បញ្ចេញពន្លឺរបស់អ្នក

ដោយ សារ៉ុន អូប៊ែង

ទីប្រឹក្សាទីមួយនៅក្នុងគណៈប្រធានសមាគមសង្គ្រោះទូទៅ

ឱ !បងប្អូនស្រីទាំងឡាយអើយ ពួកព្យាការីកំពុងហៅយើង ។ តើអ្នកយល់ព្រមធ្វើជាមនុស្សសុចរិតឬទេ ? តើអ្នកយល់ព្រមបង្ហាញសេចក្ដីជំនឿរបស់អ្នកឲ្យបានច្បាស់លាស់ឬទេ ? តើអ្នកយល់ព្រមបើកពន្លឺរបស់អ្នកឬទេ ?

អ្នកប្រហែលជាមិនដឹងរឿងនេះទេ ប៉ុន្តែប្រធាន ម៉នសុន និងខ្ញុំគឺជាបងប្អូនភ្លោះ ។ នៅថ្ងៃដែលខ្ញុំកើត—នៅក្នុងរដ្ឋកាលីហ្វូញ៉ាភាគខាងជើង—គឺចំម៉ោងនោះ ប្រធានថូម៉ាស ម៉នសុន វ័យ ៣៦ ឆ្នាំ ត្រូវបានគាំទ្រជាពួកសាវកដ៏ថ្មីបំផុត ។ ខ្ញុំស្រឡាញ់តំណដ៏ពិសេស និងផ្ទាល់ខ្លួនចំពោះព្យាការីរបស់ព្រះគឺប្រធាន ម៉នសុននេះណាស់ ។

ពួកព្យាការីកំពុងមានប្រសាសន៍អំពីស្ត្រី ។^១ អ្នកនឹងស្ដាប់ឮសម្ដីរបស់ពួកគាត់ខ្លះៗនៅក្នុងការប្រជុំនេះ ។ សម្រាប់អត្ថបទរបស់ខ្ញុំ ខ្ញុំនឹងត្រឡប់ទៅកាន់ការព្យាករដ៏អស្ចារ្យមួយកាលពីរយៈពេល៤០ ឆ្នាំមុន ដោយប្រធាន ស្ពែនស៊ើរ ដបុលយូ ឃឹមបឹល ។ នៅខែកញ្ញា ឆ្នាំ ១៩៧៩ គឺជាលើកទីពីរដែលស្ត្រីនៃសាសនាចក្រទូទាំងសាកលលោកបានជួបជុំគ្នានៅក្នុងការប្រជុំទូទៅរបស់ខ្លួន ។ ប្រធាន ឃឹមបឹល បានរៀបចំការនិយាយរបស់លោក ប៉ុន្តែនៅពេលថ្ងៃសន្និសីទនោះមកដល់ លោកត្រូវចូលមន្ទីរពេទ្យ ។ ដូច្នេះលោកបានសុំឲ្យភរិយារបស់លោក ខាមីឡា អាវរិង ឃឹមបឹល អានសុន្ទរកថារបស់លោកជំនួសលោក ។^២

រូបភាព

ស៊ិស្ទើរ ឃឹមបឹល កំពុងអានប្រសាសន៍របស់ព្យាការីនៅលើវេទិកា

ស៊ិស្ទើរ ឃឹមបឹល អានប្រសាសន៍របស់ព្យាការី ដែលគូសបញ្ជាក់អំពីឥទ្ធិពលរបស់ស្ត្រីអិល.ឌី.អែស ទៅលើស្ដ្រីល្អៗក្នុងពិភពលោកពីមុនការយាងមកជាលើកទីពីររបស់ព្រះអង្គសង្គ្រោះ ។ នៅជិតចុងបញ្ចប់ប្រសាសន៍នោះ មានអារម្មណ៍ដ៏រំជើបរំជួលមួយចំពោះស្ត្រីនៃសាសនាចក្រ ដែលយើងបាននិយាយអំពីវាចាប់តាំងពីពេលនោះមក ។

