O Tagata e Puipuia leFolafolaga o le Aiga
Saunia e Bonnie L. Oscarson
Peresitene Aoao o Tamaitai Talavou
Ia tatou fesoasoani i le fausia o le malo o le Atua i le tulai i luga ma le lototoa ma avea ma tagata e puipuia le faaipoipoga, tulaga faamatua, ma le aiga.
O se faamanuiaga ma se fiafiaga le avea ai ma se vaega o lenei faatasiga ofoofogia o teineiti ma tamaitai. Ua matua faamanuiaina i tatou o ni tamaitai i le auai faatasi ai i lenei afiafi i le lotogatasi ma le alofa.
Sa ou faitau talu ai nei i le tala ia Marie Madeleine Cardon, o lē, faatasi ai ma lona aiga, sa mauaina le savali o le talalelei toefuataiina a Iesu Keriso mai uluai faifeautalai na valaauina e galulue i Italia i le 1850. O ia o se tamaitai talavou e 17 pe 18 ona tausaga i le taimi na latou papatiso ai. I se tasi Aso Sa, a o faia se sauniga tapuai i lo latou fale i luga o mauga o Italia i matu, na potopoto faataamilo ai se vaega faatupu vevesi o alii, e aofia ai ma nisi o faifeau i le lotoifale, ma amata ona taufonō, feei, ma tauvalaau atu e aumai i fafo faifeautalai. E leai sou manatu sa latou naunau ia aoao i le talalelei—sa latou faamoemoe ia faaoolima. O Marie talavou sa savali atu i fafo e faafetaia’i ma le au faatupu vevesi.
Sa faaauau pea ona latou fe’ei atu i upu masoa ma faatonu atu e aumai i fafo faifeautalai. Sa sii e Marie i luga lana Tusi Paia ma faatonu i latou e o ese. Sa ia tau atu ia i latou o loo i lalo faifeautalai i lana puipuiga ma e le mafai ona latou faatamaia se lauulu se tasi mai o latou ulu. Faafofoga i ana lava upu: “Sa tutu tagata uma ma le ofo. … na faatasi le Atua ma a’u. Sa Ia tuuina mai na upu i lo’u gutu, aua e le mafai ona ou faia na upu. Na faafuasei ona filemu mea uma. Na tutu ma le le mautonu na alii malolosi matamataita i luma o se teineitiiti auvaivai, gatete, ae sa le fefe.” Na talosagaina e faifeau le au faatupu vevesi e o ese, ma sa latou o ma le filemu ma le maasiasi, fefefe, ma le faanoanoa. Na faamaeaina e le vaega toalaiti le latou sauniga ma le filemu.
E mafai ona e vaai faalemafaufau atu i lena tamaitai talavou lototoa, e tutusa lona matua ma le toatele o outou, na tu atu i le au faatupu vevesi ma puipui i lona talitonuga fou ma le lototele ma le tuuto?
Uso e, e toalaiti i tatou o le a fetaiai ma se au faatupu vevesi feita faapea, ae o loo i ai se taua o loo faia i lenei lalolagi lea o loo osofaia ai a tatou aoaoga faavae autu ma sili ona taua. O loo ou talanoa faapitoa atu lava i le aoaoga faavae o le aiga. O le tulaga paia o le aiga ma faamoemoega taua o le aiga o loo fesiligia, faitioina, ma sauaina i soo se auala e mafai ai.
I le taimi muamua lava na faitau ai e Peresitene Gordon B. Hinckley le “O Le Aiga: O Se Folafolaga i le Lalolagi” i le 20 tausaga ua mavae i lenei tausaga, sa matou faafetai ai, ma faatauaina le manino, faigofie, ma le moni o lenei pepa o faamatalaga musuia mai faaaliga. Matou te lei iloaina i lena taimi, le matua manaomia e i tatou o nei folafolaga autu i le lalolagi i lenei vaitaimi e avea ma tulaga manaomia tatou te faamasino ai soo se aoaoga fou po o filosofia a le lalolagi tatou te maua mai i ala o faasalalauga, le Initoneti, tagata atamamai, TV ma ata tifaga, ma e oo lava i sui o palemene. Ua avea le folafolaga i aiga ma se fua faatatau mo le faamasinoina o manatu o le lalolagi, ma ou te molimau atu o mataupu faavae ua tuuina atu i totonu o lenei faamatalaga e moni i lenei vaitaimi e pei lava i le taimi na tuuina mai ai ia i tatou e se perofeta a le Atua i le toeitiiti atoa le 20 tausaga talu ai.
E mafai ona ou faasino atua se mea manino? E seasea ogatusa le olaga ma fuafuaga mo soo se tagata, ma ua tatou matua nofouta e le o tamaitai uma ua aafia i mea o loo faamatala mai e le folafolaga. E taua pea le malamalama ma aoao atu i le mamanu a le Alii ma taumafai ia maua lena mamanu i le mea sili tatou te mafaia.
