ចូរសិក្សាព្រះគម្ពីរ ចូររំពឹងទៅរកព្រះអម្ចាស់
តើបងប្អូនអាចឃើញថាព្រះគម្ពីរមរមនជាមូលដ្ឋាន ជាចំណុចសំខាន់នៃភាពរឹងមាំខាងវិញ្ញាណ របស់បងប្អូនដែរឬទេ ?
ម៉ារី អេលីស្សាប៊ែត រ៉ូលីន
ក្នុងគំនិតខ្ញុំ ខ្ញុំគិតស្រមៃថាបងប្អូនគឺជាជំនាន់កំពុងពេញវ័យ ដែលកំពុងទស្សនា ឬ ស្តាប់សម័យប្រជុំសន្និសីទនេះនៅគ្រប់ទិសទីទូទាំងពិភពលោក ។ ខ្ញុំសូមចែកចាយរឿងពិតមួយជាមួយបងប្អូន ជារឿងដែលអាចក្លាយជាគំរូ និង ជាមេរៀនផងដែរ ។ រឿងនេះបង្ហាញបងប្អូនអំពីរបៀបខិតកាន់តែជិតព្រះអម្ចាស់ និង មានសិទ្ធិទទួលបានអំណាចកាន់តែប្រសើរឡើងក្នុងការទប់ទល់នឹងការល្បួង ។
នេះគឺជារឿងមួយអំពីយុវនារីម្នាក់រស់នៅទីក្រុង នូវ យ៉ក ដែលបានបាត់បង់ឪពុកនាងពីមុននាងមានអាយុបីឆ្នាំ ដោយសារទូករបស់គាត់បានលិចនៅក្នុងបឹងដ៏ធំមួយ ។ រូបនាងផ្ទាល់ ម្តាយនាង បងប្រុស និង ប្អូនស្រីនាងបានប្តូរទៅនៅទីក្រុងថ្មីមួយនៅក្នុងរដ្ឋផ្សេងទៀត ដើម្បីរស់នៅជាមួយម្តាយមីង និង ឪពុកមារបស់នាង ។ បន្ទាប់ពីគ្រួសារនាងបានទៅដល់ទីនោះ អ្នកផ្សព្វផ្សាយសាសនា និង សមាជិកនៃសាសនាដែលទើបនឹងបង្កើតថ្មីបានចូលមកក្នុងទីក្រុងពួកគេ ដោយមានដំណឹងដ៏រុងរឿងមួយអំពីការស្តារឡើងវិញនៃដំណឹងល្អ ។ ពួកគេបានប្រាប់រឿងដ៏អស្ចារ្យមួយអំពីទេវតាមួយអង្គ ដែលបានប្រគល់កំណត់ត្រាបុរាណ ឲ្យទៅក្មេងប្រុសម្នាក់ឈ្មោះ យ៉ូសែប ស៊្មីធ ជាកំណត់ត្រាដែលលោកបានបកប្រែដោយព្រះចេស្តានៃព្រះ ។ មនុស្សពីរនាក់គឺ អូលីវើរ ខៅឌើរី និង យ៉ូហាន វិតមើរ ពិតជាបានឃើញកំណត់ត្រាបុរាណដែលមានឆ្លាក់អក្សរនៅលើសន្លឹកលោហធាតុនោះដោយផ្ទាល់ភ្នែក ហើយវិតមើរបានកាន់ផ្ទាំងមាសនោះដោយដៃលោកផ្ទាល់ ។ ក្រោយមកកំណត់ត្រានេះត្រូវបានបោះពុម្ព ហើយលោកបានយកគម្ពីរនោះទៅជាមួយលោក ។ ប្រាកដណាស់ឈ្មោះគម្ពីរនោះគឺ គម្ពីរមរមន ។
កាលអាយុ ១២ ឆ្នាំ ម៉ារី បានឮអ្នកផ្សព្វផ្សាយសាសនានិយាយអំពីគម្ពីរនេះ នាងមានអារម្មណ៍ពិសេសមួយក្នុងចិត្ត ។ ទោះបីជាគម្ពីរមរមនមានកម្រាស់ក្រាស់ក្តី ក៏ម៉ារីចង់អានវាយ៉ាងខ្លាំងដែរ ។ ពេលបងប្រុស វិតមើរបានចាកចេញទៅ គាត់បានឲ្យគម្ពីរដ៏មានតម្លៃនេះទៅ បងប្រុស អ៊ីសាក មួរលី ដែលជាមិត្តម្នាក់របស់ឪពុកមានាងម៉ារី ហើយក៏ជាអ្នកដឹកនាំក្នុងមូលដ្ឋានក្នុងព្រះវិហារថ្មីនោះ។
