Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?

Fai ʻe Palesiteni Russell M. Nelson

Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá

ʻOku ou fakamoʻoni ʻaki hoku lotó kotoa ʻoku akoʻi kitautolu ʻe he Tohi ʻa Molomoná ʻi ha founga fakaofo mo makehe, ʻo kau kia Sīsū Kalaisi mo ʻEne ongoongoleleí.

Ne fakaafeʻi au he 1986 ke u fai ha lea makehe ʻi ha ʻunivēsiti ʻi ʻAkalā, Kana. Ne u feʻiloaki ai mo ha kakai māʻolunga he puleʻangá, kau ai ha tuʻi mei ha matakali ʻAfilika. ʻI heʻemau pōtalanoa kimuʻa heʻeku leá, ne folofola mai e tuʻí kiate au ʻo fakafou heʻene fakatonuleá. Ne u tali ki he fakatonuleá, ʻo ne toki fakahoko ki he tuʻí.

Hili ʻeku leá, ne hangatonu mai e tuʻí kiate au, ka naʻe ʻikai haʻu ia mo ʻene fakatonuleá. Ne u ʻohovale heʻene lea faka-Pilitānia leleí—ʻo hangē pē ha taha mei ʻIngilaní!

Ne ngali puputuʻu e tuʻí. Naʻá ne ʻeke mai, “Ko hai koe?”

Ne u tali ange, “Ko ha ʻAposetolo au ʻa Sīsū Kalaisi kuo fakanofo.”

Ne fehuʻi mai e tuʻí, “Ko e hā te ke lava ʻo akoʻi mai kau kia Sīsū Kalaisi?”

Ne u tali ange ʻaki ha fehuʻi: “ʻE lava nai ke u ʻeke atu pe ko e hā e meʻa ʻokú ke ʻosi ʻiloʻi kau kiate Iá?”

Ne fakahaaʻi mai ʻe he tali ʻa e tuʻí ko ha tokotaha ako fakamaatoato ia ʻo e Tohi Tapú pea ʻokú ne ʻofa ʻi he ʻEikí.

Ne u ʻeke ange pe naʻá ne ʻilo fekauʻaki mo e ngāue ʻa Sīsū Kalaisi ki he kakai ʻi he kuonga ki muʻa ʻo ʻAmeliká?

Ne mahino ne ʻikai ke ne ʻilo ki ai.

Ne u fakamatalaʻi ange ne hili hono Tutuki mo e Toetuʻu ʻa e Fakamoʻuí, naʻá Ne hāʻele ki he kakai ʻi he kuonga ki muʻa ʻo ʻAmeliká, ʻo Ne akoʻi ai ʻEne ongoongoleleí. Naʻá Ne fokotuʻu Hono Siasí mo kole ki Heʻene kau ākongá ke nau tauhi ha lekooti ʻo ʻEne ngāue ʻiate kinautolú.

Ne u talaange, “ʻOku tau ui e lekooti ko iá ko e Tohi ʻa Molomoná. Ko ha fakamoʻoni ia e taha ʻo Sīsū Kalaisi. Ko ha folofola ia ʻoku vakavaka ua mo e Tohi Tapú.

Ne fuʻu tokanga ʻaupito e tuʻí ki he meʻá ni. Ne u tafoki ki he palesiteni fakamisiona naʻa ma ō fakatahá, ʻo ʻeke ange pe ʻoku ʻi ai haʻane Tohi ʻa Molomona. Naʻá ne toʻo hake ha tohi mei hono kató.

Ne u fakaava hake ki he vahe 11 ʻo e 3 Nīfaí, peá ma lau mo e tuʻí e malanga ʻa e Fakamoʻuí ki he kau Nīfaí. Ne u foaki ange leva e Tohi ʻa Molomoná kiate ia. Heʻikai ke toe ngalo ʻiate au ʻene talí: “Naʻá ke mei lava pē ʻo ʻomai haʻaku taiamoni pe makakoloa, ka ʻoku ʻikai ha meʻa ʻe mahuʻinga ange kiate au ka ko e ʻilo lahi ange ki he ʻEiki ko Sīsū Kalaisí.

Hili ʻene aʻusia e mālohi ʻo e folofola ʻa e Fakamoʻuí he 3 Nīfaí, ne folofola mai e tuʻí, “Kapau te u ului ki he Siasí, te u fekauʻi kotoa hoku matakalí ke nau kau mai.”

