ្រចិត្ត នៅពេលពួកគេចូលរួមជាមួយនឹងក្រុមយុវវ័យរបស់ពួកគេដើម្បីធ្វើពិធីបុណ្យជ្រមុជទឹកសម្រាប់អ្នកស្លាប់ ។ យុវនារីដែលមានវ័យក្នុងថ្នាក់កុមាររបស់យើង ឥឡូវនេះត្រូវបានអញ្ជើញឲ្យចូលរួមក្នុងព្រះវិហារបរិសុទ្ធ និងការប្រជុំរៀបចំបព្វជិតភាព ដែលនឹងជួយពួកគេយល់ថា ពួកគេក៏ជាអ្នកចូលរួមដ៏សំខាន់នៅក្នុងកិច្ចការដែលបានដឹកនាំដោយបព្វជិតភាព ។ ពួកគេកំពុងរៀនថា បុរស ស្ត្រី យុវវ័យ និងកុមារ គឺជាអ្នកទទួលពរជ័យបព្វជិតភាព ហើយទាំងអស់គ្នាអាចមានតួនាទីដ៏សកម្មនៅក្នុងការរំកិលកិច្ចការដែលដឹកនាំកិច្ចការរបស់ព្រះអម្ចាស់ឆ្ពោះទៅមុខ ។
ប៊ីស្សពទាំងឡាយ ជាញឹកញាប់ ពួកយើងដឹងថាកាតព្វកិច្ចរបស់លោកមានច្រើន ប៉ុន្តែក៏ដូចជាអាទិភាពខ្ពស់បំផុតមួយរបស់ប្រធាន គឺធ្វើជាអធិបតីលើកូរ៉ុមបព្វជិតភាពដែរ ក្បួនខ្នាតភាគ ២ ពន្យល់ថា « ប៊ីស្សព និងទីប្រឹក្សារបស់គាត់ផ្ដល់ការដឹកនាំពីបព្វជិតភាពទៅលើអង្គការយុវនារី ។ ពួកគាត់មើលខុសត្រូវលើ និងពង្រឹងដល់ក្រុមយុវនារីម្នាក់ៗ ដោយធ្វើការយ៉ាងជិតស្និតជាមួយនឹងឪពុកម្តាយ និងពួកអ្នកដឹកនាំក្រុមយុវនារីនៅក្នុងកិច្ចខិតខំនេះ » ។ វាក៏ចែងផងដែរថា « ប៊ីស្សព និងទីប្រឹក្សារបស់គាត់ ចូលរួមជាទៀងទាត់នៅក្នុងការប្រជុំក្រុមយុវនារី ការបម្រើ និងសកម្មភាពទាំងឡាយ » ។៤ ពួកយើងមានអំណរគុណចំពោះប៊ីស្សពដែលចំណាយពេលទៅមើលថ្នាក់យុវនារី ហើយផ្ដល់ឱកាសដល់យុវនារីបម្រើជាជាងគ្រាន់តែធ្វើជាអ្នកមើលអ្នកដទៃធ្វើការ ។ អរគុណដែលបានមើលឲ្យប្រាកដថាយុវនារីរបស់បងប្អូន មានការចូលរួមចំណែកដ៏មានតម្លៃនៅក្នុងការបំពេញតម្រូវការរបស់សមាជិកវួដ ! ឱកាសបម្រើដ៏មានអត្ថន័យទាំងនេះប្រទានពរដល់ពួកគេច្រើនជាងសកម្មភាពដែលពួកគេគ្រាន់តែទៅកម្សាន្ដ ។
