Ena Mata ni Kalou

Mai vei Elder Dale G. Renlund

Ena Kuoramu ni iApositolo Le Tinikarua

Former official portrait of Elder Dale G. Renlund of the First Quorum of the Seventy, April 2009. Formerly a member of the Fifth Quorum of the Seventy. Called to the Quorum of the Twelve Apostles and sustained October 2015. Portrait replaced in November 2015.

Meda na veiqaravi vakavinaka vei ira e so, meda raici ira ena mata vakaitubutubu, ena mata ni Tamada Vakalomalagi.

Kemuni na taciqu kei na ganequ, vakavinavinakataki nomuni tokoni au ena noa meu dua na lewe ni Kuoramui ni iApositolo Le Tinikarua. Ena ka dredre meu vakamacalataka na kena bibi vei au. Vakauasivi na nodrau veitokoni vei au e rua na marama vakasakiti ena noqu bula: o Ruci na watiqu kei na luvequ keirau lomani, o Ashley.

Na noqu kacivi e vakadinadinataka na dina ni itukutuku e a biuta tu mai na Turaga ena itekitekivu ni itabagauna oqo: “Era na vunautaka yani na uto ni noqu ivakavuvuli dina ko ira sa malumalumu kei ira na tamata wale, io mera vunautaka yani ki vuravura taucoko.”¹ O au e dua vei ira na malumalumu ka tamata wale. Vica vata na yabaki sa oti ena noqu a kacivi meu bisopi ena dua na tabanalevu mai na tokalau kei Amerika, qai qiriti au mai na tuakaqu, ka vuku cake vei au. Ka qai kaya, “Dodonu mo kila ni Turaga e sega ni kacivi iko baleta na veika o sa vakayacora oti. Vei iko, ena rairai baleta beka na veika e dodonu mo a vakayacora. Na Turaga e kacivi iko baleta na veika e na ganita me caka ena ruku ni nomu veiliutaki, ka na vakayacori walega o ya kevaka mo na vakayacora na Nona lewa”. Au raica rawa ni lako mai oqo vua e dua na tuakaqu ka sa dodonu vinaka sara ga ena gauna oqo.

Dua na ka totoka e dau yaco ena gauna ni kaulotu o ya na gauna e vakila kina o koya ni nona kacivi e sega ni baleti koya, ia, e baleta tiko na Turaga, na Nona cakacaka, kei ira na luvena na Tamada Vakalomalagi. Au vakila ni tautauvata kei na dua na iApositolo. Na itavi oqo e sega ni baleti au. E baleta tiko na Turaga, na Nona cakacaka, kei ira na luvena na Tamada Vakalomalagi. Sega soti ni dua na ka na itavi cava e qaravi ena Lotu, meda veiqaravi vagumatua, e dua me na veiqaravi ka kila tiko ni o, “ira oqo era luvena vakayalo na itubutubu vakalomalagi ka sa kena ibalebale, … ni ra sa vakayalo ka ra na laki cava kece kina.”²

Ena noqu cakacaka sa mai vakacavari, o au e dua kau dau dikeva na veimate ni uto kei na kedra vakaisosomitaki ka levu sara na tauvimate era sa bibi sara ga. Dau veiwalitaka o watiqu ni na dua na ivakaraitaki ca kevaka me mai dua o koya na noqu tauvimate. Niu qai vakananuma mai sa levu sara ga na tauvimate era mate, kau sa qai vakamatautaka me yaco vei au e dua na ituvaki ni bula veilecayaki ena gauna e dau yaco mai kina e dua na gauna dredre. Ni yaco o ya na yalorarawa kei na yalo ca sa vaka e mamada.

E a sotava o Chad e dua na cauravou ena yabaki 1986 e dua na leqa ni nona uto ka mani veisautaki kina na nona uto. E a toso vinaka sara na nona bula ena tini vakacaca na yabaki. E a cakava kece o Chad na veika e gadrevi vua me bulabula vinaka tu ga kina ka bulataka sara tu ga na bula ni veisiga. E a laki kaulotu ka mai cakacaka ka sa gone vakarorogo sara ga vei rau na nona itubutubu. Na iotioti ni vica na yabaki ni nona bula sa bau veibolei sara toka ga ni a curu suka vakawasoma mai valenibula.

Dua na yakavi e a kau mai na tabana ni veiqaravi vakatotolo e valenibula ni a sotava e dua na leqa ni cakacaka vakadodonu na nona uto. Keitou a veiqaravi vua kei ira na noqu itokani ena kena e vinaka sara ia sa dreve na inaki ni sa sega tale ni rawa me vakabulai o Chad. Keitou mai vakacegu yani kau vakarogoya ni sa mai vakacegu o Chad. Dina ga niu rarawa ka yaloca, au taura ena yalo vakadauveiqaravi vakavuniwai. Au a vakasamataka, “O Chad e a qaravi sara vakavinaka. E a toso tale nona bula me vica vata na yabaki ka a sega ni rawa kevaka me a sega ni yaco na veika sa mai vakayacori vua.” Na veiyawaki ni yalorarawa o ya e a mai vorolaki ni rau sa curu mai kina rumu ni veiqaravi vakatotolo na nona itubutubu ka raici luvedrau ni sa davo koto ena ilavelave. Ena tiki ni sekodi o ya au sa qai raici Chad ena matai tinana kei tamana, Au a raica na vakanuinui levu kei na nanamaki ka rau a nanuma ni na vakayacora o koya, na gagadre e a tu vei rau ni na bula me balavu tale vakalailai ka vinaka cake talega. Niu sa vakananau tu vaka oya sa qai tekivu tuturu mai na wai ni mataqu. Ena kena mai veisau na itutu kei na yalo ni loloma kau na sega vakadua ni guilecava, erau sa qai mai vakalomavinakataki au na itubutubu nei Chad.