ក្រោយមកម៉ារីបានកត់ត្រាដូចនេះ ៖ « ខ្ញុំបានទៅផ្ទះរបស់ [ បងប្រុស មួរលី ] … ហើយបានសូមមើលគម្ពីរនោះ [ គាត់ ] បានដាក់គម្ពីរនោះក្នុងដៃរបស់ខ្ញុំ [ ហើយ ] កាលខ្ញុំសម្លឹងមើលវា ខ្ញុំមានបំណងចង់អានគម្ពីរនោះ ខ្ញុំពុំអាចឃាត់ចិត្តខ្លួនឯងបានឡើយ ហើយបានសូមយកគម្ពីរនោះទៅផ្ទះអាន ។ … គាត់បាននិយាយថា … គាត់ពុំសូវមានពេលអានគម្ពីរនេះឡើយ តែមានពួកបងប្អូនប្រុសមួយចំនួនបានមើលខ្លះៗ ប៉ុន្តែខ្ញុំបានទទូចសុំគាត់យ៉ាងខ្លាំង ទីបំផុតគាត់បាននិយាយថា ‹ ក្មួយតូច ប្រសិនបើក្មួយអាចយកគម្ពីរនេះមកវិញមុនអាហារពេលព្រឹកថ្ងៃស្អែក នោះក្មួយអាចយកគម្ពីរនេះទៅបាន › » ។
ម៉ារីបានយកគម្ពីរនោះរត់ទៅផ្ទះ ហើយនាងជក់ចិត្តនឹងគម្ពីរនោះយ៉ាងខ្លាំង ដែលធ្វើឲ្យនាងអានវាស្ទើរតែពេញមួយយប់ ។ លុះព្រឹកស្អែកឡើង ពេលនាងបានយកគម្ពីរមកសងវិញ បងប្រុស មួរលីនិយាយថា « ពូគិតថាក្មួយពុំបានអានគម្ពីរនេះច្រើនទេ ហើយពូជឿថា ក្មួយពុំអាចចាំសូម្បីតែមួយពាក្យពីក្នុងគម្ពីរនេះឡើយ » ។ ម៉ារីបានក្រោកឈរឡើង ហើយសូត្រខគម្ពីរដំបូងគេពីក្នុងព្រះគម្ពីរមរមនតាមការចាំរបស់នាង ។ ក្រោយមកនាងបានប្រាប់គាត់អំពីរឿងរបស់ព្យាការីនីហ្វៃ ។ ក្រោយមកម៉ារីបានសរសេរថា « គាត់បានសម្លឹងមើលខ្ញុំដោយក្តីភ្ញាក់ផ្អើល ហើយនិយាយថា ‹ ក្មួយតូច ក្មួយយកគម្ពីរនេះទៅផ្ទះវិញចុះ ហើយអានវាឲ្យចប់ ពូអាចរង់ចាំបាន › » ។
មិនយូរប៉ុន្មានក្រោយមក ម៉ារីបានអានគម្ពីរនោះចប់ ហើយនាងគឺជាមនុស្សដំបូងគេនៅក្នុងទីក្រុងនាង ដែលបានអានគម្ពីរនោះតាំងពីដើមដល់ចប់ ។ នាងបានដឹងថាគម្ពីរនោះពិត ហើយថាវាបានមកពីព្រះវរបិតាសួគ៌ ។ ដូច្នោះនាងបានសិក្សាព្រះគម្ពីរ នាងបានរំពឹងទៅរកព្រះអម្ចាស់ ។
មួយខែក្រោយមក មានភ្ញៀវពិសេសម្នាក់មកលេងផ្ទះនាង ។ នេះគឺជាអនុស្សាវរីយដែលម៉ារីបានកត់ត្រាទុកនៅថ្ងៃនោះ ៖ « កាល [ យ៉ូសែប ស៊្មីធ] បានឃើញខ្ញុំ នោះលោកបានមើលខ្ញុំដោយក្លៀវក្លា ។ … មួយសន្ទុះក្រោយមកលោក … បានផ្តល់ការប្រសិទ្ធពរដ៏អស្ចារ្យមួយដល់ខ្ញុំ … ហើយបានឲ្យព្រះគម្ពីរមរមននោះមកខ្ញុំជាអំណោយ ហើយលោកមានប្រសាសន៍ថា លោកនឹងឲ្យគម្ពីរមួយ [ ក្បាល ] ទៀតទៅបងប្រុស មួរលី ។ ពួកយើងទាំងអស់គ្នាទទួលអារម្មណ៍ថា លោកគឺជាបុរសរបស់ព្រះ ដ្បិតលោកមានប្រសាសន៍ដោយមានព្រះចេស្តា ហើយជាមនុស្សម្នាក់មានអំណាច » ។
