Ug Ang Kinabuhing Dayon Mao Kini
Ang Dios nakaila kaninyo ug nagdapit kaninyo nga makaila Kaniya.
Mamulong ako kaninyo, ang bag-ong henerasyon—mga kabatan-onan ug mga young adult, minyo o dili—kamo nga umaabut nga mga lider niini nga Simbahan sa Ginoo. Uban sa tanang kadautan, kasamok, kahadlok, ug kalibug sa kalibutan karon, klaro akong mamulong kaninyo bahin sa kaharianon ug panalangin nga makaila sa Dios.
Si Jesukristo mitudlo og daghang mga kamatuoran nga nagpasabut sa plano sa Langitnong Amahan alang sa kalipay ug sa inyong luna diha niini. Motutok ko sa duha niini aron sa pagtabang ninyo nga makasabut sa inyong pagkatawo isip anak sa Dios ug masayud sa inyong katuyoan sa kinabuhi.
Una: “Kay gihigugma gayud sa Dios ang kalibutan, nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kondili may kinabuhing dayon.”1
Ikaduha: “Ug ang kinabuhing dayon mao kini, ang ilang pagpakaila kanimo nga mao ang bugtong tinuod nga Dios, ug kang Jesukristo, nga imong pinadala.”2
Palihug ibutang sa hunahuna kini nga mga kamatuoran—nagtudlo kini sa ngano—samtang maningkamot ko sa paghulagway kon sa unsang paagi kamo ug kitang tanan makaila sa Dios.
Ilha Siya pinaagi sa Pag-ampo
Akong batan-ong mga higala, makasugod kita sa pag-ila sa Dios pinaagi sa pag-ampo.
Niadtong Abril 7, 1829, ang 22 anyos nga si Oliver Cowdery misugod sa pagtrabaho isip tigsulat alang sa 23 anyos nga si Joseph Smith. Mga batan-on sila—sama gayud kaninyo. Si Oliver nangayo og kumpirmasyon gikan sa Dios kalabut sa Pagpahiuli ug sa iyang buhat diha niini. Agi og tubag, nakadawat siya sa mosunod nga pagpadayag:
“Tan-awa, ikaw nahibalo nga ikaw nagpakisayud kanako ug Ako milamdag sa imong panumduman. …
“Oo, Ako mosulti kanimo, nga ikaw unta mahibalo nga walay lain gawas sa Dios nga nasayud sa imong mga hunahuna ug sa mga katuyoan sa imong kasingkasing. …
“… Kon ikaw nagtinguha og dugang nga kamatuoran, hinumdumi ang gabii nga ikaw misangpit ngari kanako diha sa imong kasingkasing. …
“Wala ba Ako magsulti og kalinaw nganha sa imong hunahuna … ? Unsa ka labaw nga kamatuoran ang imong maangkon kay sa gikan sa Dios?”3
Kon mag-ampo kamo uban sa pagtuo, inyong mabati ang gugma sa Dios samtang ang Iyang Espiritu mamulong sa inyong kalag. Bisan unsa pa ka nag-inusara o walay kasiguroan ang inyong bation usahay, wala mo mag-inusara niini nga kalibutan. Ang Dios personal nga nakaila kaninyo. Samtang mag-ampo kamo, makaila kamo Kaniya.
Ilha Siya pinaagi sa Pagtuon sa Kasulatan
Samtang magtuon kamo sa mga kasulatan, dili lang kamo makat-on mahitungod sa Manluluwas, apan kamo sa tinuod makaila sa Manluluwas.
Niadtong Abril 1985, si Elder Bruce R. McConkie namulong sa kinatibuk-ang komperensya—13 lang ka adlaw sa wala pa siya mamatay. Mitapos siya uban niini nga pagpamatuod:
“Usa ako sa Iyang mga saksi, ug sa umaabut nga adlaw akong mahikap ang mga marka sa lansang sa Iyang mga kamot ug sa Iyang mga tiil ug mabasa sa akong mga luha ang Iyang mga tiil.
