ពរជ័យទាំងឡាយនៃព្រះវិហារបរិសុទ្ធ
ដោយប្រធាន ថូម៉ាស អេស ម៉នសុន
នៅពេលយើងចូលរួមក្នុងព្រះវិហារបរិសុទ្ធ នោះមាននូវទំហំនៃជីវភាពខាងវិញ្ញាណ និងអារម្មណ៍សុខសាន្ដដ៏ធំមួយ ។
បងប្អូនប្រុសស្រីជាទីស្រឡាញ់ ខ្ញុំមានអំណរគុណណាស់ដើម្បីនៅជាមួយអ្នកនាព្រឹកបុណ្យអ៊ីស្ទើរដ៏ស្រស់ស្អាតនេះ ពេលដែលគំនិតរបស់យើងបានងាកទៅរកព្រះអង្គសង្គ្រោះនៃពិភពលោក ។ ខ្ញុំសូមផ្ដល់ក្ដីស្រឡាញ់ និងជំរាបសួរដល់បងប្អូនម្នាក់ៗ ហើយអធិស្ឋានសុំឲ្យព្រះបិតាសួគ៌របស់យើង នឹងបំផុសពាក្យខ្ញុំ ។
សន្និសីទនេះ គូសចំណាំរយៈពេលប្រាំពីរឆ្នាំ ចាប់តាំងពីខ្ញុំត្រូវបានគាំទ្រជាប្រធាននៃសាសនាចក្រ ។ ឆ្នាំទាំងនោះជាឆ្នាំដ៏រវល់ ដែលពុំគ្រាន់តែមាននូវបញ្ហាមួយចំនួនប៉ុណ្ណោះទេ តែក៏មាននូវពរជ័យរាប់មិនអស់ផងដែរ ។ ពរជ័យដ៏អំណរ និងពិសិដ្ឋមួយនៃពរជ័យទាំងនោះ គឺជាឪកាសរបស់ខ្ញុំដើម្បីឧទ្ទិសឆ្លង និងឧទ្ទិសឆ្លងឡើងវិញនូវព្រះវិហារបរិសុទ្ធទាំងឡាយ ។
ថ្មីៗនេះ កាលពីខែវិច្ឆិកាកន្លងទៅ វាជាឯកសិទ្ធិរបស់ខ្ញុំ ដើម្បីឧទ្ទិសឆ្លងព្រះវិហារបរិសុទ្ធ ហ្វូនិក អារីស្សូណា ថ្មីដ៏ស្រស់ស្អាត ។ ខ្ញុំមានប្រធាន ឌៀថើរ អេស្វ អុជដូហ្វ អែលឌើរ ដាល្លិន អេក អូក អែលឌើរ រីឆាដ ជេ ម៉េនេស្ស និងអែលឌើរ លីន ជី រ៉ូប៊ីន និងអែលឌើរ ខេន អែហ្វ រីឆាដ ចូលរួមជាមួយ ។ នៅពីមុនល្ងាចនៃការឧទ្ទិសឆ្លងនោះ មានការប្រារព្ធឡើងនូវពិធីខាងវប្បធម៌ដ៏អស្ចារ្យមួយដោយយុវវ័យជាង ៤,០០០ នាក់មកពីមណ្ឌលព្រះវិហារបរិសុទ្ធ សម្ដែងយ៉ាងស្រស់ស្អាត ។ នៅថ្ងៃបន្ទាប់ ព្រះវិហារបរិសុទ្ធត្រូវបានឧទ្ទិសឆ្លងនៅក្នុងសម័យប្រជុំដ៏ពិសិដ្ឋចំនួនបី និងដ៏បំផុសគំនិត ។
