សូមស្វាគមន៍មកកាន់សន្និសីទ
ដោយប្រធាន ថូម៉ាស អេស ម៉នសុន
យើង … រួបរួមក្នុងជំនឿយើង ហើយមានបំណងប្រាថ្នាដើម្បីស្ដាប់ និងរៀនពីសារលិខិត ដែលនឹងបង្ហាញមកកាន់យើង។
បងប្អូនប្រុសស្រីជាទីស្រឡាញ់ ខ្ញុំរីករាយណាស់ដើម្បីស្វាគមន៍អ្នកមកកាន់សន្និសីទទូទៅ នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ យើងជួបជុំគ្នាជាគ្រួសារធំមួយ មានសមាជិកច្រើនជាង 15 លាននាក់ និងបានរួបរួមនៅក្នុងជំនឿយើង ហើយមានបំណងប្រាថ្នាដើម្បីស្ដាប់ ហើយរៀនពីសារលិខិត ដែលនឹងបង្ហាញមកកាន់យើង ។
រយៈពេលប្រាំមួយខែ បានកន្លងផុតទៅយ៉ាងរហ័ស ពេលកិច្ចការនៃសាសនាចក្រ បានឆ្ពោះទៅមុខដោយគ្មានអ្វីរារាំងបាន ។ វាជាឯកសិទ្ធិរបស់ខ្ញុំ កាលពីជាងមួយខែមុន ដើម្បីឧទ្ទិសឆ្លងព្រះវិហារបរិសុទ្ធហ្គីលប៊ឺតអារីហ្សូណា ដែលជាសំណង់ដ៏អស្ចារ្យ។ នៅល្ងាចមុនពេលការឧទ្ទិសឆ្លងនោះ មានព្រឹត្តការណ៍សម្ដែងខាងវប្បធម៌មួយត្រូវបានធ្វើឡើង នៅសួន ឌីស្កូវើរី ផាក ជិតនោះ ។ មានយុវវ័យ 12,000 នាក់ បានសម្ដែងកម្មវិធីនោះរយៈពេល 90 នាទី ។ ការរាំ ការច្រៀង និងការប្រគុំតន្ត្រីពិសេស គឺអស្ចារ្យណាស់ ។
តំបន់នេះ បានជួបរដូវរាំងស្ងួតជាខ្លាំង ហើយខ្ញុំជឿថា ការអធិស្ឋានជាច្រើន ត្រូវបានឮដល់ស្ថានសួគ៌ កាលពីប៉ុន្មានសប្ដាហ៍មុន សុំឲ្យមានទឹកភ្លៀងច្រើន ។ ជាអកុសល វាបានភ្លៀងនៅមុនពេលការសម្ដែងនោះ ហើយវាភ្លៀងពេញមួយថ្ងៃ ! យើងទាំងអស់គ្នាទទួលអារម្មណ៍ពីព្រះវិញ្ញាណនៃព្រះអម្ចាស់ ទោះជាយុវវ័យត្រូវទទឹកទឹកភ្លៀង ហើយរងារញាប់ញ័រក្ដី ។ បាវចនានៃកម្មវិធីនោះគឺ « រស់នៅស្មោះត្រង់ចំពោះសេចក្ដីជំនឿ » -- គិតអំពីរឿងនោះថា ៖ « រស់នៅស្មោះត្រង់ចំពោះសេចក្ដីជំនឿ »-- ដែលវាត្រូវបានបង្ហាញយ៉ាងល្អ តាមស្នាមញញឹម និងភាពអង់អាចរបស់យុវជន និងយុវនារី ។ ទោះជាអាកាសធាតុត្រជាក់ និងមានភ្លៀងធ្លាក់ក្ដី នេះគឺជាបទពិសោធន៍ដែលពេញដោយសេចក្ដីជំនឿ និងការបំផុសគំនិត ដែលយុវវ័យទាំងនេះនឹងរក្សាទុកជានិច្ច ហើយនិងរៀបរាប់ទៅកាន់កូនៗ និងចៅៗរបស់ពួកគេនាពេលអនាគត ។
