ចូរមានមហិច្ឆតាចំពោះព្រះគ្រីស្ទចុះ
យើងមានមហិច្ឆតាចំពោះព្រះគ្រីស្ទ នៅពេលយើងបម្រើដោយស្មោះត្រង់ ទទួលយកការបម្រើដោយរាបសា ស៊ូទ្រាំដោយសប្បុរស អធិស្ឋានដោយស្មោះត្រង់ ហើយទទួលទានសាក្រាម៉ង់ដោយសក្តិសម ។
បងប្អូនប្រុសស្រីជាទីស្រឡាញ់របស់ខ្ញុំ ថ្ងៃនេះខ្ញុំចង់និយាយទៅកាន់យុវវ័យនៃសាសនាចក្រ រួមទាំងអ្នកផ្សព្វផ្សាយសាសនាដ៏អស្ចារ្យរបស់យើងផងដែរ ។ ប្រាកដណាស់ បងប្អូនប្រុសស្រីដែលមានដួងចិត្តនៅក្មេងខ្ចីក៏ត្រូវបានអញ្ជើញដោយស្មោះសរដើម្បីស្តាប់សារលិខិតនេះដែរ ។
កាលពីថ្ងៃទី ២១ ខែ សីហា ថ្មីៗនេះ ប្រធាន រ័សុល អិម ណិលសុន បានឧទ្ទិសឆ្លងព្រះវិហារសាបពូរ៉ូដ៏ស្រស់ស្អាត—ជាព្រះវិហារបរិសុទ្ធទីបីនៅប្រទេសជប៉ុន ។ ព្រះវិហារបរិសុទ្ធ សាបពូរ៉ូត្រូវបានសាងសង់ឡើងនៅភាគខាងជើងប្រទេសជប៉ុននៅលើកោះ ហុកកៃដូ ។ ដូចជារដ្ឋ យូថាហ៍ ដែរ នៅកោះហុកកៃដូ មានអ្នកត្រួសត្រាយដ៏ឧស្សាហ៍ និង ប្រឹងប្រែងធ្វើការបានតាំងទីលំនៅនៅទីនោះ ។
ក្នុងឆ្នាំ ១៨៧៦ គ្រូបង្រៀនដ៏ល្បីល្បាញម្នាក់ឈ្មោះវេជ្ជ. វីល្លាម ក្លាក១ ត្រូវបានអញ្ជើញឲ្យមកកោះហុកកៃដូដើម្បីបង្រៀន ។ គាត់រស់នៅក្នុងប្រទេសជប៉ុនអស់រយៈពេលប្រាំបីខែ ប៉ុន្តែស្មារតីជាគ្រិស្តសាសនិករបស់គាត់ បានបន្សល់ទុកនូវឥទ្ធិពលដ៏យូរអង្វែងដល់និស្សិតវ័យក្មេងរបស់គាត់ដែលមិនមែនជាគ្រិស្តសាសនិកនោះ ។ ពីមុនចាកចេញទៅ គាត់បានផ្តល់សារលិខិតមួយដល់សិស្សគាត់ ដែលវាក្លាយជាសារលិខិតឆ្លាក់ជាប់នៅលើរូបចម្លាក់លង្ហិននេះ ។២ គាត់បាននិយាយថា « យុវជនអើយ ចូរមានមហិច្ឆតាចុះ !—ចូរមានមហិច្ឆតាចំពោះព្រះគ្រីស្ទចុះ » ។៣ ដំបូន្មានរបស់គាត់ឲ្យ « មានមហិច្ឆតាចំពោះព្រះគ្រីស្ទ » អាចជួយណែនាំការសម្រេចចិត្តរៀងរាល់ថ្ងៃរបស់ពួកបរិសុទ្ធថ្ងៃចុងក្រោយបច្ចុប្បន្ននេះ ។
តើ « ការមានមហិច្ឆតាចំពោះព្រះគ្រីស្ទ » មានន័យដូចម្តេច ? ការមានមហិច្ឆតាចំពោះព្រះគ្រីស្ទមានន័យថាជា ការជំរុញចិត្ត ការផ្តោតចិត្ត និង ការបូជាចំពោះកិច្ចការរបស់ទ្រង់ ។ ការមានមហិច្ឆតាចំពោះព្រះគ្រីស្ទ ពុំមែនមានន័យថាយើងនឹងត្រូវបានជ្រើសរើសគោរពជាសាធារណៈនោះទេ ។ ការមានមហិច្ឆតាចំពោះព្រះគ្រីស្ទមានន័យថា យើងបម្រើដោយស្មោះត្រង់ និង ដោយឧស្សាហ៍ព្យាយាមនៅក្នុងវួដ និង សាខារបស់យើងដោយពុំរអ៊ូរទាំ គឺបម្រើដោយដួងចិត្តរីករាយ ។