ក្មេងស្រីតូច ម៉ារី អេលីស្សាបែត រ៉ូលីន បានឃើញអព្ភូតហេតុជាច្រើនផ្សេងទៀតនៅក្នុងជីវិតនាង ហើយនាងបានរក្សាទីបន្ទាល់នាងអំពីព្រះគម្ពីរមរមនជានិច្ច ។១ រឿងនេះមានន័យខ្លាំងណាស់ចំពោះខ្ញុំ ដោយសារគាត់គឺជីដូនលារបស់ខ្ញុំ ។ តាមរយៈគំរូរបស់ម៉ារី ជាមួយនឹងបទពិសោធន៍ផ្សេងទៀតក្នុងជីវិតខ្ញុំ នោះខ្ញុំបានរៀនថា គ្មាននរណាម្នាក់ក្មេងពេកក្នុងការស្វែងរក និង ទទួលបានទីបន្ទាល់ផ្ទាល់ខ្លួនអំពីព្រះគម្ពីរមរមនឡើយ ។
មូលដ្ឋាននៃទីបន្ទាល់របស់អ្នក
មានមេរៀនផ្ទាល់ខ្លួនមួយសម្រាប់បងប្អូននៅក្នុងរឿងរបស់ម៉ារី ។ បងប្អូនម្នាក់ៗ ទាំងយុវជន និង យុវនារី ព្រមទាំងក្មេងៗអាចមានអារម្មណ៍ដូចជាម៉ារីមានផងដែរ ។ ពេលបងប្អូនអានព្រះគម្ពីរមរមន ហើយអធិស្ឋានដោយមានបំណងចង់ដឹងថាពិត នោះបងប្អូនអាចទទួលការបំផុសគំនិតនៅក្នុងចិត្តបងប្អូនដូចម៉ារីបានទទួលផងដែរ ។ បងប្អូនក៏ឃើញថា ពេលបងប្អូនក្រោកឈរ ហើយថ្លែងទីបន្ទាល់អំពីព្រះគម្ពីរមរមន បងប្អូននឹងមានអារម្មណ៍ពីការបញ្ជាក់របស់ព្រះវិញ្ញាណដូចគ្នានោះ ។ ព្រះវិញ្ញាណបរិសុទ្ធនឹងមានបន្ទូលមកកាន់ដួងចិត្តបងប្អូន ។ បងប្អូនអាចទទួលអារម្មណ៍ពីការបញ្ជាក់របស់ព្រះវិញ្ញាណដូចគ្នានេះ ពេលបងប្អូនស្តាប់អ្នកដទៃចែកចាយទីបន្ទាល់ពួកគេអំពីគម្ពីរមរមន ។ សាក្សីខាងវិញ្ញាណទាំងនេះ អាចនាំឲ្យព្រះគម្ពីរមរមនក្លាយជាមូលដ្ឋាននៃទីបន្ទាល់របស់បងប្អូន ។
ខ្ញុំសូមពន្យល់អំពីរឿងនេះ ។ ព្យាការី យ៉ូសែប ស៊្មីធ ដែលបានបកប្រែព្រះគម្ពីរមរមនតាមរយៈ « អំណោយទាន និង ព្រះចេស្តានៃព្រះ » បានពិពណ៌នាអំពីព្រះគម្ពីរមរមនថាជា « គម្ពីរដ៏ត្រឹមត្រូវបំផុតជាងគម្ពីរនានាទាំងអស់នៅលើផែនដីនេះ ហើយជាមូលដ្ឋាននៃសាសនារបស់យើង » ។២
ចាប់តាំងពីគម្ពីរមរមនបានបោះពុម្ពលើកដំបូងក្នុងឆ្នាំ ១៨៣០ មានគម្ពីរនេះជាង ១៧៤ លានក្បាលត្រូវបានចេញផ្សាយជា ១១០ ភាសាផ្សេងៗគ្នា នេះបង្ហាញថាគម្ពីរមរមនគឺនៅតែជាមូលដ្ឋាននៃសាសនារបស់យើង ។ ប៉ុន្តែរឿងនេះមានន័យយ៉ាងណាចំពោះបងប្អូន ?
