Ko Hono Maʻu ha Fakamoʻoni ʻo e Māmá mo e Moʻoní
Fai ʻe Palesiteni Dieter F. Uchtdorf
Tokoni Ua ʻi he Kau Palesitenisī ʻUluakí
He ʻikai ngata pē ʻi hono tāpuakiʻi koe mo ho hakó ʻe hoʻo fakamoʻoni fakafoʻituitui ʻo e māmá mo e moʻoní ʻi he moʻuí ni, ka te ne ʻiate koe ʻi he kotoa ʻo e taʻengatá.
ʻI heʻeku hoko ko ia ko ha pailaté, ne u puna ai ʻi ha ngaahi houa lahi ʻi ha ngaahi konitinēniti mo e ngaahi potu tahi lolotonga e fakapoʻuli ʻo e poó. ʻI heʻeku vakai atu ki he fakapoʻuli ʻo e poó mei he sioʻata ʻo e loki pailaté, kae tautautefito ki he kanivá, ne u ofo maʻu pē ʻi he lahi mo e loloto ʻo e fakatupu ʻa e ʻOtuá—ʻa ia ʻoku fakamatalaʻi ʻe he folofolá ko e “ngaahi māmani taʻefaʻalaua.”1
Kuo mei senituli ʻeni ʻe taha mei he taimi ne pehē ai ʻe ha kau ʻasitolōnoma tokolahi ko hotau pupunga fetuʻu kanivá pē taha ʻi he ʻunivēsí.2 Naʻa nau pehē ʻoku ʻikai toe ʻi ai ha meʻa mavahe mei hotau kanivá, ka ko ha ʻatā taʻefaʻalaua—ko ha ʻatā pē, momoko pea ʻikai ha ngaahi fetuʻu, maama pe meʻa moʻui.
ʻI he fakaʻau ke fakalakalaka ange ʻa e ngaahi meʻa fakaʻata fetuʻú—kau ai e ngaahi meʻa fakaʻata ʻe malava ke tuku atu ki he vavaá—ne kamata ke mahino ange ki he kau ʻasitolōnomá ha meʻa fakaofo, ha moʻoni ne hangē he ʻikai mahinó: ʻoku fuʻu lahi ke makupusi ʻe he ʻatamaí ʻa e ʻunivēsí ʻi he meʻa ne tomuʻa fai ki ai e fakakaukaú, pea ʻoku fonu ʻa e langí ʻi ha ngaahi kaniva taʻefaʻalaua, ʻa ia ʻoku mamaʻo kilukilua pea ʻikai lava ke tau fakakaukau ki ai, pea ʻoku nau takitaha ha ngaahi fetuʻu ʻe laui piliona.3
Ne liliu kotoa ʻetau mahino ki he ʻunivēsí ʻi ha vahaʻataimi nounou.
ʻOku tau lava ʻo mamata he ʻahó ni ki ha niʻihi ʻo e ngaahi kaniva mamaʻo ko ʻení.4
ʻOku tau ʻiloʻi ʻoku nau ʻi ai.
Kuo fuoloa ʻaupito ʻenau ʻi aí.
Ka kimuʻa pea maʻu ʻe he faʻahinga ʻo e tangatá e ngaahi meʻangāue lelei ko ʻeni ke tānaki e maama fakasilesitialé pea ʻai ke tau lava ʻo mamata ki he ngaahi kaniva ko ʻení, ne ʻikai ke tau tui ʻe malava ha meʻa pehē.
Ne ʻikai fakafokifā pē ʻa e liliu e lahi ʻo e ʻunivēsí, ka naʻe liliu lahi ʻetau malava ke sio mo maʻu e mahino ki he moʻoni ko ʻení. Pea ʻi he ʻilo lahi ko iá, ne fakafeʻiloaki ai e faʻahinga ʻo e tangatá ki ha ngaahi meʻa fakaofo ne ʻikai ke tau teitei fakakaukau ki ai.
