Nomu iKalawa e Tarava
    Footnotes

    Nomu iKalawa e Tarava

    Na Tamamu Vakalomalagi dauloloma kei na Luvena o Jisu Karisito e rau sureti iko mo taura na nomu ikalawa e tarava vei Rau. Kakua ni wawa. Taura sara ga oqo.

    E a rarawa na yaloqu ena dua na soqoni ni Yalododonu totoka. E a tarogi e dua na taro, O cei ena gadreva me laki bula vata tale kei na Tamada Vakalomalagi? Era lave liga kecega. Na taro e tarava “O cei e vakadeitaka ni na rawata?” Ka ni rarawa ka kidrowataki ni levu na liga era a lutu sobu.

    Ni da nanuma ni sa cavuka na vanua eda toka kina ena gauna oqo kei na vanua eda vinakata meda na laki yacova, e levu vei keda ena digitaka me sa malumu na nona vakabauta kei na vakanuinui.1

    Me vaka ni “sega na ka tawasavasava sa tiko vata kei na Kalou,”2 me rawa ni da laki bula vata tale kei Koya ena gadrevi meda savasava mai na ivalavala ca3 ka vakavoui.4 Kevaka meda cakava oqo vakaikeda, ena sega ni dua vei keda ena rawata. Ia eda sega ni tiko duadua. Na kena dina ga, ni da sega vakadua ni tiko duadua.

    Tiko vei keda na veivuke mai lomalagi baleti Jisu Karisito kei na Nona Veisorovaki.5 Tukuna na iVakabula, “Kevaka dou sa vakabauti au dou na kitaka na ka kecega ena vukuqu.”6 Ni sa bulataki na vakabauta, na vakabauta ena qai tubu cake.

    Meda vakasamataka vata e tolu na ivakavuvuli ka na vukei keda ena noda ilakolako lesu Vei Tamada Vakalomalagi.

    Mo vakataka e dua na Gone

    E vakatakarakarataka na imatai ni ivakavuvuli, e dua na makubui keirau tagane ka gone duadua. Ni sa vulica me qasi, ka qai tucake, sa tekivu sasaga me lako. Ena itekivu ni nona sasaga e dau lutu, tagi, ka solia mai e dua na rai ka kena ibalebale, “Au na sega ni cakava tale—vakadua—na ka o ya! Au sa na qasi voli mada ga.”

    Ni sa lutu ka bale ki ra, erau sega ni nanuma na nona itubutubu ni sa tawayaga se na sega ni rawa ni na lako. Ia, erau dodoka yani na ligadrau ka kacivi koya, kei na matana ni raici rau toka mai sa qai sasaga tale me toso yani kina nodrau iroqo ni loloma.

    Ira na itubutubu dauloloma era na tu vakarau kei na ligadra ni dodo tu yani mera veivakauqeti kina noda ikalawa kina vanua dodonu. Erau kila vinaka tu ni noda sasaga meda tovolea ka tovolea tale ena kauti keda yani kina toso ki liu kei na rawa ka.

    E vakatavulica na iVakabula ni gadrevi me rawati na Matanitu ni Kalou e dodonu meda vakataki ira na gonelalai.7 Sa, kena ibalebale ni dodonu meda cakava na ka eda a cakava ni da a se gonelalai.8

    Ni da sa yalomalumalumu vagone ka sasaga yani vua na Tamada Vakalomalagi kei na noda iVakabula, meda sa kalawa yani vei Rau ka kakua ni soro, kevaka sara mada ga eda na lutu. Na Tamada Vakalomalagi dauloloma, ena marautaka na ikalawa ni vakabauta eda taura, ka kevaka eda lutu, o Koya ena marautaka na noda sasaga meda tucake ka sasaga tale.

    Cakacaka ena Vakabauta

    Na ikarua ni ivakavuvuli e rau a vakatovotovotaka e rua na Yalododonu Edaidai ka rau a sasaga sara tiko vakaukauwa me rau sotava na nodrau itokani tawamudu. Erau a taura ruarua na ikalawa ni vakabauta ena doudou.