អគារព្រះវិហារបរិសុទ្ធ គឺត្រូវបានចង្អុលបង្ហាញយ៉ាងច្បាស់លាស់អំពីការរីកចម្រើននៃសាសនាចក្រ ។ ថ្មីៗនេះ យើងមានព្រះវិហារបរិសុទ្ធចំនួន ១៤៤ កំពុងដំណើរការនៅទូទាំងពិភពលោក ជាមួយនិងព្រះវិហារបរិសុទ្ធចំនួន ៥ កំពុងជួសជុលឡើងវិញ ហើយនិង ១៣ ទៀតកំពុងសាងសង់ ។ បន្ថែមពីលើនោះ ព្រះវិហារបរិសុទ្ធចំនួន ១៣ ដែលបានប្រកាសកាលពីលើកមុន គឺកំពុងស្ថិតនៅក្នុងដំណាក់កាលរៀបចំផ្សេងៗ ពីមុនការសាងសង់ចាប់ផ្ដើម ។ ឆ្នាំនេះ យើងបានឧទ្ទិសឆ្លងព្រះវិហារបរិសុទ្ធចំនួន ២ ឡើងវិញ ហើយនិងឧទ្ទិសឆ្លងព្រះវិហារបរិសុទ្ធថ្មីចំនួន ៥ ទៀត ដែលបានដាក់កាលវិភាគសម្រាប់ការបញ្ចប់ការសាងសង់រួចហើយ ។
សម្រាប់កាលពីពីរឆ្នាំមុន នៅពេលយើងបានផ្ដោតកិច្ចខិតខំរបស់យើងទៅលើការសាងសង់បញ្ចប់ព្រះវិហារបរិសុទ្ធដែលបានប្រកាសពីមុនៗ យើងបានផ្អាកផែនការសម្រាប់ការសង់ព្រះវិហារបរិសុទ្ធបន្ថែមទៀត ។ ទោះជាយ៉ាងណា ព្រឹកនេះ ខ្ញុំរីករាយយ៉ាងខ្លាំងដើម្បីប្រកាសថា មានព្រះវិហារបរិសុទ្ធបីទៀត ដែលនឹងសាងសង់នៅក្នុងទីតាំងដូចខាងក្រោម ៖ ទីក្រុង អាប៊ីយ៉ាន, ឈូងសមុទ្រអាយវ៉ូរី; ទីក្រុងផត អូ ព្រីនស៍, ប្រទេសហៃទី; និងទីក្រុង បាំងកក ប្រទេសថៃ ។ នោះជាពរជ័យដ៏អស្ចារ្យដែលមានក្នុងឃ្លាំងសម្រាប់ពួកបរិសុទ្ធដ៏ស្មោះត្រង់របស់យើង នៅក្នុងតំបន់ទាំងនេះ និងកន្លែងណាក៏ដោយដែលមានព្រះវិហារបរិសុទ្ធនៅទូទាំងពិភពលោក ។
ដំណើរការនៃការកំណត់ពីតម្រូវការ និងការស្វែងរកទីតាំងសម្រាប់ព្រះវិហារបរិសុទ្ធបន្ថែមកំពុងតែធ្វើ ដ្បិតយើងមានបំណង ចង់ឲ្យសមាជិកជាច្រើនតាមដែលអាចធ្វើទៅបាន មានឱកាសដើម្បីចូលរួមក្នុងព្រះវិហារបរិសុទ្ធដោយគ្មានការពលិកម្មពេលវេលា និងធនធានច្រើនពេក ។ ដូចដែលយើងធ្លាប់ធ្វើពីមុនមក យើងនឹងបន្ដជូនដំណឹងដល់បងប្អូន នៅពេលការសម្រេចចិត្តត្រូវបានធ្វើឡើងទាក់ទងនឹងរឿងនេះ ។