ʻOku Faingataʻa ke Tau Tui Ki he Meʻa ʻOku ʻIkai Lava Ke Tau Mamata Ki Aí
Tau pehē pē ne tau lava ʻo foki ki he kuohilí pea talanoa mo e kakai ne nau moʻui ʻi he taʻu ʻe tahaafe pe laungeau kuohilí. Fakakaukau ki haʻo feinga ke fakamatalaʻi kiate kinautolu e niʻihi ʻo e ngaahi tekinolosia ʻoku tau angamaheni ki ai he ʻaho ní. Hangē ko ʻení, ko e hā nai ha fakakaukau ʻa e kakaí ni kapau te tau fakamatala ange ʻo kau ki he ngaahi seti vakapuna lalahí, microwave, ngāue ʻaki e device toʻotoʻo ʻoku ʻi ai ha ngaahi fakamatala fakaʻilelitulōniká, mo e vitiō ʻo hotau makapuná ʻa ia ʻoku makimo hono ʻave takai holo ki ha kakai ʻe laui miliona he māmaní?
ʻE ʻi ai e niʻihi ʻe tui mai. Ka ko e tokolahi te nau manukiʻi, fakafepakiʻi pe feinga ke taʻofi pe fakalaveaʻi kitautolu. Mahalo naʻa ʻi ai ha niʻihi te nau fai ha fakamatala fakapoto, fakaʻuhingaʻi pea fakaʻaongaʻi ʻa e ngaahi moʻoniʻi meʻa ʻoku nau ʻiló ke pehē ʻoku takihalaʻi kitautolu pea tau vale mo fakatuʻutāmaki. Mahalo ʻe aʻu ʻo nau tukuakiʻi kitautolu ki he feinga ke takihalaʻi e niʻihi kehé.
Ka ko e moʻoní, ʻe hala ʻaupito e maʻu ʻa e kakaí ni. Mahalo ko ʻenau fie tokoni pē mo fakamātoato. Mahalo te nau pehē ʻoku tonu pē ʻenau maʻú. Ka he ʻikai pē ke nau lava ʻo maʻu ha mahino he ʻoku teʻeki ai ke nau maʻu e maama kakato ʻo e moʻoní.
Ko e Talaʻofa ʻo e Māmá
ʻOku hangē pē ia ha natula ʻo e tangatá ke tau pehē ʻoku tau moʻoni neongo e hala ʻetau maʻú. Pea kapau ko ia, ko e hā leva ha ʻamanaki maʻatautolu? Te tau nofo ai pē nai ʻo ʻikai ʻilo e moʻoní he kuo lahi e ngaahi fakakaukau ʻoku fepakipakí pea tau falala pē ki heʻetau mahinó mo e meʻa ʻoku tau tui ki aí?
ʻE malava nai ke maʻu e moʻoní?
Ko e taumuʻa ʻeku leá ke talaki e pōpoaki fiefia ʻa e ʻOtuá—ʻa e ʻEiki ʻo e Ngaahi Kau Taú ʻa ia ʻokú Ne ʻafioʻi e moʻoni kotoa—kuo foaki ki Heʻene fānaú ʻa e talaʻofa te nau lava ʻo ʻiloʻi ʻa e moʻoní maʻanautolu.
Kātaki ʻo fakakaukau ki he mafatukituki ʻo e talaʻofá ni:
ʻE folofola e ʻOtua Taʻengata mo Mafimafí, ʻa e Tupuʻanga ʻo e fuʻu ʻunivēsí ni, kiate kinautolu ʻe hū kiate Ia ʻi he loto fakamātoato mo moʻoní.
Te Ne folofola kiate kinautolu ʻi ha ngaahi misi, mata-meʻa-hā-mai, fakakaukau mo e ngaahi ongo.
Te Ne folofola ʻi ha founga mahino moʻoni pea ʻoku hulu atu ia ʻi he meʻa ʻoku aʻusia ʻe he tangatá. Te Ne ʻoange kiate kinautolu ha fakahinohino fakalangi pea mo e tali ki heʻenau moʻui fakatāutahá.
