Ang Iyang Kamot nga Naggiya Matag-adlaw
Ang Langitnong Amahan mas nasayud sa atong gikinahanglan kay ni bisan kinsa.
Usa sa labing pinalangga nga himan sa Langitnong Amahan sa paggiya sa Iyang mga anak mao ang mga matarung nga apohan. Ingon niana ang inahan sa akong papa. Usa ka higayon niana nakahinumdom ko sa bata pa ko gidisiplina ko sa akong amahan. Nagtan-aw niining pagkoriher, ang akong lola miingon, “Monte, nagtuo ko nga ang imong pagkoriher niya bangis ra kaayo.”
Mitubag ang akong amahan, “Ma, akong korhian ang akong mga anak sa akong gusto.”
Ug ang maalamon nakong apohan hinayng miingon, “Ug kon mao ako usab.”
Sigurado ko nga nakadungog ang akong amahan sa maalamon nga giya sa iyang mama nianang adlawa.
Kon paggiya ang hunahunaon, mahunahunaan nato ang himno nga nahibaloan natong tanan—“Ako Anak sa Dios.” Sa korus atong mabasa ang mga pulong “Agaka ko, tudloi ko, unsay buhaton.”1
Bag-uhay lang nakong nasabtan nga ang kuros maoy balaan nga direksyon sa ginikanan. Sa pagpamalandong niining mga pulong, nakaamgo ko nga kini naglakip og direksyon, anaa diha ang mas dakong kahulugan. Ang kada usa, nangamuyo sa inadlaw-adlaw nga ang Langitnong Amahan, mogiya, moagak ug moabay kanato.
Si Presidente Dieter F. Uchtdorf mipasabut: Ang atong Amahan sa Langit mas nasayud og maayo sa mga panginahanglan sa Iyang mga anak kay ni bisan kinsa. Kini ang Iyang buhat ug himaya sa padayon nga pagtabang kanato, paghatag kanato og talagsaon nga temporal ug espirituhanon nga mga kapanguhaan sa pagtabang kanato diha sa atong dalan pabalik ngadto Kaniya.”2
Paminaw niadtong mga pulong: Ang Langitnong Amahan mas nasayud unsay atong gikinahanglan kay ni bisan kinsa. Isip resulta, mihimo Siya og usa ka personal nga pakete sa pag-amuma nga haum sa matag usa nato. Aduna kini daghang kasangkapan. Naglakip kini sa Iyang Anak ug sa Pag-ula, ang Espiritu Santo, kasugoan, kasulatan, pag-ampo, mga propeta, mga apostoles, mga ginikanan, apohan, lider sa Simbahan, ug uban pa—ang tanan motabang nato nga makapuyo og balik Kaniya.
Mopaambit lang ko karon og pipila ka bahin sa kasangkapan sa pakete sa pag-amuma nga nakapaamgo nako nga ang mahigugmaong Amahan naggiya, ug mitabang nako ug sa akong pamilya? Ang akong pag-ampo mao nga matag usa ninyo moila sa inyong kasinatian nga giniyahan, gitabangan sa Langitnong Amahan, ug niana nga kahibalo, mopadayon mo nga masaligon, nasayud nga wala mo mag-inusara.
Ang kasugoan sa Langitnong Amahan mao ang importanting kasangkapan sa pakete sa pag-amuma. Sa pahayag ni Alma nga ang “pagkadautan dili mahitabo nga mahimo nga kalipay.”3 Ang pagpaundayon sa sayop nga kinaiya nga walay pagkoriher usa ka sayop nga kalooy ug nagpalig-on sa komon nga hunahuna nga tingali ang kadautan mahimong kalipay. Si Samuel nga Lamanite klarong misupak niini: “Gipangita ninyo ang kalipay sa pagbuhat sa kadautan, mga butang nga sukwahi sa kinaiya niana nga pagkamatarung nga anaa sa atong halangdon ug Walay Katapusan nga Pangulo.”4
Pinaagi sa Iyang mga propeta, makanunayong nagpahinumdom ang Langitnong Amahan nato nga ang pagkamatarung mao ang kalipay. Si Haring Benjamin, pananglit, mitudlo nga ang Langitnong Amahan “nagkinahanglan nga kamo kinahanglan mobuhat ingon nga siya nagsugo kaninyo; kay kon kamo mobuhat, siya diha-diha mopanalangin kaninyo.”5 Sa laing himno dunay susama nga pahinumdom:
Sa akong ika-14 nga adlawng natawhan, nakat-unan nako ang pipila niining mga panalangin. Nakamatngon ko og lahi nga linihokan sa akong mga ginikanan. Nagkonsiderar sa akong naobserbahan, nangutana ko, “Magmisyon ba kita?” Ang ekspresyon sa nawong sa akong inahan mikumpirmar sa akong suspitsa. Sa kaulahian, sa family council, nahibaloan namo nga ang among ginikanan gitawag sa pagdumala og misyon.
