O E Moe i Lenei Taimi o le Toefuataiga?
E taua tele lenei mea mo i tatou o ni tagata taitoatasi, o ni aiga, ma ni tagata o le Ekalesia a Keriso e le tatau ai ona tuu atu na o sina taumafaiga lē atoatoa i lenei galuega paia.
Toeitiiti atoa le 200 tausaga talu ai, na avea ai le tala puupuu Amerika o le “Rip Van Winkle” o se tala masani. O le tagata autu, o Rip, e le o se tagata tinou, sa lelei tele i le faataumamao mai i mea e lua: galuega ma lona toalua.
I se tasi aso, a o tafaofao ai i le mauga ma lana taifau, na ia maua atu ai se vaega o alii sa ese lava o latou laei o loo inupia ma taaalo i ni taaloga. Ina ua uma ona ia inuina la latou pia, sa oo ina faanenefu lana vaai ma moeiini ai mo sina taimi. Ina ua ia pupula a’e, sa faateia o ia i le iloa ai ua leai lana taifau, ua elea lana fana, ma ua i ai nei sana soesa umi lava.
Sa toe foi atu Rip i lona nuu ma iloa ai ua suia mea uma. Ua maliu lona toalua, ua leai ni ana uo, ma o le ata o le Tupu o Siaosi le III sa i totonu o le pa pia ua suia i se ata o se tagata na te le masani ai—o le Taitai Au o Siaosi Uosigitone.
Sa moe Rip Van Winkle mo le 20 tausaga! Ma i le faagasologa, na ia misia ai se tasi o vaitau silisili ona faafiafiaina i le talafaasolopito o lona atunuu—sa ia moe i le taimi atoa o Taua i Amerika.
Ia Me 1966, sa faaaoga ai e Dr. Martin Luther King Jr. lenei tala e fai ma faataitaiga o lana lauga “Aua le Moe i le Taimi o le Taua.”1
O le asō, ou te fia faaaogaina ai lea lava autu e tasi ma fautua atu se fesili ia i tatou uma o loo umiaina le perisitua a le Atua: o e moe i le taimi o le Toefuataiga?
O Loo Tatou Ola i le Taimi o le Toefuataiga
O nisi taimi tatou te mafaufau ai i le Toefuataiga o le talalelei o se mea ua atoatoa, ma ua tea atu ma tatou—sa faaliliuina e Iosefa Samita le Tusi a Mamona, na ia mauaina ki o le perisitua, na faatulagaina le Ekalesia. Ae o le mea moni, o le Toefuataiga o se faagasologa faifai pea; o loo tatou ola ai i le taimi nei. O loo aofia ai “mea uma na faaali mai e le Atua, mea uma ua ia faaali mai nei,” ma le “tele o mea silisili ma le taua” lea “o le a ia faaali mai.”2 Uso e, o atinaega faafiafiaina o aso nei o ni vaega o lena vaitau o sauniuniga ua leva ona muai tau mai lea o le a faaiuina i le Afio Faalua Mai ma le mamalu o lo tatou Faaola, o Iesu Keriso.
O se tasi lenei o vaitau sili ona ofoofogia o le talafaasolopito o le lalolagi! Sa naunau lava perofeta anamua e fia vaai i o tatou aso.
A maea lo tatou taimi i le olaga nei, o a ni aafiaga o le a mafai ona tatou faasoa atu e uiga i lo tatou sao i lenei vaitau taua o o tatou olaga atoa ai ma le faalauteleina o le galuega a le Alii? Mata e mafai ona e fai atu sa afe i luga lima o o tatou ofu ma galulue ma o tatou loto atoa, mafaufau, manatu, ma le malosi atoa? Pe o le a tatou tautino atu o o tatou matafaioi sa tele lava na o le matamata [i isi o galulue]?
Ou te manatu o loo tele mafuaaga e faigofie ai ona tatou tulimomoe e tusa ai ma le fausiaina o le malo o le Atua. Sei ou ta’ua ni mea taua se tolu. A o ou ta’ua, ou te valaaulia outou ia mafaufau loloto pe ono faatatau se tasi o ia mea. Afai e te vaaia se avanoa e faaleleia ai, ou te talosagaina outou ia mafaufau po o a mea e mafai ona faia e suia ai mo le lelei sili atu.
Manatu Faapito
Muamua, manatu faapito.