ខ្ញុំសូមដកស្រង់បន្ដិចបន្ដួចអំពីអ្វីដែលប្រធាន ឃឹមបឹល មានប្រសាសន៍ ៖

« ទីបំផុត ឱ ! បងប្អូនស្រីជាទីស្រឡាញ់របស់ខ្ញុំអើយ ខ្ញុំសូមផ្ដល់យោបល់ដល់អ្នកនូវរឿងមួយដែលពុំបាននិយាយពីមុនមក ឬយ៉ាងហោចណាស់បាននិយាយតាមរបៀបនេះនោះទេ ។ ការរីកចម្រើនចម្បងបំផុតដែលកំពុងតែកើតមានក្នុងសាសនាចក្រនៅថ្ងៃចុងក្រោយនឹងកើតមានឡើង ដោយសារតែស្ត្រីល្អៗជាច្រើនក្នុងពិភពលោក… នឹងនាំមកក្នុងសាសនាចក្រក្នុងចំនួនដ៏ច្រើនសន្ធឹក ។ ការណ៍នេះនឹងកើតមានឡើងក្នុងកម្រិតមួយដែលស្ត្រី នៃសាសនាចក្រឆ្លុះបញ្ចាំងពីសេចក្ដីសុចរិត និងការប៉ិនប្រសប់នៅក្នុងជីវិតរបស់ពួកគេ និងក្នុងកម្រិតមួយដែលស្ត្រីនៃសាសនាចក្រត្រូវបានគេមើលឃើញថាខុសប្លែក និង ផ្សេងពីគេ—ក្នុងរបៀបដ៏រីករាយ—ខុសពីស្ត្រីខាងលោកិយ ។

« នៅក្នុងចំណោមវីរជនពិតៗនៅលើពិភពលោកដែលនឹងមកក្នុងសាសនាចក្រនេះ គឺជាស្ត្រីដែលមានការខ្វល់ខ្វាយចំពោះការរស់នៅដោយសុចរិតជាជាងការមានភាពអត្មានិយម ។ វីរជនពិតៗទាំងនេះ មានការបន្ទាបខ្លួនដ៏ពិត ដែលដាក់តម្លៃកាន់តែខ្ពស់ទៅលើសេចក្ដីសុចរិតជាជាងការបង្ហាញមុខមាត់ ។…

« … វានឹងជា … គំរូនៃស្រ្តីនៅក្នុងសាសនាចក្រ [ ដែល ] នឹងជាកម្លាំងដ៏សំខាន់មួយទាំងការរីកចម្រើននៃចំនួន និងខាងវិញ្ញាណក្នុងសាសនាចក្រនៅថ្ងៃចុងក្រោយ ។^៣

ឱនោះជាសេចក្ដីថ្លែងដ៏អស្ចារ្យអ្វីម៉្លេះរបស់ព្យាការី ។ ដោយគ្រាន់តែចង់សង្ខេបថា ៖

វានឹងជាទំនាក់ទំនងល្អរបស់ស្ត្រីដែលនឹងបណ្ដាលឲ្យមានការរីកចម្រើនដ៏ធំក្នុងសាសនាចក្រនៅឆ្នាំក្រោយៗ ។
មិត្តភាពដែលស្ត្រីសមាគមសង្គ្រោះ យុវនារី និងកុមារីអង្គការបឋមសិក្សាស្ថាបនាឡើងដោយស្មោះស្ម័គ្រ ស្មោះត្រង់ ជាស្ត្រី និងយុវនារីល្អមកពីជំនឿផ្សេងនឹងក្លាយជាកម្លាំងដ៏សំខាន់មួយជារបៀបដែលសាសនាចក្ររីកចម្រើននៅថ្ងៃចុងក្រោយ ។
ប្រធាន ឃឹមបឹល បានហៅស្ត្រីទាំងនេះដែលមានជីវប្រវត្តិផ្សេងៗថាជា « វីរនារី » ដែលនឹងមានការខ្វល់ខ្វាយចំពោះការរស់នៅដោយសុចរិតជាជាងការមានភាពអត្មានិយម ដែលនឹងបង្ហាញយើងថាសេចក្ដីសុចរិតគឺមានតម្លៃជាជាងការបង្ហាញមុខមាត់ ។

ខ្ញុំបានជួបនឹងស្ត្រីល្អៗជាច្រើនទាំងនេះ នៅពេលខ្ញុំធ្វើកិច្ចការរបស់ខ្ញុំនៅជុំវិញពិភពលោក ។ មិត្តភាពរបស់ពួកគេគឺមានតម្លៃចំពោះខ្ញុំ ។ អ្នកស្គាល់ពួកគេផងដែរនៅក្នុងចំណោមមិត្តភក្ដិ និងអ្នកជិតខាងរបស់អ្នក ។ ពួកគេអាចជាសមាជិក ឬមិនអាចជាសមាជិកនៃសាសនាចក្រក្នុងពេលឥឡូវនេះមែន ប៉ុន្តែយើងទាក់ទងគ្នានៅក្នុងទំនាក់ទំនងដែលវាសំខាន់ណាស់ ។ មែនហើយតើយើងធ្វើចំណែករបស់យើងយ៉ាងដូចម្ដេច ? តើយើងគួរធ្វើយ៉ាងណា ? ប្រធាន ឃឹមបឹល សំដៅទៅលើរឿងប្រាំយ៉ាង ៖

