Auaunaga Musuia

Saunia e Peresitene Henry B. Eyring

Fesoasoani Lua i le Au Peresitene Sili

Ou uso pele, ou te faafetai mo le avanoa e lauga atu ai ia te outou i lenei konafesi aoao faasolopito. Ua tatou lagolagoina Peresitene Russell M. Nelson o le Peresitene Lona 17 o Le Ekalesia a Iesu Keriso o le Au Paia o Aso e Gata Ai. A o ou maua le faamanuiaga o le galulue faatasi ma ia i aso taitasi, ua ou lagonaina se faamautinoaga a le Agaga e faapea, o Peresitene Nelson ua valaauina e le Atua e taitai le Ekalesia moni a le Alii.

O la’u molimau foi ua valaauina e le Alii ia Elder Gerrit W. Gong ma Elder Ulisses Soares e auauna atu o ni uso o le Korama a Aposetolo e Toasefululua. Ou te alofa ma lagolagoina i laua. E ala i le la auaunaga, o le a la faamanuiaina ai olaga i le lalolagi atoa.

O lenei konafesi e logologoa mo se isi foi mafuaaga. Ua faasilasila mai e Peresitene Nelson se laasaga musuia agai i luma i le fuafuaga faatulagaina a le Alii mo Lana Ekalesia. O lena fuafuaga ua aofia ai se faatulagaga fou mo korama a le au perisitua i uarota ma siteki ina ia mafai ona tatou faataunuuina lelei atili o tatou tiutetauave faaleperisitua. O na tiutetauave uma e faatatau i la tatou tausiga faaleperisitua o fanau a lo tatou Tama.

O le fuafuaga a le Alii mo Lana Au Paia e tuuina atu le tausiga alofa ua tele ituaiga auala na faia ai i le gasologa o tausaga. I uluai aso o Navu, sa manaomia ai e le Perofeta o Iosefa Samita se auala faatulagaina e tausi ai le anoanoai o tagata liliu mai sa tele lava o e matitiva na o mai i le aai. Sa aofia ai ma le toafa o ou matua o matua matutua—o le au Eyring, au Bennion, au Romney, ma le au Samita. Sa faatulagaina e le Perofeta le tausiga o na Au Paia i tulaga faafaafanua. I Ilinoi o na vaevaega o le aai na ta’ua o “uarota.”

A o sopo atu le Au Paia i laufanua valevalenoa, o lo latou tausiga o le tasi ma le isi sa faatulagaina i “vaega.” O se tasi o o’u tama o tama matua (itu o le tama) sa toefoi mai i lana misiona i le vaega ua ta’ua nei o Okalahoma ina ua ia feiloai ma se vaega i luga o le alasopo.Sa matua vaivai o ia i faama’i lea sa la taooto taliaga ai ma lana soa i totonu o se tamai taavaletoso.

Na auina atu e le taitai o le vaega ni tamaitai talavou se toalua e fesoasoani i soo se tasi lava na i ai i totonu o lena taavaletoso. O le tasi o i la’ua, o se tuafafine talavou na liliu mai i Suitiselani, sa vaai atu i le tasi o faifeautalai ma lagona ai le agaalofa.Sa laveaiina o ia e lena vaega o le Au Paia. Sa lava lona toe malosi e savali ai i le vaega na totoe o le auala i le Vanu o Sate Leki faatasi ma le tamaitai talavou na laveaia o ia, i ona talaane. Sa alofa faamamai le tasi i le isi ma faaipoipo ai. Na avea o ia ma tama o lo’u tama matua o Henry Eyring, ma le tamaitai o le tina o lo’u tina matua ia Maria Bommeli Eyring.

I ni tausaga mulimuli ane, a o talanoa tagata i le faigata tele o le asaina o se konetineta, sa ia fai mai, “Oi leai, sa lei faigata. A o ma savavali, sa ma talanoa i le malaga atoa e uiga i le vavega lea ua ma maua uma ai le talalelei moni a Iesu Keriso. O le taimi silisili ona fiafia lea ou te manatuaina.”

Talu mai lena taimi, ua faaaoga ai e le Alii le tele o auala e fesoasoani ai i Lana Au Paia e tausi ai e le tasi le isi. O lenei ua Ia faamanuiaina i tatou i ni korama ua faamalosia ma faalotogatasia i uarota ma siteki—o korama e galulue felagolagomai ma faalapotopotoga uma a le uarota.