Ne u tali ange, “ʻE hoʻo ʻAfio, ʻoku ʻikai ke pehē ia. Ko e uluí ko ha meʻa fakataautaha ia. Ne ngāue fakatāutaha pē ʻa e Fakamoʻuí ki he kau Nīfaí. ʻOku maʻu ʻe he fakafoʻituituí ha fakamoʻoni mo e ʻilo ki he ongoongolelei ʻo Sīsū Kalaisí.”¹

Jesus Christ Appears to the Nephites

Siʻoku kāinga, ʻoku mahuʻinga fēfē kiate koe ʻa e Tohi ʻa Molomoná? Kapau ʻe foaki atu kiate koe ha taiamoni, makakoloa pe Tohi ʻa Molomoná, ko e fē meʻa te ke filí? Ko hono moʻoní, ko e fē ʻoku mahuʻinga ange kiate koé?

ʻI he fakatahaʻanga ʻo e pongipongi Sāpaté he konifelenisi lahi ʻo ʻEpeleli 2017, ne kole mai ʻe Palesiteni Tōmasi S. Monisoni “ke tau ako mo fakalaulauloto ʻi he faʻa lotu ki he Tohi ʻa Molomoná he ʻaho kotoa pē.”² Ne tokolahi ha kakai ne nau tali e kole ʻa hotau palōfitá.

Naʻe ʻikai ke u ʻiloʻi mo Laili taʻu valú, ʻoku faitaaʻi kimaua. Fakatokangaʻi ʻoku lau ʻe Laili ʻene Tohi ʻa Molomoná mo ha fakaʻilonga tohi “Ko e Fānau Au ʻa e ʻOtua.”

President Nelson and Riley studying the scriptures

ʻOku hoko ha meʻa mālohi he taimi ʻoku fekumi ai ha kiʻi tamasiʻi ke ʻilo lahi ange kiate Ia mo Hono ʻAlo ʻOfaʻangá. ʻOku ʻikai ha feituʻu ʻe toe mālohi mo mahino ange ai e ngaahi moʻoni ko iá ka ko e Tohi ʻa Molomoná.

Talu mei he fakaafe ne fai ʻe Palesiteni Monisoni he māhina ʻe ono kuo hilí, mo ʻeku feinga ke muimui ki heʻene faleʻí. Ne u lisi e ngaahi meʻa kau ki he Tohi ʻa Molomonámeʻa ʻokú ne fakapapauʻí meʻa ʻokú ne fakataʻeʻaongaʻí, meʻa ʻokú ne fakakakató, meʻa ʻokú ne fakamaʻalaʻalá, mo e meʻa ʻokú ne fakahaaʻí 3 Ko ha meʻa fakamāfana mo fakafiefia hono vakaiʻi e Tohi ʻa Molomoná he founga ko iá! ʻOku ou fokotuʻu atu ke ke fai ia.

Ne u toe fakaafeʻi mai mo ha kulupu kehekehe he māhina ko ʻeni ʻe onó—kau ai hoku ngaahi Tokoua ʻi he Kōlomu ʻo e Toko Hongofulu Mā Uá, kau faifekau ʻi Sileí, kau palesiteni fakamisioná mo honau ngaahi uaifí ʻi ʻĀsenitiná—ke nau fakakaukau ki ha fehuʻi ʻe tolu ʻoku nau fekauʻaki pea ʻoku ou kole atu ke ke fakakaukau ki ai he ʻahó ni:

ʻUluakí, naʻe mei fēfē nai hoʻo moʻuí, kapau naʻe ʻikai e Tohi ʻa Molomoná? Uá, ko e naʻe ʻikai ke ke mei ʻiló? Pea tolú, ko e hā naʻe ʻikai ke ke mei maʻú?

Ko e ngaahi tali loto vēkeveke mei he ngaahi kulupú ni ne haʻu ia mei honau lotó. Ko ha konga ʻeni ʻo ʻenau ngaahi talí:

Kapau naʻe ʻikai ha Tohi ʻa Molomona, ne u mei puputuʻu he ngaahi akonaki mo e fakakaukau ʻoku fepakipakí, ʻo kau ki ha ngaahi meʻa kehekehe. Te u ʻi he tuʻunga tatau pē ʻo hangē ko ia ne u ʻi ai kimuʻa peá u toki kau ki he Siasí, ʻo fekumi ki ha ʻilo, tui mo e ʻamanakí.”

Ne pehē ʻe ha tokotaha: “Ne ʻikai ke u mei ʻilo ki he fatongia ʻo e Laumālie Māʻoniʻoní heʻeku moʻuí.”