អ្នកផ្សព្វផ្សាយសាសនារបស់យើងបម្រើទូទាំងពិភពលោក គឺជាគំរូដ៏អស្ចារ្យអំពីអស់អ្នកដែលមានមហិច្ឆតាពិតប្រាកដចំពោះព្រះគ្រីស្ទ ។ ពីរបីឆ្នាំកន្លងមកហើយ ស៊ិស្ទើរ យ៉ាម៉ាស្ស៊ីតា និង ខ្ញុំបានបម្រើនៅក្នុងបេសកកម្ម ណាហ្គូយ៉ា ប្រទេសជប៉ុន ។ ពួកអ្នកផ្សព្វផ្សាយសាសនារបស់យើងមានមហិច្ឆតាយ៉ាងខ្លាំងចំពោះព្រះគ្រីស្ទ ។ មានអ្នកផ្សព្វផ្សាយសាសនាម្នាក់ក្នុងចំណោមនោះ គឺអែលឌើរ ខូវ៉ាន់ ។
អែលឌើរ ខូវ៉ាន់ កំបុតជើងខាងស្តាំ ដោយសារគាត់មានគ្រោះថ្នាក់ចររាចរណ៍កាលពីនៅវ័យជំទង់ ។ ពីរបីសប្តាហ៍បន្ទាប់ពីគាត់បានចូលបម្រើបេសកកម្ម ខ្ញុំបានទទួលទូរសព្ទមកពីដៃគូរបស់គាត់ ។ ជើងសប្បនិម្មិតរបស់អែលឌើរ ខូវ៉ាន់ បានបាក់អំឡុងពេលគាត់កំពុងជិះកង់ ។ យើងបានយកគាត់ទៅកន្លែងជួលជួលដ៏ល្អមួយ ហើយនៅក្នុងបន្ទប់នោះហើយ ដែលខ្ញុំបានឃើញជើងរបស់គាត់ជាលើកដំបូង ។ ខ្ញុំបានដឹងថា គាត់មានការឈឺចាប់ជាខ្លាំង ។ ជើងសប្បនិម្មិតរបស់គាត់បានជួលជុលរួច ហើយគាត់បានត្រឡប់ទៅតំបន់បេសកកម្មវិញ ។
ប៉ុន្តែប៉ុន្មានសប្តាហ៍ក្រោយមក ជើងសប្បនិម្មិតនោះបានបន្តបាក់ម្តងហើយម្តងទៀត ។ អ្នកប្រឹក្សាខាងវេជ្ជសាស្ត្រប្រចាំតំបន់បានផ្តល់យោបល់ថា អែលឌើរ ខូវ៉ាន់ គួរត្រឡប់ទៅផ្ទះវិញ ហើយរង់ចាំការចាត់តាំងបម្រើបេសកកម្មជាថ្មី ។ ខ្ញុំបានបដិសេធយោបល់នោះ ដោយសារអែលឌើរខូវ៉ាន់ គឺជាអ្នកផ្សព្វផ្សាយសាសនាដ៏អស្ចារ្យ ហើយគាត់មានបំណងប្រាថ្នាខ្លាំងដើម្បីបន្តនៅក្នុងប្រទេសជប៉ុន ។ យូរៗទៅរាងកាយរបស់អែលឌើរ ខូវ៉ាន់ បានចាប់ផ្តើមឈានដល់កម្រិតមួយដែលពិបាក ។ ទោះបីជាយ៉ាងនោះក្តី គាត់ពុំបានត្អូញត្អែរ ឬ រអ៊ូរទាំឡើយ ។
ជាថ្មីម្តងទៀត គេបានប្រាប់ខ្ញុំថា អែលឌើរ ខូវ៉ាន់ ត្រូវបានអនុញ្ញាតឲ្យបម្រើនៅកន្លែងមួយ ដែលមិនតម្រូវឲ្យគាត់ជិះកង់ឡើយ ។ ខ្ញុំបានពិចារណាអំពីស្ថានភាពនេះ ។ ខ្ញុំបានគិតអំពីអែលឌើរ ខូវ៉ាន់ និង អនាគតរបស់គាត់ ហើយខ្ញុំបានអធិស្ឋានអំពីបញ្ហានោះ ។ ប្រាកដណាស់ ខ្ញុំបានទទួលអារម្មណ៍ថា អែលឌើរ ខូវ៉ាន់គួរតែត្រឡប់ទៅផ្ទះវិញ ហើយរង់ចាំការចាត់តាំងបម្រើជាថ្មី ។ ខ្ញុំបានទូរសព្ទទៅគាត់ ហើយបង្ហាញក្តីស្រឡាញ់ និង កង្វល់របស់ខ្ញុំចំពោះគាត់ ព្រមទាំងប្រាប់គាត់អំពីការសម្រេចចិត្តរបស់ខ្ញុំ ។ គាត់ពុំបានឆ្លើយតបអ្វីឡើយ ។ ខ្ញុំអាចឮតែសំឡេងគាត់យំតាមទូរសព្ទតែប៉ុណ្ណោះ ។ ខ្ញុំបាននិយាយថា « អែលឌើរ ខូវ៉ាន់ អែលឌើរពុំចាំបាច់ឆ្លើយតបខ្ញុំក្នុងពេលឥឡូវនេះទេ ។ ខ្ញុំនឹងទូរសព្ទទៅអែលឌើរម្តងទៀតនៅថ្ងៃស្អែក ។ សូមគិតដោយការអធិស្ឋានដ៏ស្មោះសរអំពីអ្វីដែលខ្ញុំបានប្រាប់អែលឌើរ ។
ពេលខ្ញុំទូរស័ព្ទទៅគាត់នាព្រឹកបន្ទាប់នោះ គាត់បាននិយាយដោយរាបសាថា គាត់នឹងធ្វើតាមការទូន្មានរបស់ខ្ញុំ ។
អំឡុងពេលសម្ភាសន៍លើកចុងក្រោយរបស់ខ្ញុំជាមួយគាត់ ខ្ញុំបានសួរសំណួរនេះដល់គាត់ ៖ « អែលឌើរ ខូវ៉ាន់ តើអែលឌើរបានស្នើសុំគេឲ្យបញ្ជូនអែលឌើរទៅបេសកកម្មណាដែលមិនតម្រូវឲ្យជិះកង់ ដែរឬទេ កាលអែលឌើរដាក់ពាក្យសុំធ្វើជាអ្នកផ្សព្វផ្សាយសាសនានោះ ? »
គាត់បាននិយាយថា « បាទប្រធាន ខ្ញុំបានសុំមែន » ។
ខ្ញុំបានតបថា « អែលឌើរ ខូវ៉ាន់ អែលឌើរត្រូវបានហៅឲ្យបម្រើនៅបេសកកម្ម ណាហ្គូយ៉ាប្រទេសជប៉ុន ជាកន្លែងដែលតម្រូវឲ្យអែលឌើរជិះកង់ ។ តើអែលឌើរបានប្រាប់រឿងនេះដល់ប្រធានស្តេករបស់អែលឌើរដែរឬទេ ? »
ខ្ញុំភ្ញាក់ផ្អើលចំពោះចម្លើយរបស់គាត់ ។ គាត់បាននិយាយថា « អត់ទេ ខ្ញុំពុំបានប្រាប់គាត់ទេ ។ ខ្ញុំបានតាំងចិត្ត ប្រសិនបើ ទីនោះ ជាកន្លែងដែលព្រះអម្ចាស់បានហៅខ្ញុំ នោះខ្ញុំនឹងទៅកន្លែងហាត់ប្រាណ ហើយបង្វឹករាងកាយខ្ញុំ ដើម្បីឲ្យខ្ញុំអាចជិះកង់បាន » ។
នៅចុងបញ្ចប់នៃការសម្ភាសន៍របស់យើង គាត់បានសួរសំណួរនេះដល់ខ្ញុំទាំងយំថា ៖ « លោកប្រធាន យ៉ាម៉ាស្ស៊ីតា ហេតុអ្វីបានជាខ្ញុំមកប្រទេសជប៉ុន ? « ហេតុអ្វីខ្ញុំនៅទីនេះ ? »
ខ្ញុំបានឆ្លើយប្រាប់គាត់ដោយឥតរុញរាចិត្តថា ៖ « អែលឌើរ ខូវ៉ាន់ ខ្ញុំដឹងពីមូលហេតុមួយដែលអែលឌើរមកទីនេះ ។ អែលឌើរបានមកទីនេះដើម្បីជាប្រយោជន៍ដល់ខ្ញុំ ។ ខ្ញុំបានយល់អំពីយុវជនដ៏អស្ចារ្យម្នាក់ ដែលខ្ញុំបានបម្រើជាមួយនេះ ។ ខ្ញុំមានពរដែលបានបម្រើជាមួយអែលឌើរ » ។
