A Cava Tale Sa Vo Vei Au?
    Footnotes

    A Cava Tale Sa Vo Vei Au?

    Kevaka meda yalomalua ka vakarorogo, ena tuberi keda yani ki vale na Yalo Tabu, ia me da na taroga vua na Turaga na vanua me da gole kina ni da toso tiko.

    Au a tekivu vakataroga na Lotu niu a se tiko ena tabagone qasecake. E a dreti au kina kosipeli na nodra ivakaraitaki na noqu itokani Yalododonu Edaidai, ia au sa qai malele ena duatani ni kena ivunau. Niu a vulica ni yalewa kei na tagane era vakabauta dina era rawa ni toso tiko me qai lai yacova yani nodra sa tautauvata kei na noda itubutubu vakalomalagi, au sa vakadrukai sara ga. Au taleitaka na kena ivakavuvuli; au vakila sara ga na kena dina.

    Ni oti ga na noqu papitaiso, au sa vulica sara na iVunau mai na Ulunivanua, kau raica rawa sara ni o Jisu e vakatavuvulitaka sara ga na toso e tawamudu mai na iVolatabu. E a kaya, “O koya mo dou qai vinaka sara me vaka sa vinaka sara na Tamamudou sa tiko mai lomalagi.”1

    Au sa lewenilotu tiko oqo ka rauta ni 40 na yabaki kei na veigauna kece au wilika kina na tikina oqo mai na ivolanikalou au sa dau vakananumi sara ga ena inaki ni noda mai bula tu e vuravura. Eda lako mai meda mai vuli ka torocake me yacova ni da sa laki vakasavasavataki se da sa na laki vinaka sara vaka i Karisito.

    Na ilakolako vakatisaipeli e sega ni ka rawarawa. Sa dau vakatokai tu me “ilakolako me dei ka tosoicake.”2 Ni da sa lakova na sala rabailailai ka qiqo, ena dau bolei keda wasoma na Yalotabu meda vinaka cake ka toso cake tiko. Na Yalo Tabu ena dua na itokani totoka ni ilakolako oqo. Kevaka meda yalomalua ka vakarorogo, o koya ena tauri keda ka tuberi keda yani ki vale.

    Ia, o keda meda na dau kerea na Turaga me veidusimaki ena noda sala. Meda na taroga e so na taro dredre, me vaka na, “Na cava ena gadrevi meu veisautaka?” “Meu na vakavinakataka vakacava? “Na malumalumu cava ena gadrevi meu vaqaqacotaka?

    Meda vakasamataka mada na italanoa ni cauravou vutuniyau ena Veiyalayalati Vou. O koya e a buladodonu tu ka sa talairawarawa tu ena iVunau e Tini, ia e vinakata me vinaka cake. Na nona sasaga me rawata na bula tawamudu.

    Ni sotava ga na iVakabula, e taroga sara, “A cava tale sa vo vei au?”3

    Sauma o Jisu ena nona veivakasalataki ka a soli sara ga me baleta na cauravou vutuniyau. “Sa kaya vua ko Jisu, Kevaka ko sa vinakata mo vinaka sara, mo lako, mo volitaka na nomu iyau ka solia vei ira sa dravudravua, ia … mo lako mai mo muri au.”4

    E kidrowa sara ga na cauravou; e se bera vakadua ni bau vakasamataka na solibula vaka o ya. E a yalomalua me taroga na Turaga, ia e sega vua na yalodina me vakayacora na ivakasala e a soli vua. Meda tu vakarau meda cakava ni da sa ciqoma na sau ni taro.

    E a vakatavuvulitaka o Peresitedi Harold B. Lee, “O keda kece, kevaka meda na laki vinaka sara, [e] dodonu meda na taroga na taro oqo, ‘A cava tale sa vo vei au?’”5

    Au kila tiko e dua na tina vakabauta ka a vakamalumalumutaki koya qai taroga, “Na cava e vesuki au tiko mai na toso ki liu?” Ena nona kisi, e sega ni bera na isau ni nona taro mai na Yalotabu: “Kakua ni vosa kudrukudru tiko.” E kidrowa o koya ena isaunitaro o ya; e sega ni dau vakasamataka ni o koya e dau vosa kudrukudru. Ia, na itukutuku mai vua na Yalo Tabu sa matata sara tu ga. Ena veisiga kei na macawa e tarava sa qai vakila mai o koya nai vakarau ni nona dau vosa kudrukudru. Ni vakavinavinaka ena veivakauqeti o ya me tosoicake, sa qai vakadeitaka me wilika na nona kalougata ka sega soti na nona veibolebole. Ena vica ga na siga sa tekivu vakila o koya na vakacegu ni Yalotabu.

