Io, Eda Rawa ka Eda na Qaqa!
    Footnotes

    Io, Eda Rawa ka Eda na Qaqa!

    Sa dodonu me da kukuva matua na noda ivakadinadina ni kosipeli i Jisu Karisito. Eda na qai qaqa kina ena ivalu e veisiga kei na ca.

    Kemuni na taciqu, au yalomalumalumu ena itavi dokai e noqu meu vosa vei kemuni, na matabete ni Kalou ena Lotu raraba nikua.

    A kaya ena dua na gauna o Peresitedi Thomas S. Monson:

    “Na vuravura e rawa ni yaco ena so na gauna me vanua vakarerevaki me da tiko kina. E sega ni dua—se gone se qase se tu e loma—me galala mai na kena tadravi koya na veika oqo ka rawa ni dreti keda sobu ka vakarusai keda. …

    “… Ia me da kakua ni guce. … Eda vala tiko ena dua na ivalu vata kei na ivalavala ca. … Oqo e dua na ivalu eda na qaqa kina. Sa solia mai vei keda na Tamada mai Lomalagi na iyaragi me da rawata kina.”1

    O keda kece, gone kei na qase, eda sotava tiko e veisiga na ivalu sa cavuta oti o Peresitedi Monson. Na meca kei ira na nona agilosi era tovolea tiko me ra vagolei keda tani. Na nodra inaki me ra vakauqeti keda me da goletani mai na veiyalayalati eda sa cakava kei na Turaga, ka vakavuna na noda sega ni raica na noda ivotavota tawamudu. Era kila vinaka na ituvatuva nei Tamada Vakalomalagi ena vukudra na Luvena, ni ra a tiko vata kei keda ena Matabose cecere oya mai Lomalagi ka a vakaraitaki taucoko kina. Era tovolea me ra vakayagataka na noda malumalumu kei na luluqa, me ra lawakitaki keda ena “butobuto loaloa …, ka dau vakamatabokotaka na matadra, ka vakaukauwataka na lomadra na luve ni tamata, a sa kauti ira ki na sala rabailevu, mera lako sese kina ka rusa.”2

    Veitalia na veisaqasaqa eda sotava, me vaka sa vakavuvulitaka o Peresitedi Monson, oqo e dua na ivalu ena rawa ka da na qaqa kina. E vakabauta na Turaga na noda kaukauwa kei na noda gagadre me vakakina.

    E tu ena ivolanikalou na kedra ivakaraitaki sega ni wili rawa o ira era sa qaqa ena nodra ivalu ena loma sara mada ga ni veimecaki kaukauwa. E dua vei ira na ivakaraitaki oqori o Kavetani Moronai ena iVola i Momani. Na cauravou vakasakiti oqo a yaloqaqa me taqomaka na dina ena gauna e levu tu kina na vakaduiduile kei na veivaluvaluti ka toka kina ena dua na vanua rerevaki na nodra bula na matanitu ni Nifaiti. E dina ni uasivi sara na nona qarava na nona itavi, a yalomalumalumu voli ga o Momani. Oqori kei na itovo ni bula tale eso a yaco kina o koya me dua na iyaya ni cakacaka duatani ena liga ni Kalou ena gauna oya. E vakamacalataki ena ivola i Alama kevaka me vakataki Moronai kece na tagane, “ena sautanini me tawamudu na kaukauwa kei eli; [ka] na sega na nona kaukauwa na tevoro ki yalodra na luve ni tamata.”3 Na itovo ni bula kece nei Moronai e vu mai na cecere ni nona vakabauta na Kalou kei na Turaga o Jisu Karisito4 kei na nona gagadre tudei me muria na vosa ni Kalou kei ira na Nona parofita.5

    Me kena ivakatautauvata, o keda kece eda gadreva me da veisautaka na noda bula me da Kavetani Moronai ni gauna oqo me rawa ni da qaqa ena noda vala vata tiko kei na ca. Au kila tiko e dua na dikoni gonetagane ka veisautaki koya me dua na Kavetani Moronai ni gauna oqo. Ena nona segata me muria na nodrau ivakasala na nona itubutubu kei ira na iliuliu ni Lotu, na nona vakabauta kei na yalodina sa dau vakatovolei ena veisiga kece, ni se yabaki gone sara mada ga. A tukuna vei au ni dua na siga a vakidacalataki ena dua na ituvaki dredre ka logaloga ca—era sarava tiko nona itokani na iyaloyalo vakasisila ena nodra selevoni. Ena gauna sara ga oqori, me vakatulewataka na cauravou oqo se cava e bibi duadua—na nona kilailevu se na nona buladodonu. Ena vica na sekodi e tarava, a vakasinaiti ena yaloqaqa ka tukuna vei ira na nona itokani ni sega ni dodonu na ka era cakava tiko. A vakuria ena nona kaya, ni dodonu me ra muduka sara na ka era cakava tiko de ra na qai vakabobulataki kina. E vuqa na nona lewenikalasi era vakalialia na nona ivakasala, ka kaya ni oya e dua na tiki ni bula ka sega ni dua na kena cala. Ia, e dua vei ira a rogoca na ivakasala ni cauravou oya ka muduka na ka a vakayacora tiko.