ខ្ញុំរីករាយដើម្បីប្រាប់ថា អែលឌើរ ខូវ៉ាន់ បានត្រឡប់ទៅផ្ទះជាទីស្រឡាញ់របស់គាត់វិញ ហើយត្រូវបានចាត់តាំងឲ្យបម្រើបេសកកម្មជាថ្មីម្តងទៀត នៅកន្លែងមួយដែលគាត់ផ្សព្វផ្សាយដោយជិះឡាន ។ ខ្ញុំពុំគ្រាន់តែកោតសរសើរអែលឌើរ ខូវ៉ាន់ប៉ុណ្ណោះទេ ប៉ុន្តែខ្ញុំក៏កោតសរសើរដល់អ្នកផ្សព្វផ្សាយសាសនាទាំងអស់ទូទាំងពិភពលោក ដែលបម្រើដោយឆន្ទៈ គ្មានការត្អូញត្អែរ ឬ រអ៊ូរទាំនោះ ។ សូមអរគុណ អែលឌើរ និង ស៊ីស្ទើរ ចំពោះសេចក្តីជំនឿ ការផ្តោតចិត្តទុក្ខដាក់ និង មហិច្ឆតាដ៏មោះមុតរបស់អ្នកចំពោះព្រះគ្រីស្ទ ។
ព្រះគម្ពីរមរមនមានដំណើររឿងជាច្រើនអំពីមនុស្សដែលមានមហិច្ឆតាចំពោះព្រះគ្រីស្ទ ។ អាលម៉ាជាកូនគឺជាយុវជនម្នាក់ដែលបៀតបៀនសាសនាចក្រ និង សមាជិកសាសនាចក្រ ។ ក្រោយមកលោកបានជួបនូវការផ្លាស់ប្តូរដួងចិត្តយ៉ាងធំ ហើយបានបម្រើជាអ្នកផ្សព្វផ្សាយសាសនាដ៏មានប្រសិទ្ធភាព ។ លោកបានស្វែងរកការដឹកនាំពីព្រះអម្ចាស់ ហើយលោកបានផ្តល់ពរដល់ដៃគូរបស់លោក ពេលលោកបានបម្រើជាមួយពួកគេ ។ ព្រះអម្ចាស់បានពង្រឹងលោក ហើយលោកបានយកឈ្នះលើការសាកល្បងដែលលោកបានជួប ។
អាលម៉ាម្នាក់នេះបានផ្តល់ដំបូន្មានដល់ហេលេមិនជាកូនប្រុសលោកដូចនេះ ៖
« នរណាដែលដាក់ទីទុកចិត្តរបស់ខ្លួនទៅលើព្រះ អ្នកនោះហើយ ដែលនឹងបានគាំទ្រនៅក្នុងការពិសោធន៍របស់គេ និងវិបត្តិរបស់គេ និងសេចក្ដីទុក្ខវេទនារបស់គេ ។ …
… កាន់តាមព្រះបញ្ញត្តិទាំងឡាយនៃព្រះ ។ …
ចូរប្រឹក្សាជាមួយនឹងព្រះអម្ចាស់នូវគ្រប់កិច្ចការរបស់កូន ហើយទ្រង់នឹងដឹកនាំកូនទៅរកការល្អ » ។៤
កូនប្រុសទីពីររបស់យើងបានរស់នៅក្នុងយុវវ័យឆ្ងាយពីសាសនាចក្រ ។ ពេលគាត់ឈានដល់អាយុ ២០ ឆ្នាំ គាត់មានបទពិសោធន៍មួយ ដែលធ្វើឲ្យគាត់ចង់ផ្លាស់ប្តូរជីវិត ។ ដោយសេចក្តីស្រឡាញ់ ការអធិស្ឋាន និង ជំនួយពីគ្រួសារគាត់ និង សមាជិកសាសនាចក្រ និង តាមរយៈក្តីមេត្តាករុណា និង ព្រះគុណរបស់ព្រះអម្ចាស់ នោះគាត់បានត្រឡប់មកសាសនាចក្រវិញ ។
ក្រោយមកគាត់ត្រូវបានហៅឲ្យបម្រើនៅបេសកកម្ម ស៊ីអាថល វ៉ាស៊ីនតោន ។ ដំបូងគាត់បានរងទុក្ខដោយការខកចិត្តជាខ្លាំង ។ រៀងរាល់យប់ក្នុងអំឡុងពេលបីខែដំបូង គាត់បានទៅក្នុងបន្ទប់ទឹក ហើយយំរហូត ។ ដូចជាអែលឌើរ ខូវ៉ាន់ដែរ គាត់ចង់យល់ថា « ហេតុអ្វីខ្ញុំនៅទីនេះ ? »
