ប្រកាសរក៖ ដៃ និងដួងចិត្តដើម្បីជួយពន្លឿនកិច្ចការ

ដោយ លីនដា ខេ ប៊ើរតុន

ប្រធានសមាគមសង្គ្រោះទូទៅ

រូបភាព

យើងអាចផ្ដល់ដៃជំនួយ និងដួងចិត្តដើម្បីពន្លឿនកិច្ចការដ៏អស្ចារ្យរបស់ព្រះវរបិតាសួគ៌។

បងប្អូនស្រីជាទីស្រឡាញ់ យើងស្រឡាញ់បងប្អូនណាស់ ! ពេលយើងមើលវីដេអូដ៏ល្អនោះ តើអ្នកបានមើលឃើញដៃរបស់អ្នក ឈោងទៅជួយនរណាម្នាក់នៅលើផ្លូវ នៃសេចក្ដីសញ្ញានោះឬទេ ? ខ្ញុំគិតអំពីកុមារថ្នាក់បឋមសិក្សា ឈ្មោះ ប្រ៊ីន ដែលមានដៃតែម្ខាង តែនាងប្រើវាដើម្បីប្រទានពរដល់គ្រួសារ និងមិត្តនាង-- ដែលជាពួកបរិសុទ្ធថ្ងៃចុងក្រោយ និងអ្នកដែលមានជំនឿផ្សេងៗ ។ បងប្អូនស្រីទាំងឡាយ យើងអាចផ្ដល់ដៃជំនួយ និងដួងចិត្តដើម្បីពន្លឿនកិច្ចការដ៏អស្ចារ្យរបស់ព្រះវរបិតាសួគ៌ ។

ក៏ដូចបងប្អូនស្រីស្មោះត្រង់ក្នុងបទគម្ពីរដែរ គឺនាងអេវ៉ា សារ៉ាយ ម៉ារា និងអ្នកដទៃទៀតជាច្រើន គេស្គាល់អត្តសញ្ញាណ និងគោលបំណងរបស់ពួកគេ ប្រ៊ីន បានដឹងថា នាងគឺជាបុត្រីនៃព្រះ ។¹ យើងក៏អាចស្គាល់កេរដំណែលដ៏ទេវភាពផ្ទាល់ខ្លួនយើង ក្នុងនាមជាបុត្រីសំណព្វនៃព្រះ និងកិច្ចការដ៏មានតម្លៃ ដែលទ្រង់ប្រទានឲ្យយើងធ្វើដែរ ។

ព្រះអង្គសង្គ្រោះ បានបង្រៀនថា « បើអ្នកណាចង់ធ្វើតាមព្រះហឫទ័យទ្រង់ នោះនឹងបានដឹងជាសេចក្ដីបង្រៀន » ។ ² តើយើងចាំបាច់ត្រូវដឹង និងធ្វើអ្វី « ដើម្បីរស់នៅជាមួយនឹងទ្រង់នាថ្ងៃមួយ » ? ³ យើងអាចរៀនមកពីរឿងកម្លោះអ្នកមាន ដែលបានសួរព្រះយេស៊ូវ តើគាត់ត្រូវធ្វើអ្វី ដើម្បីទទួលបានជីវិតដ៏អស់កល្បនោះ ។

ព្រះយេស៊ូវ បានឆ្លើយនឹងគាត់ថា « បើអ្នកចង់ចូលទៅក្នុងជីវិត ចូរកាន់តាមបញ្ញត្តិទាំងប៉ុន្មាន » ។

កម្លោះនោះបានសួរទ្រង់ថា តើគាត់គួរគោរពបញ្ញត្តិមួយណា ។ នោះព្រះយេស៊ូវ បានរំឭកគាត់នូវក្រិត្យវិន័យទាំងដប់ប្រការមួយចំនួន ដែលយើងទាំងអស់គ្នាស្គាល់ ។