ពេលខ្ញុំគិតអំពីព្រះវិហារបរិសុទ្ធ គំនិតខ្ញុំបានងាកទៅរកពរជ័យជាច្រើនដែលយើងទទួលនៅក្នុងនោះ ។ នៅពេលយើងចូលឆ្លងកាត់ទ្វារទាំងឡាយក្នុងព្រះវិហារបរិសុទ្ធ នោះយើងបំភ្លេចនូវការរំខាន និងចលាចលនៃលោកិយ ។ នៅខាងក្នុងអគារដ៏ពិសិដ្ឋនេះ យើងរកឃើញនូវភាពស្រស់ស្អាត និងរបៀបរៀបរយ ។ មានការសម្រាកនៅក្នុងព្រលឹងរបស់យើង ហើយសម្រាលពីកង្វល់នៃជីវិតរបស់យើង ។
នៅពេលយើងចូលក្នុងព្រះវិហារបរិសុទ្ធ នោះអាចមានកម្រិតនៃជីវភាពខាងវិញ្ញាណ និងអារម្មណ៍សុខសាន្ដ ដែលនឹងលើសអស់អារម្មណ៍ផ្សេងទៀត ដែលអាចនឹងកើតមានក្នុងចិត្តមនុស្ស ។ យើងនឹងក្រសោបយកន័យពិតនៃព្រះបន្ទូលរបស់ព្រះអង្គសង្គ្រោះ ពេលទ្រង់មានបន្ទូលថា ៖ « ខ្ញុំទុកសេចក្ដីសុខសាន្តនៅនឹងអ្នករាល់គ្នា គឺខ្ញុំឲ្យសេចក្ដីសុខសាន្តរបស់ខ្ញុំដល់អ្នករាល់គ្នា ។ …កុំឲ្យចិត្តអ្នករាល់គ្នាថប់បារម្ភ ឬភ័យឡើយ ។ »១
ភាពសុខសាន្ដដូច្នេះ អាចបំពេញគ្រប់ដួងចិត្ត-- ដួងចិត្តដែលមានបញ្ហា ដួងចិត្តដែលផ្ទុកធ្ងន់ដោយភាពសោកសៅ ដួងចិត្តដែលច្របូកច្របល់ ដួងចិត្តដែលសុំរកជំនួយ ។
ថ្មីៗនេះ ខ្ញុំបានរៀនពីបទពិសោធន៍ផ្ទាល់របស់យុវជនម្នាក់ ដែលបានចូលរួមក្នុងព្រះវិហារបរិសុទ្ធដោយដួងចិត្តសុំរកជំនួយ ។ ជាច្រើនខែមុន គាត់បានទទួលការហៅបម្រើបេសកកម្មនៅអាហ្រ្វិកខាងត្បូង ។ ទោះជាយ៉ាងណាក៏ដោយ ទិដ្ឋាការរបស់គាត់ ត្រូវបានពន្យាពេលអស់រយៈពេលយ៉ាងយូរ ដែលគាត់ត្រូវបានចាត់សារជាថ្មីឲ្យទៅបេសកកម្មនៅសហរដ្ឋអាមេរិក ។ ទោះជាគាត់ខកចិត្ត ដែលគាត់ពុំអាចបម្រើនៅតំបន់ដែលហៅគាត់ដំបូងក្ដី ក៏គាត់បានធ្វើការយ៉ាងខ្លាំងនៅក្នុងការចាត់តាំងថ្មីរបស់គាត់ ដោយប្ដេជ្ញាបម្រើឲ្យអស់ពីលទ្ធភាពរបស់គាត់ ។ ទោះជាយ៉ាងណាក៏ដោយ គាត់បានបាក់ទឹកចិត្ត ដោយសារបទពិសោធន៍អវិជ្ជមាន ដែលគាត់មានជាមួយនឹងអ្នកផ្សព្វផ្សាយសាសនា ដែលចំពោះគាត់ ពួកគេហាក់ដូចជាចាប់អារម្មណ៍ច្រើនលើការសប្បាយជាងការចែកចាយដំណឹងល្អ ។