Ne pehē ʻe ha tokotaha: “Ne ʻikai ke mei mahino lelei kiate au ʻa e ʻuhinga ʻo ʻeku ʻi he māmaní!”

Ne pehē ʻe ha tali ʻe taha: “Naʻe ʻikai ke u mei ʻilo ʻoku hokohoko atu e fakalakalaká he hili ʻa e moʻuí ni. Tuʻunga he Tohi ʻa Molomoná, ʻoku ou ʻiloʻi lelei ai ʻoku ʻi ai e moʻui hili ʻa e maté. Ko e tumutumu ia ʻo e taumuʻa ʻoku tau ngāue ki aí.”

Ne hanga ʻe he tali fakamuimui ko ʻení ʻo ʻai ke u fakakaukau ki heʻeku moʻuí heʻeku hoko ko ha taha akoako toketā faitafa kei talavoú. Ko e taha e fatongia mafatukituki ʻo ha toketā faitafa, ko hono fakahā ki ha fāmili ʻa e mālōlō hanau ʻofaʻanga. Ne ʻi ai ha falemahaki ne u ngāue ai, ne ʻi ai ha loki makehe ne matolu hono holisí, ke fakahoko atu ai e ongoongo pehení ki he fāmilí. Ne ʻi ai ha kakai ʻe niʻihi ne fakahaaʻi ʻenau loto mamahí ʻaki hano tui ʻuluʻi e holisí. ʻEku fakaʻamua ko ia ke akoʻi ki he niʻihi fakafoʻituitui ko iá, neongo e faingataʻa e maté ki he niʻihi ʻoku kei moʻuí, ka ko ha konga mahuʻinga ia ʻo ʻetau moʻui taʻe-faʻa-maté. ʻOku fakaʻatā ʻe he maté kitautolu ke tau fakalakalaka atu ki he maama hono hokó.⁴

Ne tali ʻe ha tokotaha ʻeku fehuʻí ʻo pehē: “Ne ʻikai ha taumuʻa ʻo ʻeku moʻuí ka ne ʻikai ʻeku lau e Tohi ʻa Molomoná. Neongo ʻeku lotu mo ʻalu ki heʻemau lotú, ka ne tokoniʻi au ʻe he Tohi ʻa Molomoná ke u fuofua fetuʻutaki moʻoni mo e Tamai Hēvaní.”

Ne pehē ʻe ha tokotaha: “Ne toki mahino kiate au mei he Tohi ʻa Molomoná, ne ʻikai ngata pē he mamahi e Fakamoʻuí heʻeku angahalá, ka ʻokú Ne lava ʻo fakamoʻui au mei heʻeku mamahí mo e faingataʻaʻiá.”⁵

Ne pehē ʻe ha tokotaha: “Ne ʻikai ke u mei ʻiloʻi ʻoku ʻi ai ha kau palōfita ke tataki kitautolu.”

ʻI heʻetau faʻa ako fakamaatoato e ngaahi moʻoni mei he Tohi ʻa Molomoná, ʻe lava ke hoko ia ko ha meʻa liliu moʻui. Ko e taha homa mokopuna fefine ʻoku ngāue fakafaifekau, ko Sisitā ʻOlivia Nalesoni, naʻá ne fakapapauʻi ange ki ha taha naʻá ne akoʻi, ʻe sai hono maaka he sivi ʻi he ʻunivēsití kapau te ne lau fakaʻaho e Tohi ʻa Molomoná. Naʻá ne fai ia pea naʻe hoko ia.

Sister Olivia Nelson

Siʻoku kāinga ʻofeina, ʻoku ou fakamoʻoni ko e Tohi ʻa Molomoná ko e fololola moʻoni ia ʻa e ʻOtuá. ʻOku ʻi ai e tali ki he ngaahi fehuʻi mahuʻinga taha ʻo e moʻuí. ʻOkú ne akoʻi mai e tokāteline ʻo Kalaisí.⁶ ʻOkú ne tānaki mai mo fakamaʻalaʻala e ngaahi moʻoni “mahinongofua mo mahuʻinga”⁷ ne mole he ngaahi senituli ʻo taimí, mo hono toutou liliu ʻo e Tohi Tapú.