O i latou e manatu faapito latou te sailia a latou lava mea ma mea e fiafia i ai i lo isi mea uma. O le fesili autu a le tagata manatu faapito e faapea “O le a se mea ou te maua mai ai?”
Uso e, ou te mautinoa e mafai ona e vaaia o lenei uiga ua manino lava e feteenai ma le agaga lea e manaomia i le fausiaina o le malo o le Atua.
A tatou sailia ni auaunaga mo le tagata lava ia i lo auaunaga le manatu faapito, o le a oo ina taulai atu mea tatou te faamuamuaina i o tatou lava viiga ma le faamalieina o o tatou lava manao.
Sa tauivi augatupulaga ua mavae ma le tele o ituaiga o faamaualuga ma le faafiasili ae ou te manatu o nei aso ua matua faateleina ituaiga eseese o faamaualuga. Pe o se mea e tupufua le folafola ai e le Oxford Dictionary talu ai nei o le upu “selfie” e fai ma upu o le tausaga?3
E masani lava, tatou te maua uma se manao mo le fiailoa, ma e leai se mea e leaga ai le eva ma tatou fiafia lava i tatou. Ae a tatou sailia loa ia “oloa ma viiga o le lalolagi”4 e fai ma vaega autu e uunaia ai i tatou, o le a tatou misia ni aafiaga togiola ma olioli lea e o mai pe a tatou tuu atu ma le lotofoai i tatou lava i le galuega a le Alii.
O le a le vaifofo?
O le tali, e pei ona masani ai, o loo maua i afioga a Keriso:
“Ai se fia mulimuli mai ia te au, aua ne’i usiusitai o ia ia te ia, a ia ave e ia lona satauro, i le mulimuli mai ai ia te au.
“Aua ai se fia faasaogalemuina lona ola, e maumau ai ia te ia; a o le faamaumau lona ola ona o a’u ma le tala lelei, e faasaoina e ia.”5
O i latou o e liua atoatoa atu o latou olaga i lo tatou Faaola ma auauna atu i le Atua ma uso a tagata, latou te iloaina se oa ma se faamalieina atoa o le olaga lea o le a le mafai lava ona oo i ai le tagata manatu faapito ma faamaualuga. O e le manatu faapito latou te tuu atu i latou lava. Atonu i nei mea o ni meaalofa faatauvaa o le alofa mama lea e i ai se aafiaga loloto mo le lelei: se ataata, se faatalofa, se fusi, o taimi e faalogo atu ai i isi, se upu mālū o le faamalosiau, po o se aga o le popole. O nei galuega uma o le agalelei e mafai ona suia ai loto ma olaga. A tatou faaaogaina tatau ia avanoa lē faatapulaaina e alolofa ma auauna atu ai i o tatou uso a tagata, e aofia ai o tatou taitoalua ma aiga, o lo tatou gafatia e alolofa ma auauna atu ai i le Atua o le a matua faateleina.
O i latou e auauna atu i isi o le a le momoe lava i le taimi o le Toefuataiga.
O Vaisū
O le isi mea e ono mafua ai ona tatou moesavali i le taimi atoa o lenei vaitau taua o le lalolagi, o vaisu.
O vaisu e masani lava ona amatamata malie. O vaisu o filo tuaiti o amioga fai soo lea e taataai ma avea ma ni mausa e puleaina i tatou. O mausa le lelei ua i ai le gafatia e avea ai ma ni vaisu e le mafai ona puleaina.
O nei vaisu e puleaina i tatou e mafai ona tino mai i soo se ituaiga, e pei o ponokalafi, ava malosi, feusuaiga, fualaau faasaina, tapaa, taaloga faitupe, meaai, galuega, Initoneti, po o mea e faafoliga e komepiuta e mo’i. O Satani, lo tatou fili numera tasi, ua i ai le tele o meafaigaluega na te fiafia e faaaoga e faoa ai mai ia i tatou lo tatou gafatia paia e ausia ai la tatou misiona i le malo o le Alii.
E faanoanoa lo tatou Tama Faalelagi i le silasila mai i le naunau o nisi o Ona atalii malualii e faatagaina i latou e puleaina e vaisu faataumaoi.
