Welcome sa Komperensya
Ni Presidente Thomas S. Monson
Samtang kita maminaw, hinaut ang atong mga kasingkasing matandog ug mapalambo ang atong pagtuo.
Minahal kong mga kaigsoonan, dako nakong kalipay nga mo-welcome ninyo niining talagsaong tibuok kalibutan nga komperensya. Kita nagpundok sa daghang dapit sa tibuok kalibutan aron maminaw ug magkat-on gikan sa mga kaigsoonan kinsa atong gipaluyohan isip mga General Authority ug kinatibuk-ang mga opisyales sa Simbahan. Sila nangayo og panabang sa langit mahitungod sa mga mensahe nga ilang ihatag, ug sila mibati og inspirasyon kon unsay isulti.
Kini nga komperensya nagtimaan sa 90 ka tuig nga anibersaryo sa sibya sa radyo sa kinatibuk-ang komperensya. Atol sa Oktubre nga komperensya niadtong 1924, ang mga sesyon gisibya sa radyo sa unang higayon pinaagi sa KSL nga gipanag-iya sa Simbahan. Kini nga komperensya nagtimaan sa 65 ka tuig nga anibersaryo sa sibya sa telebisyon sa kinatibuk-ang komperensya. Sa kinatibuk-ang komperensya nga gihimo niadtong Oktubre 1949, ang mga sesyon unang gisibya sa telebisyon tibuok dapit sa Salt Lake pinaagi sa telebisyon sa KSL.
Atong giila ang mga panalangin sa modernong media sa pagtugot sa minilyon nga mga miyembro sa Simbahan nga makatan-aw o makapaminaw sa kinatibuk-ang komperensya. Ang mga sesyon niining katapusan sa semana isibya pinaagi sa telebisyon, radyo, cable, satellite transmission, ug sa Internet, lakip sa mga mobile device.
Sa miaging unom ka bulan sukad sa katapusan natong panagtigum, usa ka bag-ong templo ang gipahinungod ug usa gipahinungod pag-usab. Niadtong Mayo, si Presidente Dieter F. Uchtdorf mipahinungod sa Fort Lauderdale Florida Temple. Usa ka nindot kaayong pagsaulog sa kultura sa mga kabatan-onan ang gihimo sa gabii sa wala pa ang pagpahinungod. Pagkasunod adlaw, sa Dominggo, Mayo 4, ang templo gipahinungod sa tulo ka mga sesyon.
Duha lang ka semana ang milabay akong pribilehiyo ang pagpahinungod pag-usab sa Ogden Utah Temple, orihinal nga gipahinungod niadtong 1972 ni Presidente Joseph Fielding Smith. Usa ka maanindot nga pagsaulog sa kultura ang gihimo sa adlaw sa wala pa ang pagpahinungod pag-usab, uban sa daghan kaayong kabatan-onan nga miapil sa duha ka managlahi nga mga pasundayag nga gipresentar, nga dunay lahi nga mga sumasalmot ang kada usa. Ang tanan, 16,000 ka kabatan-onan ang miapil. Ang mga serbisyo sa pagpahinungod pag-usab nahitabo pagkasunod adlaw, uban sa daghang mga Kaigsoonan nga miapil, uban sa mga lider sa auxiliary ug sa presidente sa templo, sa iyang mga magtatambag, ug sa ilang mga asawa.
Ang atong pagtukod og templo nagpadayon. Sa sunod bulan ang bag-ong Phoenix Arizona Temple ipahinungod, ug sa sunod nga tuig, sa 2015, kami magpaabut sa pagpahinungod o pagpahinungod pag-usab sa dili mominos sa lima ka mga templo, uban sa dugang nga mahimo, nag-agad sa pagkakompleto.
Sa ako nang gipahibalo niadtong Abril, kon ang tanang gipahibalo na nga mga templo mahuman ug mapahinungod, kita adunay 170 ka mga templo nga magamit sa tibuok kalibutan. Tungod kay kita nagtutok sa atong mga paningkamot sa pagkompleto sa mga templo nga gipahibalo sa una, niining higayona kita dili pa mopahibalo og bag-ong mga templo. Hinoon, sa umaabut, sa atong pag-ila sa mga panginahanglan ug sa pagpangita og mga yuta, ang pahibalo sa dugang nga mga templo himoon.
Ang Simbahan nagpadayon sa pagtubo. Kita karon sobra na sa 15 ka milyon ka lig-on ug nagtubo nga gidaghanon. Ang atong misyonaryo nga paningkamot nagpadayon nga wala mapugngi. Kita adunay 88,000 sobra ka mga misyonaryo nga nagserbisyo, nagsangyaw sa mensahe sa ebanghelyo sa kalibutan. Atong imatuod pag-usab nga ang misyonaryo nga buhat katungdanan sa priesthood, ug atong awhagon ang tanang takus ug makahimo nga batan-ong mga lalaki sa pagserbisyo. Mapasalamaton kaayo kita sa batan-ong mga babaye kinsa nagserbisyo usab. Dako ang ilang natabang, bisan sila dili ubos sa samang sugo sa pagserbisyo sama sa batan-ong mga lalaki.
Karon ako modapit kaninyo sa paghatag sa inyong pagtagad ngadto sa mga kaigsoonan kinsa moapil karon ug ugma sa atong mga sesyon sa komperensya. Ang tanan kinsa gihangyo sa pagpamulong mibati og dakong responsibilidad sa pagbuhat niini. Samtang kita maminaw, hinaut ang atong mga kasingkasing matandog ug mapalambo ang atong pagtuo, ako mapaubsanong nag-ampo sa pangalan ni Jesukristo, amen.