ទីមួយ គឺធ្វើជាមនុស្សសុចរិត ។ ការធ្វើជាមនុស្សសុចរិត ពុំមានន័យថាត្រូវល្អឥតខ្ចោះ ឬមិនដែលធ្វើកំហុសនោះទេ ។ វាមានន័យថា ការអភិវឌ្ឍទំនាក់ទំនងនៅខាងក្នុងខ្លួនជាមួយនឹងព្រះ ប្រែចិត្តពីអំពើបាប និងកំហុសទាំងឡាយរបស់យើង ហើយស្ម័គ្រចិត្តជួយដល់អ្នកដទៃ ។

ស្ត្រីដែលប្រែចិត្តផ្លាស់ប្ដូរបុព្វហេតុនៃប្រវត្តិសាស្ត្រ ។ ខ្ញុំមានមិត្តម្នាក់ដែលជួបគ្រោះថ្នាក់ចរាចរណ៍មួយ កាលនាងនៅក្មេង ហើយបានញៀនទៅនឹងថ្នាំបំបាត់ការឈឺចាប់ ។ ក្រោយមក ឪពុកម្ដាយរបស់នាងបានលែងលះគ្នា ។ នាងបានមានគត៌ដោយសារទំនាក់ទំនងដ៏ខ្លីមួយ ហើយការញៀនរបស់នាងនៅតែបន្ដ ។ ប៉ុន្តែនាយប់មួយ នាងបានមើលទៅភាពរញ៉េរញ៉ៃ ច្របូកច្របល់ក្នុងជីវិតនាង ហើយបានគិតថា « ល្មមគ្រប់គ្រាន់ហើយ » ។ នាងបានស្រែកយំរកព្រះអង្គសង្គ្រោះ ព្រះយេស៊ូវគ្រីស្ទឲ្យជួយនាង ។ នាងបាននិយាយថា នាងបានដឹងថាព្រះយេស៊ូវគ្រីស្ទគឺមហិមាជាងស្ថានភាពដ៏អាក្រក់របស់នាង ហើយថានាងអាចទុកចិត្តលើកម្លាំងរបស់ទ្រង់ នៅពេលនាងដើរនៅផ្លូវនៃការប្រែចិត្ត ។

ដោយសារការត្រឡប់មកព្រះអម្ចាស់ ហើយត្រឡប់មកកាន់មាគ៌ារបស់ទ្រង់វិញ នាងបានផ្លាស់ប្ដូរផ្លូវដ៏ជាប្រវត្តិសាស្ត្ររបស់នាង និងរបស់កូនប្រុសតូចរបស់នាង និងស្វាមីថ្មីរបស់នាង ។ នាងសុចរិត ហើយនាងមានដួងចិត្តទូលាយចំពោះអ្នកដទៃដែលបានធ្វើកំហុសឆ្គង ហើយចង់ផ្លាស់ប្ដូរ ។ ក៏ដូចជាយើងទាំងអស់គ្នាផងដែរ នាងពុំល្អឥតខ្ចោះនោះទេ ប៉ុន្តែនាងបានដឹងពីរបៀបប្រែចិត្ត ហើយបន្ដព្យាយាម ។

