2010–2019
MiTaun Yu di Dios
April 2016


MiTa un Yu di Dios

Un komprondementu di nos herensia selestial ta esensial pa eksaltashon.

Nos doktrina mas fundamental ta inkluí e konosementu ku nos ta yunan di un Dios bibu. Ta p’esei un di Su nòmbernan mas sagrado ta Tata----Tata Selestial. E doktrina aki a wòrdu siñá bon kla pa e profetanan durante siglonan:

  • Ora Satanas a tenta Moises, el a deklará, bisando: “Ken bo ta, ami ta un yu hòmber di Dios.” 1

  • Papiando ku Israel, e Salmista a proklamá, “Boso tur ta yunan di e Altísimo.”2

  • Pablo a siña e ateneonan riba Seru di Mars ku nan tabata “desendiente di Dios.”3

  • José Smith i Sidney Rigdon a risibí un vishon den kua nan a mira e Tata i e Yu, i un stèm selestial a deklará ku e habitantenan di e mundunan ta yunan hòmber i muhé engendrá di Dios. 4

  • Na 1995, 15 apòstel i profeta bibu a afirmá: “Tur ser humano … ta kreá den e imágen di Dios. Kada un ta un yu hòmber òf muhé spiritual stimá di mayornan selestial.5

  • Presidente Thomas  S. Monson a testifiká: “Nos ta yunan hòmber i yunan muhé di un Dios bibu. ...Nos no por tin e konvikshon aki sinseramente sin eksperensiá un sentido profundo nobo di forsa i poder.”6

E doktrina aki ta asina básiko, hopi biaha deklará, i p’esei instintivamente simpel ku e por parse ordinario, ora ku realmente e ta entre e konosementu di mas ekstraordinario ku nos por haña. Un komprendementu korekto di nos herensia selestial ta esensial pa eksaltashon. E ta fundamental pa komprondé e plan glorioso di salbashon i pa nutri fe den e primogénito di e Tata, Jesus e Cristu, i den Su Ekspiashon miserikordioso.7 Tambe, e ta duna motivashon kontinuo pa nos pa hasi i warda nos kombenionan eternamente indispensabel.

Ku algun eksepshon, tur ku ta partisipá den e reunion aki por awor aki mes, sin palabranan òf músika, kanta, “Mi Ta un Yu di Dios.”8 E kantika stimá aki ta un di esnan ku hopi biaha ta wòrdu kantá den e Iglesia aki. Pero e pregunta kritiko ta “Nos sa esaki realmente?” Nos sa esei den nos mente i kurason i alma? Nos prosedensia selestial ta nos promé i di mas profundo identidat?

Aki na mundu, nos ta identifiká nos mes den diferente manera, inkluso nos lugá di nasementu, nashonalidat, i lenga. Algun ta hasta identifiká nan mes pa nan okupashon òf nan hòbi. E identifikashonnan mundano aki no ta robes a ménosku nan ta remplasá òf interferí ku nos identidat eterno----esun di ta un yu hòmber òf yu muhé di Dios.

Tempu nos yu di mas yòn tabatin seis aña i tabata den e promé klas na skol, su maestro a duna e muchanan un ehersisio di skibi den klas. Tabata òktober, e luna di Halloween, un dia di fiesta selebrá den algun parti di mundu. Ounke e no ta mi selebrashon faborito, mi ta suponé ku lo tin algun aspekto inosente i redentor di Halloween.

E maestro a parti pida papel na e studiantenan hóben. Na e parti ariba tabatin un dibuho mas o ménos pintá di un hèks mítiko (mi a bisa boso ku esaki no ta mi selebrashon faborito) pará over di un wea ku ta herebiendo. E pregunta riba e página, pa kurashá e imaginashon di e muchanan i pa tèst nan habilidat básiko pa skibi, tabata “Bo a kaba di bebe un kùp di e bebida di e hèks. Kiko a pasa ku bo?” Por fabor sa ku e historia aki no ta wòrdu kompartí komo un rekomendashon na maestronan.

“Bo kaba di bebe un kùp di e bebida dje hèks. Kiko a pasa ku bo?” Ku su mihó habilidat di un eskritor básiko, nos chikitin a skibi, “Lo mi muri i lo mi ta den shelu. Lo mi gusta aya. Lo mi stim’é pasó e ta e mihó lugá pa ta pasó bo ta ku bo Tata Selestial.” E kontesta aki a sorprendé su maestro; sinembargo, ora nos yu a trese e tarea kompletá kas, nos a nota ku el a haña un strea, e grado di mas haltu.

Den bida real, nos ta eksperensiá,problemanan,aktual, no imaginario. Tin dolor---físiko, emoshonal, i spiritual. Tin desepshon ora ku sirkunstansianan ta masha diferente for di loke nos a antisipá. Tin inhustisia ora ta parse ku nos ta meresé nos situashon. Tin desepshon ora un hende ku nos ta konfia faya nos. Tin problemanan di salú i finansiero ku por ta desorientadó. Por tin tempu di duda ora un asuntu di doktrina òf historia ta leu for di nos komprendementu aktual.