    Na nona ivakaraitaki na dikoni oqo a veivakauqeti vinaka vua e dua mada ga na nona lewenikalasi. E sega ni vakataratutu, ni rau na vakalialiai ka vosa vakacacani kei na nona itokani ena vuku ni vakatulewa oya. Ena yasana kadua, erau sa muria na veivakauqeti nei Alama vei ira na nona tamata ena nona kaya, “Dou lako tani mai vei ira na tamata ca, ia dou tawasei tu; dou kakua ni tara na ka sa sega ni savasava.”6

    Na ivolalailai ni Me iSakisaki ni iTabagone e tu kina na ivakasala eso oqo mai vei iratou na Mataveiliutaki Taumada: “Sa nomuni lewa na digidigi ko ni na vakayacora. Sa dau nanumi kemuni tikoga na Kalou ka na vukei kemuni mo ni vakayacora na digidigi e vinaka, ena gauna mada ga era vakayagataka kina ena sala tawadodonu na nodra galala ni digidigi o ira na nomuni matavuvale kei na itokani. Mo ni yaloqaqa ka tudei tiko ena nomuni talairawarawa ki na lewa ni Kalou, ena gauna mada ga ko ni tu taudua kina. Ni ko ni vakayacora oqo, ko ni sa tuvalaka tiko kina e dua na ivakaraitaki me ra muria ko ira na tamata.”7

    Na ivalu erau sota tiko kina na vinaka kei na ca ena ia tikoga ena noda bula taucoko me vaka ni nona inaki na meca me ca na tamata kecega me vakataki koya. O Setani kei ira na nona agilosi era na tovolea me ra tabonaka na noda vakasama ka lewai keda ena nodrau temaki keda me da ivalavala ca. Kevaka era rawata, era na vakacacana na ka vinaka kecega. Ia, e dodonu me da kila ni ra na qai rawai keda ga kevaka eda vakatara vei ira.

    E tu talega ena ivolanikalou e vica vata na kedra sabolo o ira era solia vua na meca na veivakadonui oqori ka qai kedra itinitini na veilecayaki ka yaco sara me vakarusai me vakataki Neori, Korio, kei Seremi. E dodonu me da kidava na ka rerevaki oqo. E sega ni rawa ni da soli keda me da vakasesei mai na veitukutuku kilailevu ka dau ciqomi vakarawarawa e vuravura ka saqata na ivunau kei na ivakavuvuli dina ni kosipeli i Jisu Karisito. E vuqa vei ira na itukutuku vakavuravura oqori e kedra inaki duadua na sasaga ni vuravura me vakadonuya na ivalavala ca. E dodonu me da nanuma tiko, na kena itinitini, ni na tu ena mata i Karisito na tamata kecega me lewai ena nona ivalavala, se vinaka se ca.8 Ni da sotava na veitukutuku vakavuravura oqo, ena gadrevi na yaloqaqa cecere kei na kilai deivaki ni ituvatuva nei Tamada Vakalomalagi me digitaki na dodonu.

    Eda na rawata o keda kece na igu me da digitaka na dodonu kevaka eda vakasaqara na Turaga ka biuta Vua na noda vakanuinui kei na vakabauta kece sara. Ia me vaka e vakavuvulitaka na ivolanikalou, e gadrevi me tu vei keda na “yalo dau dina” kei na “inaki savasava.” Ia na Turaga, ena Nona loloma tawayalani, “ena vakaraitaka na dina” [vei keda] “ena kaukauwa ni Yalo Tabu. Ia na kaukauwa ni Yalo Tabu ena vakatakila vei kemudou na dina ni veika kecega.”9

    Na kilaka ka rawa mai na Yalo Tabu sai koya ga na noda ivakadinadina, ka tosoya tiko na noda vakabauta kei na gagadre me da muria na ivakavuvuli ni kosipeli vakalesui mai ena veisiga e muri oqo, veitalia na itukutuku kilailevu eda rogoca mai vuravura. Na noda ivakadinadina sa dodonu me noda isasabai me taqomaki keda mai na gasauvidi ni meca ena nona sasaga me valuti keda.10 Ena tuberi keda yani vakavinaka ena maliwa ni butobuto kei na veilecayaki ka tu e vuravura nikua.11

