ដោយព្រមព្រៀងគ្នា
ដើម្បីទៅដល់ជោគវាសនាដ៏អស្ចារ្យរបស់យើង យើងត្រូវការគ្នាទៅវិញទៅមក ហើយយើងចាំបាច់ត្រូវមានសាមគ្គីភាព ។
សត្វលោកដ៏អស្ចារ្យបំផុតមួយនៅលើផែនដីគឺ សត្វមេអំបៅពណ៌ចម្រុះ ។ នៅក្នុងការធ្វើដំណើរទៅប្រទេសម៉ិកស៊ីកដើម្បីចំណាយពេលបុណ្យគ្រីស្ទម៉ាស់ជាមួយនឹងគ្រួសារខាងស្វាមីរបស់ខ្ញុំ ពួកយើងបានទៅលេងជម្រកមេអំបៅ ដែលមានមេអំបៅពណ៌ចម្រុះរាប់លានក្បាលចំណាយពេលនៅរដូវរងារ ។ វាគួរឲ្យស្រឡាញ់ណាស់នៅពេលមើលឃើញទិដ្ឋភាពដ៏អស្ចារ្យ ហើយយើងអាចនឹកគិតអំពីគំរូនៃសាមគ្គីភាព និងការគោរពប្រតិបត្តិចំពោះក្រឹត្យវិន័យដ៏ទេវភាពដែលការបង្កបង្កើតរបស់ព្រះបានបើកសម្ដែង ។១
មេអំបៅពណ៌ចម្រុះគឺជាអ្នកស្ទង់មើលទិសដៅដ៏ជំនាញ ។ ពួកវាបានប្រើទីតាំងរបស់ព្រះអាទិត្យដើម្បីរកទិសដៅដែលពួកវាត្រូវទៅ ។ ជារៀងរាល់និទារឃរដូវ ពួកវាបានធ្វើដំណើររាប់ពាន់គីឡូម៉ែត្រពីប្រទេសម៉ិកស៊ីកទៅកាន់ប្រទេសកាណាដា ហើយជារៀងរាល់រដូវស្លឹកឈើជ្រុះ ពួកវាត្រឡប់មកព្រៃឈើស្រល់ដ៏ពិសិដ្ឋនៅប្រទេសម៉ិកស៊ីកវិញ ។២ ស្លាបតូចទទះម្ដងៗ ពួកវាធ្វើដូចនេះពីមួយឆ្នាំទៅមួយឆ្នាំ ។ អំឡុងពេលធ្វើដំណើរ ពួកវាដង្គុំគ្នានៅពេលយប់នៅលើដើមឈើដើម្បីការពារពួកវាពីភាពត្រជាក់ និងពីសត្វដែលចង់ស៊ីពួកវា ។៣
ក្រុមមេអំបៅនោះត្រូវបានហៅថា kaleidoscope ( កាលីដូស្កូប ) ។៤ តើនោះពុំមែនជារូបភាពដ៏ស្អាតទេឬអី ? មេអំបៅនីមួយៗនៅក្នុង kaleidoscope គឺពិសេស និងដាច់ដោយឡែក ប៉ុន្តែសត្វលោកដែលហាក់ដូចជាងាយស្លាប់ទាំងនេះ ត្រូវបានរចនាឡើងដោយអង្គបង្កបង្កើតជាទីស្រឡាញ់ដែលមានសមត្ថភាពដើម្បីនៅរស់ ធ្វើដំណើរ បង្កើតជីវិតចម្រើនជាច្រើនឡើង នៅពេលពួកវាហើរទៅពីមួយផ្កាទៅមួយផ្កា ពង្រាយលំអងផ្កា ។ ហើយទោះបីជាមេអំបៅនីមួយៗមានភាពខុសគ្នាក្ដី ក៏ពួកវាធ្វើការជាមួយគ្នាដើម្បីធ្វើឲ្យពិភពលោកកាន់តែជាកន្លែងដ៏ស្រស់ស្អាត និងមានផលផ្លែ ។