O uarota ua i ai tuaoi, vaega, ma korama ua faamalosia ua manaomiaina uma e le itiiti ifo ni mea se lua ina ia faamanuiaina ai i le faamoemoega o le Alii ia tausia e Lana Au Paia le tasi ma le isi i le ala Na te tausi ai i latou. Latou te manuia pe a lagona e le Au Paia le alofa o Keriso mo le tasi ma le isi e sili atu i lo o latou lava faanaunautaiga faaletagata lava ia. O loo ta’ua e tusitusiga paia, o le “alofa mama … le alofa le pona o Keriso” (Moronae 7:47). Ma latou te manuia pe a taialaina e le Agaga Paia lē e tuuina atua le tausiga ia iloa po o a mea e finagalo le Alii e aupito silisili ona lelei mo le tagata o loo ia taumafai e fesoasoani i ai.

I le tele o taimi i ni vaiaso talu ai, sa galulue ai tagata o le Ekalesia a o ou i ai e peisea’i ua latou faamoemoeina mea o le a faia e le Alii. Sei ou tuuina atu ni faataitaiga se lua. Tasi, o se lauga faigofie i le sauniga faamanatuga a se aoao e 14 tausaga le matua i le Perisitua Arona sa malamalama i mea e mafai ona ausia e e umiaina le perisitua i la latou auaunaga mo le Alii. Lua, o se umia le Perisitua Mekisateko o lē, faatasi ai ma le alofa o Keriso, sa musuia e auauna atu i se aiga.

Muamua, se’i ou tuu atua upu a le alii talavou na lauga i se sauniga faamanatuga a se uarota sa ou auai ai. Sa ou i ai iina. Taumafai e manatua pe na faape’i mai oe a o 14 ou tausaga ma faalogo atu ina ia e lagona o ia o lauga e sili atu ma mea ua faamoemoeina se alii talavou na te iloaina:

“Ua ou fiafia lava i le avea ai ma se uso o le korama a aoao i le matou uarota talu ona atoa lo’u 14 i le tausaga ua te’a. E i ai pea i se aoao tiutetauave uma o se tiakono faaopoopo i ai ma nisi tiute fou.

“Talu ai o nisi o i tatou o aoao, o isi o le a avea ai i se aso, ma o tagata uma i le Ekalesia ua faamanuiaina i le perisitua, o lea la e taua ai mo i tatou uma ona iloa atili e uiga i tiute o se aoao.

“O le mea muamua lava, fai mai le Mataupu Faavae ma Feagaiga 20:53 , ‘O le tiute o le aoao o le leoleo lea i luga o le ekalesia e lē aunoa, ma faatasi ma faamalosi i latou.’

“O le isi e sosoo ai, fai mai le Mataupu Faavae ma Feagaiga 20:54–55 :

“‘Ma vaai ina ia leai se amioletonu i totonu o le ekalesia, po o se feitagai ma le tasi, po o se pepelo, faatuaupua, po o se tautala leaga;

“Ma vaai ia potopoto soo faatasi le ekalesia, ma vaai foi ia fai e tagata uma o le ekalesia o latou tiute.’”

Na faaauau le saunoaga a le alii talavou:

“O loo ta’u mai e le Alii ia i tatou o lo tatou tiutetauave e le na o le tausia o le Ekalesia ae tausi foi tagata i totonu o le Ekalesia i le ala e ono faia ai e Keriso ona o Lana Ekalesia lenei. Afai o loo tatou taumafai e tausi poloaiga, ia agalelei i le tasi ma le isi, ia faamaoni, ia avea ma ni uo lelei, ma olioli i le potopoto faatasi, ona mafai lea ona tatou maua le Agaga e faatasi ma i tatou ma iloa mea ua finagalo le Tama Faalelagi ia i tatou e fai. Afai tatou te le faia, ona le mafai lea ona tatou faataunuuina lo tatou valaauga.”

Sa faaauau ona ia faapea atu:

“A filifili se aoao e fai se faataitaiga sa’o i le avea ai ma se faiaoga lelei o aiga, faafeiloai atu i tagata i le lotu, sauniaina o le faamanatuga, fesoasoani i le aiga, ma avea ma e faatupuina le filemu, o loo ia filifilia e faamamalu lona perisitua ma faataunuu lona valaauga.

“O le avea ma se aoao lelei e le faapea e na o le nafa lava ma tiute pe a tatou i ai i le lotu po o gaoioiga a le Ekalesia. Sa aoao mai le Aposetolo o Paulo, ‘Ia fai oe ma faaa’oa’o i e faatuatua, i le upu, ma le amio, ma le alofa, ma le loto, ma le faatuatua, ma le le gaoia’ (1 Timoteo 4:12).”

Ona fai mai lea o le alii talavou:

“Po o fea lava o tatou i ai pe o a foi mea o tatou faia, e mafai lava ona avea i tatou ma se faataitaiga lelei o le amiotonu i taimi uma ma i nofoaga uma.”