ទីពីរ គឺធ្វើជាមនុស្សច្បាស់លាស់ ។ ការធ្វើជាមនុស្សច្បាស់លាស់មានន័យថា ត្រូវបង្ហាញអំពីអារម្មណ៍ដែលអ្នកមានអំពីអ្វីមួយ និងហេតុផលវាយ៉ាងច្បាស់លាស់ ។ កាលពីដើមឆ្នាំនេះ មានការបង្ហោះលើទំព័រព័ត៌មានហ្វេសប៊ុករបស់ខ្ញុំមួយដែលនិយាយអវិជ្ជមានអំពីពួកគ្រីស្ទាន។ ខ្ញុំបានអានវា ហើយមានអារម្មណ៍រំខានបន្ដិចបន្តួច ប៉ុន្តែខ្ញុំមិនអើពើរនឹងវាទេ ។ ប៉ុន្ដែ អ្នកស្គាល់គ្នាម្នាក់ដែលពុំមានជំនឿដូចយើង បានផ្ដល់មតិលើទំព័ររបស់នាង ។ នាងបានសរសេរថា ៖ « [ នេះគឺជា ] ការផ្ទុយទាំងស្រុងទៅនឹងអ្វីដែលព្រះយេស៊ូវធ្វើ—ទ្រង់មាន … ព្រះយោបល់ដ៏អស្ចារ្យ [ នៅក្នុង ] ជំនាន់របស់ទ្រង់ ដោយសារទ្រង់ … រាប់ពិភពលោកស្មើភាពគ្នា ។ … ទ្រង់ [ បានថ្លែង ] ទៅ[ ពួក ]ស្រីពេស្យា [ ទ្រង់ទទួលទាន ] ជាមួយនឹង[ ពួក ] អ្នកប្រមូល…ពន្ធ … , ធ្វើជាមិត្តជាមួយស្ត្រី និងកុមារដែលគ្មានលទ្ធភាព … , [ហើយ] ប្រទានរឿងសាសន៍សាម៉ារីល្អដល់យើង ។ … វាបន្ដថា … ពួកគ្រីស្ទានពិត នឹងព្យាយាមធ្វើជាមនុស្សដែលគួរឲ្យស្រឡាញ់បំផុតក្នុងពិភពលោក » ។ នៅពេលខ្ញុំអានរឿងនោះ ខ្ញុំប្រាប់ខ្លួនឯងថា « ហេតុអ្វីក៏ខ្ញុំមិនសរសេរដូច្នោះ ? »

យើងម្នាក់ៗចាំបាច់ត្រូវធ្វើជាមនុស្សច្បាស់លាស់ពីមូលហេតុនានាសម្រាប់ជំនឿរបស់យើង ។ តើអ្នកមានអារម្មណ៍យ៉ាងណាអំពីព្រះយេស៊ូវគ្រីស្ទ ? ហេតុអ្វីអ្នកស្ថិតនៅក្នុងសាសនាចក្រ ? ហេតុអ្វីអ្នកជឿថាព្រះគម្ពីរមរមនគឺជាព្រះគម្ពីរ ? តើអ្នកទទួលបានភាពសុខសាន្ដរបស់អ្នកនៅកន្លែងណា ? ហេតុអ្វីវាសំខាន់ដែលព្យាការីមានអ្វីមួយត្រូវប្រាប់នៅក្នុងឆ្នាំ ២០១៧ ? តើអ្នកដឹងថាលោកជាព្យាការីពិតដោយរបៀបណា ? សូមប្រើសំឡេង និងអំណាចរបស់អ្នកដើម្បីប្រាប់ឲ្យច្បាស់ពីអ្វីដែលអ្នកដឹង និងអារម្មណ៍របស់អ្នក—នៅលើប្រព័ន្ធផ្សព្វផ្សាយសង្គម នៅក្នុងការសន្ទនាជាមួយមិត្តរបស់អ្នក នៅពេលនិយាយជាមួយនឹងចៅៗរបស់អ្នក ។ សូមប្រាប់ពួកគេហេតុអ្វីអ្នកជឿ ហើយតើវាមានអារម្មណ៍យ៉ាងណា ប្រសិនបើអ្នកធ្លាប់សង្ស័យ តើអ្នកឆ្លងកាត់វាយ៉ាងដូចម្ដេច ហើយតើព្រះយេស៊ូវមានន័យយ៉ាងណាចំពោះអ្នក ។ ដូចសាវកពេត្រុសបានថ្លែង ៖ « មិនត្រូវឲ្យអ្នកខ្លាចឡើយ …ចូរឲ្យតាំងព្រះគ្រីស្ទឡើង ជាបរិសុទ្ធ នៅក្នុងចិត្តអ្នករាល់គ្នា ទុកជាព្រះអម្ចាស់ចុះ ហើយឲ្យប្រុងប្រៀបជានិច្ច ដើម្បីនឹងតបឆ្លើយដល់អ្នកណាដែលសួរពីហេតុនៃសេចក្តីសង្ឃឹមរបស់អ្នករាល់គ្នា » ។^៤