Uso e, o loo tatou umiaina le perisitua faavavau a le Atua Silisiliese. O i tatou moni lava o atalii o le Silisili Ese ma ua faamanuiaina i se gafatia le mafaamatalaina. Ua mamanuina i tatou ia ausia lo tatou gafatia silisili faalelagi. E lei faamoemoeina i tatou e faamutaina lo tatou gafatia faalelagi e tuinanau faalelalolagi ma puleaina ai e vaisu.
O le a le vaifofo?
O le mea muamua e tatau ona tatou malamalama i ai, o vaisu e matua faigofie lava ona puipuia mai ai i tatou nai lo le tau togafitia. I le fetalaiga a le Faaola, “Ia outou le tuu se tasi o ia mea ia ulu i totonu o lou loto.”6
I nai tausaga ua mavae, sa ma maua ai ma Peresitene Thomas S. Monson se avanoa e malaga taamilo ai i le Air Force One—le vaalele ofoofogia lea e feaveaia le peresitene o le Iunaite Setete. Sa faia ni siaki vailiili a le puipuiga e le Vaega Faalilolilo, ma sa ou ataata teisi a o suesueina e sui o le puipuiga lo tatou perofeta pele a o lei faovaa.
Ona valaaulia lea o a’u e le pailate faafoe ia ou nofo i le nofoa o le kapeteni. O se aafiaga ofoofogia le toe saofai ai i le nofoa faatonutonu o se masini lele matagofie e pei o le ituaiga sa ou lele ai i le tele o tausaga. O manatuaga o ia malaga i atuvasa ma konetineta sa toe faatumulia ai lou loto ma le mafaufau. Sa ou mafaufau i taimi faafiafiaina e masagi ai i luga ma tulaueleele ai i malaevaalele i le lalolagi atoa.
Sa toetoe a aunoa ma le mafaufauina, sa tuu atu ai ou lima i ki faatonutonu e fa o le 747. Ae ou faalogoina loa se leo pele ma le le mafaaseseina mai i ou tua—le leo o Thomas S. Monson.
“Dieter,” sa ia fai mai, “aua lava ne’i e mafaufau e tago i ai.”
Ou te le o tautino atu i se mea, ae atonu lava sa iloa e Peresitene Monson lo’u mafaufau.
A faaosoosoina i tatou e faia ni mea e le tatau ona tatou faia, ia tatou faalogo atu i le lapataiga agaalofa o aiga faatuatuaina, ma uo, lo tatou perofeta pele, ma le Faaola i taimi uma.
O le puipuiga sili lava mo vaisu o le aua lava nei amataina.
Ae faapefea i latou ua saisaitia i latou lava i noataga o vaisu?
O le mea muamua, faamolemole ia iloa o loo i ai se faamoemoe. Ia saili le fesoasoani mai i e pele, ma faufautua aoaoina. Ua saunia e le Ekalesia se polokalama toe faaleleia mo vaisu e ala i taitai o le Ekalesia i le lotoifale, le Initoneti,7 ma i nisi eria, i le Auaunaga a le AAG mo Aiga.
Ia manatua i taimi uma, faatasi ai ma le fesoasoani a le Faaola, e mafai ona faasaolotoina oe mai vaisu. Atonu o se ala umi ma faigata, ae o le a le fiu lava le Alii ia te oe. E alofa o Ia ia te oe. Na puapuagatia Iesu Keriso i le Togiola e fesoasoani ina ia e sui, ia faasaoloto oe mai le nofopologa i le agasala.
O le mea sili ona taua o le taumafai—o nisi taimi e tele ni nai taumafaiga e faia ai a o lei maua e tagata le manuia. O lea ia aua nei fiu. Aua nei lafoaia le faatuatua. Ia faalatalata lou loto i le Alii, ma o le a Ia tuu atu ia te oe le mana o le laveaiga. O le a Ia faasaolotoina oe.
Ou uso pele, ia e matua taumamao lava i taimi uma mai mausa e ono taitai atu ai oe i vaisu. O i latou e faia lea mea o le a mafai ona tuuto atu o latou loto, manatu, mafaufau, ma le malosi i le galuega a le Atua.
O le a latou le momoe lava i lenei taimi o le Toefuataiga.
O Mea Faamuamua e Faatautavā
O se faafitauli lona tolu o loo taofia i tatou mai le punouai atoatoa i lenei galuega, o le anoanoai lea o mea faamuamua e fetautavāa’i o loo tatou fetaiai. O nisi o i tatou ua pisi tele ua tatou lagonaina ai e pei i tatou o se taavale toso o loo tosoina e ni manu o loo aoaoina e galulue—ma e tofu lava le manu ma le itu e fia alu i ai. E tele le malosi e alu ai, ae e le o minoi le taavale toso.
