Sa Mudu Li na Siga ni Cakacaka Mana?
    Footnotes

    Sa Mudu Li na Siga ni Cakacaka Mana?

    Na noda rai cecere taudua e dodonu me vakanamata ena cakacaka mana vakayalo ka tu vakarawarawa vei ira kece na luve ni Kalou.

    Ena yabaki sa oti, ena ilesilesi ki na vanua o California, keirau a lako kei na dua na peresitedi ni iteki ka veisiko vei Clark kei Holly Fales kei na nodrau matavuvale. Ea tukuni vei au ni rau a se qai sotava oti ga edua na cakacaka mana. Ena neirau yaco yani, ea sasaga o Clark me tucake ka kidavaki keirau me vaka ni a dara toka edua na iusuusu ni daku, domo, ka vakadreti tu na ligana ruarua.

    Ena rua na vula sa oti, o Clark, na luvena tagane o Ty, kei rauta ni 30 na itabagone tagane kei na iliuliu era a lako ena dua na itaviqaravi ena nodra cabeta na 14,180-fute (4,322 m) Mount Shasta, edua na ulunivanua cecere taudua e California. Ena ikarua ni siga ni cabe dredre qori, e levu vei ira a yacova na delana—a yaco ena ririko ka rawa mai na vica na vula ni vakavakarau.

    Dua vei ira na yaco e liu ena delana ena siga oya o Clark. Ni oti ga edua na cegu lekaleka volekata na bati ni delana, ea tucake okoya ka tekivu taubale. Ena nona lako oqori, ea tacaqe qai bale i muri ka ulabaleta na bati ni delana, qai lutu lala me rauta ni 40 na fute (12 m) qai toqiqi sobu na baba waicevata me rauta tale e 300 na fute (91 m). E veivakurabuitaki ni bula o Clark ia sa mavoa vakaca sara ka sega ni yavala rawa.

    Na cakacaka mana ka sotava o Clark ena ka vakadomobula oqo e se qai kena itekitekivu ga. Eso vei ira na imatai me ra yacovi koya yani “a yaco me” dua na ilawalawa dautaubale ka wili kina eso na dauveivueti ena ulunivanua kei na kenadau vakavuniwai ni leqa tubukoso. Era qaravi Clark sara vakatotolo ka vakarautaka eso na iyaya me vakatakatataki koya kina. Na ilawalawa oqo “a yaco me” ratou vakatovotovotaka tiko edua na iyaya ni veivosaki vou ka vakauta sara edua na kere veivuke tubukoso mai na vanua koya ka dau dredre kina na veitaratara ena talevoni. E dua na elikopita lailai ea talai sara yani vakatotolo ki Mount Shasta ka dua na auwa na kena yawa vakagauna. Ni oti e rua na sasaga rerevaki ka tawayaco me ro ena vanua cecere oya ka vakatovolei kina na waqavuka, kei na sasaga ena loma ni cagi veitubuyaki, a tovolea tale o pailate na ikatolu ka iotioti ni sasaga. Ni vakaroro yani na elikopita mai na duatale na yasana, “a yaco me” veisau na cagi ka ro yani na waqavuka valalekaleka ga ka rawa ni vakavodoki vakatotolo ena mosi o Clark ki na rumu lailai ena daku ni dabedabe nei pailate.

    Ena nona vakadikevi o Clark ena valenibula, e laurai e levu na ramusu e domona, dakuna, saresare, kei na ligana; e kalamu edua na yatevusa; kei na vuqa na mavoa kei na drakusi. Edua na dauveisele-ni-nave kilai levu “a yaco me” cakacaka tiko ena siga oya; ka dau tiko e valenibula oya vakavica walega ena dua na yabaki. Na vuniwai oqo ea qai tukuna emuri ni se sega ni raica edua me yacovi koya na mavoa vakaoya ki na suitu kei na salanidra-levu ki na domona kei na uluna ka qai bula. E sega walega ni namaki o Clark me bula ia me lesu tale ki na ituvaki vinaka taucoko. E vakamacalataka o dauveisele ni sega ni vakabauta na veika vakalou ia na kisi nei Clark e saqata kece na nona kilaka vakadaunivakadidike me baleta na mavoa vakanave ka rawa walega ni vakamacalataki ni cakacaka mana.

    Ena nodrau tinia o Clark kei Holly na italanoa veivakurabuitaki oqo, ea dredre saraga me’u vosa.Ea sega walega ni baleta na matata ni caka mana, ia e baleta edua e levu cake. Au a vakila edua na veivakauqeti kaukauwa—a ivakadinadina vakayalo—ni o Holly kei iratou yadua na lima na gone totoka ka ratou dabe wavokiti rau na itubutubu ena loma ni rumu e kaukauwa na nodratou vakabauta ka ratou na rawa ni ciqoma na cava ga ena yaco ena siga oya ia ratou na rawa-ka vakayalo tikoga.O Clark kei Holly kei rau na luvedrau qase, Ty kei Porter, eratou tiko maliwai keda nikua ena Vale ni Koniferedi.

    Ni’u vakasamataka vagumatua na ka eratou sotava na matavuvale na Fales, au a vakananuma na veika era sotava e lewe vuqa tale. Vakacava o ira na vuqavakavuqa na vakabauta-vuabale, tauri-veivakalougatataki-vakamatabete, masulaki-tawayalayala, daumaroroi-veiyalayalati, sinai-ena-inuinui Yalododonu Edaidai ka sega ni yaco mai nodra caka mana?Ke vakalailai mada ga ena sala era kila kina na caka mana. Ke vakalailai mada ga ena sala era rairai ciqoma kina na caka mana o ira tale eso.