Ko e moʻoni ʻe ʻi ai e niʻihi ʻe manuki pea tala ʻoku ʻikai lava ke hoko ha meʻa pehē, pea kapau ne ʻi ai ha ʻOtua, ʻe ʻi ai Haʻane meʻa lelei ange ke fakahoko ʻi Haʻane fakafanongo mo tali ha lotu ʻa ha foʻi toko taha.
Ka ʻoku ou talaatu ʻeni: ʻOku tokanga mai e ʻOtuá kiate koe. Te Ne fakafanongo pea tali mai hoʻo ngaahi fehuʻi fakatāutahá. ʻE fakahoko mai e tali hoʻo lotú ʻi Heʻene founga mo e taimi pē ʻAʻaná, ko ia ai, ʻoku fie maʻu ke ke ako ke fakafanongo ki Hono leʻó. ʻOku finangalo e ʻOtuá ke ke foki ange kiate Ia, pea ko e Fakamoʻuí pē ʻa e halá.5 ʻOku finangalo e ʻOtuá ke ke ako mei Hono ʻAló, ʻa Sīsū Kalaisi, pea aʻusia ʻa e nonga mo e fiefia moʻoni ʻoku maʻu mei he muimui ʻi he hala ʻo e ākonga fakalangí.
Siʻoku kaungāmeʻa ʻofeina, ʻoku ʻi ai ha sivi fakahangatonu, pea mo ha talaʻofa mei he ʻOtuá, ʻoku maʻu ia ʻi ha tohi folofola fakakuongamuʻa, ʻa ia ʻoku lava ke maʻu ʻe he tangata, fefine mo e fānau kotoa ʻoku nau loto fiemālie ke siviʻi iá:
ʻUluakí, kuo pau ke ke fekumi ʻi he folofola ʻa e ʻOtuá. ʻOku ʻuhinga ia ke lau e folofolá pea ako e lea ʻa e kau palōfita ʻo e kuongamuʻá mo e onopōní ʻo fekauʻaki mo e ongoongolelei ʻo Sīsu Kalaisi kuo fakafoki maí—ʻo ʻikai ʻi ha fakakaukau ke veiveiua pe fakaangaʻi ka ʻi he loto fakamātoato ke ʻilo ʻa e moʻoní. Fakakaukauloto ki he ngaahi meʻa ʻokú ke ongoʻí, pea teuteuʻi ʻa hoʻo fakakaukaú ke maʻu ia.6 “ʻIo, kapau foki ʻoku ʻikai te mou lava ʻo fai ha meʻa lahi ange ʻi he holi pē ke tuí, tuku ʻa e holí ni ke ngāue ʻiate kimoutolu … te mou lava ai ʻo fakaʻatā ha potu [maʻá e folofola ʻa e ʻOtuá].”7
Uá kuo pau ke ke fakakaukau, fakalaulauloto, feinga taʻe ufi ke ke tui,8 pea loto houngaʻia ʻi he ʻaloʻofa ʻa e ʻEikí ki Heʻene fānaú talu meia ʻĀtama ki hotau kuongá ʻi Heʻene ʻomi ha kau palōfita, kau tangata kikite, mo maʻu fakahā ke tataki Hono Siasí pea tokoniʻi kitautolu ke toe foki kiate Ia.