Ua tofu i tatou ma se tiute i le fuafuaga, ma ua tutusa uma lo tatou taua i fofoga o le Alii. E tatau ona tatou manatua ua silafia e le Tama Faalelagi alofa o tatou manaoga amiotonu ma o le a Ia faamamaluina Ana folafolaga lea o le a leai se mea e taofia mai ia i latou o e tausia faamaoni a latou feagaiga. E i ai i le Tama Faalelagi se misiona ma se fuafuaga mo i tatou taitoatasi, ae ua i ai foi Lana lava faatulagaga o taimi. O se tasi luitau sili ona faigata i lenei olaga o le faatuatua lea i le taimi a le Alii. O se manatu lelei le i ai o se fuafuaga faaleoleo, lea e fesoasoani ia i tatou ia avea ma tamaitai tausi-feagaiga, agaalofa, ma amiotonu o e fausia le malo o le Atua e tusa lava po o fea e agai ai o tatou olaga. E tatau ona tatou aoaoina a tatou fanau teine ina ia taulai atu mo le tulaga aupito sili ae ia fuafua foi mo ni mea e tutupu faafuasei.
I le aluga o le faamanatuina o le 20 tausaga o le folafolaga i le aiga, ou te fia tuuina atu se lu’i mo i tatou uma o tamaitai o le Ekalesia ina ia avea ma e puipuia le “O Le Aiga: O Se Folafolaga i le Lalolagi.” E pei ona puipuia ma le lototoa e Marie Madeleine Cardon ia faifeautalai ma lana tapuaiga fou, e tatau foi ona tatou puipuia ma le lototoa ia aoaoga faavae a le Alii na faaalia mai o loo faamatala ai le faaipoipoga, aiga, o matafaioi paia a alii ma tamaitai, ma le taua o aiga o ni nofoaga paia—e tusa lava pe o tauvalaau mai le lalolagi i o tatou taliga faapea o nei mataupu faavae ua tuai, faatapulaa, ma e le o toe aoga. O tagata uma, e tusa lava po o a o latou tulaga faaleulugalii pe fia le aofai o le fanau, e mafai ona avea ma e puipuia le fuafuaga a le Alii o loo faamatala mai i le folafolaga o le aiga. Afai o le fuafuaga lea a le Alii, e tatau foi ona avea ma a tatou fuafuaga!
E tolu mataupu faavae o loo aoao mai i le folafolaga ou te manatu e matuai manaomia ai lava ni tagata e puipuia ma le mausali. O le mea muamua o le faaipoipoga i le va o se alii ma se tamaitai. Ua aoaoina i tatou i tusitusiga paia, “A e ui lava ina faapea, e leai se tane pe a le o i ai le fafine, e leai foi se fafine pe a le o i ai le tane, i le Alii.” Mo le mauaina e soo se tagata o le atoatoaga o faamanuiaga o le perisitua, e tatau ona i ai se tane ma se ava ua faamauina i le maota o le Alii, o galulue faatasi i le amiotonu, ma tumau faamaoni i a laua feagaiga. O le fuafuaga lenei a le Alii mo Ana fanau, ma e le mafai e talanoaga po o faitioga lautele ona suia mea ua folafola mai e le Alii. E manaomia lo tatou faataitaia pea o faaipoipoga amiotonu, saili mo na faamanuiaga i o tatou olaga, ma ia faatuatua pe afai o loo tuai ona oo mai. Ia avea i tatou ma tagata e puipuia le faaipoipoga e pei ona faauuina e le Alii a o faaauau pea ona faaalia le alofa ma le agaalofa mo i latou e eseese manatu.
O le isi mataupu faavae lea e manaomia ai o tatou leo o le puipuiga o le faamamaluina o matafaioi a tina ma tama. Tatou te naunau e aoao a tatou fanau ia taulai maualuga atu i lenei olaga. Tatou te matua mananao ia faamautinoa ua iloa e a tatou fanau teine ua ia i latou le gafatia e ausia ma avea ai ma soo se mea e mafai ona latou mafaufauina. Matou te faamoemoe o le a latou fiafia e aoao, ia aotauina, ia talenia, ma atonu ia avea ma le isi Marie Curie po o Eliza R. Snow.
Pe o tatou aoao foi o tatou atalii ma afafine e leai se isi mamalu silisili, leai ni faalagiga taua, ma e leai nisi matafaioi e sili atu ona taua i lenei olaga nai lo o tina ma tama? Ou te faamoemoe a o tatou uunaia a tatou fanau ia ausia le mea sili i lenei olaga o loo tatou aoao atu foi i latou ia faamamalu ma viia ia matafaioi o loo faia e tina ma tama i le fuafuaga a lo tatou Tama Faalelagi.