លុះថ្ងៃស្អែកឡើង ការឧទ្ទិសឆ្លងព្រះវិហារបរិសុទ្ធហ្គីលប៊ឺតអារីហ្សូណាបានធ្វើឡើង ។ វាបានក្លាយជាព្រះវិហារបរិសុទ្ធទី 142 ដែលដំណើរការក្នុងសាសនាចក្រ ។ វាផ្ទុយគ្នានឹងល្ងាចម្សិលមិញ ដែលថ្ងៃនេះ គឺស្រស់ស្អាត ហើយមានពន្លឺព្រះអាទិត្យចែងចាំង ។ សម័យប្រជុំទាំងឡាយ ពិតជាមានការបំផុសគំនិត ។ អ្នកចូលរួមជាមួយខ្ញុំក្នុងការឧទ្ទិសឆ្លងនោះរួមមាន ប្រធាន ហិនរី ប៊ី អាវរិង, អែលឌើរ និងស៊ីស្ទើរ ថាត អរ ខាលីស្ទើរ, អែលឌើរ និងស៊ីស្ទើរ វីល្លាម អរ វ៉កឃើរ និង អែលឌើរ និងស៊ីស្ទើរ ខេន អេហ្វ រីឆាត ។
នៅខែឧសភា ព្រះវិហារបរិសុទ្ធហ្វតឡូឌឺឌេលផ្ល័ររីដានឹងត្រូវបានឧទ្ទិសឆ្លង ។ ព្រះវិហារបរិសុទ្ធដទៃទៀត ត្រូវបានដាក់កាលវិភាគសាងសង់បញ្ចប់ និងឧទ្ទិសឆ្លងនាពេលក្រោយក្នុងឆ្នាំនេះ ។ នៅឆ្នាំ 2015 យើងរំពឹងថានឹងសាងសង់បញ្ចប់ ហើយឧទ្ទិសឆ្លងព្រះវិហារបរិសុទ្ធថ្មីៗ ក្នុងកន្លែងជាច្រើនលើពិភពលោក ។ ដំណើរការនេះនឹងបន្ដ ។ នៅពេលព្រះវិហារបរិសុទ្ធដែលបានប្រកាសប្រាប់ពីមុនៗទាំងអស់ ត្រូវបានសាងសង់ចប់ នោះយើងនឹងមានព្រះវិហារបរិសុទ្ធចំនួន 170 កំពុងដំណើរការនៅលើពិភពលោក ។
ទោះជាថ្មីៗនេះ យើងផ្ដោតកិច្ចខិតខំរបស់យើងទៅលើការសាងសង់បញ្ចប់ព្រះវិហារបរិសុទ្ធដែលបានប្រកាសពីលើកមុន ហើយនឹងមិនប្រកាសអំពីព្រះវិហារបរិសុទ្ធថ្មីណាមួយ នៅក្នុងពេលអនាគតភ្លាមៗនេះក្ដី ក៏យើងនឹងបន្ដដំណើការនៃការកំណត់ពីតម្រូវការ និងការស្វែងរកទីតាំងសម្រាប់ព្រះវិហារបរិសុទ្ធ ដែលនឹងមានដែរ ។ ការប្រកាសទាំងឡាយ នឹងធ្វើឡើងនៅក្នុងសន្និសីទទូទៅនាពេលអនាគត ។ យើងគឺជារាស្ត្រសាងសង់ព្រះវិហារបរិសុទ្ធ និងចូលរួមក្នុងព្រះវិហារបរិសុទ្ធ ។
ឥឡូវ បងប្អូនប្រុសស្រី យើងអន្ទះសារចង់ស្ដាប់សារលិខិតទាំងឡាយ ដែលនឹងថ្លែងមកកាន់យើងនាថ្ងៃនេះ និងថ្ងៃស្អែក ។ អ្នកទាំងឡាយដែលនឹងថ្លែងមកកាន់យើង បានសុំជំនួយ និងការដឹកនាំពីស្ថានសួគ៌ ពេលពួកគាត់បានរៀបចំសារលិខិតរបស់ពួកគាត់ ។
សូមឲ្យយើង--ទាំងអស់គ្នានៅទីនេះ និងកន្លែងផ្សេងទៀត-- បានពេញដោយព្រះវិញ្ញាណនៃព្រះអម្ចាស់ ហើយបានលើកតម្កើង និងបំផុសគំនិត ពេលយើងស្ដាប់ ហើយរៀន ។ ក្នុងព្រះនាមនៃព្រះយេស៊ូវគ្រីស្ទ ជាព្រះអង្គសង្គ្រោះរបស់យើង អាម៉ែន ។