Au sa qai kila oqo ena Lotu, kevaka meda na veiqaravi vakavinaka vei ira e so, meda raici ira ena mata vakaitubutubu, ena mata ni Tamada Vakalomalagi. Ena gauna oqori eda na qai kila dina kina na ibalebale ni bibi ni yalo ni tamata. Ena gauna oqori eda na qai kila kina na nona loloma na Tamada Vakalomalagi, vei ira kece na luvena. Eda na kila talega kina na nona dau kauwaitaki keda na iVakabula. Eda na sega ni rawa ni vakataucokotaka na qaravi ni noda itavi ena noda veiyalayalati meda tagi vata kei ira sa tagi, ka vakacegui ira era gadreva na veivakacegui vakavo kevaka meda na raici ira e matana na Kalou.³ Na kena vakarabailevutaki na noda rai oqo, sa na dolavi kina na yaloda, kina nodra rarawa, lomaleqa, kei na mosi ni yalo vei ira na tani. Ia, na Tamada Vakalomalagi ena tuberi keda ka vakacegui keda me vaka ga na nodrau a vakacegui au na itubutubu nei Chad ena vica na yabaki sa oti. Dodonu me tiko vei keda na mata meda na raica, na daliga me na rogoca, kei na yalo me na kila, ka vakila kevaka meda na vakavotukanataka na veivueti e dau tukuna wasoma ka veivakauqeti kina o Peresitedi Thomas S. Monson.⁴

Ena gauna eda na raica kina ena mata ni Tamada Vakalomalagi eda na qai vakasinaiti ena “loloma i Karisito”⁵ Meda na kerea vua na Kalou ena veisiga na loloma vakaoqo. E veivakadreti kina o Momani, “Oi kemudou na wekaqu lomani, mo dou masuta na Tamada ena yalomudou taucoko me vakasinaiti kemudou ena loloma oqo ia na loloma sa solia vei ira era sa muria na Luvena o Jisu Karisito.”⁶

Ena yaloqu taucoko, au vinakata meu sa tisaipeli yalodina i Jisu Karisito.⁷ Au lomani Koya. Au vakacerecerei Koya. Au vakadinadinataka ni o Koya nai Lumuti, Na Mesaia. Au vakadinadinataka na nona loloma soliwale, loloma cecere, kei na loloma tawa tukuni rawa, au kuria na noqu ivakadinadina kina nodra na iApositolo, ni yabaki 2000 era a tukuna kina ni o “Karisito e se bula, ka luvena Daulomani na Kalou o Jisu. … O koya na rarama, na bula kei na inuinui kei vuravura.”⁸

Au vakadinadinataka ni dua na siga ena 1820 ena dua na veikau mai Niu York e a basika kina na Turaga ka sa tucaketale, vata kei na Kalou na Tamada Vakalomalagi vei Parofita Josefa Simici, me vaka ga e a kaya o Josefa Simici. Sa tu e vuravura na idola niMatabete me rawa kina ni qaravi na cakacaka vakalotu ka sa vakalesuimai me veivakabulai. Au kila na veika oqo. Ena yaca i Jisu Karisito, emeni.

iDusidusi

1. Vunau & Veiyalayalati 1:23.

2. “Na Matavuvale: Ai Vakaro ki Vuravura Raraba,” Liaona, Nove. 2010, 129; wiliki mai vei Peresitedi Gordon B. Hinckley me tiki ni nona itukutuku kina Soqoni ni iSoqosoqo ni Veivukei ka vakayacori ena ika 23 ni Sepiteba, 1995, mai Salt Lake City, Utah.

3. Raica na Mosaia 18:8–10.

4. Raica, me kena ivakaraitaki na, Thomas S. Monson, “To the Rescue,” Liaona, Julai 2001, 57–60; “Our Responsibility to Rescue,” Liaona, Okot. 2013, 4–5. E a vakabibitaka na itukutuku oqo o Peresitedi Monson ena nona itukutuku vei ira na Vakaitutu Raraba ena 30 ni Sepiteba , 2015, ni vakananumi ira na a soqoni tiko kina; ni a vakabibitaka tiko na itukutuku ka a solia vei ira na Vakaitutu Raraba kei na vitusagavulu ni iWasewase era a vuli tiko ena koniferedi raraba ni Epereli 2009.

5. Moronai 7:47.

6. Moronai 7:48.

7. Raica na Vunau & Veiyalayalati 18:27–28:

   “Ia, ko ira na Le Tinikarua mera noqu tisaipeli ka ra na taura na yacaqu mera kilai kina kei ira na Le Tinikarua, sa i ira sa gadreva mera sa na taura na yacaqu ena yalodra taucoko.

   “Ka ra na gadreva mera sa na taura na yacaqu ena yalodra taucoko, ka ra sa kacivi mera lako yani ki vuravura taucoko mera vunautaka na noqu kosipeli kina tamata kecega.”

8. “Se Bula na Karisito: Na nodra iVakadinadina na iApositolo,” Liaona, Epe. 2000, 3. Ni mai cavuti oqo eke, au sa kuria kina na noqu saini kina itukutuku meu kuria kina na nodra ivakadinadina o ira na iApositolo oqori.