“Apan dili molabaw ang akong pagkaila unya kaniya kay sa karon nga Siya ang Anak sa Labawng Makagagahum nga Dios, nga Siya ang atong Manluluwas ug Manunubos, ug nga ang kaluwasan moabut pinaagi sa iyang maulaong dugo ug wala nay laing paagi.”4
Kadtong nakadungog ni Elder McConkie nga namulong nianang adlawa wala gayud makalimot kon unsay among gibati. Sa pagsugod niya sa iyang pakigpulong, gipadayag niya nganong ang iyang pagsaksi gamhanan kaayo. Siya miingon:
“Sa paghisgot niining talagsaong mga butang, mogamit ko sa kaugalingon nakong mga pulong, bisan tuod maghunahuna kamo nga mga pulong kini sa kasulatan. …
“Tinuod nga sa sinugdanan gisangyaw kini sa uban, apan ako na kini karon, tungod kay ang Balaang Espiritu sa Dios nagpamatuod kanako nga kini tinuod, ug daw gipadayag kini karon sa Ginoo kanako sa unang higayon. Sa ingon akong nadungog ang Iyang tingog ug nasayud sa Iyang pulong.”5
Samtang magtuon ug mamalandong kamo sa mga kasulatan, madungog usab ninyo ang tingog sa Dios, masayud sa Iyang mga pulong, ug makaila Kaniya. Ang Dios personal nga mopadayag sa Iyang mahangturong mga kamatuoran nganha kaninyo. Kini nga mga doktrina ug mga baruganan mahimong kabahin kon kinsa kamo ug magagikan sa inyo gayung kalag.
Agig dugang sa indibidwal nga pagtuon, ang pagtuon sa mga kasulatan isip usa ka pamilya importante.
Sa among balay gusto namong makat-on ang among mga anak sa pag-ila sa tingog sa Espiritu. Nagtuo kami nga nahitabo kana samtang nagtuon kami sa Basahon ni Mormon matag adlaw isip usa ka pamilya. Ang among pagpamatuod nalig-on samtang nag-istorya kami bahin sa sagradong mga kamatuoran.
Ang pagtuon sa kasulatan mahimong paagi aron ang Espiritu makahatag sa matag usa kanato og pinahaum nga pagtudlo. Samtang magtuon kamo sa mga kasulatan matag adlaw, mag-inusara, ug uban sa inyong pamilya, makakat-on kamo sa pag-ila sa tingog sa Espiritu ug makaila sa Dios.
Ilha Siya pinaagi sa Pagbuhat sa Iyang Kabubut-on
Agig dugang sa atong pag-ampo ug pagtuon sa mga kasulatan, kinahanglan natong buhaton ang kabubut-on sa Dios.
Ang Manluluwas mao ang atong hingpit nga ehemplo. Miingon Siya, “Kay ako nanaug gikan sa langit, dili sa pagbuhat sa akong kaugalingong kabubut-on, kondili sa kabubut-on sa nagpadala kanako.”6
Sa dihang ang nabanhaw nga Manluluwas mipakita sa mga Nephite, miingon Siya, “Tan-awa, Ako ang kahayag ug ang kinabuhi sa kalibutan; ug Ako nakainom gikan sa pait nga kopa nga gihatag sa Amahan ngari kanako, ug gihimaya ang Amahan sa akong pagpas-an sa mga sala sa kalibutan, diin pinaagi niini Ako mituman sa kabubut-on sa Amahan sa tanan nga mga butang gikan sa sinugdanan.”7
Kamo ug ako mobuhat sa kabubut-on sa Amahan pinaagi sa pagtuman sa atong mga pakigsaad, pagsunod sa mga sugo, ug pagserbisyo sa Dios ug sa atong isigkatawo.
Ang akong asawa, si Rhonda, ug ako dunay mga ginikanan nga ordinaryo lang nga mga tawo—tingali susama sa inyong mga ginikanan. Apan usa ka butang nga ganahan kaayo nako sa among mga ginikanan mao nga gipahinungod nila ang ilang kinabuhi sa pagserbisyo sa Dios, ug mitudlo sila kanamo sa pagbuhat usab niini.