    O Yuri, e dua na Yalododonu Edaidai mai Rusia, e a solibula ka sasaga me lako yani kina valetabu. E a qai raica e dua na marama totoka ena sitimanivanua, ka sa lomana me na wasea vua na kosipeli. Sega ni kila se cava tale me cakava e a taura na nona iVola iMomani ka tekivu wiliwili yani ka nuitaka ni na raici koya mai.

    Sega ni kila o Yuri ni marama o ya, o Mariya sa Yalododonu Edaidai oti tu. Ni sega ni kila tu o Mariya ni o Yuri e lewenilotu; ni vakamuria na veivakauqeti ka via wasea vua na kosipeli sa tekivu wilika talega o Mariya na nona iVola iMomani ka nuitaka ni na raici koya mai.

    Ia, erau rai cake vata ga mai ena dua na gauna ka rau kidrowa ni rau raica ena dui ligadrau na iVola i Momani—sa dina sara, ni rau a qai veivinakati ka rau laki vauci sara kina valetabu. Nikua o Yuri kei Mariya Kutepov mai Voronezh, Rusia, rau sa vauci tawamudu, erau sa vakaitavi sara vakalevu ena toso ni Lotu mai Rusia

    Na ka me vakabibitaki eke e sega walega na nodrau a bulataka nodrau vakabauta na veiwatini oqo. Ia e baleta talega na ikarua ni ivakavuvuli—Na Turaga e vakasotara vata na noda rawa ni cakacakataka ena vakabauta. Na noda sasaga meda taura e dua na ikalawa e sega walega ni sotavi, ena ulabaleta mai na nona veivakalougatataki yalataki na Turaga.

    Na Tamada Vakalomalagi kei na noda iVakabula e rau sa tu vakarau me rau vakalougatataki keda. Ni o Rau ga erau vinakata e dua na ikatini ni veika erau sa vakalougatataki keda kina ka rau sa yalataka tu ni katuba kei lomalagi ena tadola!9

    Ni da cakacaka ena vakabauti Jisu Karisito ka taura e dua na ikalawa vakauasivi na ikalawa e tawalogavinaka ka gadrevi kina na veisau se veivutuni eda na kalougata ka vakaukauwataki.10

    Au vakadinadinataka ni Turaga ena tuberi keda yani—kina—noda ikalawa ka tarava. O Koya ena vakasotara vata na noda sasaga kei na Nona kaukauwa, kevaka meda na guta meda na tovolea tikoga, veivutuni, ka toso yani ki liu ena vakabauta na Tamada Vakalomalagi kei na Luvena o Jisu Karisito.

    Na isolisoli vakayalo e yalataki vei ira ka ra lomana na Kalou ka talairawarawa kina Nona ivakaro, ia sa vakatalega kina vei keda ka “[vaqara] me na cakacakataka.”11 Na veivakaukauwataki ena soli vei ira era sasagataka tikoga ka vakasaqara.

    Rua na ivakatakilakila ka dau qaravi ena veimacawa ka na makataka na noda ilakolako lesu Vua na Tamada Vakalomalagi sa ikoya na Veiyalayalati ni cakacaka vakalotu ni sakaramede kei na noda rokova na Siga ni Vakacecegu. O Peresitedi Russell M. Nelson e vakatavuvulitaka ena koniferedi raraba sa oti, ni Siga ni Vakacecegu sa isolisoli ni Turaga vei keda. Na noda dinata e veimacawa ka vakarorkorokotaka na Siga ni Vakacecegu sa ivakatakilakila Vua na Turaga ni da lomani Koya.12

    “Ena veisiga ni vakacecegu eda vakadinadinataka ni da na taura na yaca ni luvena ka na dau nanumi Koya ka muria na Nona ivakaro.”13 Me isau ni noda sa veivutuni kei na noda sa ivalavala dodonu vua na Turaga ena vakavouia na iyalayala ni savai ni ivalavala ca ka na vukei keda me “tiko ga kei [keda] na nona Yalotabu”14 Na cakacaka ni Yalotabu ena vakatorocaketaki, vakaukauwataki, vakavulici ka tuberi keda.

