Na Kaukauwa, Reki, kei na Loloma ena Maroroi ni Veiyalayalati

Mai vei Linda K. Burton

Peresitedi Raraba ni iSoqosoqo ni Veivukei

iVakatakilakila

Au sureti keda yadua me da dikeva tale mada se vakaivei na levu ni noda lomana na iVakabula, ena noda vakayagataka me kena ivakatakilakila na ivakarau ni noda maroroya ena yaloreki na noda veiyalayalati.

Au vinakata meu tekivu ena noqu talanoataka e dua na italanoa e dau lauti au.

Ena dua na yakavi a kacivi ira na nona lima na sipi e dua na turaga ki na nodra ivakaruru ni sa bogi. Eratou sarava toka na nona matavuvale ena yalo taleitaka na nona kaci, “Lako mai,” ena dua vata ga na gauna era mata cake na lima na ulu ka vuki yani vua. E va na sipi eratou cici yani. Ena yalo ni loloma a vakamasia na uludratou yadua na va na sipi. Eratou kila na domona na sipi ka ratou lomani koya

Ia na ikalima ni sipi a sega ni cici mai. Oqo e dua na tinani sipi levu ka a soli koya mai na kena itaukei ena vica na macawa sa oti, ka tukuna ni sa rui kila, dau vakauyalona, ka dau vakauti ira vakatani na vo ni sipi. A ciqomi koya na kena itaukei vou ka vesuki koya tu me vica na siga ena dua na duru ena nona lomanibai me rawa ni vulica kina me dau tu vakadua. A vakavulici koya vakamalua me lomani koya kei ira na vo ni sipi me yacova na gauna sa lili wale toka ga kina e domona e dua na dali lekaleka sa sega ni vesu tale ki na duru.

Ena yakavi oya ni ratou sarava toka na nona matavuvale, a lako yani na turaga oqo vua na tinanisipi, ka tu mai na mua ni lomanibai, ka baci kaya tale yani vakamalua, “Lako mai. O sa sega tale ni vesu. O sa sereki.” Ena yalololoma a dolele yani, biuta na ligana e uluna, ka taubale yani vata kei koya kei ira na vo ni sipi ki na nodra ivakaruru.¹

Ena yalo ni italanoa oya, au masuta me na vukei keda na Yalo Tabu me da vulica vata ena bogi nikua na maroroi ni veiyalayalati. Na caka kei na maroroi ni veiyalayalati e kena ibalebale noda digitaka me da vauci keda vei Tamada Vakalomalagi kei Jisu Karisito. Sai koya na noda yalataki keda me da muria na iVakabula. Sai koya na noda vakararavi Vua ka gadreva me da vakaraitaka na noda vakavinakavinaka ena vuku ni isau a sauma ko Koya me sereki keda mai na isolisoli tawavakaiyalayala ni Veisorovaki.

E vakamacalataka o Elder Jeffrey R. Holland ni “veiyalayalati e dua na konitaraki vakayalo veivauci, e dua na yalayala bibi vua na Kalou na Tamada ni da na bula ka vakasama ka cakacaka ena dua na ivakarau—na Nona ivakarau na Luvena, na Turaga o Jisu Karisito. Me kena isau, eratou sa yalataka vei keda na Tamana, Luvena, kei na Yalo Tabu na totoka kei na lagilagi ni bula tawamudu.”² Ena konitaraki veivauci oqori, e virikotora na kena ivakarau na Turaga ka da vakadonuya me da na rokova. Na noda cakava ka maroroya na noda veiyalayalati sa ivakaraitaki ni noda yalataka me da na yaco me vaka na iVakabula.³ Na kena dina me da segata na ivalavala ka vakamacalataki vakavinaka sara ena vica na malanivosa ni dua na serenilotu taleitaki: “Au lako ke ko ni lewa. … Cavuta na nomuni vosa. … Meu dina tu vei you.”⁴

Na Cava me da Cakava ka Maroroya kina na Veiyalayalati?

1. Na maroroi veiyalayalati e veivaqaqacotaki, veivakaukauwataki, ka veitaqomaki.

E raica o Nifai ena raivotu na veivakalougatataki talei e solia na Turaga vei ira era dau maroroya na veiyalayalati. “Ia koi au ko Nifai, au sa raica na kaukauwa ni Lami ni Kalou, ni sa curumi ira … na nona tamata ni veiyalayalati na Turaga, … ia era sa vakaiyaragi ena yalododonu kei na lagilagi ni nona kaukauwa na Kalou.”⁵

Au a sota ena dua na gauna lekaleka sa oti kei na dua na noqu itokani vou ka taleitaki. E vakadinadinataka ni oti na nona ciqoma na nona edaumeni ni valetabu, a vaqaqacotaki ena kaukauwa me vorata na veitemaki ka dau dredre vua e liu.