នៅក្នុងន័យស្ថាបត្យកម្ម ពាក្យមូលដ្ឋានគឺជាធាតុសំខាន់មួយនៅខ្លោងទ្វារចូលអគារ ។ វាគឺជាថ្មមួយដែលមានរូបរាងដូចជាស្នៀត នៅចំកណ្តាល ហើយវានៅត្រង់ចំណុចខ្ពស់បំផុតនៃខ្លោងទ្វារ ។ វាគឺជាថ្មសំខាន់ជាងថ្មផ្សេងៗទាំងអស់ ដោយសារវាទប់ជំហរខ្លោងទ្វារទាំងសង្ខាងឲ្យមានលំនឹង ការពារមិនឲ្យទ្វាររលំ ។ ហើយវាគឺជាធាតុនៃសំណង់ដែលធានាឲ្យច្រកចូល ឬ មានចន្លោះអាចចេញចូលបាន ។
នៅក្នុងន័យដំណឹងល្អ វាគឺជាអំណោយ និងពរជ័យមកពីព្រះអម្ចាស់ ដែលថាមូលដ្ឋាននៃសាសនារបស់យើង គឺជាអ្វីមួយដែលជាក់ស្តែង និង មានរូបរាងដូចជាព្រះគម្ពីរមរមន ដែលបងប្អូនអាចកាន់ ហើយអានវាបាន ។ តើបងប្អូនអាចឃើញថាព្រះគម្ពីរមរមនជាមូលដ្ឋាន ជាចំណុចសំខាន់នៃភាពរឹងមាំខាងវិញ្ញាណដែរឬទេ ?
ប្រធាន អ៊ែសរ៉ា ថាហ្វ ប៊ែនសឹនបានពន្យល់លើការបង្រៀនរបស់យ៉ូសែប ស្ម៊ីធ ។ លោកថ្លែងថា « មានរបៀបបីយ៉ាងដែល ព្រះគម្ពីរមរមនគឺជាមូលដ្ឋាននៃសាសនារបស់យើង ។ ព្រះគម្ពីរមរមនជាមូលដ្ឋាននៅក្នុងសាក្សីរបស់យើងអំពីព្រះគ្រីស្ទ ។ ព្រះគម្ពីរមរមនជាមូលដ្ឋាននៃគោលលទ្ធិរបស់យើង ។ ព្រះគម្ពីរមរមនជាមូលដ្ឋាននៃទីបន្ទាល់ » ។
ប្រធាន ប៊ែនសឹន បានបង្រៀនបន្ថែមទៀតថា ៖ « ព្រះគម្ពីរមរមនបង្រៀនសេចក្តីពិត [ និង ] ថ្លែងទីបន្ទាល់អំពីព្រះគ្រីស្ទដល់យើង ។ … ប៉ុន្តែមានអ្វីៗជាច្រើនទៀត ។ មានអំណាចមួយនៅក្នុងព្រះគម្ពីរដែលនឹងចាប់ផ្ដើមហូរចូលមកក្នុងជីវិតរបស់អ្នក ពេលអ្នកចាប់ផ្ដើមធ្វើការសិក្សាដោយហ្មត់ចត់អំពីព្រះគម្ពីរនោះ ។ អ្នកនឹងរកឃើញអំណាចកាន់តែមហិមា ដើម្បីទប់ទល់នឹងការល្បួង ។ … អ្នកនឹងរកឃើញអំណាចដើម្បីឈរនៅលើផ្លូវតូច និង ចង្អៀត » ។៣
សាក្សីផ្ទាល់ខ្លួនរបស់ខ្ញុំ