ប៉ុន្មានខែក្រោយមក យុវជនម្នាក់នេះ មានបញ្ហាសុខភាពធ្ងន់ធ្ងរ ដែលធ្វើឲ្យគាត់ពុំអាចកម្រើកបានមួយចំហៀងខ្លួន ដូច្នេះគាត់ត្រូវបានបញ្ជូនទៅផ្ទះដើម្បីព្យាបាល ។
ជាច្រើនខែក្រោយមក យុវជននេះបានព្យាបាលជាសះស្បើយទាំងស្រុង ។ គាត់ត្រូវបានជូនដំណឹងថា គាត់នឹងអាចបម្រើម្ដងទៀតបាន ជាពរជ័យមួយដែលគាត់បានអធិស្ឋានប្រចាំថ្ងៃ ។ ដំណឹងខកចិត្តគឺថា គាត់នឹងត្រឡប់ទៅបេសកកម្មដដែលដែលគាត់បានចេញមកនោះ ជាកន្លែងដែលគាត់ដឹងពីឥរិយាបទ និងអាកប្បកិរិយារបស់អ្នកផ្សព្វផ្សាយសាសនាមួយចំនួនពុំបានធ្វើដូចដែលពួកគេគួរធ្វើនោះទេ ។
គាត់បានទៅព្រះវិហារបរិសុទ្ធ ដើម្បីស្វែងរកការលួងលោមចិត្ត និងការបញ្ជាក់ ដែលគាត់អាចមានបទពិសោធន៍ល្អ ក្នុងនាមជាអ្នកផ្សព្វផ្សាយសាសនា ។ ឪពុកម្ដាយរបស់គាត់ ក៏បានអធិស្ឋានផងដែរថា សុំឲ្យការទៅព្រះវិហារបរិសុទ្ធនេះ នឹងផ្ដល់ជំនួយដែលកូនប្រុសពួកគេត្រូវការ ។
នៅពេលយុវជនបានចូលទៅក្នុងបន្ទប់សេឡេស្ទាល បន្ទាប់ពីពិធី គាត់អង្គុយនៅលើកៅអីមួយ ហើយបានចាប់ផ្ដើមអធិស្ឋានសុំការណែនាំមកពីព្រះវរបិតាសួគ៌ ។
មានមនុស្សម្នាក់ទៀត ដែលចូលមកបន្ទប់សេឡេស្ទាល បន្ដិចក្រោយមក គឺជាយុវជនម្នាក់ដែលមានឈ្មោះថា ឡាដុន ។ នៅពេលគាត់ដើរចូលក្នុងបន្ទប់នោះ រំពេចនោះគាត់ក្រឡេកឃើញយុវជនម្នាក់កំពុងអង្គុយលើកៅអីបិទភ្នែកអធិស្ឋាន ។ ឡាដុន បានទទួលការបំផុសគំនិតច្បាស់ថា គាត់គួរនិយាយនឹងយុវជននេះ ។ ទោះជាយ៉ាងណា ដោយពុំហ៊ានរំខាន គាត់បានសម្រេចចិត្តថារង់ចាំ ។ បន្ទាប់ពីប៉ុន្មាននាទីបានកន្លងផុតទៅ យុវជននោះនៅតែអធិស្ឋាន ។ ឡាដុន បានដឹងថា គាត់មិនអាចបង្អាក់ការបំផុសគំនិតនៅយូរជាងនេះទៀតទេ ។ គាត់បានដើរទៅជិតយុវជននោះ ហើយបានប៉ះស្មាថ្នមៗ ។ យុវជននោះបានបើកភ្នែកឡើង ហើយភ្ញាក់ផ្អើលដែលមានការរំខាន ។ ឡាដុន បាននិយាយដោយស្ងាត់ស្ងៀមថា « ខ្ញុំមានអារម្មណ៍ថា ខ្ញុំចាំបាច់ត្រូវនិយាយនឹងអ្នក ទោះជាខ្ញុំពុំដឹងថាហេតុអ្វីក៏ដោយ » ។
នៅពេលពួកគេចាប់ផ្ដើមសន្ទនា យុវជននោះបាននិយាយអស់ពីចិត្តរបស់គាត់ប្រាប់ ឡាដុន ដោយពន្យល់ពីស្ថានភាពគាត់ ហើយបញ្ចប់ដោយមានបំណងទទួលនូវការលួងលោម និងការលើកទឹកចិត្តមួយចំនួនទាក់ទងនឹងបេសកកម្មរបស់គាត់ ។ ឡាដុន ដែលបានត្រឡប់មកពីបេសកកម្មដ៏ជោគជ័យមួយកាលពីមួយឆ្នាំមុន បានប្រាប់អំពីបទពិសោធន៍បេសកកម្មផ្ទាល់ខ្លួនគាត់ ប្រាប់អំពីឧបសគ្គ និងកង្វល់ ដែលគាត់បានជួប និងរបៀបដែលគាត់ងាកទៅរកព្រះអម្ចាស់សុំជំនួយ និងពរជ័យដែលគាត់បានទទួល ។ ពាក្យរបស់គាត់គឺជាការលួងលោមចិត្ត និងការអះអាង ហើយចិត្តក្លៀវក្លាក្នុងការបម្រើបេសកកម្មរបស់គាត់ ត្រូវបានជះឥទ្ធិពលទៅយុវជននោះ ។ ទីបំផុត ការភ័យខ្លាចយុវជននោះបានរលប់បាត់ នោះអារម្មណ៍នៃភាពសុខសាន្ដបានកើតមាន ។ គាត់មានអារម្មណ៍ដឹងគុណដ៏ជ្រាលជ្រៅ ពេលគាត់បានដឹងថា ការអធិស្ឋានរបស់គាត់ត្រូវបានឆ្លើយតប ។
យុវជនទាំងពីរនាក់នេះ បានអធិស្ឋានរួមគ្នា រួចហើយ ឡាដុន បានរៀបចំចេញទៅ ហើយរីករាយដែលគាត់បានស្ដាប់តាមការបំផុសគំនិតដែលកើតមានចំពោះគាត់ ។ ពេលគាត់ក្រោកឈរហៀបដើរទៅ យុវជននោះបានសួរ ឡាដុន ថា « តើអ្នកបម្រើនៅបេសកកម្មណា ? » មកដល់ចំនុចនេះ គ្មានពួកគេណាម្នាក់បានប្រាប់ដល់គ្នាអំពីឈ្មោះបេសកកម្មដែលពួកគេបានបម្រើនៅឡើយទេ ។ ពេល ឡាដុន បានប្រាប់ពីឈ្មោះបេសកកម្មរបស់គាត់ យុវជនរូបនោះបានស្រក់ទឹកភ្នែក ។ ឡាដុន បានបម្រើនៅក្នុងបេសកកម្មដែលយុវជនរូបនេះ នឹងត្រឡប់ទៅបម្រើ !