ʻOku ʻomi ʻe he Tohi ʻa Molomoná e mahinio kakato mo taupotu taha ki he Fakalelei ʻa Sīsū Kalaisí, he ʻikai ke toe maʻu ia mei ha feituʻu kehe. ʻOkú ne akoʻi moʻoni e ʻuhinga ʻo e fanauʻi foʻoú. ʻOku tau ʻilo mei he Tohi ʻa Molomoná ʻa hono tānaki ʻo ʻIsileli ne fakamoveteveteʻí. ʻOku tau ʻilo e ʻuhinga ʻo ʻetau ʻi he māmaní. Ko e ngaahi moʻoni ko ʻení mo ha ngaahi moʻoni kehe, ʻoku akoʻi lelei mo mālohi ia ʻi he Tohi ʻa Molomoná, ʻo mahulu ange ʻi ha toe tohi kehe. ʻOku tau maʻu e mālohi kakato ʻo e ongoongolelei ʻo Sīsū Kalaisí ʻi he Tohi ʻa Molomoná. Piliote ai.

ʻOku fakatou fakamaʻalaʻala ʻe he Tohi ʻa Molomoná e ngaahi akonaki ʻa e ʻEikí mo fakahaaʻi e ngaahi founga ʻa e filí.⁸ ʻOku akoʻi ʻe he Tohi ʻa Molomoná e tokāteline moʻoní ke kapusi ʻaki e ngaahi talatupuʻa hala fakalotú—hangē ko e meʻa hala lahi fau ko ia ko hono papitaiso ʻo e fānau valevalé.⁹ ʻOku ʻomi ʻe he Tohi ʻa Molomoná ha taumuʻa ki he moʻuí ʻaki hono fakaʻaiʻai kitautolu ke tau fakalaulauloto ke tau malava ʻo aʻusia e moʻui taʻengatá mo e “fiefia ʻoku ʻikai hano ngataʻangá.”¹⁰ ʻOku fakaʻauha ʻe he Tohi ʻa Molomoná e foʻi maʻu hala ko ia ʻoku lava ke maʻu ha fiefia he faiangahalá,¹¹ pea ko e meʻa pē ʻoku fie maʻu ke foki ai ki he ʻao ʻo e ʻOtuá, ko ha failelei fakafoʻituitui.¹² ʻOkú ne fakaʻauha taʻengata e foʻi maʻu hala naʻe ngata pē ʻa e maʻu fakahaá he Tohi Tapú pea kuo ʻikai toe fakaava mai ʻa e langí.

ʻI heʻeku fakakaukau ki he Tohi ʻa Molomoná, ʻoku ou fakakaukau ai ki he foʻi lea ko e mālohi. ʻOku maʻu ʻe he ngaahi moʻoni ʻo e Tohi ʻa Molomoná ʻa e mālohi ke fakamoʻui, fakafiemālieʻi, fakafoki, tokoniʻi, fakamālohia, fakanonga pea mo fakafiefiaʻi hotau lotó.

Siʻoku kāinga ʻofeina, ʻoku ou palōmesi atu ʻi hoʻo ako e Tohi ʻa Molomoná he ʻaho kotoa peé ʻe toe lelei ange ai hoʻo fai tuʻutuʻuní—he ʻaho kotoa pē ʻOku ou palōmesi atu ʻi hoʻo fakalaulauloto ki he meʻa ʻokú ke akó, ʻe fakaava mai e ngaahi matapā ʻo e langí, pea te ke maʻu e tali ki hoʻo ngaahi fehuʻí mo e tataki ki hoʻo moʻuí. ʻOku ou palōmesi atu ʻi hoʻo fakaʻutumauku fakaʻaho he Tohi ʻa Molomoná, ʻe lava ke maluʻi koe mei he ngaahi kovi ʻo e kuongá, kau ai e haʻahaʻa fakalilifu ʻo e ponokalafí mo e ngaahi maʻunimā ʻokú ne fakakonahi ʻetau fakakaukaú.

ʻI haʻaku fanongo ki ha taha ʻo aʻu pē kiate au ʻokú ne pehē, “ʻOku ou ʻiloʻi ʻoku moʻoni e Tohi ʻa Molomoná,” ʻoku ou fie pehē ange au, “ʻOku lelei ia, ka ʻoku ʻikai feʻunga ia!” ʻOku fie maʻu ke tau ongoʻi moʻoni ʻi he konga “loloto taha” ʻo hotau lotó,¹³ ko e Tohi ʻa Molomoná ko e folofola moʻoni ia ʻa e ʻOtuá. Kuo pau ke tau fuʻu ongoʻi moʻoni ia pea ʻikai ke tau teitei loto ke ʻosi atu ha ʻaho taʻe te tau moʻui ʻaki ia. Te u toe fakaongo atu e lea ʻa Palesiteni Pilikihami ʻIongí, (1801-77) ʻo fakalea peheni, “Pehēange mai ne u maʻu e ongo leʻolahi ʻo ha mana fatulisi ʻe fitu ke fafangu ʻaki e kaka픹⁴ ki he moʻoni mo e mālohi ʻo e Tohi ʻa Molomoná.