ទីបី គឺត្រូវធ្វើជាមនុស្សផ្សេងពីគេ ។ ខ្ញុំសូមប្រាប់អ្នកនូវរឿងមួយដែលកើតឡើងនៅខែកក្កដានេះនៅឆ្នេរសមុទ្រទីក្រុង ប៉ាណាម៉ា នៅរដ្ឋហ្លូរីដា ។^៥ រសៀលនោះ រ៉ូបឺតតា អឺសរី បានឃើញកូនប្រុសតូចពីរនាក់របស់នាង ស្រែករកជំនួយមកពីក្នុងសមុទ្រចម្ងាយ ៩០ ម៉ែត្រ ។ ពួកគេជាប់នៅក្នុងចរន្តទឹកដ៏ខ្លាំងមួយ ហើយកំពុងនាំចូលទៅក្នុងសមុទ្រ ។ គូស្វាមីភរិយាមួយគូនៅជិតនោះ បានព្យាយាមជួយក្មេងប្រុសទាំងពីរនាក់នោះ ប៉ុន្តែពួកគេក៏ត្រូវជាប់ក្នុងចរន្ដទឹកនោះដែរ ។ ដូច្នេះសមាជិកគ្រួសារ អឺសរី បានលោតទៅជួយសង្គ្រោះដល់អ្នកហែលទឹកដែលកំពុងមានបញ្ហានោះ តែមួយរំពេចសោះមានមនុស្សប្រាំបួននាក់ត្រូវជាប់នៅក្នុងចរន្ដទឹកគួចខ្លាំងនោះ ។

ពេលនោះគ្មានខ្សែពួរទេ ។ ក៏គ្មានអ្នកជួយសង្គ្រោះដែរ ។ ប៉ូលីសបានបញ្ជូនទូកជួយសង្គ្រោះមួយទៅ ប៉ុន្តែមនុស្សដែលនៅក្នុងសមុទ្រនោះកំពុងពុះពារអស់រយៈពេល ២០ នាទីមកហើយ ហើយក្បាលរបស់ពួកគេលិចទៅក្នុងទឹកដោយអស់កម្លាំង ។ នៅក្នុងចំណោមអ្នកមើលពីឆ្នេរ មាន ចេស៊ីកាមែ ស៊ីម៉ូន ។ ស្វាមីនាងមានគំនិតមួយដើម្បីបង្កើតជាការប្រទាក់ដៃគ្នា ។ ពួកគេស្រែកហៅមនុស្សនៅលើឆ្នេរទាំងអស់មកជួយ ហើយមានមនុស្សប្រទាក់ដៃគ្នាដើរចូលទៅក្នុងសមុទ្រជាច្រើននាក់ ។ ចេស៊ីកា បានសរសេរថា ៖ « ពេលមើលឃើញមនុស្សមិនស្គាល់គ្នាសោះបានមកជួយមកពីជាតិសាសន៍ និងភេទផ្សេងៗគ្នា វាគឺជារឿងដ៏អស្ចារ្យណាស់ ! »^៦ មានមនុស្ស ៨០ នាក់ប្រទាក់ដៃគ្នាទៅរកអ្នកហែលទឹកទាំងនោះ ។ សូមមើលរូបថតនេះអំពីគ្រាដ៏អស្ចារ្យនោះ ។

រូបភាព

អ្នកហែលទឹកបង្កើតជាការប្រទាក់ដៃគ្នា

មនុស្សគ្រប់គ្នានៅលើឆ្នេរអាចគិតត្រឹមតែដំណោះស្រាយតាមទម្លាប់ ហើយពួកគេត្រូវជាប់គាំង ។ ប៉ុន្តែក្នុងរយៈពេលមួយវិនាទីគូស្វាមីភរិយាមួយគូបានគិតឃើញដំណោះស្រាយផ្សេងមួយ ។ គំនិតថ្មី និងការច្នៃប្រឌិត គឺជាអំណោយទានខាងវិញ្ញាណ ។ នៅពេលយើងរក្សាសេចក្ដីសញ្ញារបស់យើង វាអាចធ្វើឲ្យយើងខុសពីអ្នកដទៃនៅក្នុងវប្បធម៌ និងសង្គមរបស់យើង ប៉ុន្តែវាឲ្យយើងទទួលបានការបំផុសគំនិត ដើម្បីយើងអាចគិតឃើញដំណោះស្រាយ មធ្យោបាយ និងការអនុវត្តផ្សេងៗ ។ យើងពុំតែងតែចុះសម្រុងនឹងពិភពលោកនេះទេ ប៉ុន្តែការធ្វើជាមនុស្សខុសពីគេក្នុងរបៀបវិជ្ជមាន អាចឲ្យយើងជួយអ្នកដទៃដែលកំពុងជួបបញ្ហា ។