Ora kosnan difísil ta pasa den nos bida, kiko ta nos reakshon inmediato? Ta konfushon òf duda òf retirada spiritual? E ta un shòk inesperá di nos fe? Nos ta duna Dios òf otronan falta di nos sirkunstansianan? Òf nos promé reakshon ta pa kòrda ken nos ta—ku nos ta yunan di un Dios amoroso? Esei ta konektá ku un konfiansa apsoluto ku E ta pèrmití algun sufrimentu terenal pasobra E sa ku nan lo bendishoná nos, manera un kandela ku ta refiná, pa bira meskos ku E i pa gana nos herensia eterno?9

Resientemente mi tabata den un reunion ku Elder Jeffrey R. Holland. Miéntras ta siña e prinsipio ku bida mortal por ta doloroso pero ku nos difikultatnan tin propósito eterno--- hasta si nos no ta komprondé na e momentu ei---Elder Holland a bisa, “Boso por haña loke boso ke, òf boso por haña algu mihó.”

Sinku luna pasá, mi kasá, Diane, i ami a bai Afrika ku Elder i Hermana David A. Bednar. E di seis i delaster pais ku nos a bishitá tabata Liberia. Liberia ta un gran pais ku hende noble i un historia riku, pero kosnan no tabata fásil aya. Dékadanan di instabilidat polítiko i gueranan sivil a hasi e difikultat di pobresa mas pió. Riba tur esei, e malesa temeroso Ebola a mata kasi 5,000 hende durante dje delaster epidemia. Nos tabata e promé grupo di lidernan di Iglesia pafó di e área ku a bishitá Monrovia, e suidat kapital, for di tempu ku e Organisashon Mundial di Salú a deklar’é safe pa biaha despues di e krísis di Ebola.

Riba un djadumingu mainta hopi kayente i húmedo, nos a biaha na un fasilidat di hür pa reuní den e sentro di e suidat. Tur stul disponibel tabata poné, na total 3,500 stul. E kantidat final di presentenan tabata 4,100. Kasi tur ku a bini mester a biaha na pia òf ku algun otro tipo di transporte públiko inkonveniente; no tabata fásil pa e Santunan pa reuní. Pero nan a bini. Mayoria a yega algun ora promé ku e tempu stipulá pa e reunion. Ora nos a drenta e pasio, e atmósfera spiritual tabata eksitante! E Santunan tabata prepará pa wòrdu siñá.

Ora un diskursante tabata sita un skritura, e miembronan tabata bisa e verso na bos haltu. No tabata importá---skritura kòrtiku òf largu, henter e kongregashon tabata respondé den unísono. Awor, nos no ta bisa ku esaki ta nesesario, pero ta sigur impreshonante ku nan por a hasié. I e koro---nan tabata poderoso. Ku un dirigente di koro entusiasmá i un yònkuman di dieskuater aña na e keyboard, e miembronan a kanta ku vigor i forsa.

Despues Elder Bednar a papia. Esaki, klaro, tabata e punto kulminante di e reunion---pa skucha un Apòstel siña i testifiká. Klaramente ku guia spiritual, na mitar di su remarkenan, Elder Bednar a stòp i a bisa, “Boso konosé ‘Que firmes cimientos’?”

Tabata parse ku 4,100 stèm a grita,”SI!”

Despues el a puntra, “Boso konosé verso 7?”

Atrobe henter e grupo a kontestá, “SI”!”

E areglo di e himno poderoso “Que firmes cimientos” kantá pa e Koro di Tabernakulo Mormon pa e delaster 10 añanan a inkluí verso 7, ku no tabata wòrdu kantá masha promé. Elder Bednar a instruí, “Laga nos kanta 1,2,3, i 7.”

Sin basilá, e dirigente di koro a bula lanta i e kompaño pianista poseedor Saserdosio Aaróniko---inmediatamente a kuminsá toka e notanan introduktor ku energia. Ku un nivel di konvikshon ku nunka promé mi a sinti den un himno di kongregashon, nos a kanta versonan 1, 2, 3. Despues e volúmen i poder spiritual a wòrdu elevá ora 4,100 stèm a kanta e di shete verso i a deklará:

Al alma que anhele la paz quque hay en mi

No quiero, no puedo, dejar en error;

Yo lo sacaré de tinieblas a luz

Y siempre guardarlo, y siempre guardarlo,

Y siempre guardarlo con grande amor!10

Den un di e eventonan spiritual mas remarkabel di mi bida, mi a siña un lès profundo e dia ei. Nos ta biba den un mundu ku ta laga nos lubidá ken nos ta realmente. Mas distraishon ku ta rondoná nos, mas fásil ta pa trata kasualmente, despues ignorá, i despues lubidá nos konekshon ku Dios. E Santunan na Liberia tin poko kos material, i tòg nan ta parse di tin tur kos spiritual. Loke nos a presensiá e dia ei na Monrovia tabata un grupo di yunan hòmber i yunan muhé di Dios---ku sa!

Den e mundu di awendia, no ta importá unda nos ta biba òf kiko nos sirkunstansianan ta, ta esensial ku nos identidat pre eminente ta komo un yu di Dios. Sa esei lo pèrmití nos fe pa floresé, lo motivá nos arepentimentu kontinuo, i lo duna e forsa pa ta “firme i inmovibel” durante nos biahe mortal.11 Den e nòmber di JesuCristu, amèn.