Na Bulataki ni Veiyalayalati ena Maroroi Keda, Vakarautaki Keda, ka Vakaukauwataki Keda
Eda luvena yalewa ni veiyalayalati ena veitabayaki ka da mai lako voli ena bula vakayago ena sasaga ni lesu tale Vua.
Isa, kemuni na taciqu, keitou lomani kemuni. Ena noqu a sikovi Mexico wale tikoga oqo, au a vakila kina na isema ni veitacini ka da vakila kece tiko ena bogi nikua. Raitayaloyalotaka mada na iyaloyalo oqo: Keimami se qai vakacavara ga na soqoni ni Lalai ena mataka ni Sigatabu, kau sa sasaga yani kei ira na gonelalai, kei ira na qasenivuli kina loma ni olo. Sa qai tadola mai na katuba ni kalasi vei ira na Goneyalewa, kau sa raici ira na goneyalewa kei ira na nodra iliuliu. Keimami sa mai veimarautaki yani e kea ka veimokomoko. Era se kukuva toka ga na gonelalai na noqu liku ka ra sa sinai wavoki e yasaqu na vo ni marama, kau vinakata meu tasereka na ka au sa vakila tu ena gauna o ya.
Au sega ni dau vosa vaka Sipeni, ka basika ga mai ena noqu vakasama na vosa vakavalagi. Au raici ira kece yani ka kaya, “Oi keimami na luvena goneyalewa na Tamada Vakalomalagi, ka sa dau lomani keimami, ka keimami dau lomani Koya.” Era sa qai tomani au kece sara mai ena vosa vaka Sipeni. Keimami sa qai mai tu e kea ena dua na olo ka sa sinai vutucoqa tu ka cavuqaqataka tiko na iToko ni Goneyalewa ena neimami tukuna, “Keimami na vakadinadinataka na Kalou ena veigauna kece, ena veika kece, kei na veivanua kece.”
Ena bogi edai eda soqoni vata ena veiyasai vuravura, me vaka na Nona tisaipeli kei na noda gagadre meda taqomaka ka tokona na matanitu ni Kalou. Eda luvena yalewa na Tamada Vakalomalagi. Eda luvena yalewa ni veiyalayalati ena veitabayaki ka da mai lako voli ena bula vakayago ena sasaga ni lesu tale Vua. Na bulataki ni veiyalayalati ena maroroi keda, vakarautaki keda, ka vakaukauwataki keda.
Era tiko maliwai keda nikua na goneyalewa ka ra se tiko ena Lalai. Oi kemuni na goneyalewa oqo, o ni sa taura nikua na imatai ni ikalawa kina bula tawamudu ena nomuni sa papitaiso.
Ni vakararai wavokiti kemuni mada. Na nomuni veisiga ni mataka sa matata sara ga ena nomuni raici ira na marama era a sa cakava oti mai na veiyalayalati o ya ka sa matataka tiko na gaunisala ki liu.
Kevaka mo ni sa yabaki 8, 9, 10, se 11, se ko ni tiko ena Vale ni Koniferedi, mai nomuni vale, se ena nomuni vale ni soqoni ena veiyasai vuravura, sa kerei mo ni tucake mada? Ni sa kidavaki mai kina soqoni raraba ni marama. Ko ni sa kerei mo ni tucake tu mada, baleta ni keitou gadreva me keitou sureti kemuni mo ni na vakaitavi ena bogi nikua. Au sa na tekivu lagata lo yani e dua na sere ni Lalai. Ena nomuni sa kila ga na sere, sa rawa beka mo ni na lagata vata sara mai kei au? Oqo mo ni na laga kece mai me rawa ni ra rogoca o ira kece na tiko oqo.
Tuberi au e nona loloma;
Tuberi au meu masu tu Vua;
Meu sa kila na veika dodonu;
Tuberi au, meu muria tu.
Ni tucake tu ga ra goneyalewa, mera na tucake kece na yabaki 12 ka lako cake ka lagata na ikarua ni qaqana.
Bau mai ragone me tou mai vuli tu
Nona ivunau me tou lesu Vua
Tou na bula ena nona iserau—
Gauna kece muri koya tu.1
Sa totoka dina o ya. Ni dabe sobu. Vinaka vakalevu.
