Na Parofita o Josefa Simici

Mai vei Elder Lawrence E. Corbridge

Ena Vitusagavulu

iVakatakilakila

Era vakadinadinataka na veivakatakila a soli kivei Josefa Simici ni okoya e dua na parofita ni Kalou.

Na iMatai ni Raivotu

A wilika e dua na gonetagane na iVola Tabu, ka tao na matana ena dua na tikina mai na ivolanikalou. Oqo na tiki ni gauna me na veisautaka na vuravura.

A cikeva okoya me kila se lotu cava ena rawa ni muataki koya ki na dina kei na veivakabulai. E sa vakatovolea o koya voleka ni veika taucoko sara, ka sa vuki oqo ki na iVola Tabu ka wilika na vosa oqo: “Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua.”¹

E qai mai vakasamataka toka yani vakabibi o koya na tikina oqo. Na imatai ni wase ni rarama e seraka yani na butobuto. Sa ikoya beka oqo na isaunitaro, na sala tani mai na veilecayaki kei na butobuto? E sa rawarawa li beka vakaoqo? Taroga na Kalou ka na sauma o Koya? A mai vakananuma voli yani se me na taroga na Kalou se me vakalaivi tu ga ena butobuto kei na veilecayaki.

Ia ena vuku ga ni nona cikecike, e a sega ni cici ki na dua na tutu vakadirorogo ka veimamayaka e dua na masu totolo. E se qai yabaki 14 ga okoya, ia ena nona sasaga vagumatua me kila, e a sega ni tavaiyaya. Oqo ena sega ni dua na masu wale tu ga. E vakasamataka okoya na vanua me gole kina kei na gauna me qarava kina na itavi oqo. E sa vakarautaki koya me veivosaki kei na Kalou.

E sa qai roro mai na siga. E sa dua “na mataka totoka, ena itekivu ni vulaitubutubu ni [1820].”² E sa lako taudua ki na loma ni veikau vagagalu voleka ena ruku ni veikau eso ka tubu siviti koya. E yacova yani na vanua a namaka me yaco taumada kina. E tekiduru okoya ka talaucaka na gagadre ni lomana.

Ni vakamacalataki na veika a tarava mai, e kaya okoya:

“Au sa raica kina e cake e dua na duru bukawaqa donuya tiko na uluqu, ni sa lako sobu tiko mai ka serauni au, ia sa sivia sara na ramase ni matanisiga.

“… Ia ni sa mai toka e mataqu au sa qai raica e rua na Tamata, ia na kedrau iserau kei na iukuuku sa sega ni vakamacalataki rawa, raica erau sa tucake tu ena maliwa lala donuya na mataqu. A sa kacivi au e dua vei rau, dusi koya na kena ikarua ka kaya—[Josefa,] Oqo na noqu Gone ni Toko. Mo Rogoci Koya!”³

Ni oti toka ga e 24 na yabaki emuri, erau na mate o Josefa Simici kei tacina o Hyrum baleta na ka a tekivutaki eke.

Veisaqasaqa

A tukuna o Josefa ni sa yabaki 17, ni tukuna vua e dua na agilosi ni “[na] rogo na yacaqu vei ira na veimatanitu, … eso era na taleitaka ka so era na vosacataka.”⁴ Na parofisai vakasakiti oqo e se tomani tiko ga na kena yaco ena kena tetevi vuravura taucoko tiko yani Na Lotu i Jisu Karisito ni Yalododonu Edaidai.

Na veisaqasaqa, veivakasewasewani, kei na veivakaduiduitaki era sa veitokani ki na dina. Ena gauna ga e vakatakilai kina na dina me baleta na inaki kei na icavacava ni tamata, ena tiko e dua na meca me saqata. E tekivu mai vei Atama kei Ivi ena Were ko Iteni, me yaco sara ki na ilesilesi i Karisito, ka dewa mai ki na noda gauna, ena dau tiko ga na sasaga me vakacacani, vakatanitaki, saqati, ka vakasesei kina na yavu ni bula.

Vakaraica e dua na tamata ka a vakacacani vakatawamacala vakalevu cake mai na Dua ka a saqati, bolei, ka tawa ciqomi, mokulaki, vakawaleni, ka vakamatei, E Dua ka sa lako sobu mai ki ra sara, ka o na kunea ekea na dina, na Luve ni Kalou, na iVakabula ni kawatamata. Cava na vuna era sega ni biuti Koya tu ga kina?

Cava na vuna? Baleta ni o Koya na dina, ka na dau saqati tu ga na dina.

Ka qai vakaraica e dua ka a kauta mai e dua tale na veiyalayalati i Jisu Karisito kei na ivolanikalou tale eso, vakaraica e dua e a iyaya ni cakacaka ni kena vakalesui tale mai ki vuravura na taucoko ni kosipeli i Jisu Karisito, vakaraici koya ka namaka ni kunea na veisiriyaki ni duka. Cava na vuna me kakua ni biu duadua tu ga kina?

Cava na vuna? Baleta ni a vakatavulica o koya na dina, ka na dau saqati tu ga na dina.