ចំពោះយុវនារីនៅក្នុងសាសនាចក្រ ជាញឹកញាប់ក្នុងយុវវ័យរបស់អ្នកអាចនឹងរវល់ ហើយមានឧបសគ្គ ។ ពួកយើងបានកត់សម្គាល់ថា មានអ្នករាល់គ្នាជាច្រើនទៀតកំពុងមានបញ្ហានៅក្នុងរឿងតម្លៃផ្ទាល់ខ្លួន មានភាពអន្ទះអន្ទែង មានភាពតានតឹងកម្រិតខ្ពស់ ហើយប្រហែលជាអស់សង្ឃឹមខ្លាំង ។ ចូរបង្វែរការគិតរបស់អ្នកមកគិតអ្វីក្រៅពីខ្លួនអ្នក ជំនួសឲ្យការស្ថិតនៅក្នុងបញ្ហាផ្ទាល់ខ្លួនរបស់អ្នក ពីព្រោះវាពុំអាចដោះស្រាយអ្វីបានទេ ប៉ុន្តែការបម្រើជាញឹកញាប់អាចសម្រាលបន្ទុករបស់អ្នក ហើយធ្វើឲ្យបញ្ហារបស់អ្នកហាក់ដូចជាពុំសូវពិបាក ។ របៀបដ៏ល្អបំផុតមួយដើម្បីបង្កើនអារម្មណ៍ឲ្យតម្លៃខ្លួនឯង គឺឲ្យបង្ហាញថាយើងមានតម្លៃច្រើនដើម្បីបរិច្ចាគតាមរយៈការបម្រើអ្នកដទៃ ។៥ ខ្ញុំសូមលើកទឹកចិត្តដល់អ្នកឲ្យលើកដៃស្ម័គ្រចិត្ត ហើយធ្វើកិច្ចការនៅពេលអ្នកមើលឃើញមានតម្រូវការនៅជុំវិញអ្នក ។ នៅពេលអ្នកបំពេញការទទួលខុសត្រូវដែលអ្នកបានចុះសេចក្ដីសញ្ញា ហើយចូលរួមក្នុងការស្ថាបនានគរព្រះ នោះមានពរជ័យជាច្រើននឹងចាក់ស្រោចមកលើជីវិតអ្នក ហើយអ្នកនឹងរកឃើញអំណរដ៏ជ្រាលជ្រៅ និងយូរអង្វែងនៃភាពជាសិស្ស ។
បងប្អូនប្រុសស្រីទាំងឡាយ យុវនារីរបស់យើងអស្ចារ្យណាស់ ។ ពួកគេមានទេពកោសល្យ មានភាពក្លៀវក្លាគ្មានកំណត់ ហើយមានថាមពល និងក្ដីមេត្តា និងការយកចិត្តទុកដាក់ ។ ពួកគេ ចង់ បម្រើ ។ ពួកគេត្រូវការដឹងថាពួកគេមានតម្លៃ ហើយសំខាន់នៅក្នុងកិច្ចការនៃសេចក្ដីសង្គ្រោះ ។ ក៏ដូចជាយុវជនរៀបចំខ្លួននៅក្នុងបព្វជិតភាពអើរ៉ុនសម្រាប់ការបម្រើកាន់តែសំខាន់ពីមុនទទួលបព្វជិតភាពមិលគីស្សាដែកផងដែរ នោះយុវនារីរបស់យើងកំពុងរៀបចំដើម្បីក្លាយជាសមាជិកនៃអង្គការស្ត្រីដ៏ធំបំផុតនៅលើផែនដី—គឺសមាគមសង្គ្រោះ ។ យុវនារី និងយុវជនដ៏ស្មោះត្រង់ រឹងមាំ ស្រស់ស្អាតទាំងនេះ កំពុងរៀបចំខ្លួនរួមគ្នាដើម្បីធ្វើជាភរិយា និងជាស្វាមី និងជាម្ដាយ និងជាឪពុកដែលនឹងបង្កើតក្រុមគ្រួសារដែលមានតម្លៃក្នុងនគរសេឡេស្ទាលរបស់ព្រះ ។
ខ្ញុំសូមថ្លែងទីបន្ទាល់ថា កិច្ចការរបស់ព្រះវរបិតាសួគ៌យើងនាំមកនូវជីវិតអមត និងជីវិតអស់កល្បជានិច្ចដល់បុត្រាបុត្រីរបស់ទ្រង់ ។៦ យុវនារីដ៏មានតម្លៃរបស់យើងមានតួនាទីដ៏សំខាន់ដើម្បីជួយសម្រេចកិច្ចការដ៏មហិមានេះ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។