Na iloa e le ma uii, o Abby, se avanoa uigaese e tu atu ai ma puipuia le matafaioi o tina. I se tasi aso sa ia mauaina se tusi mai le aoga a lana fanau o le a faia se latou polokalama o le Aso o Matata i le aoga. Na valaaulia matua e auina atu se talosaga pe a latou mananao e o atu i le aoga e aoao le fanau ia latou galuega, ma na musuia Abby i se lagona e talosaga e alu atu ma talanoa e uiga i le avea ma se tina. Na te lei toe faalogo i se tala mai le aoga, ma ina ua latalata i le Aso o Matata, sa iu lava ina ia valaau i le aoga, ma mafaufau atonu ua leiloa ia i latou lana talosaga. Sa saili solo e taitai ma iloa ai e toalua faiaoga na ioe e alu atu Abby e talanoa ia laua vasega i le faaiuga o le Aso o Matata.
I le mālie tele o ana aoaoga i le fanau, sa aoao atu ai e Abby i latou, atoa ma isi mea e faapea, i le avea ai ma se tina e manaomia le malamalama lelei i vailaau faafomai, mafaufau, tapuaiga, faiaoga, musika, tusi, tusiata, mea tautupe, teuina o fale, sitailiina o ulu, avetaavale, taaloga, kuka, ma le tele o isi mea. Na faagaeetia le fanau. Sa ia faaiuina i le fai atu i tamaiti taitasi ia manatua o latou tina e ala i le tusiina o se tusi faafetai e faaali ai le lotofaafetai mo le tele o galuega alofa o auaunaga o loo latou mauaina i aso taitasi. Na lagona e Abby ua vaai atu tamaiti i o latou tina i se malamalama fou ma o le avea ma se tina po o se tama o se mea e taua tele. Na ia talosaga e toe fia faasoa atu i lenei tausaga ma sa valaaulia ai o ia e aoao atu ni vasega se ono.
O le tala lea a Abby e uiga i lona aafiaga: “Ou te lagona e pei e faigofie i lenei lalolagi le mauaina e se tamaitiiti o se lagona faapea, o le avea ma se matua o se galuega lona lua lea po o se tulaga e le tau manaomiaina tele. Ou te manao ia lagona e tamaiti uma o i latou o se mea e sili ona faamuamua ma taua i o latou matua, ma atonu o le tau atu ia i latou e taua ia te au le avea ma se matua, o le a fesoasoani lea ia latou iloa ai mea uma o loo faia e o latou matua mo i latou ma le mafuaaga.”
O lo tatou perofeta pele, o Peresitene Thomas S. Monson, o se faataitaiga matagofie lea o le faamamaluina o tamaitai ma tulaga faatina, aemaise lona lava tina. I se faatatauga i o tatou tina faalelalolagi, na ia saunoa ai: “Ia taitasi i tatou ma faataua lenei upumoni; e le mafai e se tasi ona faagalo tina ma manatua le Atua. E le mafai e se tasi ona manatua tina ae faagalo le Atua. Aisea? Aua o nei tagata paia e toalua, o le Atua ma lo [tatou (tina) faalelalolagi], e soa i le foafoaga, i le alofa, i le ositaulaga, i auaunaga, e tasi i laua.”
O le mataupu faavae mulimuli e tatau ona tatou tutu atu ma puipuia le tulaga paia o le aiga. E tatau ona tatou aveina se faaupuga lea e talanoaina i nisi taimi ma le faatauemu, ma siitiaina. O le faaupuga fatuaigatausi. E mafai e i tatou uma—o tamaitai, alii, autalavou, ma le fanau, nofofua pe faaipoipo—ona galulue ia avea ma fatuaigatausi. E tatau ona “faia o tatou aiga” ma nofoaga o le malutaga, paia, ma ia saogalemu. E tatau ona avea o tatou aiga ma nofoaga e matua faateleina ai le lagonaina o le Agaga o le Alii ma o loo suesueina ai, aoaoina, ma ola ai i tusitusiga paia ma le talalelei. O le a tele se eseesega o le a i ai i le lalolagi pe afai e vaavaai tagata uma ia i latou lava o ni fatuaigatausi amiotonu. Ia tatou puipuia le aiga o se nofoaga e lona lua atu i le malumalu lona paia.
Uso e, ou te faafetai i le avea ai ma se tamaitai i nei aso e gata ai. Ua tatou maua avanoa ma filifiliga e lei maua muamua e nisi augatupulaga o tamaitai i le lalolagi. Ia tatou fesoasoani i le fausia o le malo o le Atua i le tulai i luga ma le lototoa ma avea ma tagata e puipuia le faaipoipoga, tulaga faamatua, ma le aiga. E manaomia i tatou e le Atua ia avea ma autau lotototoa, tumau, ma lē mafaagaeetia o le a puipuia Lana fuafuaga ma aoao atu Ana upumoni i augatupulaga o i le lumanai.
Ou te molimau atu o loo soifua le Tama Faalelagi ma e alofa ia i tatou taitoatasi. O Lona Alo, o Iesu Keriso, o lo tatou Faaola ma Togiola. Ou te tuuina atu lenei molimau ia te outou i le suafa o Iesu Keriso, amene.