Na Vosa Talei ni Kalou
    Footnotes

    Na Vosa Talei ni Kalou

    Na vosa talei ni Kalou sa vakaraitaka vei keda ni gadrevi me ia tikoga na veivutuni ena noda bula me rawa kina ni tiko vata kei keda vakabalavu sara na veivakauqeti ni Yalo Tabu.

    E levu vei keda eda sota me da vakaitavi ena koniferedi oqo eda lako mai “me da mai rogoca na vosa talei ni Kalou, io, na vosa sa vakamavotaka na yalo sa mavoa” (Jekope 2:8). Na vosa oqori e rawa ni kunei ena ivolanikalou kei na nodra itukutuku na noda iliuliu, ka kauta mai vei keda na inuinui kei na vakacegu ena butobuto ni veika rarawa.

    Mai na veika eda sa sotava ena bula, eda sa vulica kina ni sega ni taucoko na reki ena vuravura oqo, ia vei Jisu Karisito sa taucoko na noda reki (raica na V&V 101:36). Ena solia vei keda o Koya na kaukauwa me da kakua kina ni sotava na veivakararawataki baleta ni ra sa vakaseyavutaki ena Nona reki (raica na Alama 31:38).

    Ena yaco na yaluma ni yalo ni da raica ni sotava tiko e dua eda daulomana na mosi ni dua na mate rerevaki.

    Ni mate e dua eda dau lomana ena vakamosia na yaloda.

    Ni ra lako tani mai na salatu ni kosipeli na luveda, eda na beitaki keda ka yaco na veilecayaki ena vuku ni nodra icavacava tawamudu.

    Sa na tekivu me seyavu yani vakamalua na vakanuinui me rawati na vakamau vakaselesitieli ka tauyavutaki e dua na matavuvale ena bula oqo ni toso na gauna.

    Na nodra itovo veivakalolomataki o ira e dodonu me ra lomani keda e rawa ni titobu ka mosi na kena imawe ki yaloda.

    Nona sega ni yalodina e dua na isa ni vakawati e rawa ni vakarusa e dua na isema vakaveiwatini eda a nuitaka me rawa ni tawamudu.

    Oqo kei na vuqa tale na veika rarawa ena kunei ga ena bula vakatovolei oqo e dau vakavuna noda tarogi keda ena taro vata a taroga na Parofita o Josefa Simici: “Oi kemuni na Kalou, ko ni sa tiko evei?” (V&V 121:1).

    Ena veigauna dredre oqori ni noda bula, ena kauta mai ki yaloda kei na noda vakasama na vosa talei ni Kalou ka dau vakamavotaka na yalo sa mavoa na itukutuku veivakacegui vakaoqo:

    “Me vakacegu na yalomu; raica sa lekaleka walega na gauna ni nomu rarawa kei na vutugu;

    “Ia kevaka ko sa vosota rawa, ena laveti iko cake na Kalou” (V&V 121:7–8).

    Na vosa talei ni Kalou ena vakasinaiti keda ena inuinui, baleta ni da kila ni ko ira era yalodina tiko ena gauna ni buladredre ena levu cake na kedra isau ena matanitu vakalomalagi ka ni na “rawati na veivakalougatataki ni sa oti na veika rarawa” (raica na V&V 58:3–4).

    Na vosa talei ni Kalou, ka cavuti mai vei ira na parofita, e vakadeitaka vei keda ni noda veivauci tawamudu, tokoni mai na noda yalodina ki na veiyalayala vakalou a soli vei keda ena noda veiqaravi gugumatua me baleta na dina, ena vakalougatataki keda kei ira na noda kawa (raica na Orson F. Whitney, ena Conference Report, Epe. 1929, 110).

    Ena vakadeitaka talega vei keda, ni oti na noda bulataka e dua na bula yalodina, eda na sega ni vakayalia e dua na veivakalougatataki baleta ni da a sega ni cakava eso na ka kevaka a sega ni donumaki keda na kena madigi me da cakava. Kevaka eda a yalodina tiko ena noda bula me yacova ni da mate, eda “na rawata na veivakalougatataki, na bula vakacerecerei, kei na lagilagi kece sara era na rawata na tagane kei na yalewa [a donumaki ira na kena madigi].” (Raica na The Teachings of Lorenzo Snow, ed. Clyde J. Williams [1984], 138.)