    Vakacava o ira era bikai vakabibi—vakayago, vaka-vakasama, vakayalo—vakayabaki se vakatini na yabaki se nodra bula kece vakavuravura? Vakacava o ira era mate ni ra se gone sara?

    Ena vula rua ga sa oti, e rua na veiwatini tauri-ivolatara-ni-valetabu, kei tolu na gone daukaulotu kei na lima tale na gone ena kedratou maliwa, eratou vuka yani ena dua na waqavuka lailai ena dua na vuka lekaleka. Au yalodei ni ratou a masulaka na veimaroroi ni bera na vuka ka masu vagumatua sara ena gauna sa sotava na leqa bibi vakaidini na waqavuka ni se bera ni voca. E sega ni dua e bula. E vakacava o iratou?

    E dua beka na vuna era taroga kina na tamata vinaka kei na nodra daulomani na taro mai vei Momani: “Sa mudu li na siga ni cakacaka mana?”1

    Na noqu kila vakaiyalayala e sega ni vakamacalataka rawa na vuna edau yaco kina na veitakosovi vakalou ena so na gauna ka so tale na gauna e sega. De rairai sega beka vei keda na kilaka me baleta na veitikina bibi ni cakacaka mana.

    Vakavuqa eda vakamacalataka na caka mana me veivakabulai ka sega na kena veivakadeitaki vakavuniwai se na levei ni vakacalaka se leqa levu ena kena muri na veivakauqeti matata. Ia, na vakamacalataki ni caka mana me “dua na ka vinaka ka rawa mai na kaukauwa vakalou ka sega ni kila rawa na tamata”2 e solia edua na ivakamacala rabailevu ena veika e tawamudu na kena ituvaki. Na ivakamacala oqo e vukei keda talega me da raica vakarabailevu na itavi bibi ni vakabauta ena ciqomi ni cakacaka mana.

    E a vakatavulica o Moronai, “Ka a sega talega ni dua na gauna me a vakayacori kina e dua na veicakacaka mana me yacova ni ra sa vakabauta.”3 O Amoni ea vunautaka, “Sa vakarautaka tu gona kina na Kalou na sala me vakayacora kina na tamata na vei cakacaka mana lelevu, ena vakabauta ga.”4 Na Turaga e a vakatakila vei Josefa Simici, “Ni koi Au na Kalou, … au na vakayacora na cakacaka mana e vuqa … kivei ira kecega era sa vakabauta na yacaqu.”5

    Na Tui o Nepukanesa a vakaroti Setareki, Mesake, kei Apeti-niko ena veivakarerei me ratou qarava na matakau koula ka vakaduria okoya me kalou, “kevaka dou na bese ni vakarokorokotaka, dou na biu ga … kina loma ni lovo ni bukawaqa.” E qai vakacudrui iratou okoya ena “Ia ko cei na kalou ko ya me na vakabulai kemudou mai na ligaqu?”6

    Eratou qai kaya na tolu na tisaipeli yalodina oqo: “Ke sa vakaoqori, ko koya na neitou Kalou o koya keitou sa qarava sa rawata me vakabulai keitou mai na lovo ni bukawaqa. … Ia ke sega, mo ni kila, koi kemuni na tui, ni keitou sa bese ni qarava na nomuni kalou.”7

    Eratou vakasinaiti ena yalodei ni na vakabulai iratou na Kalou, “Ia ke sega,” e taucoko na nodratou vakabauta na Nona ituvatuva.

    Me vakatale ga oqori, ena dua na gauna ea taroga edua o Elder David A. Bednar na gone tagane ka a gadreva edua na veivakalougatataki vakamatabete, “Kevaka esa loma i Tamada Vakalomalagi mo sa vakadewataki ena mate ena nomu itabagone ki na vuravura ni yalo mo laki tomana kina na cakacaka, e tu vei iko na vakabauta mo yalorawarawa ki na Nona lewa ka sega ni vakabulai?”8 E tu beka vei keda na vakabauta meda “sega [ni] vakabulai” mai na veivakalolomataki vakavuravura me rawa kina ni da vakabulai tawamudu?

    Na taro bibi meda vakasamataka vagumatua oya “Meda biuta evei na noda vakabauta?” E vakanamata beka li na noda vakabauta ki na noda via vakacegui mai na mosi kei na rarawa, se e yavutaki matua vua na Kalou na Tamada kei na Nona ituvatuva savasava kei Jisu Karisito kei na Nona Veisorovaki? Na vakabauta na Tamada kei na Luvena e vukei keda me da kila ka ciqoma na Nodrau lewa ena noda vakavakarau ki na tawamudu.

    Nikua au vakadinadinataka na cakacaka mana. Ni’u luve ni kalou edua na cakacaka mana.9 Na rawati ni yago e itovo vata ka ucui Koya edua na cakacaka mana.10 Na isolisoli ni iVakabula edua na cakacaka mana.11 Na Veisorovaki i Jisu Karisito edua na cakacaka mana.12 Na kena rawa ni rawati na bula tawamudu edua na cakacaka mana.13

    E dina ni vinaka na masulaki kei na cakacakataki ni veitaqomaki kei na veivakabulai vakayago ena bula vakavuravura oqo, na noda rai cecere taudua e dodonu me vakanamata ena cakacaka mana vakayalo ka tu vakarawarawa vei ira kece na luve ni Kalou. Se vakaevei na noda kawatamata, se vakaevei na noda vanua, se vakaevei na ka eda sa cakava ni da veivutuni, se vakaevei na veika esa caka oti vei keda—o keda kece eda rawata vakatautauvata na cakacaka mana kece oqo. Eda bulataka tiko edua na cakacaka mana, ka vuqa tale na cakacaka mana sa tu mai liu. Ena yacai Jisu Karisito, emeni.