Na Waluvu ni Vakatakila

Era vakadinadinataka na veivakatakila a soli kivei Josefa Simici ni okoya e dua na parofita ni Kalou. Meda raica mada eso, meda raica mada eso na rarama kei na dina e a vakatakilai vua ka cilava tu na veibasai ni vakabauta sa matau voli ena nona gauna kei na noda:

E sa tamata vakayago, ka vakacerecerei na Kalou, sa dua na Tama Tawamudu. E sa Tamada o Koya.
E ratou sa duidui taucoko na Kalou na Tamada, o Jisu Karisito, kei na Yalo Tabu.⁵
O iko sa levu cake mai na tamata. Ko sa dua na luve ni Kalou na Tamada Tawamudu ka na rawa ni o vakataki Koya⁶ kevaka o vakabauta na Luvena, veivutuni, ciqoma na cakacaka vakalotu, ciqomi ni Yalo Tabu, ka vosota me yacova na ivakataotioti.⁷
Na Lotu i Jisu Karisito edaidai e sa tautauvata voli ga na Lotu a tauyavutaka taumada o Koya ena Nona bula vakayago, vata kei ira na parofita kei na iapositolo, Matabete i Melikiseteki kei Livai, talatala qase, bete levu, dikoni, ivakavuvuli, bisopi, kei na vitusagavulu me vaka e vakamacalataki tu ena iVola Tabu.
A kautani tu mada na dodonu ni vakatulewa ni matabete e vuravura ni oti na mate i Karisito kei ira na Nona iApositolo ka sa vakalesui tale mai ena noda gauna.
E se sega ni cegu na ivakatakila, ka se bera ni tasogo o lomalagi. E vosa tiko na Kalou kivei ira na parofita edaidai, ka na vosa o Koya kivei iko kei au talega.⁸
Sa vuqa na ka e tu ni cava na bula oqo mai na lomalagi kei eli. E sa tiko na ivakatagedegede ni lagilagi eso, ka sa vakaibalebale sara vakalevu na veika eda cakava ena bula oqo.⁹
Me levu cake mai na tauri vakamamada ni vakabauti Karisito sa dodonu meda “vakaliuci [Koya] ena nanuma kecega,”¹⁰ “na veika kecega [eda sa kitaka] me kitaki ena yaca ni Luvena,”¹¹ “vakananumi koya ka muria na vunau sa solia vei ira … ka me tiko ga kei [keda] na nona Yalo Tabu.”¹²
O ira na bilioni vakacaca ka ra bula ka qai mate ka sega ni donuya na kosipeli se na cakacaka tabu vakalotu veiganiti kaya na veivakabulai era sa sega ni yali. Mai na veisorovaki i Karisito, na tamata kecega “ena vakabulai, kevaka eda sa muria na vunau kei na ivakavuvuli ni itukutuku vinaka,”¹³ ka qaravi me baleti ira na bula kei na mate.¹⁴
Era sega ni vakatekivu na ka kece ena sucu. Ko a bula taumada ena mata ni Kalou vaka Luvena tagane kei na yalewa ka sa vakarautaki me baleta na bula vakaicavacava oqo.¹⁵
Na vakawati kei na matavuvale erau sa sega ni ivakarau tudei ni tamata walega me yacova ni tawasei kedaru na mate. Rau sa nakiti me tawamudu mai na veiyalayalati eda cakava vata kei na Kalou. Na matavuvale e sa ituvatuva vakalomalagi.¹⁶

Ia oqo e sa dua na tiki walega ni waluvu ni vakatakila ka a soli kivei Josefa Simici. Era a lako taucoko mai vei, na veivakatakila oqo ka vakavu rarama ki na butobuto, na veivakamatatataki ki na vakatitiqa, ka sa mai vakauqeta, vakalougataka ka vakavinakataka e milioni vakacaca na tamata? Ka na manata toka, ni a bulia ga vakataki koya na veika kece oqo se a yaco vua na veivuke vakalomalagi? Era rogo beka me vaka na vosa ni tamata na ivolanikalou e tabaka se na vosa ni Kalou?

iTinitini

E sega ni tiko na duidui ena veika a rawata o Josefa Simici, ia ena sala ga e a cakava kina kei na vuna. Ka sa sega soti ni levu na vakatataro. O koya a dausasaga me vakataka se parofita. E a cakava taudua ga na ka e cakava, se a rawata okoya na veivuke vakalomalagi. Raica na ivakadinadina, ia raica mada na ivakadinadina taucoko, na veika kece a yaco ena nona bula, e sega vakadua ni dua na tikina. Sa ka bibi sara, cakava me vakataki Josefa gone ka “kerea … na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga [veiko].”¹⁷ Oqo e sega ni iwalewale duadua ga mo vulica kina na dina ni iVola i Momani kei Josefa Simici, e sa ituvatuva talega ni kena kilai na dina ni veika kecega.¹⁸

O Josefa Simici a parofita ni Kalou, vakakina o Thomas S. Monson edaidai. Mai vei Josefa Simici, sa yaco tale na idola ni matanitu ni Kalou mera “soli e vuravura vua na tamata, ia … ena [qai] vunautaki yani na itukutuku vinaka … me vaka na vatu sa kavida mai na ulunivanua ka sa sega ni ta ena liga … , io ena roboti vuravura taucoko.”¹⁹

Sa Tamada Tawamudu na Kalou, kei Jisu sa Karisito. Eda qaravi Rau. Sa sega na ka e vakatauvatani ki na Nodrau veibuli, na yavu ni veivakabulai, kei na solibula ni veisorovaki ni Lami ni Kalou. Ena itabagauna oqo, eda vakataucokotaka na Yavu ni Tamada ka kania na vuata ni Veisorovaki ena talairawarawa duadua ga ki na ivakaro kei na cakacaka vakalotu ni Kosipeli ka sa vakalesui vua na Parofita o Josefa Simici. Au vakadinadinataki Rau, na Kalou na Tamada Tawamudu, Jisu Karisito na iVakabula kei vuravura. Ena yaca tabu i Jisu Karisito, emeni.