    Ia, sa ka bibi talega me da kila ni rawa ni curuma mai noda bula na dredre kei na bulararawa kevaka eda sega ni veivutunitaka vakaidina na noda ivalavala ca. E vakavuvulitaka vei keda o Peresitedi Marion G. Romney: “Na veika rarawa kei na dredre e sotava na tamata e vuravura oqo e vua ni ivalavala ca sega ni veivutunitakitaki ka sega ni muduki. … Me vaka ga ni rau semati ki na ivalavala ca na veika rarawa kei na yaluma, sa semati vakakina ki na veivosoti na marau kei na reki” (ena Conference Report, Epe. 1959, 11).

    Na cava e vakavuna kina na bulararawa kei na mosi na sega ni veivutuni?

    E dua na ka e rawa ni kena isau sai koya “sa tu vata kei na kena itotogi, me ra veivutuni kina na tamata” (Alama 42:18; raica talega na tikina e 16). E vakavuvulitaka na Parofita o Josefa Simici ni sai keda ga eda na vakarusai keda, sai koya na veivakararawataki ni cudru ka tu ena noda vakasama ena vaka na drano bukawaqa kei na sulifure (raica na Nodra iVakavuvuli na Peresitedi ni Lotu: Josefa Simici [2007], 255).

    Kevaka eda via vakamamautaka na noda gagadre ena noda tovolea me da “vakalewa na ivunau ni Kalou me iulubale ni [noda] ivalavala ca” (Alama 42:30) se na noda tovolea me da vunitaka, na ka ga eda na rawata kina na noda vakacudruya na Yalo (raica na V&V 121:37) ka lokuyarataka noda veivutuni. Na mataqali vakacegu vakaoqo, me ikuri ni sega ni tudei, ena yaco me vakavuna e levu tale na rarawa kei na yaluma ena noda bula ka na vakamalumalumutaka na noda rawata na vakabokoci ni noda ivalavala ca.

    Ena mataqali veivakararawataki vakaoqo, e kauta talega mai kina na vosa talei ni Kalou na vakacegu kei na inuinui; e tukuna vei keda ni tiko na iwali ni mosi ka vu mai na revurevu ni ivalavala ca. Na iwali oqori e rawa mai na isoro ni veivakaduavatataki i Jisu Karisito ka na mana ni da cakacakataka noda vakabauti Koya, veivutuni, ka talairawarawa ki na Nona ivakaro.

    E bibi kina na noda kila me vaka ga na vakabokoci ni ivalavala ca, na veivutuni e dua na iwalewale, ka sega ni dua na ka e yaco ga ena dua na gauna. E gadrevi kina na gumatua ena kena ikalawa yadua.

    Me kena ivakaraitaki, ni da vakayagataka na sakaramede, eda vakaraitaka kina vua na Turaga ni da na dau nanumi Koya tikoga ka muria na Nona ivakaro. Oqori na ivakaraitaki ni noda inaki yalodina.

    Ena gauna sa tekivu kina me da dau nanumi Koya ka talairawarawa ki na Nona ivakaro ena veisiga—ka sega ena Siga walega ni Vakacecegu—sai koya oqori na gauna sa tekivu me vakaimawe mai kina na bokoci ni noda ivalavala ka tekivu me vakataucokotaki mai na Nona yalayala ni na tiko vata kei keda na Yalona.

    Ni sega na talairawarawa dodonu me salavata kei na noda inaki, ena rawa ni sega ni dede sa yali yani na mana ni vakabokoci ka tu vakasuka na veitokani ni Yalotabu. Sa rawa ni yaco kina vei keda na itovo rerevaki ni vakarokorokotaki Au ena tebenigusudra io na yalodra era sa vakayawaka vei Au (raica na 2 Nifai 27:25).

    Me ikuri ni vakacegu, sa vakasalataki keda na vosa talei ni Kalou ni iwalewale oqo me rawati na vakabokoci ni noda ivalavala ca e rawa ni vakataotaki ni da tacori “ena nodra veivakacacani na kai vuravura,” ka rawa ni tomani tale ena vakabauta kevaka eda veivutuni vakaidina ka vakayalomalumalumutaki keda (raica na V&V 20:5–6).

    Na cava beka eso na veivakacacani ni vuravura e rawa ni vakataotaka na iwalewale me da rawata kina na vakabokoci ni noda ivalavala ca e semati ki na vakarokorokotaki ni Siga ni Vakacecegu?