ʻOku fie maʻu ke tau hangē ko e faifekau kei talavou ne ngāue ʻi ʻIulope naʻe ongo moʻoni kiate ia e moʻoni ʻo e Tohi ʻa Molomoná, ʻo ne lele mo ha tatau ʻo e tohi toputapú ni ki ha tangata he paʻaké naʻá ne toki ʻilo mo hono hoá.

Missionary running

ʻOku ou fakamoʻoni ko Siosefa Sāmitá ko e palōfita ia ʻo e kuonga fakaʻosí ni. Naʻá ne liliu e tohi toputapú ni ʻaki e meʻafoaki mo e mālohi ʻo e ʻOtuá. Ko e tohi ʻeni ʻe tokoni ki hono teuteuʻi ʻo e māmaní ki he Hāʻele ʻAngaua Mai ʻa e ʻEikí.

ʻOku ou fakamoʻoni ko Sīsū Kalaisí ko e ʻAlo moʻui ia ʻo hotau ʻOtua moʻuí. Ko ia hotau Fakamoʻuí mo e Huhuʻí, ko hotau Faʻifaʻitakiʻanga maʻongoʻongá, mo hotau Taukapo ki he Tamaí. Ko Ia ʻa e Mīsaia naʻe talaʻofa maí, ko e Mīsaia ʻi he matelié, mo e Mīsaia ʻo e nofotuʻí. ʻOku ou fakamoʻoni ʻaki hoku lotó kotoa ʻoku akoʻi kitautolu ʻe he Tohi ʻa Molomoná ʻi ha founga fakaofo mo makehe, ʻo kau kia Sīsū Kalaisi mo ʻEne ongoongoleleí.

ʻOku ou ʻilo ko Palesiteni Tōmasi S. Monisoní, ko e palōfita ia ʻa e ʻOtuá he māmaní he ʻahó ni. ʻOku ou ʻofa mo poupouʻi ia ʻaki hoku lotó kotoa. Ko ʻeku fakamoʻoní ia ʻi he huafa toputapu ʻo Sīsū Kalaisí, ʻēmeni.

President Nelson’s Book of Mormon Lists

Ko e Tohi ʻa Molomoná

• Toe Fakamoʻoni ʻe Taha ʻo Sīsū Kalaisi. Ko e kau tangata ne lahi ʻenau tohí ko—Nīfai, Sēkope, Molomona, Molonai—mo e tokotaha liliu leá, Siosefa Sāmita, ne nau hokokotoa ko e kau fakamoʻoni mātātonu ʻo e ʻEikí.

• Ko ha lekooti ʻo ʻEne ngāue he kakai ne nofo ʻi ʻAmelika Motuʻá.

• Ko e moʻoní, ʻi hono fakamoʻoniʻi ʻe he ʻEikí Tonu pē.

ʻOku fakapapauʻi mai ʻe he Tohi ʻa Molomoná:

• ʻA e tuʻunga fakafoʻituitui ʻo e Tamai Hēvaní mo Hono ʻAlo ʻOfaʻanga, ko Sīsū Kalaisí.

• Ko e fie maʻu e Hinga ʻa ʻĀtamá mo e poto ʻo ʻIví, ke maʻu ʻe he tangatá e fiefiá.

ʻOku fakahalaki ʻe he Tohi ʻa Molomonáʻa e fakakaukau ʻoku pehē:

• Ne ngata e fakangata e maʻu fakahaá ʻi he Tohi Tapú.

• ʻOku fie maʻu ke papitaiso e fānau valevalé.

• ʻE lava ke maʻu e fiefiá he faiangahalá.

• ʻOku sai pē angalelei fakafoʻituituí ki he hakeakiʻí (ʻoku fie maʻu e ngaahi ouaú mo e ngaahi fuakavá).

• Ne hanga ʻe he Hinga ʻa ʻĀtamá pea fakameleʻi ai e faʻahinga ʻo e tangatá ʻaki e “ʻuluaki angahalá.”

ʻOku fakakakato ʻe he Tohi ʻa Molomoná e ngaahi kikite fakatohitapú:

• ʻE fanongo e “fanga sipi kehé” ki hono leʻó.