“O ma’ua ma lo’u tamā o faiaoga o le aiga o le au Brown. O taimi uma ma te o ai iina, ou te fiafia lava i le taimi e asiasi ai ma faamasani ma i latou. O le tasi mea ou te fiafia ai lava e uiga i le au Brown o soo se taimi lava ma te o ai iina, e naunau uma i latou e faalogo ma e i ai lava ni a latou tala mananaia e faasoa mai.

“A tatou iloaina lelei ni tagata i le uarota ona o faiaoga o aiga, e matua faigofie lava ona faia le isi tiute e sosoo ai o se aoao, o le faafeiloaiina lea o tagata i le lotu. O le fesoasoani i tagata ia lagona le talileleia ma faaaofia i le lotu e fesoasoani lea i tagata uma o le uarota ia lagona le alofaina ma saunia e taumamafa i le faamanatuga.

“A uma ona faafeiloai i tagata e o mai i le lotu, e fesoasoani aoao i Aso Sa taitasi e ala i le sauniaina o le faamanatuga. Ou te fiafia lava e tufa ma saunia le faamanatuga i lenei uarota ona e matua faaaloalo lava tagata uma. Ou te lagona le Agaga i taimi uma pe a ou saunia ma tufa atu le faamanatuga. O se faamanuiaga moni ia te a’u lo’u mafai ai ona faia i Aso Sa uma.

“O nisi o auaunaga e pei o le tufaina o le faamanatuga o se mea e vaai i ai tagata ma faafetai mai ai ia i matou mo le faia o lea mea, ae o isi auaunaga e pei o le sauniaina o le faamanatuga e masani lava e faia e aunoa ma le matauina e se tasi. E lē taua pe vaai tagata o matou auauna atu; o le mea e taua o le silafia lea e le Alii ua matou tautuaina o Ia.

“I le avea ai ma aoao, e tatau ona tatou taumafai i taimi uma e faamalosia le Ekalesia, a tatou uo, ma o tatou aiga e ala i le faataunuuina o o tatou tiute faaleperisitua. E le faigofie i taimi uma, ae e le aumaia lava e le Alii ni poloaiga ia i tatou ‘vagana o le a saunia e ia se ala mo i [tatou e] faataunuuina [ai] o le mea ua ia poloaiina’ (1 Nifae 3:7).”

Ina ua faai’uina le lauga a lena alii talavou, sa faaauau pea ona ou maofa i lona faatagata matua ma le poto. Sa ia otootoina i le faapea atu, “Ou te iloa o le a tatou lelei atili pe afai tatou te filifili e mulimuli ia [Iesu Keriso].”

O se isi tala o auaunaga faaleperisitua sa faamatalaina i le masina ua te’a i se sauniga faamanatuga a se uarota. Sa ou auai ai foi. O lenei uso atamai o loo umiaina le perisitua sa lei iloaina a o ia saunoa o loo ia faamatalaina tonu le mea o loo finagalo le Alii ia tupu i le faamalosia o korama o le perisitua. O le auiliiliga lenei o lana tala:

Sa tofia o ia ma se soa o faiaoga o aiga e auauna atu i ni aiga se toafitu. E toetoe lava o i latou uma sa le’i mananao e asia [i latou]. A ō atu faiaoga o aiga i o latou fale, sa latou mumusu e tatala le faitotoa. A la telefoni i ai, sa le tali mai se tasi. A la tuua se feau, sa le toe vili atu se isi. Sa i’u ina tonu i le soa sinia lenei e auauna atu i ai e ala i ni tusi tusitusia. Sa oo foi ina ia faaaogaina teutusi sasama sesega i le faamoemoe lava e maua mai se tali.

O se tasi o aiga e toafitu nei o se tuafafine nofotoatasi le toaga sa malaga mai Europa. Sa toalua lana fanau laiti.

I le mavae ai o le tele o taumafaiga e faafesootai o ia, sa ia maua ai se tesi. Sa ia faailoa sa’o mai ia te ia sa pisi tele o ia e feiloai ma faiaoga o aiga. Sa lua ni ana galuega ma sa i ai foi i le militeli. O lana galuega autu o se ofisa leoleo, ma o lana sini faalematata o le avea lea ma se leoleo nana ona toe foi ai lea i lona atunuu moni ma faaauau ai ona faigaluega iina.

Sa le mafai lava ona asi e le faiaoga o aiga o ia i lona fale. Sa ia tesi atu ia te ia mai lea taimi i lea taimi. O masina uma na te auina atu ai se tusi tusitusia, faaopoopo i ai ma kata o aso malolo mo tamaiti taitasi.

Sa ia lei mauaina lava se tali. Ae sa iloa e le [tuafafine] ona faiaoga o aiga, le auala e faafesootai ai i la’ua, ma o le a la tumau pea i lenei auaunaga faaleperisitua.