ទីបួន គឺត្រូវធ្វើជាមនុស្សដាច់ដោយឡែកពីគេ ។ ការដាច់ដោយឡែកពីគេមានន័យថា ត្រូវបានគេទទួលស្គាល់យ៉ាងល្អ ។ ខ្ញុំសូមត្រឡប់ទៅរឿងអំពីចេស៊ីកាមែ ស៊ីម៉ូន នៅលើឆ្នេរសមុទ្រវិញ ។ នៅពេលការប្រទាក់ដៃគ្នានោះបានទៅរកអ្នកហែលទឹក នោះនាងបានដឹងថានាងអាចជួយបាន ។ ចេស៊ីកាមែ បាននិយាយថា « ខ្ញុំអាចអត់ដង្ហើម ហើយហែលជុំវិញអាងទឹកអូឡាំពិកដោយងាយ ! [ ខ្ញុំដឹងអំពីរបៀបចេញពីចរន្ដទឹកគួចនោះ ] ។ ខ្ញុំដឹងថាខ្ញុំអាចឲ្យ [ អ្នកហែលទឹកម្នាក់ៗ ] ទៅអ្នកដែលប្រទាក់ដៃគ្នានោះបាន » ។^៧ នាង និងស្វាមីនាងបានចាប់យកក្ដារប៊ូហ្គី ហើយហែលតាមការឈរប្រទាក់ដៃគ្នានោះ រហូតពួកគេ និងអ្នកជួយសង្គ្រោះដទៃទៀតឈោងទៅដល់អ្នកហែលទឹកទាំងនោះ រួចហើយពួកគេបានទាញអ្នកទាំងនោះម្ដងម្នាក់ៗមកឲ្យអ្នកប្រទាក់ដៃគ្នា ដើម្បីចម្លងពួកគេទៅទីសុវត្ថិភាពនៅលើឆ្នេរ ។ ចេស៊ីកាមានជំនាញដាច់ដោយឡែកពីគេ ៖ នាងបានដឹងអំពីរបៀបហែលបញ្ច្រាស់ចរន្ដទឹកគួច ។

ដំណឹងល្អដែលបានស្ដារឡើងវិញ ត្រូវបានគេទទួលស្គាល់យ៉ាងល្អ ។ ប៉ុន្តែយើងត្រូវធ្វើជាមនុស្សដាច់ដោយឡែកពីគេអំពីរបៀបដែលយើងធ្វើតាមដំណឹងល្អ ។ ក៏ដូចជា ចេស៊ីកា បានហាត់ហែលទឹកដែរ យើងចាំបាច់ត្រូវហាត់រស់នៅតាមដំណឹងល្អពីមុនគ្រាអាសន្ន ដើម្បីយើងនឹងរឹងមាំគ្រប់គ្រាន់ដើម្បីជួយអ្នកដទៃដែលត្រូវបានទាញយកទៅដោយចរន្ដទឹកគួចដោយឥតភ័យខ្លាច ។

ហើយចុងបញ្ចប់ ទីប្រាំ គឺត្រូវធ្វើពីចំណុចទីមួយដល់ទីបួនតាមរបៀបរីករាយ ។ ការមានភាពរីករាយពុំមានន័យថា ការបិទរូបញញឹមនៅលើមុខ ទោះជាមានរឿងអ្វីកើតឡើងនោះទេ ។ ប៉ុន្ដែវាមានន័យថា ជាការរក្សាក្រឹត្យវិន័យរបស់ព្រះ ហើយស្ថាបនា និងលើកស្ទួយអ្នកដទៃឡើង ។^៨ នៅពេលយើងស្ថាបនា នៅពេលយើងសម្រាលបន្ទុកអ្នកដទៃ វាធ្វើឲ្យជីវិតយើងមានពរតាមរបៀបជាច្រើនដែលការសាកល្បងរបស់យើងពុំអាចដកយកបាន ។ ខ្ញុំបានដាក់ពាក្យដកស្រង់មួយរបស់ប្រធាន ហ្គរដុន ហ៊ិងគ្លី នៅត្រង់កន្លែងដែលខ្ញុំមើលឃើញវារាល់ថ្ងៃ ។ លោកមានប្រសាសន៍ថា « ចូរអ្នកកុំ… ស្ថាបនាទុទិដ្ឋិនិយម ឬការចំអកឡើយ ។ អ្នកត្រូវមើលទៅមុខដោយសុទិដ្ឋិនិយម ធ្វើការដោយសេចក្តីជំនឿ ហើយលទ្ធផលនឹងកើតមានឡើង » ។^៩