កម្លោះនោះតបថា « ខ្ញុំបានកាន់តាមគ្រប់សេចក្ដីទាំងនោះ តាំងពីក្មេងមកហើយ ៖ តើខ្ញុំនៅខ្វះអ្វីទៀត ? »

ព្រះយេស៊ូវ មានបន្ទូលថា « បើអ្នកចង់បានជាគ្រប់លក្ខណ៍ ចូរអ្នកទៅលក់របស់ទ្រព្យខ្លួន ហើយចែកដល់ពួកអ្នកក្រីក្រទៅ នោះអ្នកនឹងបានទ្រព្យសម្បត្តិនៅឯស្ថានសួគ៌វិញ ៖ រួចឲ្យមកតាមខ្ញុំចុះ » ។ ⁴

ព្រះយេស៊ូវ ហៅគាត់ឲ្យចូលរួមក្នុងកិច្ចការទ្រង់--កិច្ចការជាសិស្សម្នាក់ ។ កិច្ចការយើង គឺដូចគ្នា ។ យើងត្រូវ « ទុកចោលរបស់ទាំងឡាយ [នៃ]ពិភពលោកនេះ... ហើយស្វែងកាន់ខ្ជាប់សេចក្ដីសញ្ញា [របស់យើង] » ⁵ ហើយមករកព្រះគ្រីស្ទ និងដើរតាមទ្រង់ ។ នោះជាអ្វីដែលពួកសិស្សធ្វើ !

ឥឡូវ បងប្អូនស្រីទាំងឡាយ ចូរកុំមានអារម្មណ៍មិនល្អពីខ្លួនអ្នក ដោយសារតែព្រះអង្គសង្គ្រោះមានបន្ទូលទៅកាន់កម្លោះអ្នកមាន អំពីការបានល្អឥតខ្ចោះនោះឡើយ ។ ពាក្យ ល្អឥតខ្ចោះ នៅក្នុងដំណើររឿងនេះ បានបកប្រែពីភាសាក្រិច ដែលមានន័យថា « ពេញលេញ » ។ នៅពេលយើងខំអស់ពីសមត្ថភាពយើង ដើម្បីឈានទៅមុខលើផ្លូវសេចក្ដីសញ្ញា នោះយើងប្រែក្លាយកាន់តែពេញលេញ និងល្អឥតខ្ចោះក្នុងជីវិតនេះហើយ ។

ដូចជាកម្លោះអ្នកមានក្នុងជំនាន់ព្រះយេស៊ូវ ពេលខ្លះយើងត្រូវបានល្បួងឲ្យលះបង់ ឬបែរខ្នង ដោយសារតែយើងគិតថា យើងមិនអាចធ្វើវាបានតែម្នាក់ឯងនោះ ។ ហើយយើងត្រឹមត្រូវ ! យើងពុំអាចធ្វើរឿងលំបាកៗ ដែលយើងបានសុំឲ្យធ្វើដោយគ្មានជំនួយនោះឡើយ ។ ជំនួយកើតមានតាមរយៈដង្វាយធួននៃព្រះយេស៊ូវគ្រីស្ទ ការដឹកនាំនៃព្រះវិញ្ញាណបរិសុទ្ធ និងការបម្រើរបស់អ្នកដទៃ ។