Tolú, kuo pau ke ke kole ki hoʻo Tamai Hēvaní, ʻi he huafa Hono ʻAlo ko Sīsū Kalaisí ke Ne fakahā kiate koe hono moʻoni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Kole kiate Ia ʻi he loto fakamātoato mo e loto moʻoni, ʻo maʻu e tui kia Kalaisí.9
ʻOku toe ʻi ai foki mo ha sitepu hono fā, ʻa ia ʻoku ʻomi ʻe he Fakamoʻuí kiate kitautolu: “Ko ia ia ʻe fai ki [he] finangalo ʻo e [ʻOtuá], te ne ʻilo ʻa e akonakí, pe ʻoku ʻi he ʻOtuá ia, pe ko ʻeku lea ʻiate au pē.”10 ʻI hono fakalea ʻe tahá, ʻi hoʻo feinga ko ia ke fakapapauʻi ʻa e moʻoni ʻo e ngaahi tefitoʻi moʻoni ʻo e ongoongoleleí, kuo pau ke ke tomuʻa moʻui ʻaki kinautolu. Hanga ʻo siviʻi e ngaahi tokāteline ʻo e ongoongoleleí mo e ngaahi akonaki ʻa e Siasí ʻi hoʻo moʻuí. Fai ia ʻi he loto fakamātoato pea mo e tui ʻoku tuʻuloa ʻi he ʻOtuá.
Kapau te ke fakahoko e ngaahi meʻá ni, ʻoku ʻi ai haʻo talaʻofa mei he ʻOtuá—ʻa ia ʻokú Ne haʻisia ki Heʻene folofolá11—te Ne fakahā e moʻoní kiate koe ʻi he mālohi ʻo e Laumālie Māʻoniʻoní. Te Ne foaki atu ha maama lahi ange pea malava ke ke vakai ʻo fakalaka atu ʻi he fakapoʻulí pea mamata ki ha ngaahi meʻa nāunauʻia ʻoku ʻikai lava ke mamata ki ai hotau mata fakaēkakanó.
ʻE lava ke pehē ʻe ha niʻihi ʻoku matuʻaki faingataʻa e ngaahi sitepú pe ʻoku ʻikai ke nau taau mo e ngāué ni. Ka ʻoku ou fokotuʻu atu ko e fakamoʻoni fakatāutaha ko ʻeni ʻo e ongoongoleleí mo e Siasí, ʻa e meʻa mahuʻinga taha te ke lava ke maʻu ʻi he moʻui ní. He ʻikai ngata ʻi heʻene tāpuakiʻi mo tataki koe ʻi he moʻui ní, ka ʻoku ʻi ai ʻene kaunga ki hoʻo moʻuí ʻi he taʻengatá kotoa.
ʻE Toki ʻIlo Pē ʻa e Ngaahi Meʻa Fakalaumālié ʻi he Laumālié
Ne faingataʻa ke mahino ki he kau saienisí ʻa e lahi ʻo e ʻunivēsí, kaeʻoua kuo toe lelei ange e ngaahi meʻangāué ke tānaki ha maama lahi ange kae lava ke mahino kiate kinautolu ha moʻoni ʻoku kakato ange.
Ne akoʻi ʻe he ʻAposetolo ko Paulá ha tefitoʻi moʻoni tatau ʻo kau ki he ʻilo fakalaumālié. Naʻá ne tohi ki he kau Kolinitoó, “ʻOku ʻikai maʻu ʻe he tangata fakakakanó ʻa e ngaahi meʻa ʻo e laumālie ʻo e ʻOtuá, he ko e vale ia kiate ia: pea ʻoku ʻikai te ne faʻa ʻilo ia, he ʻoku ʻilo fakalaumālie pē ia.”12
ʻI hono fakalea ʻe tahá, kapau ʻokú ke fie ʻilo e moʻoni fakalaumālé, kuo pau ke ke fakaʻaongaʻi e ngaahi meʻangāue totonú. He ʻikai lava ke ke maʻu ha mahino ki he moʻoni fakalaumālié ʻaki ha meʻangāue ʻoku ʻikai ke ne lava ʻo ʻilo ia.