ក៏ដូចជាមេអំបៅពណ៌ចម្រុះដែរ យើងស្ថិតនៅក្នុងការធ្វើដំណើរត្រឡប់ទៅកាន់ផ្ទះសួគ៌ាយើងវិញ ដែលយើងនឹងរួបរួមគ្នាជាមួយនឹងព្រះមាតាបិតាសួគ៌របស់យើង ។៥ ក៏ដូចជាមេអំបៅដែរ យើងត្រូវបានប្រទានឲ្យនូវអាកប្បកិរិយាដ៏ទេវភាព ដែលអនុញ្ញាតឲ្យយើងស្ទង់មើលទិសដៅនៅក្នុងជីវិតដើម្បី « [ បំពេញ ] តាមរង្វាស់នៃការបង្កបង្កើតរបស់ [ យើង ] » ។៦ ក៏ដូចជាពួកវាដែរ បើយើងវេញដួងចិត្តរបស់យើងរួមគ្នា ៧ នោះព្រះអម្ចាស់នឹងការពារយើង « ដូចជាមេមាន់ [ ប្រមូល ] កូនវានៅក្រោមស្លាបដូច្នោះដែរ » ៨ ហើយនឹងធ្វើឲ្យយើងក្លាយជាក្រុមមេអំបៅដ៏ស្រស់ស្អាត ។
កុមារាកុមារី យុវនារីយុវជន បងប្អូនប្រុសស្រី យើងរួមដំណើរជាមួយគ្នា ។ ដើម្បីទៅដល់ជោគវាសនាដ៏អស្ចារ្យរបស់យើង យើងត្រូវការគ្នាទៅវិញទៅមក ហើយយើងចាំបាច់ត្រូវមានសាមគ្គីភាព ។ ព្រះអម្ចាស់បានបញ្ជាយើងថា « ចូររួមគ្នាតែមួយ ហើយបើសិនជាអ្នករាល់គ្នាមិនរួមគ្នាតែមួយទេ ឈ្មោះថាអ្នករាល់គ្នាពុំមែនជារបស់ផងយើងឡើយ » ។៩
ព្រះយេស៊ូវគ្រីស្ទគឺជាគំរូនៃសាមគ្គីភាពជាមួយនឹងព្រះវរបិតាទ្រង់ ។ ពួកទ្រង់មានព្រះបំណងតែមួយ ក្ដីស្រឡាញ់តែមួយ កិច្ចការតែមួយ « ព្រះហឬទ័យនៃព្រះរាជបុត្រា ត្រូវលេបដណ្ដប់នៅក្នុងព្រះហឬទ័យនៃព្រះវរបិតា » ។១០
តើយើងអាចធ្វើតាមគំរូដ៏ឥតខ្ចោះរបស់ព្រះអម្ចាស់អំពីសាមគ្គីភាពជាមួយនឹងព្រះវរបិតារបស់ទ្រង់ ហើយកាន់តែមានសាមគ្គីភាពជាមួយនឹងពួកទ្រង់ និងចំពោះគ្នាទៅវិញទៅមកយ៉ាងដូចម្ដេច ?
មានលំនាំដ៏បំផុសគំនិតមួយរកឃើញនៅក្នុង កិច្ចការ ១:១៤ ។ យើងអានថា « [ មនុស្ស ] ទាំងនេះមានចិត្ត ព្រមព្រៀងគ្នា ដោយព្យាយាមក្នុងសេចក្ដីអធិស្ឋានជាមួយនឹងពួកស្រីៗ » ។១១
ខ្ញុំគិតថាវាសំខាន់ដែលឃ្លា « ព្រមព្រៀងគ្នា » បានលេចឡើងជាច្រើនដងនៅក្នុងគម្ពីរកិច្ចការ ដែលយើងអានអំពីអ្វីដែលពួកអ្នកដើរតាមព្រះយេស៊ូវគ្រីស្ទបានធ្វើមួយរំពេចបន្ទាប់ពីទ្រង់បានយាងឡើងទៅស្ថានសួគ៌វិញ ជាតួអង្គរស់ឡើងវិញនោះ ក៏ដូចជាពរជ័យដែលពួកគេបានទទួលដោយសារតែការខិតខំរបស់ពួកគេផងដែរ ។ វាសំខាន់ផងដែរដែលយើងស្វែងរកលំនាំដូចគ្នានៅក្នុងចំណោមពួកបរិសុទ្ធស្មោះត្រង់នៅទ្វីបអាមេរិកក្នុងគ្រាដែលព្រះអម្ចាស់បានយាងទៅជួប និងបម្រើពួកគេនោះ ។ « ព្រមព្រៀងគ្នា » មានន័យថាយល់ស្រប មានសាមគ្គីភាព និងរួមទាំងអស់ ។
មានអ្វីមួយចំនួនដែលពួកបរិសុទ្ធស្មោះត្រង់បានធ្វើនៅក្នុងសាមគ្គីភាពនៅកន្លែងទាំងពីរ គឺថាពួកគេបានថ្លែងទីបន្ទាល់អំពីព្រះយេស៊ូវគ្រីស្ទ បានសិក្សាព្រះបន្ទូលរបស់ព្រះជាមួយគ្នា ហើយបម្រើដល់គ្នាទៅវិញទៅមកដោយក្ដីស្រឡាញ់ ។១២
