Mwaakan Ana Boki Moomon
I kaungai ngkami ni kabane n tataro mwaaka ni kamatebwaia ao iangoa raoi ana Boki Moomon ni katoa bong.
Tariu ao mwaneu aika kam tangiraki, I butimwaai ngkami ngkai ti a manga ikotaki riki ni korakoran ana maungatabu ni kabuta ana Ekaretia Iesu Kristo ibukiia aika Itiaki ni Boong aika Kaitira. Imwaain waakinan au marooro n te bong aei, I kan katanoatai nimaua tembora ake a na kateaki n taabo akana imwiina: Brasilia, Brazil; Manila, aonon, Philippines; Nairobi, Kenya, Pocatello, Idaho, USA; ao Saratonga Springs, Utah, USA.
Te ingabong aei I taetae n taekan mwaakan ana Boki Moomon ao kainnanoan kakawakina are ti karekea ngaira kain te Ekaretia ni kamatebwaia, n iangoia, ao kamwakura te reirei inanon maiura. Karekean kakawakin matoan ao koauan raoi ana Boki Moomon e aki ti taekinaki kakawakina.
Ti maeka inanon taai ake a kaonaki ma korakoran kaangaanga ao buakaka. Tera are e na kamanoira man te bure ao buakaka ake a tabangaki n te aonaaba? I katanoata bwa matoatoan koauan te Tia Kamaiu, Iesu Kristo, ao matoan koauan Ana euangkerio e na buokiira ni kairiira nakon kamanoara. Ngkana ko aki wareka ana Boki Moomon ni katoa bong, taiaoka wareka ana Boki Moomon ni katoa bong. Ngkana ko na warekia tataro mwaaka ma nanom ni koaua ni kan ataa te koaua, te Tamnei ae Raoiroi e na kaota te koaua nakoim. Ngkana e koaua—ao I kaotia ma te koaua are bon—Iotebwa Timiti bon ana burabeti are e noora te Atua ao Natina, Iesu Kristo.
Ibukina bwa Ana Boki Moomon e bon koaua, Ana Ekaretia Iesu Kristo ibukiia aika Itiaki ni Boong aika Kaitira bon ana Ekaretia te Uea iaon te aba, ao ana nakoanibonga te Atua ae mimitong e a tia ni kaokaki ibukin rakaia ao kakabwaiakiia Natina iaon te aba.
Ngkana akea am koaua ae matoa ni bwaai aikai, karaoa are e bon riai ni karekeaki teuana. E bon riai ibukim ni karekea oin am koaua ni kaangaangan taai aikai, ibukin aia koaua tabeman e na uotiko n ti karekea teutana. E ngae ngke, e karekeaki, te koaua e kainnanoa korakorana ao maiuna rinanon reitinakon te ongotaeka nakon ana tua te Atua ao rinanon te tataro ni katoa bong ao warekan booki aika tabu.
Raou ni beku n ana mwakuri te Uea aika kam tangiraki, I kaungaira ni kabane n tataro mwaaka ni kamatebwaia ao iangoa raoi ana Boki Moomon ni katoa bong. Ngkana ti karaoia, ti na ongo bwanaan te Tamnei, n totokoi kariiri, n tokanikai n te nanououa ao te maaku, ao ni karekei buoka mai i karawa inanon maiura. I kakoaua ma nanou ni kabane, n aran Iesu Kristo, amen.