    Dua na cauravou yalomalua ka sega tiko ni rawa ni sotava na goneyalewa ka donu vua, e a lako vua na Turaga me vukei kina: “Na cava e tarovi au tiko meu tamata donu?” e a taroga. E basika na isaunitaro oqo e lomana kei nona vakasama: “Vakasavasavataka nomu ivosavosa.” A qai vakila o koya ena gauna o ya ni tiko e so na ivosavosa e dau cavuta ka sega soti ni rogo vinaka ni da rogoca ka sa qai vakadeitaki koya me sa veisau.

    Dua na marama sega ni vakawati e taroga na taro: “Na cava e ganita meu veisautaka?” sa qai vakasolokakana vua na yalotabu ka kaya, “Kakua ni dau takosovi ira na tamata ni ra vosa tiko.” E dau solia dina na Yalo Tabu na ivakasala veiganiti. O koya sa itokani vinaka dina ka na tukuna vei keda na ka ena sega tale ni dua ena rawa ni kaya se tu vei ira na yalodina mera kaya mai.

    E dua e lesu mai na kaulotu e sotava tu na osooso levu ni veika me cakava. E saga o koya me galala me laki cakacaka, me laki vuli, nona matavuvale, kei na itavi mai valenilotu. Sa qai taro ivakasala o koya vua na Turaga: “ena rawa vakacava meu kunea na vakacegu ena levu ni ka e tu oqo meu cakava?” Sega ni namaka o koya na isaunitaro e basika mai; a ciqoma o koya na veivakadeitaki me tovolea me rokova na Siga Tabu ka vakatabuya. Sa qai vakadeitaka o koya me sa solia na Sigatabu me nona na Turaga—me kakua ni tara na nona ka ni vuli ena siga o ya ka vulica ga na kosipeli. Na veisau lailai oqo e kauta mai vua na vakacegu e a vaqara tiko.

    Vica na yabaki sa oti au a wilika kina ena mekasini ni Lotu na italanoa ni dua na goneyalewa ka tiko tani mai vale ni a laki vuli tu ena dua na koliji. E a sa bera tu ena nona kani vuli ena nona kalasi, sega soti ni salavata nona vakanuinui na nona bula ni veimaliwai vakailawalawa, ka sa vaka me yalorarawa tu ga. Dua na siga e a tekiduru ga ka tagi, “Na cava meu cakava meu vakatorocaketaka kina na noqu bula?” Vakasolokakana mai na Yalo Tabu, “Tucake ka vakasavasavataka na nomu rumu.” Na veivakauqeti o ya e lako mai vakasauri, ia sa itekitekivu ni ka e a vinakata tu. Ni oti na nona samaka vakavinaka na nona rumu e a vakila na Yalotabu ni vakasinaita na nona rumu ka laveta cake na yalona.

    Ena sega ni tukuna vei keda na Yalo Tabu meda vakacokotaka na veika kece ena dua ga na gauna. Kevaka e vakakina eda na vakayalolailaitaki ka na tuvakasuka. Ena cakacaka vata kei keda na YaloTabu ena noda itosotoso, ya dua na ikalawa ena dua na gauna, se ena nona veivakavulici na Turaga, “vakalailai eke, vakalailai mai kea, … sa kalougata ko ira sa vakarorogo kina noqu vunau, … ia ko koya sa ciqoma au na solia vakalevu vua.”6 Kena ivakaraitaki, kevaka sa uqeti iko tiko na Yalo Tabu mo tukuna wasoma na vinaka ka vakayacora sara na veiuqeti oqori, sa na rawa ni kila o Koya ni sa kena gauna mo sa na toso ki liu kina so tale na bolebole levu cake—vaka na vulica mo tukuna, “Isa vosoti au; oya na noqu cala.”

    Tauri vakamatavuvale na sakaramede

    Sa dua na gauna vinaka ni taroga na, “A cava tale sa vo vei au?” na gauna eda taura kina na sakaramede. Vakatavulica na iApositolo o Paula ni oqo na gauna vinaka ni noda vakatarogi keda.7 Ena gauna vakanomodi oqo, ni vakanamata na vakasama ki lomalagi, na Turaga ena rawa ni kaya mai vei keda na ka me na caka, tarava.

    Me vakai kemuni au sa ciqoma e levu sara na itukutuku mai na Yalotabu ena veiyabaki sa oti ni vakaraitaka vei au meu vakatorocaketaki au. Meu vakaraitaka mada e vica na itukutuku kau a talairawarawa kina. Na veiuqeti oqo e wili kina na:

    • Kakua ni dau vosa kaikaila.

    • Vakataucokotaka na nomu bula, cakava e dua na lisi ni ka mo na cakava.

    • Taqomaka na yagomu ena kena laukana vakalevu na vuanikau kei na kakana draudarau.

    • Vakalevutaka na nomu dau tiko e valetabu.

    • Sasagataka mo vakasama titobu ni bera ni ko masu.

    • Tarogi watimu ena nona ivakasala

    • Yalomalumalumu ena gauna o draiva tiko kina; kakua ni sivia na iyalayala ni totolo. (Au se sasagataka tiko ga na kena iotioti.)