អ្នកដើរតាមព្រះអម្ចាស់គឺមានចិត្តរួមគ្នាតែមួយនៅក្នុងគោលបំណង សេចក្ដីស្រឡាញ់ និងនៅក្នុងកិច្ចការ ។ ពួកគេបានដឹងថាខ្លួនពួកគេជានរណា ពួកគេបានដឹងនូវអ្វីដែលពួកគេត្រូវធ្វើ ហើយពួកគេបានធ្វើវាដោយសេចក្ដីស្រឡាញ់ចំពោះព្រះ និងចំពោះគ្នាទៅវិញទៅមក ។ ពួកគេគឺជាចំណែកនៃក្រុមមេអំបៅដ៏សំខាន់ដែលហើរឆ្ពោះទៅមុខដោយព្រមព្រៀងគ្នា ។
ពរជ័យមួយចំនួនដែលពួកគេបានទទួលគឺថា ពួកគេបានពោរពេញដោយព្រះវិញ្ញាណបរិសុទ្ធ មានអព្ភូតហេតុជាច្រើនបានកើតឡើងនៅក្នុងចំណោមពួកគេ សាសនាចក្ររីកចម្រើន ពុំមានការឈ្លោះទាស់ទែងនៅក្នុងចំណោមប្រជាជន ហើយព្រះអម្ចាស់បានប្រទានពរដល់ពួកគេនៅគ្រប់រឿងទាំងអស់ ។១៣
ពួកយើងអាចគិតថា មូលហេតុដែលពួកគេមានសាមគ្គីភាព គឺដោយសារតែពួកគេបានស្គាល់ព្រះអម្ចាស់ដោយផ្ទាល់ ។ ពួកគេបាននៅជិតនឹងទ្រង់ ហើយពួកគេបានធ្វើជាសាក្សីក្នុងបេសកកម្មដ៏ទេវភាពរបស់ទ្រង់ អព្ភូតហេតុដែលទ្រង់បានធ្វើ និងការរស់ឡើងវិញរបស់ទ្រង់ ។ ពួកគេបានឃើញ ហើយបានពាល់ស្នាមនៅលើព្រះហស្ដ និងព្រះបាទាទ្រង់ ។ ពួកគេបានស្គាល់ជាក់ថា ទ្រង់គឺជាព្រះមែស៊ីដែលបានសន្យា ជាព្រះប្រោសលោះនៃពិភពលោក ។ ពួកគេបានដឹងថា « ទ្រង់ជាប្រភពនៃការព្យាបាលទាំងអស់ ភាពសុខសាន្ដ និងការរីកចម្រើនដ៏អស់កល្បជានិច្ច » ។១៤
ទោះជាយើងពុំបានមើលឃើញព្រះអង្គសង្គ្រោះនឹងភ្នែកក្ដី ក៏យើងអាចដឹងថាទ្រង់មានព្រះជន្មរស់ ។ នៅពេលយើងខិតទៅកាន់តែជិតទ្រង់ នៅពេលយើងស្វែងរកទទួលសាក្សីផ្ទាល់ខ្លួនតាមរយៈព្រះវិញ្ញាណបរិសុទ្ធនៃបេសកកម្មដ៏ទេវភាពរបស់ទ្រង់ យើងនឹងមានការយល់ដឹងកាន់តែល្អប្រសើរអំពីគោលបំណងរបស់យើង នោះសេចក្តីស្រឡាញ់នៃព្រះនឹងមាននៅក្នុងដួងចិត្តរបស់យើង ១៥ យើងនឹងមានការតាំងចិត្តដើម្បីធ្វើជាមនុស្សម្នាក់នៅក្នុងក្រុម kaleidoscopes នៃគ្រួសាររបស់យើង វួដ និងសហគមន៍ ហើយយើងនឹងបម្រើគ្នាទៅវិញទៅមក « តាមរបៀបថ្មី និងកាន់តែល្អប្រសើរ » ។១៦
អព្ភូតហេតុទាំងឡាយបានកើតឡើងនៅពេលកូនចៅរបស់ព្រះធ្វើការរួមគ្នាដោយបានដឹកនាំតាមរយៈព្រះវិញ្ញាណដើម្បីឈោងទៅរកអ្នកដទៃដែលខ្វះខាត ។