Nagpuyo mi sa usa ka matahum nga ranso didto sa Wyoming. Para nako, ang kinabuhi hingpit na. Inig uli nako sa balay gikan sa eskwelahan, humanon ang akong tulumanon, ug molakaw aron, mangayam, mangisda, o maglibut-libut uban sa akong iro.
Sa wala madugay human mahibaloi ang tawag, nakaamgo ko nga kinahanglan nakong biyaan ang akong iro, si Blue. Gipangutana nako ang akong amahan, unsa man ang angay nakong buhaton ni Blue. Gusto nakong ipasabut nga ang gipabuhat sa Dios dili makiangayon. Dili gayud nako makalimtan ang iyang tubag. Miingon siya, “Wala ko kasiguro. Basin dili nato kini mahimong dad-on, mao nga pangutan-a ang Langitnong Amahan.” Dili kadto mao ang tubag nga akong gipaabut.
Misugod ko sa pagbasa sa Basahon ni Mormon. Matinguhaon kong nag-ampo aron masayud kon ihatag ba nako ang akong iro. Walay tubag nga miabut nianang higayuna; apan, dunay hunahuna nga midulot gyud sa akong ulo: “Ayaw og pabug-at sa imong ginikanan.” Ayaw pabug-at. Akong gitawag ang imong mga ginikanan.”
“Nakahibalo ko unsa ang gikinahanglan sa Langitnong Amahan.” Kana nga kahibalo wala mopakunhod sa kasakit nga ihatag ang akong iro. Hinoon, tungod nianang gamayng sakripisyo, ang akong kasingkasing nalukmay ug mibati ko og kalinaw sa pagtinguha sa kabubut-on sa Langitnong Amahan.
Nagpasalamat ko akong Langitnong Amahan sa panalangin ug kalipay pinaagi sa kasulatan, pag-ampo, sa Espiritu Santo, ug sa usa ka takus nga amahan nga mihangop sa iyang katungdanan isip magtutudlo sa ebanghelyo sa iyang mga anak. Sila nagtudlo, naggiya nako, ug gani mitabang nako sa pagpangita sa agianan—ilabi na kon kinahanglan buhaton ang lisud nga butang.
Agi og dugang sa pag-angkon og kasangkapan sa pakete sa pag-amuma nga akong gisulti, kita gipanalanginan usag usa uban sa usa ka priesthood leader aron mogiya nato.
Si Presidente Boyd K. Packer miingon: “Ang mga Bishop dinasig! Matag usa nato adunay kagawasan sa pagdawat o pagsalikway sa tambag gikan sa atong mga lider, apan ayaw gayud ibaliwala ang tambag sa inyong bishop, nahatag man kini diha sa pulpit o sa indibidwal.”
Kining mga kalalakin-an naningkamot sa pagrepresentar sa Ginoo. Mabatan-on o tigulang, kon si Satanas gusto atong hunahunaon nga wala nay paglaum, anaa ang mga bishop sa paggiya nato. Kon hisgutan ang ubang mga bishop, nakakaplag ko og tema kalabut sa mga gikompesal nga pagsupak o ang inosente nga nag-antus sa grabe nga kasaypanan. Ang mga bishop diha-diha dayon gustong mopadayag og gugma sa Langitnong Amahan alang sa indibidwal ug sa tinguha nga motabang kaniya sa iyang pagpauli.
Tingali ang labing dakong kasangkapan sa pakete sa pag-amuma mahulagway niining mga pulong: Kay gihigugma gayud sa Dios ang kalibutan nga tungod niana gihatag niya ang iyang bugtong Anak.”8
Aron matudloan kita sa tanan nga angay natong buhaton, si Jesukristo nagtudlo sa dalan pinaagi sa paghatag og hingpit nga ehemplo nga kinahanglan natong sundon. Siya nangamuyo nato uban sa gituyhad nga mga bukton sa pagduol, sunod Kaniya.9 Ug kon kita mapakyas, nga mahitabo natong tanan, nagpahinumdom Siya nato, “Tan-awa, Ako, ang Dios, nag-antus niini nga mga butang alang sa tanan, nga sila unta dili mag-antus kon sila maghinulsol.”10
Pagkaanindot nga gasa! Ang paghinulsol dili usa ka silot; usa kini ka pribilehiyo. Pribilehiyo kini nga modala ug mogiya nato. Mao nga ang mga kasulatan namahayag nga kinahanglan walay laing isangyaw gawas sa paghinulsol.11
Daghan og kapanguhaan ang Langitnong Amahan, apan Siya kanunayng mogamit sa ubang tawo aron sa pag-abag Kaniya. Sa inadlaw-adlaw Siya naghatag nato og oportunidad, sa pagtudlo, paggiya, ug mo-abay sa nanginahanglan. Kita kinahanglan mosunod sa ehemplo sa Manluluwas. Kita usab kinahanglan anaa sa buhat sa Langitnong Amahan.