    Ena vakadeitaka na vinaka sara kei na veivakasavasavataki na Veisorovaki. Eda na sega ni rawa ni cakava ga vakaikeda, ia na loloma soli wale ni Kalou sa na rauti keda vakavinaka. Me vaka ga e a tukuna o Elder David A. Bednar: “Levu vei keda e nanuma ni Veisorovaki e baleti ira na ivalavala ca. Au sega mada ni kila vinaka ni da kila ka vakadeitaka ni Veisorovaki e baleti ira talega na yalododonu—baleti ira na tagane kei na yalewa vinaka era sa talairawarawa tu, bula dodonu, ka sasagataka tiko mera na vinaka cake tikoga.”8

    Marama e masu tiko

    Au vinakata meu vakatututaka mada me o kemuni kece mo ni vakaitavi ena dua na vakatovotovo vakayalo ena dua na gauna lekaleka mai oqo, ena bogi nikua ni ko ni cabora tiko nomuni masu. Kerea vua na Turaga ena yalomalumalumu na taro: “Na cava e tarova tiko na noqu toso ki liu?” Dua tale na kena ivosavosa: “A cava tale sa vo vei au?” qai mai waraka toka yani na kena isau. Kevaka mo yalodina tiko kina na kena isau sa na matata mai. Ena yaco me ivakatakila ka soli me baleti iko sara ga.

    Rairai de na tukuna vei iko na Yalotabu mo na vosoti dua tale mada. Se ko na ciqoma e dua na itukutuku mo qarauna vakavinaka na iyaloyalo ko na laki sarava se na ivakatagi ko na vakarogoca. Ko na vakila mo ivakaraitaki ni dina ena nomu cicivaki bisinisi, se mo sauma vakavinaka na isolisoli ni lolo. Na veika ena rawa ni yaco e levu sara.

    Na Yalotabu ena rawa ni tukuna vei keda na noda malumalumu, ia e rawa talega vua me vakaraitaka vei keda na veika eda kaukauwa kina. Ena so na gauna e rawa ni da taroga na veika eda sa cakava tiko vakadodonu me rawa ni vukei keda na Turaga meda vakatorocaketaka. Ni da wilika na noda veivakalougatataki vakapeteriaki, eda vakananumi kina ni kila vinaka tu na Tamada Vakalomalagi na veika eda rawa ni cakava ka yacova. E marautaka na veigauna kece eda taura meda kalawa yani kina ki liu. Vei Koya na vanua eda mua tiko kina e bibi cake mai na noda totolo.

    Mo ni toso tikoga, ni kakua ni yalolailai na taciqu kei na ganequ. Eda na lako mada iliu kina ibulubulu ni bera ni da na laki vinaka vakataucoko sara, ia, eke sa dodonu me tuvalaki kina na kena yavu. “Sa noda itavi meda vinaka cake nikua mai na noa ka vinaka cake ni mataka mai na noda siga nikua.”9

    Kevaka me sega ni dau vakaliuci na toso ni bula vakayalo ena noda bula, kevaka me sega ni vakamuri na ilakolako me dei ka vakatoroicaketaki, eda sa na calata na veika bibi e gadreva na Kalou me solia vei keda.

    Vica na yabaki sa oti au a wilika kina na vosa oqo nei Peresitedi Spencer W. Kimball, ka sa tarai au sara ga vakabibi ka dede na kena revurevu. E a kaya: “Au sa vulica ni vanua e tiko kina e dua na yalo daumasumasu, na via kania na buladodonu, na guilecavi ni ivalavala ca, kei na talairawarawa kina ivunau ni Kalou, na Turaga ena sovaraka vakalevu mai na rarama me yacova ni sa yaco me kaukauwa me curuma na ilati vakalomalagi. … Na tamata e yalododonu vaka o ya, sa tu vua na yalayala ni dua na siga ena raica na Turaga ka na kila ni sa i koya.”10

    Sa noqu masu ni veika me na sotavi oqo ena yaco me noda ena dua na siga ni da sa vakatara na Yalo Tabu me liutaki keda yani ki vale. Ena yaca i Jisu Karisito, emeni.

    iDusidusi

    1. Maciu 5:48.

    2. Neal A. Maxwell, “Vakadinadinataki na Cecere kei na Lagilagi ni Veisorovaki,” Liaona, Epe. 2002, 9.

    3. Maciu 19:20.

    4. Maciu 19:21.

    5. Nodra iVakavuvuli na Peresitedi ni Lotu: Harold B. Lee (2000), 197.

    6. 2 Nifai 28:30.

    7. Raica na 1 Korinica 11:28.

    8. David A. Bednar, “Na Veisorovaki kei na iLakolako ena Bula oqo,” Liaona, Epe. 2012, 14.

    9. Joseph Fielding Smith, Doctrines of Salvation, comp. Bruce R. McConkie, 3 vols. (1954–56), 2:18.

    10. Spencer W. Kimball, “Give the Lord Your Loyalty,” Tambuli, Feb. 1981, 47.