ចំពោះខ្ញុំ ព្រះគម្ពីរមរមនបានក្លាយជាមូលដ្ឋាននៃទីបន្ទាល់របស់ខ្ញុំ អស់ពេលជាច្រើនឆ្នាំ និង មានបទពិសោធន៍ជាច្រើនទៀតផងដែរ ។ បទពិសោធន៍ដ៏មានឥទ្ធិពលមួយក្នុងការបង្កើតឲ្យខ្ញុំមានទីបន្ទាល់នោះ គឺកាលខ្ញុំបម្រើជាអ្នកផ្សព្វផ្សាយសាសនាវ័យក្មេងនៅក្នុងតំបន់បេសកកម្មដំបូងរបស់ខ្ញុំគឺ ៖ គូម៉ាម៉ូតូ ប្រទេសជប៉ុន ។ ដៃគូខ្ញុំ និង រូបខ្ញុំបានធ្វើដំណើរផ្សព្វផ្សាយពីផ្ទះមួយទៅផ្ទះមួយទៀត ។ ខ្ញុំបានជួបជាមួយលោកយាយម្នាក់ ដែលចិត្តល្អអញ្ជើញពួកយើងឲ្យចូលទៅក្នុងផ្ទះរបស់គាត់ ដែលគេហៅថា genkan(ជេនកាន់) ជាភាសាជប៉ុន ។ គាត់បានឲ្យភេសជ្ជៈត្រជាក់ៗដល់ពួកយើងផឹកនាថ្ងៃដ៏ក្តៅនោះ ។ កាលនោះខ្ញុំទើបតែទៅដល់ប្រទេសជប៉ុន ហើយខ្ញុំទើបតែបានអានព្រះគម្ពីរមរមនចប់ ហើយបានអធិស្ឋានដោយស្មោះអស់ពីចិត្តដើម្បីចង់ដឹងថាគម្ពីរនេះពិតដែរឬទេ ។
ដោយសារខ្ញុំទើបតែទៅប្រទេសជប៉ុន នោះខ្ញុំនិយាយភាសាជប៉ុនពុំបានល្អទេ ។ មែនហើយ ខ្ញុំគិតថាលោកយាយម្នាក់នោះពុំយល់ច្រើនពីអ្វីដែលខ្ញុំបាននិយាយឡើយ ។ ខ្ញុំបានចាប់ផ្តើមបង្រៀនគាត់អំពីព្រះគម្ពីរមរមន ដោយពិពណ៌នាអំពីរបៀបដែលយ៉ូសែប ស្ម៊ីធ បានទទួលកំណត់ត្រាបុរាណដែលឆ្លាក់លើផ្ទាំងចំណារពីទេវតា និង របៀបដែលលោកបានបកប្រែគម្ពីរនេះដោយព្រះចេស្តានៃព្រះ ។
នៅពេលខ្ញុំបានថ្លែងទីបន្ទាល់របស់ខ្ញុំថា ព្រះគម្ពីរមរមនគឺជាព្រះបន្ទូលរបស់ព្រះ និង ជាសក្ខីបទមួយទៀតអំពីព្រះយេស៊ូវគ្រីស្ទ នោះខ្ញុំបានទទួលការបំផុសគំនិតដ៏ខ្លាំង រួមជាមួយនឹងអារម្មណ៍កក់ក្តៅនៃការលួងលោម និង ភាពសុខសាន្តក្នុងចិត្តរបស់ខ្ញុំ ដែលព្រះគម្ពីរពិពណ៌នាពីអារម្មណ៍ថា « ទ្រូងរបស់អ្នក [ ខ្មួលខ្មាញ់ ] ខាងក្នុង » ។៤ អារម្មណ៍នេះបានបញ្ជាក់ដល់ខ្ញុំតាមរបៀបមួយដ៏មានឥទ្ធិពលដែលថា ព្រះគម្ពីរមរមនពិតជាព្រះបន្ទូលនៃព្រះ ។ នៅគ្រានោះ ខ្ញុំមានអារម្មណ៍ពីព្រះវិញ្ញាណយ៉ាងខ្លាំង ដែលធ្វើឲ្យខ្ញុំយំ ខណៈដែលខ្ញុំបាននិយាយទៅលោកយាយជនជាតិជប៉ុននោះ ។ ខ្ញុំពុំភ្លេចពីអារម្មណ៍ដ៏ពិសេសនាថ្ងៃនោះឡើយ ។
សាក្សីផ្ទាល់ខ្លួនរបស់បងប្អូន