Ona oo lea i se tasi aso sa maua ai [e le faiaoga o aiga] se tesi faananati mai ia te ia. Sa ia matua manaomia lava se fesoasoani. Sa ia lei iloaina po o ai le epikopo ae sa ia iloaina ona faiaoga o aiga.

I ni nai aso, o le a ia tuua ai le setete mo se toleniga faaleaoaoga a le militeli e tasi le masina le umi. Sa le mafai ona ia aveina lana fanau. O lona tina, lea sa tuu e tausia lana fanau, ua faatoa lele ese atu i Europa e tausi lana tane, o le sa i ai sona faalavelave faafuasei faafomai.

Sa lava tupe a le tuafafine le toaga lea e totogi ai le pepa malaga i Europa mo lana tama laitiiti ae sa le lava mo lana tama 12 tausaga le matua, o Eric. Sa ia fesili atu i lona faiaoga o aiga pe mafai ona ia sailia se aiga lelei o le Ekalesia e vaaia Eric i lo latou aiga mo le isi 30 aso e sosoo ai!

Sa toe tesi atu i ai le faiaoga o aiga o le a ia faia le mea sili na te mafaia. Ona ia faafesootaia lea o ona taitai perisitua. Sa tuu atu e le epikopo ia te ia le faamaoniga e talanoa ai i tagata o le aufono a le uarota, e aofia ai le peresitene o le Aualofa.

Sa vave lava ona maua e le peresitene o le Aualofa ni aiga lelei se toafa o le Ekalesia, sa i ai tamaiti sa tupulaga ma Eric, o e o le a avea o ia i o latou fale e ta’i vaiaso. I le aluga o le masina na sosoo ai, sa fafaga ai e nei aiga ia Eric, maua se potu mo ia i o latou falemautotogi tumutumu po o tamai fale, ave o ia i a latou gaoioiga ua leva ona fuafuaina o le taumafanafana, aumai o ia i le lotu, faaaofia o ia i a latou afiafi faaleaiga, ma isi mea faapena.

O aiga sa i ai ni tama na tupulaga ma Eric, sa latou faaaofia o ia i fonotaga ma gaoioiga a le korama a tiakono. I lenei vaitaimi o le 30 aso, sa alu Eric i le lotu i Aso Sa uma mo le taimi muamua lava.

Ina ua sau lona tina i le fale mai ana aoaoga, sa faaauau pea ona auai Eric i le lotu, e masani lava ma se tasi o nei aiga volenitia e toafa o le Ekalesia po o isi sa faauo ia te ia, sa aofia ai ma faiaoga asiasi a lona tina. Sa i’u ina faauuina o ia o se tiakono ma amata ai ona tufa atu le faamanatuga e le aunoa.

Ia, se’i o tatou vaavaai atu nei i le lumanai o Eric. O le a le faateia i tatou pe a avea o ia ma se taitai i le Ekalesia i le atunuu moni o lona tina pe a toefoi atu lona aiga iina—na mafua uma ona o le Au Paia sa galulue faatasi i le lotogatasi e auauna atu i lalo o le taitaiga a le epikopo, i le alofa mama i o latou loto faatasi ai ma le mana o le Agaga Paia.

Ua tatou iloa o le alofa mama e taua mo i tatou ina ia faaolaina ai i le malo o le Atua. Sa tusia e Moronae, “E vagana ai ua ia te outou le alofa mama e le mafai lava i se ala ona faaolaina outou i le malo o le Atua” (Moronae 10:21; tagai foi i le Eteru 12:34).

Ua tatou iloa foi o le alofa mama o se meaalofa e faaee mai i o tatou luga pe a uma mea uma e mafai ona tatou faia. E tatau ona tatou “tatalo atu i le Tamā ma le malosi atoa o le loto, ina ia faatumulia [tatou] i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso” (Moronae 7:48).

E foliga mai ia te a’u tatou te maua le Agaga o le Atua i se tulaga silisili pe a tatou taulai atu e auauna i isi. O le mafuaaga lenei ua i ai ai ia te i tatou le tiutetauave o le perisitua e auauna atu ai mo le Faaola. A tatou punouai i auaunaga i isi, tatou te le manatu tele la ia i tatou lava, ma mafai ai ona saunia atili le Agaga Paia e afio mai ia i tatou ma fesoasoani mai ia i tatou i la tatou sailiga o le olaga atoa ia maua le meaalofa o le alofa mama e faaee mai i o tatou luga.

Ou te tuu atu la’u molimau ua uma ona amataina e le Alii se laasaga sili agai i luma i Lana fuafuaga mo i tatou ina ia musuia atili ma alofa mama i a tatou galuega faaleauaunaga i le perisitua. Ou te faafetai mo Lona alofa, lea sa Ia foai maia ma le lotoalofa ia i tatou. Ou te molimau atu ai i le suafa o Iesu Keriso, amene.