Ni da yalewa ni veitabayabaki, eda na lako voli ena Nona rarama. Na noda ilakolako ena gaunisala e nomu sara ga ka sa vakararamataki tu ena loloma ni iVakabula.
Eda na curuma na matamata ni sala kina bula tawamudu ena cakacaka vakalotu kei na veiyalayalati ni papitaiso, ka qai laki ciqoma na isolisoli ni Yalo Tabu. E tarogi keda o Elder Robert D. Hales, “[Eda] kila tiko li ka ra kila tiko li na [luveda] ni gauna [eda] sa papitaiso kina eda sa veisautaki sara ga vakadua?”
E a vakamacalataka talega ni “da sa kila na noda veiyalayalati ni papitaiso kei na isolisoli ni Yalo Tabu, ena veisautaka na noda bula, ka na tauyavutaka na noda sa na yalodina kina matanitu ni Kalou. Ni sa rorovi keda mai na veitemaki, ka da na vakarorogo, na Yalo Tabu ena vakalesuya mai vei keda ni da sa yalataka oti ni da na dau nanuma na iVakabula ka na dau talairawarawa ki na ivunau ni Kalou.”2
Ni da sa votai ena ivakatakarakara ni sakaramede ena veimacawa, eda sa vakavoui tiko na noda veiyalayalati ni papitaiso. O Elder David A. Bednar a kaya: “Ena noda sa tucake tu ena wai ni veipapitaisotaki, me da sa vakanamata yani ki na valetabu. Ni da sa votai mai ena sakaramede me da vakanamata yani kina valetabu. Eda sa yalataka ni da na dau nanuma na iVakabula ka na dau bulataka na ivunau meda vakarautaki keda tiko kina cakacaka vakalotu ni valetabu.”3
Na cakacaka vakalotu ni valetabu ena veimuataki yani kina veivakalougatataki levu duadua ena rawa mai na Veisorovaki i Jisu Karisito. Sa ikoya oqori na cakacaka vakalotu ena gadrevi meda na rawata kina na Bula ena matanitu vakasilesitieli. Ni da sa saga meda maroroya na noda veiyalayalati, sa na tekivu me seyavu na vakanananu ni bula druka kei na bula sega ni vakaibalebale, sa na tekivu me seraka cake mai na cakacaka vakalotu kei na veiyalayalati ni valetabu. Sa na ka marautaki na noda taubaletaka yani na sala kina bula tawamudu.
Au dau vakadrukai ena kaukauwa e tiko vei ira na yalewa lalai, gone yalewa kei na marama, au sa sotavi ira ena veiyasai vuravura ka sa vakadeitaki ira tu ena sala oqori. Meu wasea mada kei kemuni e so na ivakaraitaki ni goneyalewa kei na marama dau veiyalayalati kau sa sotavi ira oti.
O Luana a sa yabaki 11 ena gauna au sikova kina na nona matavuvale mai Buenos Aires, Argentina. Baleta e dua na ka vakaloloma e a yaco ena gauna ni nona gonelailai, a sega kina ni rawa vei Luana me vosa. Sa vica vata tu na yabaki sa sega tu kina ni vosa o koya. A dabe galugalu toka ga ena neitou a veitalanoa tiko. Au a gadreva lo toka me bau dua mada ga na vosa me cavuta mai. A raici au vagumatua me vaka e via tukuna mai e dua na ka, ka na sega ni rawa ni tukuni vaka vosa. Ni oti e dua na neitou masu keitou sa tucake me keitou sa lako sa qai solia mai vei au o Luana e dua na droini. E a droinitaki Jisu Karisito ena Were o Kecisemani. Au sa qai raica na nona ivakadinadina ni sa rogo levu mai ka matata vakavinaka. O Luana e a veiyalayalati ena papitaiso ni na vakadinadina ni Kalou “ena veigauna kece ena veika kece, kei na veivanua kece.”4 A kila tu o koya na Veisorovaki i Jisu Karisito ka vakadinadinataka ena nona droini. Sa mai kila o koya na veika oqo ena kaukauwa e tiko ena Veisorovaki, ni na rawa ni vakabulai koya ka vosa rawa tale. Mai na siga o ya ena tolu na yabaki sa oti, sa toso sara o Luana ena nona sasaga me vosa rawa tale. Sa tekivu me vakaitavi ena soqo ni goneyalewa vata kei ira na nona itokani. Ni sa yalodina tiko kina veiyalayalati e a cakava ena papitaiso e tomana tiko ga na nona ivakadinadina me baleta na iVakabula.