Ne folofola mai e Fakamoʻuí ʻi hotau kuongá, “Ko e meʻa ko ia ʻoku mei he ʻOtuá, ko e māmá ia; pea ko ia ia ʻokú ne maʻu ʻa e māmá, pea fai atu ai pē ʻi he ʻOtuá, te ne maʻu ʻa e maama lahi ange; pea ʻe tupulaki ʻa e maama ko iá ʻo ngingila ange kae ʻoua ke aʻu ki he ʻaho haohaoá.”13
Ko e lahi ange hono ueʻi hake hotau lotó mo e ʻatamaí ki he ʻOtuá, ko e lahi ange ia ʻa e tō mai ʻa e maama fakalangí ki hotau lotó. Ko e taimi kotoa ʻoku tau loto fiemālie pea fekumi fakamātoato ai ki he maama ko iá, ʻoku tau fakahaaʻi ai ki he ʻOtuá ʻa ʻetau mateuteu ke maʻu ʻa e maama lahi angé. ʻE māmālie ʻa e hā mahino, ngingila mo angamaheni kiate kitautolu e ngaahi meʻa ne ʻasi nenefu, fakapoʻuli mo taukakapá.
ʻI he taimi tatau, kapau te tau fakamavaheʻi kitautolu mei he maama ʻo e ongoongoleleí, ʻe kamata leva ke ulo siʻisiʻi ʻetau māmá—ʻo ʻikai ʻi ha ʻaho pe uike pē ʻe taha, ka ʻe hoko māmālie ia ʻi ha vahaʻataimi—kae ʻoua ke tau vakai ki mui pea ʻikai mahino lelei pe ko e hā ne tau tui ai ʻoku moʻoni ʻa e ongoongoleleí. ʻE hangē ʻoku ngali vale kiate kitautolu e meʻa ne tau ʻilo kimuʻá koeʻuhí koe meʻa ne mahinó kuo toe nenefu, taʻemahino pea taumamaʻo ia.
Ko e ʻuhinga ia ne tui mālohi ai ʻa Paula ʻoku vale ʻa e pōpoaki ʻo e ongoongoleleí kiate kinautolu ʻoku malaʻiá, “ka ko e mālohi ia ʻo e ʻOtuá kiate kinautolu kuo fakamoʻuí.”14
ʻOku ʻIkai Ko Ha Sivi Pē ʻe Taha Ke ʻIlo Ai
Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko ha feituʻu ia maʻá e kakai ʻoku kehekehe ʻenau fakamoʻoní. ʻOku ʻi ai ha kāingalotu ʻo e Siasí ʻoku pau pea mālohi ʻa ʻenau fakamoʻoní. ʻOku ʻi ai e niʻihi ʻoku nau kei feinga ke nau ʻiloʻi ia ʻiate kinautolu pē. Ko e Siasí ko ha ʻapi ia ke fakataha mai ki ai e kakai kotoa, ʻo tatau ai pē pe ko e hā e mālohi ʻo ʻenau fakamoʻoní. ʻOku ʻikai ha fakaʻilonga ʻi he matapā hotau ʻapi siasí ʻoku pehē, “Kuo pau ke mālohi peheni hoʻo fakamoʻoní ka ke toki hū mai.”
ʻOku ʻikai ko e Siasí maʻá e kakai haohaoá pē ka ki he taha kotoa ke “haʻu kia Kalaisi, pea hoko ʻo haohaoa ʻiate Ia.”15 Ko e Siasí ʻoku maʻá e kakai hangē ko kitauá. Ko e Siasí ko ha feituʻu ʻo e talitali leleí mo e fakatupulekiná, kae ʻikai fakamavahevaheʻi pe fakaangaʻi. Ko ha feituʻu ʻoku tau tokoni ke poupouʻi, hiki hake, pea fepoupouaki ʻi heʻetau tulifua ki heʻetau fekumi fakafoʻituitui ki he moʻoni fakalangí.
ʻI hono fakaʻosingá, ko e kaungā fononga pē kitautolu ʻoku fekumi ki he maama ʻa e ʻOtuá ʻi heʻetau fononga ʻi he hala fakaākongá. ʻOku ʻikai ke tau fakahalaʻi e niʻihi kehé koeʻuhí ko e lahi ʻo e maama ʻoku nau maʻu pe ʻikai maʻú; ka ʻoku tau fafanga mo poupouʻi e maama kotoa kae ʻoua kuo tupulaki ʻo mahino, ngingila pea mo moʻoni.