    Kevaka meda nanumi Koya ena vei Siga ni Vakacecegu, meda vakanamata Vua na iVakabula ena rua na ivakatakilakila oqo ena noda sasaga ena vakaikuritaka mai na Turaga ena nona veivakalougatataki sa yalataki tu. E sa yalataki tu vei keda ni da vakarokorokotaka na Siga ni Vakacecegu na iyau kei vuravura ena noda15

    Na sala lesu Vua na Tamada Vakalomalagi ena veimuataki yani kina vale ni Turaga, na vanua eda na ciqoma kina na cakacaka vakalotu ka na veivakabulai vei keda kei ira na wekada era sa takali. Vakatavuvulitaka o Peresitedi Boyd K. Packer ni “cakacaka vakalotu kei na Veiyalayalati sa na ivakatakarakara ni noda rawa ni curu kina matanitu ni Kalou.”16Au sa masulaka ni o keda kece eda na sasagataka meda buladodonu ka vakayagataka na noda ivolatara ni valetabu meda veiqaravi vakawasoma.

    Vakamalumalumutaka na Tamata Vakavuravura

    Na ikatolu ni ivakavuvuli oqo: meda sa valuta mada na tamata vakavuravura ni dau matau vua me vakadarodaro, me lokuyara, se me dau soro.17

    Ni da sa toso tiko yani ena sala ni veiyalayalati eda na cakacala, e so na gauna ena vakavuqa. E so vei keda ena sasagataka na ivalavala se veivakatotogani ka sega vei keda na kaukauwa meda valuta. Ia na vakabauta na Tamada Vakalomalagi kei Jisu Karisito e ivakavuvuli ni cakacaka kei na kaukauwa18 Kevaka meda sa vinakata meda cakava, eda na vakalougatataki ena kaukauwa meda veivutuni kei na kaukauwa meda na veisau.

    Eda na sega ni rawata kevaka meda sega ni taura e dua na ikalawa ni vakabauta ni toso ki liu. Eda na sega, ka na sega ni rawata kevaka meda sega ni sema yani ena vakabauta vua na iVakabula—O Koya e se sega vakadua ni sega ni rawata ka na sega talega ni laiva meda sega ni rawata!

    Kalougata Yalataki

    Au yalataka ni veikalawa ni vakabauta ena sotavi ena veivuke mai lomalagi. Na veituberi ena yaco mai ni da masuta na Tamada Vakalomalagi, vakararavi vua na iVakabula ka muri Koya, ka vakarorogo kina Yalotabu. Na veivakaukauwataki ena yaco mai baleta na Veisorovaki nei Jisu Karisito19 Na veivakabulai kei na veivosoti ena lako ena loloma ni Kalou20. Na yalomatua kei na yalomalua ena yaco mai nida sa vakararavi kina nona gauna na Turaga me baleti keda. Na veitaqomaki ena yaco mai ni da sa vakamuria na parofita bula ni Kalou, o Peresitedi Thomas S. Monson.

    Ko ni a buli “mo [ni] rawata na marau”21 na reki ko ni na sotava ni ko ni sa lesu tiko vua na Tamada Vakalomalagi kei na nomudou iVakabula ka curu yani kina nomudou ivakavakacegu

    Au vakadinadinataka na veika dina oqo. Na Tamamudou Vakalomalagi dauloloma kei na Luvena o Jisu Karisito e rau bula tiko. E Rau kilai kemuni. E rau lomani kemuni. E rau sureti kemuni ena yalololoma mo ni taura na nomuni ikalawa e tarava, ka gole yani vei rau. Kakua ni wawa. Taura sara ga oqo. Ena yaca tabu i Jisu Karisito, emeni.