ស្ត្រីនៅលីវស្មោះត្រង់ម្នាក់ ថ្មីៗនេះ បានថ្លែងទីបន្ទាល់ថា តាមរយៈដង្វាយធួន គាត់រកបានកម្លាំងដើម្បីប្រើដៃ និងដួងចិត្តស្ម័គ្រជួយចិញ្ចឹមក្មេងបួននាក់ ដែលបងស្រីគាត់ បានបន្សល់ទុក ពេលគាត់ទទួលមរណភាព ដោយសារជម្ងឺមហារីកនោះ ។ រឿងនោះរំឭកខ្ញុំអំពីអ្វី ដែលអែលឌើរ នែល អេ ម៉ាក់ស្វែល មានប្រសាសន៍ថា ៖ « រាល់កិច្ចការងាយៗ ដែលសាសនាចក្រត្រូវធ្វើ គឺបានធ្វើរួចអស់ហើយ ។ ចាប់ពីពេលនេះទៅ វានឹងកាន់តែពិបាក ហើយការគោរពប្រតិបត្តិរបស់យើង នឹងត្រូវសាកល្បងតាមរបៀបគួរឲ្យចាប់អារម្មណ៍មួយចំនួន » ។ ⁶ អ្នកត្រូវបានបញ្ជូនមកកាន់ផែនដី ក្នុងគ្រាកាន់កាប់ត្រួតត្រានេះ ដោយសារខ្លួនអ្នកជានរណាពិត ហើយអ្នកត្រូវបានរៀបចំឲ្យធ្វើអ្វីហើយនោះ! មិនថាសាតាំងនឹងល្បួងយើងឲ្យគិតថាយើងជានរណានោះទេ អត្តសញ្ញាណពិតរបស់យើង គឺថាយើងជាសិស្សនៃព្រះយេស៊ូវគ្រីស្ទ!

មរមន គឺជាសិស្សពិតម្នាក់ ដែលបានរស់នៅក្នុងជំនាន់មួយ ដែល « ចិត្តរបស់គេរាល់គ្នាសុទ្ធតែរឹងរូស ... ហើយពុំដែលមានអំពើទុច្ចរិតដ៏ធំបែបនេះ នៅក្នុងចំណោមអស់ទាំងកូនចៅរបស់លីហៃនេះឡើយ » ។ ⁷ តើអ្នកនឹងចង់រស់នៅក្នុងជំនាន់នោះឬទេ ? ហើយមរមនបានសេចក្តីប្រកាសដោយក្លៀវក្លាថា « មើលចុះ ខ្ញុំជាសិស្សម្នាក់នៃព្រះយេស៊ូវគ្រីស្ទ ជាព្រះរាជបុត្រានៃព្រះ » ។ ⁸

អ្នកមិនស្រឡាញ់មរមនទេឬអី ? គាត់ស្គាល់ខ្លួនគាត់ ហើយស្គាល់បេសកកម្មគាត់ ហើយអំពើអាក្រក់ដែលហ៊ុំព័ទ្ធគាត់ ពុំអាចបន្លែបន្លំគាត់ឡើយ ។ តាមពិត គាត់បានគិតអំពីការហៅបម្រើរបស់គាត់ថា ជាអំណោយទានមួយ ។ ⁹

ចូរគិតមើលថា វាជាពរជ័យប៉ុណ្ណា ដែលត្រូវបានហៅឲ្យថ្វាយអំណោយទានរបស់យើងនៃភាពជាសិស្សប្រចាំថ្ងៃដល់ព្រះអម្ចាស់ ដោយប្រកាសទាំងពាក្យសម្ដី និងសកម្មភាពថា « មើលចុះ ខ្ញុំជាសិស្សម្នាក់នៃព្រះយេស៊ូវគ្រីស្ទ ! »

ខ្ញុំចូលចិត្តរឿងដែលប្រធាន ប៊យដ៍ ឃេ ផាកកឺ ប្រាប់អំពីបងស្រីជាទីស្រឡាញ់ម្នាក់ ដែលត្រូវគេចំអក ដោយសារការធ្វើតាមដំបូន្មានរបស់ព្យាការី ដើម្បីស្ដុកអាហារ ។ ម្នាក់ដែលរិះគន់នោះ បានឲ្យយោបល់ថា បើដល់ពេលមានវិបត្តិ នោះអ្នកដឹកនាំគាត់ នឹងសុំឲ្យគាត់ចែកចាយអាហារស្ដុករបស់គាត់ ជាមួយអ្នកដទៃហើយ ។ ចម្លើយសាមញ្ញ និងមុតមាំរបស់គាត់ ក្នុងនាមជាសិស្សស្មោះម្នាក់ តបថា « យ៉ាងហោចណាស់ ខ្ញុំនឹងមានអ្វីខ្លះដើម្បីយកទៅជាមួយដែរ» ។ ¹⁰