Ko Ha Talaʻofa ki he Tokotaha Kotoa
Tau ʻiloʻi muʻa ko e taimi lahi ko hono maʻu ko ia ha fakamoʻoní ʻoku ʻikai ko ha ngāue ia ʻoku fakahoko ʻi ha miniti, houa, pe ʻaho. ʻOku ʻikai tuʻo taha pē pea ʻosi leva. Ko e founga ko ia hono tānaki ʻo e maama fakalaumālié ko ha ngāue ia ʻi he moʻuí kotoa.
He ʻikai hoko vave mai hoʻo fakamoʻoni ki he ʻAlo moʻui ʻo e ʻOtuá mo Hono Siasi kuo Fakafoki Maí, ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻo hangē ko hoʻo fakaʻamú, ka te u palōmesi atu: kapau te ke fai hoʻo tafaʻakí, ʻe hoko mai ia.
Pea ʻe nāunauʻia ia.
ʻOku ou ʻoatu ʻa ʻeku fakamoʻoni fakatāutaha ʻe fakafonu ho lotó ʻe he moʻoni fakalaumālié pea ʻoatu ʻa e māmá ki ho laumālié. Te ne fakahā kiate koe ʻa e poto haohaoá mo e fiefia mo e nonga fakalangi. Kuó u aʻusia ʻeni ʻi he mālohi ʻo e Laumālie Māʻoniʻoní.
Hangē ko ia ne talaʻofa ʻe he folofola ʻo e kuonga muʻá, ʻe hanga ʻe he Laumālie ʻo e ʻOtuá ʻo ʻai ke ke hiva ʻaki ʻa e hiva ʻo e ʻofa huhuʻí,16 hiki hake homou matá ki he langí, pea hiki hake homou leʻó ʻi he fakafetaʻi ki he ʻOtua Fungani Māʻolungá, ko homou Hūfangaʻangá, ʻAmanaki Leleí, Maluʻangá, pea mo hoʻomou Tamaí. Kuo talaʻofa mai e Fakamoʻuí kapau te tau Kumi, te tau ʻilo.17
ʻOku ou fakamoʻoni ʻoku moʻoni ʻeni. Kapau te ke fekumi ki he moʻoni ʻa e ʻOtuá, ko e meʻa ko ia ʻoku ʻasi nenefu, taʻemahino, pea ngali taukakapá, ʻe fakahā mo fakamahinoʻi māmālie atu ia pea ʻe fakaofi ia ki ho lotó ʻe he maama ʻo e ʻaloʻofa ʻa e ʻOtuá. ʻE fakahā kiate koe ha ngaahi meʻa-hā-mai nāunauʻia, ʻoku ʻikai lava ke mamata ki ai e mata fakaetangatá.
ʻOku ou fakamoʻoni ʻe lava ke maʻu e maama fakalaumālie ko ʻení ʻe he fānau kotoa ʻa e ʻOtuá. Te ne fakamaama ho ʻatamaí, ʻomi ha fakamoʻui ki ho lotó pea mo ha fiefia ki ho ngaahi ʻahó. Siʻoku kaungāmeʻa ʻofeina, ʻoua muʻa naʻa fakatoloi e taimi ke fekumi ai pea fakamālohia hoʻo fakamoʻoni fakafoʻituitui ki he ngāue fakalangi ʻa e ʻOtuá, ʻio, ʻa e ngāue ʻo e māmá mo e moʻoní.
He ʻikai ngata pē ʻi hono tāpuakiʻi koe mo ho hakó ʻe hoʻo fakamoʻoni fakafoʻituitui ʻo e māmá mo e moʻoní ʻi he moʻuí ni, ka te ne ʻiate koe ʻi he kotoa ʻo e taʻengatá, ʻi ha ngaahi maama ʻoku ʻikai hano ngataʻangá. Ko ʻeku fakamoʻoní ʻeni pea tuku atu ʻa ʻeku tāpuakí kiate kimoutolu ʻi he huafa ʻo Sīsū Kalaisí, ʻēmeni.