E tele lava ina tuuto atu a tatou taumafaiga silisili i le sailia o mea e fiafia i ai, se taaloga, ni tafaoga, ma ni mataupu faalenuu ma faaupufai. O nei mea uma atonu e lelei ma faamamaluina, ae o tatou maua ai se taimi ma se malosi mo mea e tatau ona tatou ave i ai le faamuamua sili ona maualuga?
O le a le vaifofo?
E toe fai atu foi, e sau mai le fetalaiga a le Faaola:
“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi lona lua, E te alofa atu i lē lua te tuaoi ia pei o oe lava ia te oe.”8
O isi mea uma i le olaga e tatau ona faalona lua i nei mea faamuamua sili e lua.
E oo lava i auaunaga faale-Ekalesia, e faigofie lava ona faaaluina ai le tele o taimi e tau ai na ona fai ni mea e aunoa ma le loto i ai pe aunoa ma le aano moni o le avea ma soo.
Uso e, o i tatou o ni tagata e tauaveina le perisitua ua tuuto atu e avea ma se nuu e alolofa i le Atua ma o tatou tuaoi ma o loo loto e faaali atu lena alofa e ala i upu ma galuega. O le ute lena o ituaiga o tagata e i ai i tatou o ni soo o Iesu Keriso.
O i latou e ola i nei mataupu faavae o le a le momoe lava i lenei taimi o le Toefuataiga.
O Se Valaau ia Feala i Luga
Sa tusia e le Aposetolo o Paulo, “Ala ia oe [na] e moe ma e tulai mai i e ua oti, ona faamalamalama mai lea o Keriso ia te oe.”9
Au uo pele, ia outou iloa o outou o atalii o le malamalama.
Aua nei faatagaina le manatu faapito! Aua nei faatagaina mausa ia e taitai atu ai i vaisu! Aua nei faatagaina mea faamuamua faatautava e taitai atu oe i mea e leai se aoga pe aveesea mai ai oe mai auaunaga faamanuiaina o le avea ma soo ma auaunaga malualii faaleperisitua!
E taua tele lenei mea mo i tatou o ni tagata taitoatasi, o ni aiga, ma ni tagata o le Ekalesia a Keriso e le tatau ai ona tuu atu na o sina taumafaiga lē atoatoa i lenei galuega paia.
O le avea ai ma se soo o Iesu Keriso e le o se taumafaiga e faatasi ona fai i le vaiaso pe faatasi i le aso. O se taumafaiga e faia i taimi uma.
O le folafolaga a le Alii ia i latou moni o loo umiaina Lana perisitua e toetoe lava a maoae tele ona malamalama i ai.
O i latou o e faamaoni i le Perisitua Arona ma le Perisitua Mekisateko ma le faalauteleina o o latou valaauga “e faapaiaina e le Agaga i le faafouina o o latou tino.” O le mea lea, o mea uma o i ai i lo tatou Tama o le a tuuina atu ia te i latou.10
Ou te molimau atu e mafai e le mana faamama o le Togiola a Iesu Keriso ma le mana faaliliu o le Agaga Paia ona faamaloloina ma laveaiina tagata. O lo tatou avanoa lenei, lo tatou tiute paia, ma lo tatou olioli e faalogo ai i le valaau a le Faaola; ia mulimuli atu ia te Ia ma se mafaufau naunautai ma le faamoemoe atoa o le loto. Ia tatou “lulu ese filifili ua noatia ai [tatou], ma o mai i fafo o le pouliuli, ma tutulai mai i le efuefu.”11
Ia tatou mataala ma aua le faavaivai i le faia o mea lelei, aua o loo tatou “faataatiaina le faavae o se galuega tele,”12 o le saunia lea mo le toe afio mai o le Faaola. Uso e, a tatou faaopoopo atu le malamalama o a tatou faataitaiga o se molimau i le matagofie ma le mana o le upumoni toefuataiina, o le a tatou le momoe lava i lenei taimi o le Toefuataiga. Ou te molimau atu ai i lenei mea ma tuu atu ia te outou au faamanuiaga i le suafa paia o lo tatou Matai, o Iesu Keriso, amene.