បងប្អូនម្នាក់ៗក៏អាចទទួលសាក្សីផ្ទាល់ខ្លួនអំពីគម្ពីរនេះផងដែរ ! តើបងប្អូនដឹងថាព្រះគម្ពីរមរមនសរសេរឡើងសម្រាប់បងប្អូន—និង សម្រាប់ជំនាន់របស់បងប្អូនដែរឬទេ ? គម្ពីរនេះគឺជាពរជ័យមួយនៃការរស់នៅក្នុងជំនាន់មួយដែលយើងហៅថាគ្រាកាន់កាប់ត្រួតត្រានៃពេលពេញកំណត់ ។ ដ្បិតគម្ពីរមរមនត្រូវបានសរសេរឡើងដោយអ្នកនិពន្ធពីបុរាណដ៏មានការបំផុសគំនិត—ពួកលោកជាច្រើននាក់គឺជាព្យាការី—តែពួកលោក និង ប្រជាជននៅជំនាន់ពួកលោកពុំបានទទួលប្រយោជន៍នៃការមានគម្ពីរនេះពេញលេញឡើយ ។ ឥឡូវបងប្អូនទទួលបានកំណត់ត្រាដ៏ពិសិដ្ឋនេះយ៉ាងងាយ ដែលព្យាការី ពួកសង្ឃ និង ស្តេចបានផ្តល់តម្លៃឲ្យ ឱបក្រសោប និង រក្សាទុក ! បងប្អូនទទួលប្រយោជន៍ដោយបានកាន់ព្រះគម្ពីរមរមនទាំងមូលនៅក្នុងដៃ ។ គួរឲ្យចាប់អារម្មណ៍ណាស់ មានព្យាការីក្នុងគម្ពីរមរមនម្នាក់គឺមរ៉ូណៃបានឃើញជំនាន់របស់យើង—គឺជំនាន់របស់បងប្អូន ។ លោកថែមទាំងបានឃើញបងប្អូននៅក្នុងការនិមិត្ត កាលពីរាប់រយឆ្នាំមុន ! មរ៉ូណៃបានសរសេរ ៖
« មើលចុះ ព្រះអម្ចាស់ទ្រង់បានបង្ហាញដល់ខ្ញុំនូវការណ៍ដ៏ធំ ហើយអស្ចារ្យទាំងឡាយ …អំពីថ្ងៃដែលការណ៍ទាំងនេះ គឺព្រះគម្ពីរមរមន នឹងកើតឡើងនៅក្នុងចំណោមពួកអ្នក ។
មើលចុះ ខ្ញុំនិយាយទៅកាន់អ្នករាល់គ្នា ហាក់បីដូចជាអ្នករាល់គ្នានៅទីនេះ ប៉ុន្តែអ្នករាល់គ្នាពុំនៅទីនេះទេ ។ ប៉ុន្តែមើលចុះ ព្រះយេស៊ូវគ្រីស្ទ ទ្រង់បង្ហាញអ្នករាល់គ្នាដល់ខ្ញុំ ហើយខ្ញុំដឹងនូវអ្វីៗដែលអ្នករាល់គ្នាធ្វើ » ។៥
ដើម្បីជួយឲ្យព្រះគម្ពីរមរមនក្លាយជាមូលដ្ឋាននៃទីបន្ទាល់របស់បងប្អូន នោះខ្ញុំសូមផ្តល់ការអញ្ជើញមួយដល់បងប្អូន ។ ថ្មីៗនេះខ្ញុំបានដឹងថា យុវវ័យជាច្រើនបានចំណាយពេលជាមធ្យមជិត ប្រាំពីរម៉ោងក្នុងមួយថ្ងៃមើល ទូរទស្សន៍ កុំព្យូទ័រ និង ទូរសព្ទស្មាតហ្វូន ។៦ សូមចាំក្នុងចិត្តថា តើបងប្អូនអាចធ្វើការផ្លាស់ប្តូរបន្តិចបានទេ ? តើរៀងរាល់ថ្ងៃបងប្អូនអាចជំនួសការមើលទាំងនោះ—ជាពិសេសប្រព័ន្ធផ្សព្វផ្សាយសង្គម អ៊ិនធើរណែត ហ្គេម ឬ ទូរទស្សន៍—ដោយការអានគម្ពីរមរមនបានដែរឬទេ ? ប្រសិនបើការសិក្សាដែលខ្ញុំបាននិយាយនោះវាពិតប្រាកដមែន