• ʻE fakahoko ʻe he ʻOtuá “ha ngāue lahi mo fakaofo,” ʻo lea “hake mei he efú.”

• ʻE taha pē e “vaʻakau ʻo Siutá” mo e “vaʻakau ʻo Siosefá.”

• ʻE fakatahaʻi ʻa ʻIsileli ne fakamoveteveté “ʻi he ngaahi ʻaho fakamuí,” pea mo e founga ʻe fakahoko aí.

• Ko e hemisifia ʻAmeliká e fonua ki he tofiʻa ʻo e hako ʻo Siosefá.

ʻOku hanga ʻe he Tohi ʻa Molomoná ʻo fakamaʻalaʻala e mahino fekauʻaki mo e:

• Moʻui he maama fakalaumālié.

• Maté. Ko ha konga mahuʻinga ia ʻo e palani lahi ʻa e ʻOtuá ki he fiefiá.

• ʻOku kamata ʻi palataisi e moʻui hili e moʻui fakamatelié.

• Ko e toetuʻu ʻa e sinó, ʻoku toe fakatahaʻi ia mo e laumālié ʻo hoko ko ha sino taʻe-faʻa mate.

• ʻE fakamaauʻi kitautolu ʻe he ʻEikí ʻo fakatatau mo ʻetau ngaahi ngāué mo e ngaahi holi ʻo hotau lotó.

• Founga totonu hono fakahoko e ngaahi ouaú: hangē ko e papitaisó, sākalamēnití, mo hono foaki ʻo e Laumālie Māʻoniʻoní.

• Ko e Fakalelei ʻa Sīsū Kalaisí

• Ko e Toetuʻú.

• Ko e fatongia mahuʻinga ʻo e kau ʻāngeló.

• Ko e natula taʻengata ʻo e lakanga fakataulaʻeikí.

• Founga hono tākiekina e ʻulungāanga ʻo e tangatá ʻe he mālohi ʻo e folofolá kae ʻikai ko e mālohi ʻo e heletaá.

ʻOku fakahā mai ʻe he Tohi ʻa Molomoná e ngaahi fakamatala ne teʻeki ke ʻomi ki muʻa

• Ne fakahoko e papitaisó kimuʻa pea toki ʻaloʻi mai ʻa Sīsuú.

• Ne langa mo fakaʻaongaʻi e ngaahi temipalé ʻe he kakai ʻi ʻAmelika he kuonga muʻá.

• Ne mamata mai ʻa Siosefa ko e foha hono 11 ʻo ʻIsilelí, ki he fatongia fakaepalōfita ʻo Siosefa Sāmitá.

• Ne mamata mai ʻa Nīfai (600-592 B.C.) ki hono ʻiloʻi mo nofoʻi ʻo ʻAmeliká.

• Ne mole ha ngaahi konga mahuʻinga mo mahinongofua ʻo e Tohi Tapú.

• ʻOku foaki e Maama ʻo Kalaisí ki he taha kotoa pē.

• Ko e mahuʻinga ʻo e tauʻatāina ke fili fakatāutahá mo e fie maʻu ke ʻi ai e fehangahangai he meʻa kotoa pē.

• Ngaahi fakatokanga kau ki he “ngaahi kautaha fufuú.”

Maʻuʻanga fakamatalá

1. Vakai, 3 Nīfai 17:9–12.

2. Thomas S. Monson, “Ko e Mālohi ʻo e Tohi ʻa Molomoná,” pe Liahona, Mē 2017, 87.

3. Vakai, ʻAlamā 42:8

4. Vakai, ʻAlamā 7:11–12

5. Hangē ko ʻení, vakai ki he 2 Nīfai 31:2–21

6. Vakai, 1 Nīfai 13:29–33

7. Vakai, 2 Nephi 26–33

8. Vakai, Molonai 8:11–15

9. Mōsaia 2:41vakai foki ʻAlamā 28:12

10. Vakai, ʻAlamā 41:10–11

11. ʻOku fie maʻu foki mo e ngaahi ouau mo e fuakava toputapu makehe.

12. Vakai, ʻAlamā 13:27

13. Vakai, Ngaahi Akonaki ʻa e Kau Palesiteni ʻo e Siasí: Pilikihami ʻIongi (1997), 322--23. Naʻá ne ʻuhinga ki hono mahuʻinga ʻo e ngāue fakatemipalé mo e hisitōlia fakafāmilí.