ក្នុងសំបុត្រថ្មីមួយមកកាន់ខ្ញុំ ឡាដុន បានចែកចាយនឹងខ្ញុំអំពីពាក្យសម្ដីរបស់យុវជននោះប្រាប់គាត់ថា ៖ « ខ្ញុំមានជំនឿថា ព្រះវរបិតាសួគ៌នឹងប្រទានពរខ្ញុំ ប៉ុន្តែខ្ញុំពុំនឹកស្មានសោះថា ទ្រង់នឹងបញ្ជូននរណាម្នាក់ឲ្យមកជួយខ្ញុំ ដែលធ្លាប់បម្រើក្នុងបេសកកម្មរបស់ខ្ញុំទេ ។ ឥឡូវ ខ្ញុំដឹងថា អ្វីគ្រប់យ៉ាងនឹងល្អ » ។២ ការអធិស្ឋានដោយរាបសារពីដួងចិត្តស្មោះ ត្រូវបានស្ដាប់ឮ និងឆ្លើយតប ។
បងប្អូនប្រុសស្រី នៅក្នុងជីវិតរបស់យើង យើងនឹងមានការល្បួង យើងនឹងមានការសាកល្បង និងឧបសគ្គនានា ។ នៅពេលយើងទៅព្រះវិហារបរិសុទ្ធ នៅពេលពេលយើងចងចាំសេចក្ដីសញ្ញាទាំងឡាយ ដែលយើងបានធ្វើនៅទីនោះ នោះយើងនឹងអាចយកឈ្នះការល្បួងទាំងនោះ ហើយទ្រាំទ្រនឹងការសាកល្បងបានល្អប្រសើរជាង ។ នៅក្នុងព្រះវិហារបរិសុទ្ធ យើងអាចរកឃើញភាពសុខសាន្ដ ។
ពរជ័យនៃព្រះវិហារបរិសុទ្ធ គឺពុំអាចកាត់ថ្លៃបាន ។ ពរជ័យមួយដែលខ្ញុំដឹងគុណរាល់ថ្ងៃក្នុងជីវិតខ្ញុំ គឺភរិយាជាទីស្រឡាញ់របស់ខ្ញុំ ហ្វ្រែនស៊ីស ហើយខ្ញុំបានទទួល ពេលយើងលុតជង្គង់ចុះនៅទីអាសនាដ៏ពិសិដ្ឋមួយ ហើយធ្វើសេចក្ដីសញ្ញាចងភ្ជាប់នឹងគ្នាសម្រាប់ភាពអស់កល្បជានិច្ច ។ គ្មានពរជ័យណាមានតម្លៃជាងសេចក្ដីសុខសាន្ដ និងការលួងលោមចិត្ត ដែលខ្ញុំបានទទួលមកពីចំណេះដឹង ដែលខ្ញុំដឹងថា នាង និងខ្ញុំ នឹងនៅជាមួយគ្នាម្ដងទៀតនោះទេ ។
សូមឲ្យព្រះវរបិតាសួគ៌របស់យើង ប្រទានពរដល់យើង ដើម្បីយើងអាចមានវិញ្ញាណនៃការថ្វាយបង្គំក្នុងព្រះវិហារបរិសុទ្ធ ដើម្បីយើងអាចគោរពប្រតិបត្តិចំពោះបទបញ្ញត្តិរបស់ទ្រង់ និងដើម្បីយើងអាចធ្វើតាមជំហានទាំងឡាយនៃព្រះអម្ចាស់ និងព្រះអង្គសង្គ្រោះ ព្រះយេស៊ូវគ្រីស្ទ ដោយប្រុងប្រយ័ត្ន ។ ខ្ញុំធ្វើទីបន្ទាល់ថា ទ្រង់គឺជាព្រះប្រោសលោះរបស់យើង ។ ទ្រង់គឺជាព្រះរាជបុត្រានៃព្រះ ។ ទ្រង់គឺជាអង្គដែលចេញមកពីផ្នូរ នៅព្រឹកអ៊ីស្ទើរដំបូង ដែលនាំអំណោយនៃជីវិតដ៏អស់កល្បជានិច្ចរបស់ទ្រង់មកឲ្យកូនចៅទាំងអស់របស់ព្រះ ។ នៅថ្ងៃដ៏ស្រស់ស្អាតនេះ ពេលយើងប្រារព្ធព្រឹត្តការណ៍ដ៏សំខាន់នេះ ចូរយើងធ្វើការអធិស្ឋានដឹងគុណចំពោះអំណោយទានដ៏មហិមា និងអស្ចារ្យទាំងឡាយរបស់ទ្រង់មកកាន់យើង ។ សូមឲ្យការនោះកើតមានដូច្នោះ ខ្ញុំអធិស្ឋានដោយរាបសារនៅក្នុងព្រះនាមដ៏បរិសុទ្ធទ្រង់ អាមែន ។