នោះបងប្អូនអាចងាយរកពេលអានព្រះគម្ពីរមរមនត្រឹមតែ ១០ នាទីប៉ុណ្ណោះក្នុងមួយថ្ងៃ ។ ហើយបងប្អូនអាចសិក្សាវាតាមរបៀបមួយដែលធ្វើឲ្យបងប្អូនរីករាយ និង យល់អំពីវា—ទោះបីបងប្អូនអានតាមឧបករណ៍ចល័ត ឬ អានចេញពីគម្ពីរផ្ទាល់របស់ខ្លួនក្តី ។ ថ្មីៗនេះប្រធាន រ័សុល អិម ណិលសុន បានដាស់តឿនថា « យើងពុំគួរយកការអានព្រះគម្ពីរមរមនថា ជាកាតព្វកិច្ចដ៏ពិបាកធ្ងន់ធ្ងរនោះឡើយ គឺដូចជាការលេបថ្នាំល្វីងយ៉ាងលឿន ឲ្យតែរួចៗនោះឡើយ » ។៧
ចំពោះក្មេងតូចៗមួយចំនួន ក្មួយៗអាចអានគម្ពីរជាមួយឪពុកម្តាយ យាយតា ឬ មនុស្សជាទីស្រឡាញ់ ។ ប្រសិនបើមានជំពូក ខគម្ពីរ ឬ ផ្នែកណាមួយពិបាក ដែលធ្វើឲ្យក្មួយមិនចង់អាន សូមបន្តអានទៅមុខទៀត ។ ខ្ញុំស្រមៃឃើញបងប្អូនធ្វើតាមគំរូរបស់ម៉ារី ។ ខ្ញុំស្រមៃឃើញបងប្អូនរំភើបក្នុងការរកពេល និង កន្លែងស្ងប់ស្ងាត់អានព្រះគម្ពីរមរមន ។ ខ្ញុំស្រមៃឃើញបងប្អូនរកឃើញចម្លើយ ការណែនាំ ហើយទទួលបានទីបន្ទាល់ផ្ទាល់ខ្លួនអំពីព្រះគម្ពីរមរមន និង ទីបន្ទាល់អំពីព្រះយេស៊ូវគ្រីស្ទ ។ នៅពេលបងប្អូនសិក្សាព្រះគម្ពីរ នោះបងប្អូនរំពឹងទៅរកព្រះអម្ចាស់ ។
បងប្អូននឹងពិចារណាអំពីវគ្គបទគម្ពីរនៃគម្ពីរដ៏មានតម្លៃនេះ ហើយជួបព្រះអង្គសង្គ្រោះជាទីស្រឡាញ់របស់បងប្អូនគឺព្រះអម្ចាស់យេស៊ូវគ្រីស្ទ ស្ទើរតែគ្រប់ទំព័រ ។ តាមការប៉ានស្មានមួយថា ក្នុងទម្រង់មួយចំនួន ព្រះនាមរបស់ទ្រង់ត្រូវបានប្រើជាមធ្យម ១.៧ ខគម្ពីរម្តង ។៨ សូម្បីតែព្រះគ្រីស្ទផ្ទាល់ ទ្រង់បានថ្លែងទីបន្ទាល់អំពីភាពពិតពេញលេញនៃការណ៍នេះ នៅថ្ងៃចុងក្រោយនេះ ដោយថ្លែងថា « ប្រាកដដូចជាព្រះអម្ចាស់របស់អ្នក និងព្រះរបស់អ្នក ទ្រង់មានព្រះជន្មរស់នៅ ការណ៍នោះពិតមែន » ។៩