បន្ទាប់ពីគាត់បានបម្រើអស់មួយឆ្នាំមក យើងបានទទួលអ៊ីម៉ែលមួយ ដែលជាចម្លើយចំពោះការអធិស្ឋានរបស់យើង ។ គាត់បានសរសេរថា ៖ « ឥឡូវនេះកូនពិតជាបានទទួលអារម្មណ៍នៃសេចក្តីស្រឡាញ់របស់ព្រះ និង ពីព្រះយេស៊ូវហើយ ។ កូននឹងខិតខំធ្វើការ ដើម្បីក្លាយខ្លួនដូចជាព្យាការីបុរាណ ។ ទោះបីជាកូនកំពុងជួបការលំបាកជាច្រើនក្តី ប៉ុន្តែកូនពិតជាសប្បាយណាស់ ។ ការបម្រើព្រះយេស៊ូវគឺពិតជាកិច្ចការមួយដ៏អស្ចារ្យ ។ គ្មានកិច្ចការណាដែលអស្ចារ្យជាងនេះឡើយ ។ កូនរីករាយខ្លាំងណាស់ » ។
គាត់មានអារម្មណ៍ដូចអាលម៉ា ៖ « ហើយ ឱ អំណរ និង រស្មីដ៏អស្ចារ្យដែលឪពុកបានឃើញ មែនហើយ ព្រលឹងឪពុកបានពោរពេញទៅដោយអំណរលើសជាងការឈឺចាប់របស់ឪពុកទៅទៀត ! »៥
នៅក្នុងជីវិតយើង យើងជួបបទពិសោធន៍នៃការសាកល្បង ប៉ុន្តែប្រសិនបើយើងមានមហិច្ឆតាចំពោះព្រះគ្រីស្ទ នោះយើងអាចផ្តោតលើទ្រង់ ហើយមានអារម្មណ៍អំណរ សូម្បីតែយើងកំពុងនៅក្នុងការលំបាកទាំងនោះក្តី ។ ព្រះដ៏ប្រោសលោះរបស់យើងគឺជាគំរូដ៏អស្ចារ្យបំផុត ។ ទ្រង់បានយល់ពីបេសកកម្មដ៏បរិសុទ្ធរបស់ទ្រង់ ហើយបានគោរពប្រតិបត្តិតាមព្រះទ័យរបស់ព្រះជាព្រះវរបិតា ។ ឱ វាជាជម្រើសដ៏មានពរអ្វីម៉្លេះ ដើម្បីនាំគំរូដ៏អស្ចារ្យរបស់ទ្រង់ មកក្នុងការចងចាំរបស់យើងរៀងរាល់សប្តាហ៍ នៅពេលយើងទទួលទានសាក្រាម៉ង់ ។
បងប្អូនប្រុសស្រីជាទីស្រឡាញ់របស់ខ្ញុំ យើងមានមហិច្ឆតាចំពោះព្រះគ្រីស្ទ នៅពេលយើងបម្រើដោយស្មោះត្រង់ ទទួលយកការបម្រើដោយរាបសា ស៊ូទ្រាំដោយសប្បុរស អធិស្ឋានដោយស្មោះត្រង់ ហើយទទួលទានសាក្រាម៉ង់ដោយសក្តិសម ។
ចូរឲ្យយើងមានមហិច្ឆតាចំពោះព្រះគ្រីស្ទ នៅពេលយើងទទួលការលំបាក និង ការសាកល្បងរបស់យើង ដោយអត់ធ្មត់ និង សេចក្តីជំនឿ ព្រមទាំងរកឃើញអំណរនៅលើផ្លូវនៃសេចក្តីសញ្ញារបស់យើង ។
ខ្ញុំសូមថ្លែងទីបន្ទាល់ថា ព្រះអម្ចាស់ស្គាល់បងប្អូន ។ ទ្រង់ជ្រាបដឹងពីឧបសគ្គ និង កង្វល់របស់បងប្អូន ។ ទ្រង់ជ្រាបដឹងពីបំណងប្រាថ្នារបស់បងប្អូនដើម្បីបម្រើទ្រង់ ដោយការលះបង់ មែនហើយគឺដោយមានមហិច្ឆតា ។ សូមឲ្យទ្រង់ដឹកនាំ និង ប្រទានពរដល់បងប្អូន នៅពេលបងប្អូនធ្វើបែបនោះ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។