Sa dihang ang mga ginikanan ni Rhonda duha pa lang ka tuig nga naminyo, ang iyang 23 anyos nga amahan gitawag sa pagserbisyo og full-time nga misyon. Gibiyaan niya ang iyang batan-ong asawa ug ang ilang 2 anyos nga anak nga babaye. Dayon ang iyang asawa gitawag sa pagserbisyo uban kaniya sa katapusang pito ka bulan sa iyang misyon—gibilin ang ilang anak sa mga paryente.
Paglabay sa pipila ka tuig, nga karon dunay upat ka anak, mibalhin sila sa Missoula, Montana, aron ang iyang papa makaeskwela sa unibersidad. Hinoon, pipila pa lang sila ka bulan didto dihang si Presidente Spencer W. Kimball ug Elder Mark E. Petersen mitawag sa akong ugangang lalaki nga mahimong unang presidente sa bag-ong gitukod nga Missoula stake. 34 anyos pa lang siya. Ang mga plano sa unibersidad gibiyaan samtang naningkamot siya sa pagbuhat sa kabubut-on sa Ginoo—dili sa iyang kaugalingon.
Ang akong mga ginikanan nakaserbisyo sa templo sobra sa 30 ka tuig—si Papa isip sealer, si Mama isip usa ka ordinance worker. Nakaserbisyo usab sila og lima ka full-time nga misyon—sa Riverside, California; Ulaanbaatar, Mongolia; Nairobi, Kenya; sa Nauvoo Illinois Temple; ug sa Monterrey Mexico Temple. Sa Mexico naningkamot sila og maayo nga makat-on og bag-ong pinulongan, nga dili sayon sa 80 anyos. Apan nagtinguha sila sa pagbuhat sa kabubut-on sa Ginoo kay sa pagpadayon sa ilang kaugalingong mga tinguha sa kinabuhi.
Ngadto kanila, ug sa tanang ingon ka mapahinunguron nga mga Santos sa Ulahing mga Adlaw sa tibuok kalibutan, akong ipalanog ang mga pulong nga gisulti sa Ginoo ngadto ni propeta Nephi, ang anak ni Helaman: “Bulahan [kamo], … alang niadto nga mga butang nga [inyong] nabuhat … sa walay kaluya … , [kay kamo] wala magtinguha sa [inyong] kaugalingon nga kinabuhi, apan nagtinguha sa akong kabubut-on, ug sa paghupot sa akong mga sugo.”8
Samtang magtinguha kita sa pagbuhat sa kabubut-on sa Dios pinaagi sa matinud-anong pagserbisyo Kaniya ug sa atong isigkatawo, atong mabati ang Iyang pag-aprubar ug makaila gayud Kaniya.
Ilha Siya pinaagi sa Pagkahimong sama Kaniya
Ang Manluluwas misulti kanato nga ang labing maayong paagi sa pag-ila sa Dios mao ang pagkahimong sama Kaniya. Mitudlo Siya: “Busa, unsa nga matang sa mga tawo kamo mahisama? Sa pagkatinuod Ako moingon nganha kaninyo, gani sama nga Ako mao.”9
Ang katakus mahinungdanon aron mahimong sama Kaniya. Siya mimando, “Magbalaan sa inyong mga kaugalingon; oo, limpyohi ang inyong mga kasingkasing, ug hugasi ang inyong mga kamot … aron Ako makahimo kaninyo nga limpyo.”10 Sa pagsugod sa proseso nga mahimong sama Kaniya, kita maghinulsol ug modawat sa Iyang kapasayloan, ug Siya molimpyo sa atong mga kalag.
Sa pagtabang kanato sa atong pag-uswag padulong sa Amahan, ang Ginoo mihatag kanato niini nga saad: “Ang matag kalag kinsa mobiya sa iyang mga sala ug moduol ngari kanako, ug motawag sa akong ngalan, ug mosunod sa akong tingog, ug mohupot sa akong mga sugo, makakita sa akong panagway ug masayudnga Ako mao.”11
Pinaagi sa atong pagtuo sa Iyang maulaong sakripisyo, ang Manluluwas molimpyo kanato, moayo kanato, ug makapahimo kanato nga makaila Kaniya pinaagi sa pagtabang kanato nga mahimong sama Kaniya. Si Mormon mitudlo, “Pag-ampo ngadto sa Amahan uban sa tibuok kusog sa kasingkasing, … aron mahimo kamo nga mga anak sa Dios; nga kon siya moabut kita mahisama kaniya.”12 Samtang maningkamot kita nga mahisama sa Dios, Siya makahimo kanato nga labaw pa kay sa atong mahimo sa atong kaugalingon.