    Eso na ivakaraitaki e oka kina na yaco bera mai ki na soqoni ni sakaramede sega ni dua na iulubale vinaka; yaco mai, sega mada ni se bau dikevi keda vakavinaka, ka kania na madrai ka gunuva na bilo sega tu ni kilikili kaya (raica na 1 Koronica 11:28); kei na noda yaco mai ka sega mada ni bau vakatusa na noda ivalavala ca ka kerea vua na Kalou na nona veivosoti ena vukuda.

    Eso tale na ivakaraitaki: sega na vakarokoroko ena veisolitaki tiko ni itukutuku ena noda iyaya vakalivaliva, biubiu ni oti ga na vakayagataki ni sakaramede, kei na caka tiko ni so na ka ena noda veivale ka sega ni veiganiti kei na siga bibi oya.

    Na cava beka e dua na vuna vei keda, ni da kila tu na veika kece oqo, e sega ni rawa kina ni da rokova na Siga ni Vakacecegu?

    Ena ivola i Aisea, e rawa ni da kunea kina e dua na isaunitaro ka, dina ga ni semati kina Siga ni Vakacecegu, e baleta talega na ivakaro eso e dodonu me da rokova: “Kevaka ko na tarova na yavamu ena sigatabu, mo kakua ni cakava na ka ko sa vinakata ga ena noqu Sigatabu” (Aisea 58:13).

    Na vosa bibi eke na “cakava na ka ko sa vinakata ga,” se ena dua tale na kena vosa, cakava na loma ni Kalou. Dau vakavuqa, na lomada—dau vakauqeti mai na gagadre kei na gagano ni tamata vakayago—veisaqasaqa kei na loma ni Kalou. E vakavuvulitaka na parofita o Brigham Young ni “gauna sa veitaudonui kina vakavinaka sara na lomana kei na veika ni yalona e dua na tamata vua na Kalou kei na veika e gadreva ko koya, sa na vakacerecerei na tamata oqori.—Sai koya, na lomaqu me vakayali ena loma ni Kalou, oqori ena kauti au ki na veika vinaka kecega, ka vakaisalataki au ena tawamate rawa kei na bula tawamudu” (Deseret News, Sepi. 7, 1854, 1).

    Na vosa talei ni Kalou e sureti keda me da vakayagataka na mana ni Veisorovaki vei keda ka yaco me veiyaloni tale kei na Lomana—ka sega ki na loma ni tevoro kei na yago—me rawa kina vei keda, ena Nona iloloma soliwale, me da vakabulai (raica na 2 Nifai 10:24–25).

    Na vosa talei ni Kalou eda wasea vata nikua sa vakaraitaka vei keda ni gadrevi me ia tikoga na veivutuni ena noda bula me rawa kina ni tiko vata kei keda vakabalavu sara na veivakauqeti ni Yalo Tabu.

    Ni tiko vata kei keda na veitokani ni Yalotabu eda na yaco me tamata vinaka cake. Ena “vakasolokakanataka na vakacegu kei na reki ki yalodra, … ka kauta laivi na yaloca, veicati, kocokoco veisaqasaqa, kei na ivalavala ca kecega mai yalodra; kei na nodra gagadre taucoko me ra na cakava na veika vinaka, kauta mai na yalosavasava, ka tara cake na matanitu ni Kalou” (raica na iVakavuvuli: Josefa Simici, 110).

    Ena veivakauqeti ni Yalo Tabu, eda na sega ni vakacudrui, eda na sega talega ni veivakacudrui; eda na mamarau cake, ka na savasava na noda vakasama. Ena levu cake na noda lomani ira na tani. Eda na tuvakarau me da veivosoti vakalevu cake ka vakateteya yani na marau vei ira era wavoliti keda.

    Eda na vakavinavinaka ni da raica na nodra toso eso, ka da na segata na vinaka vei ira na tani.

    Sa noqu masu me da rawa ni vakila na reki e yaco mai ena noda segata me da buladodonu ka me rawa ni da maroroya na veitokani ni Yalo Tabu ena noda bula mai na noda veivutuni tikoga ena yalodina. Eda na yaco me tamata vinaka cake, ka na vakalougatataki na noda matavuvale. Au vakadinadinataka na veivakavuvuli oqo ena yaca tabu i Jisu Karisito, emeni.