ខ្ញុំស្រឡាញ់ស្ត្រីនៃសាសនាចក្រ ទាំងក្មេង ទាំងចាស់ ។ ខ្ញុំបានឃើញនូវភាពរឹងមាំរបស់អ្នក ។ ខ្ញុំបានឃើញនូវជំនឿរបស់អ្នក ។ អ្នកមានអ្វីមួយដើម្បីផ្ដល់ឲ្យ ហើយស្ម័គ្រចិត្តផ្ដល់ឲ្យ ។ អ្នកធ្វើរឿងនេះ ពុំមែនអួត ឬប្រកាសជាសាធារណៈទេ អ្នកផ្ដោតលើព្រះដែលយើងថ្វាយបង្គំ ពុំមែនខ្លួនយើងឡើយ ហើយអ្នកក៏ពុំដែលគិតថា នឹងទទួលអ្វីមកវិញនោះដែរ ។ ¹¹ នោះជាអ្វីដែលពួកសិស្សធ្វើ !

ថ្មីៗខ្ញុំបានជួបនឹងយុវនារីម្នាក់ នៅប្រទេសហ្វីលីពីន ដែលគ្រួសារគាត់មិនសូវសកម្មក្នុងសកម្មភាពសាសនាចក្រ ពេលគាត់អាយុ 7 ឆ្នាំគត់ ដោយទុកឲ្យគាត់ដើរតែម្នាក់ឯងតាមផ្លូវគ្រោះថ្នាក់មួយទៅកាន់ព្រះវិហាររាល់សប្ដាហ៍ ។ គាត់ប្រាប់ថា កាលអាយុ 14 ឆ្នាំ គាត់បានសម្រេចចិត្តថា គាត់នឹងនៅស្មោះចំពោះសេចក្ដីសញ្ញារបស់គាត់ ដើម្បីគាត់អាចសក្ដិសមដើម្បីចិញ្ចឹមគ្រួសារនាពេលអនាគតក្នុងគេហដ្ឋានមួយដែល « ប្រទានពរដោយកម្លាំងនៃអំណាចបព្វជិតភាព » ។ ¹² វិធីដ៏ល្អបំផុតដើម្បីពង្រឹងគេហដ្ឋានមួយ ក្នុងពេលបច្ចុប្បន្ន ឬអនាគត គឺត្រូវរក្សាសេចក្ដីសញ្ញា ការសន្យាទាំងឡាយ ដែលយើងបានធ្វើជាមួយគ្នា និងជាមួយព្រះ ។

នោះជាអ្វីដែលពួកសិស្សធ្វើ !

បងស្រីជនជាតិជប៉ុនស្មោះត្រង់ម្នាក់ និងស្វាមីគាត់ បានទៅលេងបេសកកម្មរបស់យើងនៅប្រទេសកូរ៉េ ។ គាត់ពុំចេះនិយាយកូរ៉េទេ ហើយគាត់ពុំសូវចេះនិយាយអង់គ្លេសដែរ ប៉ុន្តែគាត់មានដួងចិត្តស្ម័គ្រប្រើអំណោយទានពិសេស និងដៃជំនួយគាត់ ដើម្បីធ្វើកិច្ចការរបស់ព្រះអម្ចាស់ ។ នោះជាអ្វីដែលពួកសិស្សធ្វើ ! គាត់បានបង្រៀនអ្នកផ្សាយសាសនាយើងពីរបៀបបត់សត្វក្រដាស់សាមញ្ញមួយ--ដែលអាចបើក និងបិទមាត់បាន ។ បន្ទាប់មក គាត់ប្រើភាសាអង់គ្លេសតិចតួច ដែលគាត់ចេះ ដើម្បីបង្រៀនអ្នកផ្សាយសាសនាឲ្យ « បើកមាត់ពួកគេ » ដើម្បីចែកដំណឹងល្អ-- ជាមេរៀនមួយដែលពួកគេ និងខ្ញុំ នឹងពុំអាចភ្លេចបានឡើយ ។