យើងស្ដាប់ឮរឿងជាច្រើនអំពីសេចក្ដីស្រឡាញ់ដល់អ្នកជិតខាងដែលបានបង្ហាញនៅក្នុងចំណោមប្រជាជននៅពេលមានគ្រោះមហន្តរាយវាយប្រហារ ។ ឧទាហរណ៍ នៅពេលទីក្រុង ហោស្ដុនបានរងទុក្ខដោយទឹកជំនន់ដ៏ធំកាលពីឆ្នាំមុន មនុស្សបានបំភ្លេចអំពីតម្រូវការផ្ទាល់ខ្លួន ហើយបានចេញទៅជួយសង្គ្រោះ ។ ប្រធានកូរ៉ុមអែលឌើរម្នាក់បានស្វែងរកជំនួយពីសហគមន៍ ហើយបានកងនាវានៃទូក ៧៧ ទូកបានរៀបចំឡើងយ៉ាងលឿន ។ ពួកអ្នកជួយសង្គ្រោះបានទៅជុំវិញតំបន់ដែលរងគ្រោះជិតខាង ហើយបានដឹកជញ្ជូនគ្រួសារទាំងមូលជាច្រើនគ្រួសារទៅកាន់សាលាប្រជុំមួយរបស់យើង ជាកន្លែងដែលពួកគេបានទទួលជម្រក និងជំនួយចាំបាច់ជាច្រើន ។ ទាំងសមាជិក និងអ្នកពុំមែនជាសមាជិកបានធ្វើការរួមគ្នាក្នុងគោលបំណងតែមួយ ។
នៅសាន់ឌីអាហ្គោ ឈីលី ប្រធានសមាគមសង្គ្រោះមានបំណងប្រាថ្នាដើម្បីជួយពួកជនអន្ដោប្រវេស្ដន៍នៅក្នុងសហគមន៍របស់គាត់មកពីហៃទី ។ តាមរយៈការប្រឹក្សារួមគ្នាជាមួយនឹងពួកអ្នកដឹកនាំបព្វជិតភាពរបស់គាត់ គាត់ និងអ្នកដឹកនាំដទៃទៀត បានបង្កើតគំនិតបង្រៀនភាសាអេស្ប៉ាញដល់ជនអន្ដោប្រវេស្ដន៍ ដើម្បីជួយពួកគេចូលរួមកាន់តែល្អប្រសើរនៅក្នុងផ្ទះថ្មីរបស់ខ្លួន ។ រាល់ព្រឹកថ្ងៃសៅរ៍ ពួកអ្នកផ្សព្វផ្សាយសាសនាបានប្រមូលផ្ដុំគ្នាជាមួយនឹងសិស្សដែលចង់រៀនរបស់ពួកគេ ។ អារម្មណ៍សាមគ្គីភាពនៅក្នុងអគារនោះគឺជាគំរូដ៏បំផុសគំនិតនៃប្រជាជនមកពីប្រវត្តិផ្សេងៗកំពុងបម្រើដោយព្រមព្រៀងគ្នា ។
នៅប្រទេសម៉ិកស៊ិក មានសមាជិករាប់ពាន់នាក់បានធ្វើដំណើរជាច្រើនម៉ោងទៅជួយដល់ជនរងគ្រោះដោយសារការរញ្ជួយដីដ៏ធំពីរ ។ ពួកគេបានទៅដោយមានឧបករណ៍ គ្រឿងម៉ាស៊ីន និងសេចក្ដីស្រឡាញ់ដល់អ្នកជិតខាងរបស់ពួកគេ ។ នៅពេលអ្នកស្ម័គ្រចិត្តបានជួបជុំគ្នានៅក្នុងសាលាប្រជុំមួយរបស់យើងរង់ចាំការណែនាំ នោះចៅហ្វាយក្រុង អាយហាន់តាន់ បានស្រក់ទឹកភ្នែក នៅពេលគាត់បានមើលឃើញនូវការបង្ហាញពី « សេចក្ដីស្រឡាញ់ដ៏បរិសុទ្ធរបស់ព្រះគ្រីស្ទ » ដូច្នេះ ។១៧
ឥឡូវ ព្រះអម្ចាស់បានប្រទានឱកាសដល់យើងដើម្បីប្រឹក្សាជាមួយគ្នារាល់ខែនៅក្នុងកូរ៉ុមបព្វជិតភាព និងសមាគមសង្គ្រោះរបស់យើង ដើម្បីយើងទាំងអស់គ្នាអាចចូលរួមកាន់តែសកម្មនៅក្នុងវួដ ឬសាខា kaleidoscope របស់យើង—ជាកន្លែងមួយដែលយើងទាំងអស់គ្នាចុះសម្រុង និងត្រូវការ ។