ឧទាហរណ៍មួយអំពីស្មារតីសុទិដ្ឋិនិយមដ៏រីករាយ មានយុវនារីម្នាក់អាយុ ១៣ ឆ្នាំដែលខ្ញុំស្គាល់ឈ្មោះ អែលសា គ្រួសារនាងផ្លាស់ទៅ បាតុន រ៉ូហ្គ លូវីស៊ីអាណា ចម្ងាយ ២៩០០ គីឡូម៉ែត្រពីមិត្តរបស់នាង ។ វាពុំងាយស្រួលទេ ពេលអ្នកមានអាយុ ១៣ ឆ្នាំ ហើយត្រូវផ្លាស់ទៅកន្លែងថ្មីមួយនោះ ។ អែលសា ពុំដឹងច្បាស់ពីការផ្លាស់ប្ដូរនោះទេ ដូច្នេះឪពុករបស់នាងបានប្រសិទ្ធពរឲ្យនាង ។ នៅគ្រាដែលផ្ដល់ការប្រសិទ្ធពរនោះ ទូរសព្ទរបស់ម្ដាយនាងបានរោទិ៍ឡើងដោយមានសារមួយ ។ យុវនារីដែលរស់នៅលូវីស៊ីអាណា បានផ្ញើរូបថតនេះដែលមានចំណងជើងថា « សូមផ្លាស់មកក្នុងវួដរបស់ពួកយើង ! » ^១០

រូបភាព

យុវនារីកាន់ស្លាកស្វាគមន៍

យុវនារីទាំងនេះ ចង់បង្កើតភាពសុទិដ្ឋិនិយម ចំពោះអែលសា ទាំងមិនធ្លាប់ជួបនាងផង ។ ភាពក្លៀវក្លារបស់ពួកគេបង្កើតជាភាពសុទិដ្ឋិនិយមចំពោះ អែលសា អំពីការផ្លាស់ទៅ ហើយវាបានឆ្លើយនឹងការអធិស្ឋានរបស់នាងថាតើអ្វីៗនឹងល្អឬទេ ។

មានថាមពលមួយដែលកើតមានមកពីសុភមង្គល និងភាពសុទិដ្ឋិនិយមដែលពុំគ្រាន់តែប្រទានពរដល់យើងនោះទេ— វាថែមទាំងស្ថាបនាមនុស្សគ្រប់គ្នានៅជុំវិញយើងផងដែរ ។ គ្រប់រឿងតូចៗដែលអ្នកធ្វើដើម្បីបើកពន្លឺសុភមង្គលពិតនៅក្នុងជីវិតអ្នកដទៃ បង្ហាញថាអ្នកកំពុងកាន់គុបភ្លើងដែលប្រធានឃឹមបឹលបានដុតរួចហើយនោះ ។

ខ្ញុំមានអាយុ ១៥ ឆ្នាំ កាលប្រធាន ឃឹមបឹលថ្លែងសុន្ទរកថានោះ។ ពួកយើងដែលមានអាយុច្រើនជាង ៤០ ឆ្នាំ កំពុងមានការទទួលខុសត្រូវនេះ មកពីប្រធាន ឃឹមបឹល ចាប់តាំងពីថ្ងៃនោះមក ។ ឥឡូវ ខ្ញុំបានមើលទៅកុមារអាយុ ៨ ឆ្នាំ ១៤ ឆ្នាំ និង ២០ ឆ្នាំ និង ៣៥ ឆ្នាំ ហើយខ្ញុំកំពុងតែហុចគុបភ្លើងនេះដល់អ្នក ។ អ្នកគឺជាអនាគតថ្នាក់ដឹកនាំនៅក្នុងសាសនាចក្រនេះ ហើយវានឹងស្ថិតនៅលើអ្នកដើម្បីកាន់ពន្លឺនេះឆ្ពោះទៅមុខ ហើយបំពេញតាមការព្យាករណ៍នេះ ។ ពួកយើងដែលមានវ័យចាស់ជាង ៤០ ឆ្នាំប្រទាក់ដៃរបស់យើងតាមរយៈអ្នក ហើយដឹងពីកម្លាំង និងថាមពលរបស់អ្នក ។ ពួកយើងត្រូវការអ្នក ។