ចូរស្រម៉ៃមួយនាទីថា អ្នក និងខ្ញុំ ឈរជាមួយគ្នានឹងបងប្អូនស្ត្រីរាប់លាននាក់ដទៃទៀត និងបងប្អូនប្រុសទាំងឡាយក្នុងសាសនាចក្រទ្រង់ ឆ្ពោះទៅមុខដោយក្លៀវក្លា ធ្វើនូវអ្វីដែលពួកសិស្សធ្វើ-- ដោយការបម្រើ និងសេចក្ដីស្រឡាញ់ ដូចជាព្រះអង្គសង្គ្រោះ ។ តើការធ្វើជាសិស្សរបស់ព្រះយេស៊ូវគ្រីស្ទមានន័យយ៉ាងណាចំពោះអ្នក ?

អាវកាក់ និងអាវយឺត ដៃជំនួយពួកមរមន ត្រូវបានសិស្សដែល ពុំគិតពីខ្លួនឯងនៃព្រះយេស៊ូវគ្រីស្ទរាប់រយរាប់ពាន់នាក់ពាក់ ចូលរួមក្នុងឱកាសផ្ដល់ការបម្រើខាងសាច់ឈាមយ៉ាងសកម្ម ។ ប៉ុន្តែមានវិធីផ្សេងទៀត ដើម្បីបម្រើក្នុងនាមជាសិស្សដ៏លះបង់ ។ ចូរស្រម៉ៃជាមួយខ្ញុំអំពីសញ្ញា « ការប្រកាសរកជំនួយ » ខាងវិញ្ញាណមួយចំនួន ដែលទាក់ទងនឹងកិច្ចការនៃសេចក្ដីសង្គ្រោះ ៖

ប្រកាសរក ៖ ឪពុកម្ដាយនាំកូនចៅរបស់ពួកគេមកក្នុងពន្លឺ និងសេចក្ដីពិត
ប្រកាសរក ៖ កូនស្រី និងកូនប្រុស បងស្រី និងបងប្រុស មីង និងពូ បងប្អូនជីដូនមួយលោកតាលោកយាយ និងមិត្តស្មោះត្រង់ ដើម្បីបម្រើជាអ្នកឲ្យដំបូន្មាន និងផ្ដល់ដៃជំនួយនៅលើផ្លូវនៃសេចក្ដីសញ្ញា ។
ប្រកាសរក ៖ អ្នកទាំងឡាយដែលស្ដាប់ការបំផុសគំនិតនៃព្រះវិញ្ញាណបរិសុទ្ធ ហើយធ្វើតាមការបំផុសដែលទទួលបាន
ប្រកាសរក ៖ អ្នកទាំងឡាយដែលរស់នៅតាមដំណឹងល្អប្រចាំថ្ងៃ តាមរបៀបតូចៗ និងសាមញ្ញៗ
ប្រកាសរក ៖ អ្នកធ្វើការពង្សប្រវត្តិ និងកិច្ចការព្រះវិហារបរិសុទ្ធ ដើម្បីភ្ជាប់ក្រុមគ្រួសារដ៏អស់កល្បជានិច្ច
ប្រកាសរក ៖ អ្នកផ្សាយសាសនា និងសមាជិក ផ្សាយ « ដំណឹងល្អ » -- ជាដំណឹងល្អនៃព្រះយេស៊ូវគ្រីស្ទ
ប្រកាសរក ៖ អ្នកជួយសង្គ្រោះ ដើម្បីស្វែងរកអ្នកទាំងឡាយ ដែលបានវង្វេងផ្លូវ
ប្រកាសរក ៖ អ្នករក្សាសេចក្ដីសញ្ញា ដើម្បីឈរឲ្យរឹងមាំចំពោះសេចក្ដីពិត និងត្រឹមត្រូវ
ប្រកាសរក ៖ សិស្សពិតរបស់ព្រះអម្ចាស់ ព្រះយេស៊ូវគ្រីស្ទ