ផ្លូវរបស់ពួកយើងគ្រប់គ្នាមានផ្សេងៗគ្នា ប៉ុន្តែយើងដើរផ្លូវនោះជាមួយគ្នា ។ ផ្លូវរបស់យើងគឺពុំមែនជាអ្វីដែលយើងបានធ្វើ ឬកន្លែងដែលយើងធ្លាប់ទៅនោះទេ វាគឺជាកន្លែងដែលយើងនឹងទៅ និងអ្វីដែលយើងនឹងប្រែក្លាយនៅក្នុងសាមគ្គីភាព ។ នៅពេលយើងប្រឹក្សារួមគ្នាដោយបានដឹកនាំពីព្រះវិញ្ញាណបរិសុទ្ធ នោះយើងអាចមើលឃើញថាយើងនៅត្រង់ណា ហើយយើងត្រូវនៅកន្លែងណា ។ ព្រះវិញ្ញាណបរិសុទ្ធប្រទានទស្សនវិស័យមួយដល់យើង ដែលភ្នែកធម្មជាតិរបស់យើងពុំអាចមើលឃើញដោយសារ « វិវរណៈគឺមាននៅក្នុងចំណោមយើង » ១៨ ហើយនៅពេលយើងដាក់វិវរណៈនោះរួមគ្នា នោះយើងអាចមើលឃើញកាន់តែច្រើន ។
នៅពេលយើងធ្វើការរួមគ្នា គោលបំណងរបស់យើងគួរតែសម្លឹងមើល និងធ្វើតាមព្រះឆន្ទៈរបស់ព្រះអម្ចាស់ គ្រឿងលើកទឹកចិត្តរបស់យើងគួរតែជាសេចក្ដីស្រឡាញ់ដែលយើងមានចំពោះព្រះ និងអ្នកជិតខាងរបស់យើង ១៩ ហើយបំណងប្រាថ្នាដ៏ធំបំផុតរបស់យើងគួរតែជា « ការធ្វើការដោយឧស្សាហ៍ព្យាយាម » ២០ ដូច្នេះយើងអាចរៀបចំផ្លូវសម្រាប់ការយាងត្រឡប់មកវិញដ៏រុងរឿងរបស់ព្រះអង្គសង្គ្រោះយើង ។ វិធីតែមួយដែលយើងនឹងអាចធ្វើដូច្នោះបានគឺ « ដោយការព្រមព្រៀងគ្នា » ។
ដូចជាមេអំបៅពណ៌ចម្រុះ ចូរយើងបន្ដដំណើរជាមួយគ្នាក្នុងគោលបំណងរួមគ្នា យើងម្នាក់ៗមានលក្ខណ និងការបរិច្ចាគផ្ទាល់ខ្លួនរបស់យើង ធ្វើការដើម្បីធ្វើឲ្យពិភពលោកនេះកាន់តែស្រស់ស្អាត និងមានផលផ្លែ—បោះជំហានតូចៗមួយជំហានម្ដងៗ ហើយមានភាពសុខុដុមជាមួយនឹងបទបញ្ញត្តិរបស់ព្រះរបស់យើង ។
ព្រះអម្ចាស់ព្រះយេស៊ូវគ្រីស្ទរបស់យើងបានសន្យានឹងយើងថា នៅពេលយើងរួមប្រជុំគ្នានៅក្នុងព្រះនាមរបស់ទ្រង់ នោះទ្រង់ស្ថិតនៅកណ្ដាលពួកយើង ។២១ ខ្ញុំសូមថ្លែងទីបន្ទាល់ថា ទ្រង់មានព្រះជន្មរស់ ហើយថាទ្រង់បានរស់ឡើងវិញនៅព្រឹកនិទារឃរដូវដ៏ស្រស់ស្អាតដូចជាថ្ងៃនេះ ។ ទ្រង់គឺជាក្សត្រនៃអស់ទាំងក្សត្រ « ស្តេចលើអស់ទាំងស្តេច ហើយ [ ជា ] ព្រះអម្ចាស់លើអស់ទាំងព្រះអម្ចាស់ » ។២២
សូមឲ្យយើងបានតែមួយនៅក្នុងព្រះវរបិតា និងព្រះរាជបុត្រាសំណព្វរបស់ទ្រង់ នៅពេលយើងត្រូវបានដឹកនាំដោយព្រះវិញ្ញាណបរិសុទ្ធ គឺជាការអធិស្ឋានដោយរាបសារបស់ខ្ញុំ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។