Ilha Siya pinaagi sa Pagsunod sa mga Tigtudlo
Aron pagtabang kanato sa atong paningkamot, ang Dios mihatag kanato og mga ehemplo ug mga tigtudlo. Gusto nakong ipaambit ang akong mga pagbati kabahin sa usa nakong tigtudlo, si Elder Neal A. Maxwell. Kanunay siyang nagtinguha sa pagtugyan sa iyang kabubut-on ngadto sa kabubut-on sa Amahan sa iyang paningkamot nga mahimong sama sa Dios.
Sobra sa 20 ka tuig na ang milabay, iyang gipakigbahin ang iyang mga pagbati ngari nako human siya na-diagnose nga may kanser. Iya kong gisultihan, “Gusto ko nga anaa sa team, dinhi nga bahin [sa tabil] o sa pikas bahin. Dili ko gustong magpadaplin. Gusto kong moapil sa dula.”13
Sa misunod nga mga semana, nagduha-duha siyang mohangyo sa Dios sa pag-ayo kaniya; gusto lang niyang buhaton ang kabubut-on sa Dios. Ang iyang asawa, si Colleen, mipasabut nga ang unang hangyo ni Jesus sa Tanaman sa Getsemani mao ang “Kon mahimo man, isaylo lang kanako kining kopa.” Una pa ang Manluluwas miingon, “Ngani, dili sumala sa akong pagbuot, kondili sa imo.”14 Giawhag niya si Elder Maxwell sa pagsunod sa ehemplo sa Manluluwas, nga mangayo og kahupayan ug dayon motugyan sa iyang kabubut-on ngadto sa kabubut-on sa Dios, nga iyang gibuhat.15
Human mag-antus sa hilabihan, makapaluya nga pagtambal sa hapit usa ka tuig, siya hingpit nga nakabalik “sa dula.” Miserbisyo siya og pito pa ka tuig.
Duna koy pipila ka mga assignment uban niya atol niadto nga katuigan. Akong nabati ang iyang kamabination, kalooy, ug gugma. Nasaksihan nako ang iyang dugang espirituhanong kalunsay sa iyang nagpadayon nga pag-antus ug sa iyang padayon nga pagserbisyo samtang naningkamot siya nga mahisama sa Manluluwas.
Ang labing mahinungdanong ehemplo ug tigtudlo, nga anaa natong tanan, mao ang atong Ginoo ug Manluluwas, si Jesukristo, kinsa miingon: “Ako mao ang dalan, ang kamatuoran, ug ang kinabuhi: walay bisan kinsa nga makaadto sa Amahan, gawas kon pinaagi kanako.”16 “Umanhi ka ug sumunod kanako.”17
Akong batan-ong mga kaigsoonan, ang pag-ila sa Dios mao ang tibuok kinabuhi nga paningkamot. “Ug ang kinabuhing dayon mao kini, ang [among] pagpakaila … [sa] bugtong tinuod nga Dios, ug kang Jesukristo, nga pinadala [sa Amahan].”18
“Kita dili ba mopadayon sa hilabihan nga mahinungdanon nga katuyoan? … Pagmaisugon, [akong batan-ong mga higala]; ug sa kanunay, ngadto sa kadaugan!”19
Ang Dios nakaila kaninyo ug nagdapit kaninyo nga makaila Kaniya. Pag-ampo ngadto sa Amahan, pagtuon sa mga kasulatan, paningkamot sa pagbuhat sa kabubut-on sa Dios, paningkamot nga mahisama sa Manluluwas, ug pagsunod sa matarung nga mga tigtudlo. Samtang inyong buhaton, kamo makaila sa Dios ug ni Jesukristo, ug kamo makapanunod sa kinabuhing dayon. Kini ang akong pagdapit kaninyo isip gi-orden nga linain nga saksi Kanila. Sila buhi. Nahigugma Sila kaninyo. Niini ako mopamatuod sa pangalan ni Jesukristo, amen.