អស់ជាច្រើនឆ្នាំកន្លងទៅ អែលឌើរ អិម រ័សុល បាឡឺដ បានចេញសំណើរដ៏មុតមាំមួយដល់ស្ត្រីនៃសាសនាចក្រ ពេលលោកមានប្រសាសន៍ថា ៖

« នៅចន្លោះពេលនេះ និងការយាងមករបស់ព្រះអម្ចាស់ លោកត្រូវការស្ត្រីគ្រប់គ្រួសារ គ្រប់វួដ គ្រប់សហគមន៍ និងគ្រប់ជាតិសាសន៍ នឹងបោះជំហានទៅមុខនៅក្នុងសេចក្ដីសុចរិត ហើយនិយាយដោយពាក្យសម្ដី និងទង្វើររបស់ពួកគេថា ‹ ខ្ញុំនៅទីនេះ បញ្ជូនខ្ញុំចុះ › ។

« សំណួររបស់ខ្ញុំគឺថា ‹ តើអ្នកនឹងធ្វើជាស្ត្រីម្នាក់ក្នុងចំណោមស្ត្រីទាំងនោះឬទេ ?›» ¹³

ខ្ញុំសង្ឃឹមថា យើងម្នាក់ៗ អាចឆ្លើយច្បាស់ៗថា « ចា៎ស! » ខ្ញុំបិទដោយទំនុកចម្រៀងកុមារ ៖

​[កូនស្រី] ​នៃ​ក្ដី​សញ្ញា មាន​អំណោយទានចែកចាយ ។
យើង​នឹង​បង្រៀន​ដំណឹងល្អ​តាម​ការ​រស់នៅ​យើង ។
យើង​នឹង​ថ្លែង​បន្ទាល់​ ទាំង​ពាក្យ​សម្ដី និង​ទង្វើ ៖
យើង​ជឿ ហើយ​យើង​បម្រើ​ព្រះយេស៊ូវ​គ្រីស្ទ ។ 14

ក្នុងនាមជាសិស្សពិត សូមយើងផ្ដល់ដួងចិត្តស្ម័គ្រ និងដៃជំនួយយើង ដើម្បីពន្លឿនកិច្ចការទ្រង់ ។ វាមិនសំខាន់ថាយើង ដូចជា Brynn យើងមានដៃតែមួយនោះទេ ។ វាមិនសំខាន់ទេ បើយើងមិនទាន់ល្អឥតខ្ចោះ និងពេញលេញ ។ យើងជាសិស្សដ៏លះបង់ ដែលបានឈោងទៅជួយគ្នាទៅវិញទៅមកនៅតាមផ្លូវ ។ ភាពជាស្ត្រីរបស់យើង ឈោងទៅគ្រប់ជំនាន់ ដល់បងប្អូនស្ត្រីស្មោះត្រង់ទាំងឡាយ ដែលបានដើរពីមុនមក ។ រួមគ្នាក្នុងនាមជាស្ត្រី និងសាមគ្គីភាពជាមួយនឹងព្យាការីនៅរស់ អ្នកមើលឆុត និងអ្នកទទួលវិវរណៈ ដែលមានកូនសោបព្វជិតភាពដែលបានស្ដារឡើងវិញ នោះយើងអាចដើរក្នុងនាមជាមនុស្សម្នាក់ ជាសិស្ស ជាអ្នកបម្រើ ដែលមានដួងចិត្ត និងដៃស្ម័គ្រ ជួយពន្លឿនដល់កិច្ចការនៃសេចក្ដីសង្គ្រោះ ។ ពេលយើងធ្វើដូច្នោះ យើងនឹងក្លាយដូចជាព្រះអង្គសង្គ្រោះ ។ ខ្ញុំថ្លែងទីបន្ទាល់ដូច្នោះ ក្នុងព្រះនាមនៃព្រះយេស៊ូវគ្រីស្ទ អាម៉ែន ។