ខ្ញុំមានអំណរគុណចំពោះការអញ្ជើញ និង ការសន្យាដែលព្រះអម្ចាស់បានប្រទានមក តាមរយៈព្យាការីមរ៉ូណៃចំពោះយើងម្នាក់ៗ—និង ចំពោះមនុស្សគ្រប់គ្នាដែលអានព្រះគម្ពីរមរមន ។ ខ្ញុំសូមបញ្ចប់ដោយការអានការអញ្ជើញ និង ការសន្យានោះ ហើយបន្ថែមទីបន្ទាល់របស់ខ្ញុំ ៖ « ហើយកាលណាអ្នករាល់គ្នាទទួលនូវការណ៍ទាំងនេះ [ ព្រះគម្ពីរមរមន ] នោះខ្ញុំសូមទូន្មានដល់អ្នករាល់គ្នាឲ្យសូមសួរដល់ព្រះជាព្រះវរបិតាដ៏គង់នៅអស់កល្បជានិច្ច ដោយនូវព្រះនាមនៃ [ ព្រះយេស៊ូវ] គ្រីស្ទ បើសិនជាការណ៍ទាំងនេះមិនពិត ហើយបើសិនជាអ្នករាល់គ្នាសូមសួរដោយចិត្តស្មោះសរគឺ ដោយស្មោះអស់ពីចិត្ត ដោយមានសេចក្តីជំនឿជឿដល់ព្រះគ្រីស្ទ នោះទ្រង់នឹងសម្ដែងសេចក្តីពិតនៃការណ៍នេះដល់អ្នកដោយព្រះចេស្តានៃព្រះវិញ្ញាណបរិសុទ្ធ » ។១០
ខ្ញុំសូមថ្លែងទីបន្ទាល់អំពីការស្តារឡើងវិញនៃដំណឹងល្អនៅក្នុងថ្ងៃចុងក្រោយនេះ និង អំពីព្រះគម្ពីរមរមនថាជាភស្តុតាងជាក់នឹងភ្នែកនៃការស្តារឡើងវិញនោះ ។ ដូចដែលព្រះបន្ទូលនៅក្នុងគម្ពីរនេះបានបំផុសគំនិតដល់ក្មេងស្រីអាយុ ១២ ឆ្នាំឲ្យទទួលយកសាសនាចក្រនៃព្រះយេស៊ូវគ្រីស្ទដែលបានស្តារឡើងវិញកាលពីជិតពីរសតវត្សរ៍មុននេះ នោះសេចក្តីពិតដែលបងប្អូននឹងរកឃើញនៅក្នុងគម្ពីរនេះនឹងលើកស្ទួយ ហើយបំផុសគំនិតបងប្អូនតាមរបៀបមួយស្រដៀងគ្នានេះផងដែរ ។ សេចក្តីពិតទាំងនោះនឹងពង្រឹងជំនឿបងប្អូន បំពេញព្រលឹងបងប្អូនដោយពន្លឺ ហើយរៀបចំបងប្អូនសម្រាប់អនាគតមួយ ដែលបងប្អូនកម្រនឹងមានសមត្ថភាពអាចយល់បាន ។
នៅក្នុងគម្ពីរមរមន បងប្អូននឹងរកឃើញសេចក្តីស្រឡាញ់ដ៏ច្រើនលើសលុប និង ព្រះគុណនៃព្រះដែលគ្មានអ្វីប្រៀបផ្ទឹមបាន ។ នៅពេលបងប្អូនព្យាយាមធ្វើតាមការបង្រៀន ដែលបងប្អូនឃើញនៅក្នុងគម្ពីរនេះ នោះអំណររបស់បងប្អូននឹងកើនឡើង ការយល់របស់បងប្អូនចម្រើនឡើង ហើយទទួលចម្លើយចំពោះឧបសគ្គជាច្រើនដែលមាននៅក្នុងជីវិតរមែងស្លាប់នេះ ។ នៅពេលបងប្អូនសិក្សាព្រះគម្ពីរ នោះបងប្អូនរំពឹងទៅរកព្រះអម្ចាស់ ។ ព្រះគម្ពីរមរមនគឺជាព្រះបន្ទូលរបស់ព្រះដែលបានបើកសម្តែង ។ ខ្ញុំសូមថ្លែងទីបន្ទាល់អំពីការណ៍នេះដោយអស់ពីចិត្ត និង ព្រលឹងខ្ញុំ នៅក្នុងព្រះនាមព្រះយេស៊ូវគ្រីស្ទ អាម៉ែន ។