    Au a vulica na ivakavuvuli oqo niu a veiqaravi tiko vakacauravou daukaulotu. Keirau a veiqaravi tiko kei na noqu itokani ena dua na tabana lailai vakayawa sara ni Lotu. Keirau tovolea me keirau veitalanoa kei na tamata kecega ena loma ni koro levu. Eratou ciqomi keirau vakavinaka, io era dau taleitaka me ra veibataka na ivolanikalou ka taroga vei keirau me so na ivakadinadina kaukauwa me baleta na dina ni veika keirau vakavuvulitaka.

    Au nanuma lesu ena veigauna kece keirau tovolea kina kei na noqu itokani me keirau laki vakadinadinataka vei ira na tamata e dua na ka, e biuti keirau na Yalo ni Kalou ka keirau mai yali yani ka veilecayaki saraga. Keirau vakila ni dodonu me keirau vakataudonutaka na neirau ivakadinadina ki na dina ni kosipeli keirau vakavuvulitaka tiko. Mai na gauna ko ya ka lako yani, au nanuma ni keirau wasea na neirau ivakadinadina mai vu ni yaloi keirau, e robota na rumu e dua na kaukauwa galu ni veivakadeitaki ka lako mai na Yalo Tabu ka sega tale ni dua na veilecayaki se na veivosaki me caka. Au vulica ni sega ni dua na kaukauwa ca e tu me rawa ni vakasesea, lawakitaka, se cavilaka na mana ni nona ivakadinadina yalodina e dua na tisaipeli i Jisu Karisito.

    Me vaka e vakavuvulitaka sara ga Vakaikoya na iVakabula, ni meca e gadreva me tavuloni keda me vaka na witi, ka vakavuna me yali vei keda na kaukauwa me da vakauqeta kina na vuravura ena vinaka.12

    Kemuni na veitacini, ena vuku ni ua ni veilecayaki kei na vakatitiqa e roboti vuravura raraba tu nikua, me da kukuva matua cake toka ga na noda ivakadinadina ni kosipeli i Jisu Karisito. Ena qai tubu me levu cake na noda kaukauwa me da valataka na dina kei na dodonu. Eda na qaqa ena ivalu e veisiga kei na vunica, ia, eda na sega ni bale ena bucanivalu ni bula, eda na kauti ira yani eso tale ki na nona ivakatagedegede na iVakavuvuli.

    Au sureti keda kece me da mai vakaruru ena ivakavuvuli era tu ena ivolanikalou. A vakataudonutaka o Kavetani Moronai na nona vakabauta vua na Kalou kei na nona ivakadinadina ni dina ki na kilaka kei na yalomatua e kunei ena ivolanikalou. Ena sala oqo, a vakabauta ni na ciqoma na veivakalougatataki ni Turaga ka na rawata e vuqa na qaqa, sai koya dina na veika a yaco.

    Au sureti keda kece me da mai vakaruru ena nodra vosa ni yalomatua na noda parofita ena gauna oqo. E kaya o Peresitedi Thomas S. Monson: “O keda eda sa tabaki ki na matabete ni Kalou e rawa ni da vakabasikata na duidui. Ni da maroroya na noda dui bula savasava ka rokova na noda matabete, eda sa yaco me da ivakaraitaki buladodonu me ra muria eso … [ka da na] veivuke ena kena vakararamataki e dua na vuravura sa levu cake tikoga na kena butobuto.”13

    Au sureti keda kece me da vakabauta na vakasakiti kei na mana ni nona Veisorovaki o Jisu Karisito. Ena vuku ni Nona isoro ni solibula, eda na rawata na yaloqaqa me da qaqa ena ivalu kecega ni noda gauna, ena loma sara mada ga ni noda dredre, bolebole, kei na veivakatovolei. Me da vakabauta na Nona loloma kei na kaukauwa me vakabulai keda. E kaya o Karisito:

    “Oi au na sala, kei na vu ni dina, kei na vu ni bula: sa sega ni torovi Tamaqu walega e dua na tamata, ena vukuqu ga.”14

    “Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula.”15

    “A veika oqo kau sa tukuna vei kemudou, mo dou rawata na vakacegu ena vukuqu. Dou na kunea e vuravura na rarawa: ia mo dou vakacegu; au sa vakamalumalumutaki vuravura.”16

    Au wasea na noqu ivakadinadina ena dina eso oqo ena yaca tabu i Jisu Karisito, emeni.