Era dau vakanamata na itabagone ena veiyasai vuravura kina valetabu. Mai Lima, Peru, au a sotava kina e dua na tama kei na tolu na luvena yalewa ena taudaku ni katuba ni valetabu. Au raica na rarama e tu e matadratou. E rua na luvena yalewa e rau paralasi ka rau vodo voli ena qiqi, na ikatolu ni luvena, ena nona vukei rau na rua ena nodrau dui qiqi, e vakamacalataka ni rua tale na tacina yalewa erau se tiko ga mai vale. O rau talega e rau vaqiqitaki talega. E rau sega ni rawa ni lakova mai na gaunisala kina valetabu me 14 na auwa. Sa vakaibalebale sara vakalevu na valetabu vei tamadratou kei iratou na nona goneyalewa ni va vei iratou e lako rawa mai kina ki na valetabu ena siga o ya—e rua vei rau me rau dabe walega ka raica ni sa papitaiso o tacidrau me baleti ira na mate ka vakayacora na cakacaka vakalotu bibi o ya. Me vakataki Nifai ga, eratou sa rekitaka na veiyalayalati ni Turaga”5
E dua na yalewa dawai au kila tiko e dau vakaliuca sara na sakaramede ka dau cabori ena veimacawa kei na bibi ni kena yalayala, “me na tiko vata ga kei [koya] na Yalotabu”6 Na kena na tiko vata ga kei koya sa yalayala ka na vakamalumutaka na ua ni nona dau galili. E dau solia vua na kaukauwa me vakamatautaki koya me vakatorocaketaka na nona taledi kei na gagadre me qarava na Turaga. Sa sotava na marau levu ena nona dau marautaki ira kecega na gone ena nona bula kei na gauna e dau vaqara kina na vakacegu ena dau laurai ga ena valetabu.
Kena iotioti ga, e dua na marama qase sara sa yabaki 90 sa raica na nodra sa tubucake na luvena na makubuna kei na nodra sa tadu mai ki vuravura na makubuna vakarua. Me vaka e levu vei keda, o koya sa sotava e levu sara na bula rarawa, na veivakararawataki, kei na marau e levu cake. E vakaraitaka ni kevaka me na talanoataka tale na italanoa ni nona bula ena sega ni vola tale vakarua e so na iwase ni italanoa sa talanoataki oti. Ia, ena matadredredre, a kaya, “meu na bula tiko me dede vakalailai ka raica se na cava ena yaco!” O koya e se tosoya tikoga na nona maroroya na veiyalayalati e na sala e muria tiko.
Vakavulica o Nifai:
“Ni dou sa tu ena sala dodonu ka rabai lailai au na taro mada, Sa rauta li oqori, Raica au sa kaya vei kemudou, E segai. …
“Ia, mo dou toso ki liu ka tudei vei Karisito, ena nomudou vakanuinui taucoko sara, mo dou lomana na Kalou kei na tamata kecega. Ia, kevaka dou sa toso ki liu ka tugana ki lomamudou na vosa i Karisito ka vosota me yacova na ivakataotioti, raica sa kaya vakaoqo na Tamada, dou na rawata na bula tawamudu.”7
O keda kece eda sa muria tiko na sala o ya. Ena bogi nikua eda lagata na kena lakovi na sala ena rarama. Eda kaukauwa, yadua o keda. Ia, ni da lako vata kei na Kalou, o cei me na tarovi keda rawa.
E a kaya na Turaga vei Emma Smith, “mo reki ka marau, ia mo nanuma tiko na veiyalayalati ko sa cakava.”8
Eda sa marau ena noda maroroya na veiyalayalati eda sa cakava, eda na rawa ni vakila na loloma ni Tamada Vakalomalagi kei na noda iVakabula o Jisu Karisito. Sa noqu ivakadinadina ni Rau bula tiko. Ena yaca i Jisu Karisito, emeni.