Isip Kinatibuk-ang Kapangulohan sa Young Men, nasayud kami nga ang kabatan-onan napalanginan kon ang ilang ginikanan ug mga lider molihok alang sa Langitnong Amahan sa pagtudlo, paggiya, ug pag-abay kanila. Tulo ka mga baruganan12 nga motabang nato nga mahimong kabahin sa pakete sa pag-amuma sa Langitnong Amahan mao ang:
Una, pakig-uban sa kabatan-onan. Si Presidente Hery B. Eyring mipasabut niining punto: “Adunay pipila ka butang nga atong mabuhat nga mahimong importante kaayo. Ang mas gamhanan kay sa paggamit sa mga pulong sa atong pagtudlo sa doktrina mao ang atong ehemplo sa pagsunod sa doktrina.”13 Ang pagtudlo sa kabatan-onan nagkinahanglan og pakig-uban nila. Ang gipahinungod nga oras mao ang pagpadayag og gugma nga nagtugot nato nga makatudlo pinaagi sa pulong ug ehemplo.
Ikaduha, aron tinud-anayng magiyahan ang kabatan-onan, kinahanglan gyud nga tabangan sila makakonektar sa langit. Ang panahon moabut kon ang matag usa kinahanglang mobarug. Ang Langitnong Amahan lamang ang anaa aron makagiya sa tanang panahon ug sa tanang dapit. Ang atong kabatan-onan kinahanglang makahibalo unsaon sa pagpangita ang giya sa Langitnong Amahan.
Ikatulo, kinahanglan atong tudloan ang kabatan-onan nga mogiya. Sama sa mahigugmaong mga ginikanan nga naggunit sa kamot sa masuso nga nagtuon sa paglakaw, buhian nato sila aron ang kabatan-onan mouswag. Ang pagtugot sa kabatan-onan nagkinahanglan og pailub ug gugma. Mas lisud ug magkinahanglan og mas dakong panahon kay sa atong pangunayan. Mahimong madagma sila sa agianan apan motabang kita nila.
Mga kaigsoonan, dunay mga panahon sa atong kinabuhi kon ang mga panalangin ug giya daw layo ug kulang. Sa maong panahon sa kalisud, si Elder D. Todd Christofferson misaad: “Himoa ang inyong mga pakigsaad nga labing mahinungdanon ug himoa ang inyong kamasulundon nga eksakto. Dayon makapangayo kamo diha sa pagtuo, nga walay pagduhaduha, sumala sa inyong panginahanglan, ug ang Dios motubag.” Siya mopaluyo ninyo samtang kamo nagbuhat ug nagbantay. Sa Iyang gitakda nga panahon ug paagi Siya motoyhad sa Iyang mga kamot diha ninyo, moingon, ‘Ania Ako.’”14
Sa ingon ana nga panahon, gitinguha nako ang tambag sa Langitnong Amahan pinaagi sa padayon ug kinasingkasing nga pag-ampo nga mikapin sa tuig sa pagpangita og sulbad sa lisud nga sitwasyon. Nakahibalo ko nga ang Langitnong Amahan motubag sa tanang sinsero nga pag-ampo. Apan usa ka adlaw miabut ko sa kawalay paglaum mao nga mitambong ko sa templo nga may pangutana: “Langitnong Amahan, nagpakabana ba Ikaw?”
Naglingkod ko sa hulatanan duol sa luyo sa Logan Utah Temple sa dihang, nasurprisa ko, ang ningsulod sa lawak nianang adlawa mao ang temple president si Vaugh J. Featherstone, suod sa among pamilya. Nagbarug siya sa atubangan sa kongregasyon ug mi-welcome namong tanan. Sa dihang nakabantay siya nako taliwala sa mga patron sa templo, mihunong siya sa pag-istorya, mitan-aw nako ug dayon miingon, “Brother Brough, nindot nga aniaka sa templo karon.”
Dili gyud nako makalimtan ang gibati nianang yano nga higayon. Kadto nga panagtagbo—daw sama ra nga—ang Langitnong Amahan mituyhad sa Iyang kamot ug nag-ingon, “Ania Ako.”
Nagpakabana gayud ang Langitnong Amahan ug maminaw ug motubag sa pag-ampo sa matag anak.15 Isip usa sa Iyang mga anak, nasayud ko nga ang tubag sa akong mga pag-ampo moabut sumala sa panahon sa Ginoo. Ug pinaagi niana nga kasinatian, mas nasabtan na nako nga kita mga anak sa Dios ug Siya mipadala nato dinhi aron mobati sa Iyang presensya karon ug mopuyo pag-usab uban kaniya sa umaabut.
Ako mopamatuod nga ang Langitnong Amahan motudlo, mogiya, ug motabang nato. Kon mosunod kita sa Iyang Anak ug mopatalinghug sa Iyang sulugoon, ang mga apostoles, ug propeta, makaplagan nato ang dalan ngadto sa kinabuhing dayon. Sa pangalan ni Jesukristo, amen.