សូមស្ដាប់បទគម្ពីរនេះដែលមាននៅក្នុង គោលលទ្ធិ និងសេចក្ដីសញ្ញា. ៤៩:២៦–២៨ វាអាចត្រូវបានសរសេរនៅ ក្រោមស្ថានភាពផ្សេងៗ ប៉ុន្តែនាយប់នេះ តាមរយៈព្រះវិញ្ញាណបរិសុទ្ធ ខ្ញុំសង្ឃឹមថាអ្នកនឹងយកដាក់ជាការហៅផ្ទាល់ខ្លួនរបស់អ្នកចំពោះកិច្ចការពិសិដ្ឋនេះ ។

« មើលចុះ យើងប្រាប់អ្នកថា ចូរចេញទៅដូចជាយើងបានបញ្ជាអ្នក ចូរប្រែចិត្តពីអស់ទាំងអំពើបាបរបស់អ្នក ចូរសូមនោះអ្នករាល់គ្នានឹងបានទទួល ចូរគោះ នោះតែងនឹងបានបើកឲ្យអ្នក ។

« មើលចុះ យើងនឹងយាងនាំមុខអ្នក ហើយនឹងការពារនៅខាងក្រោយអ្នកផង ហើយយើងនឹងនៅ កណ្ដាលអ្នករាល់គ្នា ហើយអ្នកនឹងមិនត្រូវបំភាន់ឡើយ ។

« មើលចុះ យើងជាព្រះយេស៊ូវគ្រីស្ទ ហើយយើងមកយ៉ាងឆាប់រហ័ស » ។^១១

ខ្ញុំសូមអង្វរដល់បងប្អូនម្នាក់ៗឲ្យដាក់ខ្លួនអ្នកនៅត្រង់កន្លែងមួយដែលអ្នកអាចទទួលអារម្មណ៍សេចក្ដីស្រឡាញ់ដ៏សប្បុរសរបស់ព្រះមានចំពោះបងប្អូន ។ បងប្អូនពុំអាចដាក់ខ្លួនបងប្អូនឆ្ងាយហួសពីក្ដីស្រឡាញ់នោះឡើយ ។ នៅពេលបងប្អូនទទួលអារម្មណ៍ពីក្ដីស្រឡាញ់របស់ទ្រង់ នៅពេលបងប្អូនស្រឡាញ់ទ្រង់ បងប្អូននឹងប្រែចិត្ត ហើយរក្សាបទបញ្ញត្តិរបស់ទ្រង់ ។ នៅពេលអ្នករក្សាបទបញ្ញត្តិរបស់ទ្រង់ នោះទ្រង់អាចប្រើអ្នកនៅក្នុងកិច្ចការរបស់ទ្រង់ ។ កិច្ចការ និងសិរីល្អរបស់ទ្រង់ គឺភាពតម្កើងឡើង និងជីវិតអស់កល្បជានិច្ចរបស់ស្ត្រី និងបុរសទាំងឡាយ ។

ឱ ! បងប្អូនស្រីទាំងឡាយអើយ ពួកព្យាការីកំពុងហៅយើង ។ តើអ្នកយល់ព្រមធ្វើជាមនុស្សសុចរិតឬទេ ? តើអ្នកយល់ព្រមច្បាស់លាស់ចំពោះសេចក្ដីជំនឿរបស់អ្នកឬទេ ? តើអ្នកអាចធ្វើជាមនុស្សដាច់ដោយឡែក ហើយខុសប្លែកពីគេឬទេ ? តើសុភមង្គលរបស់អ្នកដោយមិនគិតពីការសាកល្បងរបស់អ្នកជាយ៉ាងណា នឹងនាំអ្នកដទៃដែលល្អ និងថ្លៃថ្នូរ និងអ្នកដែលត្រូវការមិត្តភាពរបស់អ្នកដែរឬទេ ? តើអ្នកយល់ព្រមបើកពន្លឺរបស់អ្នកឬទេ ? ខ្ញុំសូមថ្លែងទីបន្ទលា់ថា ព្រះអម្ចាស់ព្រះយេស៊ូវគ្រីស្ទនឹងយាងទៅពីមុខយើង ហើយគង់នៅកណ្ដាលយើង ។

ខ្ញុំសូមបញ្ចប់ដោយពាក្យរបស់ព្យាការីជាទីស្រឡាញ់របស់យើង ជាថូម៉ាស អេស ម៉នសុន ៖ « ឱបងប្អូនស្ត្រីជាទីស្រឡាញ់ នេះគឺជាជំនាន់របស់អ្នក នេះគឺជាពេលវេលារបស់អ្នក » ។^១២ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។