Ni da maroroya na noda veiyalayalati, eda na ciqoma talega na yaloqaqa kei na igu me vukei keda ena noda veivuketaka na noda icolacola. E dua na marama yalobibi e dua tiko na luvena tagane ka sotava tiko e dua na dredre ni bula. Ena nona veivakabauti vei ira na tacina ena iSoqosoqo ni Veivukei ni ra dau maroroya na nodra veiyalayalati, a sureti ira ena yaloqaqa me ra lolo ka masulaka na luvena. E qai vakaraitaka e dua tale na marama na nona a diva tu me rawa ni kerea na masu vata vaqori mai vei ira na tacina. Ena vica na yabaki yani i liu, a sotava tiko na dredre na luvena tagane. A diva o koya me a sureti ira me ra mai vukea na nona matavuvale ena kena sotavi na icolacola oya. E kaya na iVakabula, “A ka oqo era na kila kina na tamata kecega ni dou sa noqu tisaipeli, kevaka dou sa veilomani.”⁶

Isa, kemuni na taciqu, e dui tu kece na noda icolacola me da colata kei na icolacola me da wasea. Na veisureti me da veivuketaka na noda icolacola sa veisureti me da maroroya na noda veiyalayalati. Na ivakasala nei Lucy Mack Smith vei ira na isevu ni marama ena iSoqosoqo ni Veivukei sa yaga vakalevu cake nikua mai na veigauna kecega: “Me da veivakamareqeti, me da veivakatawai, veivakacegui ka rawata na veidusimaki, me da na dabe vata kina mai lomalagi.”⁷ Oqo na maroroi veiyalayalati kei na siko vuvale ena kena uasivi duadua!

Na iVola i Momani e vakananuma vei keda ni parofita sara mada ga o Alama a colata e dua na icolacola mai vua na luvena tagane dau vakau yalona. Ia e a vakalougatataki o Alama mai vei ira na tacina kei na ganena dau maroroi veiyalayalati ena kosipeli ka ra sa saumaki tu vakatitobu vua na Turaga ka ra sa vulica na ibalebale ni veivuketaka na noda icolacola. E matata tu vei keda na tikina mai na Mosaia ka tukuna na vakabauta cecere na masu nei Alama ena vukuna na luvena. Ia e tukuni ena kena itukutuku ni “sa rogoca na Turaga na nodra masu na na nona tamata, kei na masu talega ni nona tamata ko Alama.”⁸

Eda kila ni sa dau marautaki ira na Turaga, o “ira era sa veivutuni,”⁹ ia eda gadreva mai na veika kecega me ra muria na luveda na ivakasala nei Peresitedi Henry B. Eyring me ra “totolo ka tudei” ena kena caka ka maroroi na veiyalayalati.¹⁰ Ena dua na gauna lekaleka sa oti a tarogi kina e dua na taro dina mai vuniyalo ka vakavure vakasama ena dua na nodra matabose na veiliutaki ni matabete kei na mataisoqosoqo: eda namaka dina beka me ra maroroya na nodra veiyalayalati na yabaki walu?” Ni keimami veitalanoataka, a vakaturi ni dua na sala me ra vakarautaki kina na gonelalai me ra cakava ka maroroya na veiyalayalati tabu ni papitaiso sai koya me ra vukei ena nodra vulica me ra cakava ka maroroya e dua na yalayala rawarawa.

Sa nodra ivotavota na itubutubu yalodina me ra kila na sala uasivi duadua me ra veivakavulici kina me sotava na nodra gagadre na luvedra. Ni ra vakasaqaqara ka cakacakataka na itubutubu na ivakatakila yadua era ciqoma, veivosaki, vunautaka ka vakavulica na ivakavuvuli rawarawa eso ni kosipeli, ena tu vei ira na kaukauwa me ra vaqaqacotaka ka taqomaka na nodra matavuvale. E rawa ni ra veivuke talega na vo ni lewe ni matavuvale. A vakavulica vei keitou na tukaqu taleitaki na kena bibi me dau maroroi na yalayala mai na dua na sere rawarawa. E vakatoka qo: “Ni bera ni ko yalayala, kena bibi mo vakananuma mada. Ni sa caka, ki yalomu me ceuti sara. Ki yalomu me ceuti sara.” A vakavulici na sere lailai oqori ena loloma, yalodina, kei na kaukauwa baleta ni a dau ceuta o Tutu ki yalona na nona yalayala.

E dua na tina yalomatua au kila e dau nakita me okati ira na luvena ena nona sasaga me maroroya na nona veiyalayalati. E dau colata ena marau na nodra icolacola na tiko volekati koya, na itokani, kei ira na lewe ni tabanalevu—ka vakacegui ira era gadreva tu na vakacegu. E sega kina ni kidacalataki na nona lako mai na luvena yalewa lailai ena dua na gauna lekaleka sa oti ka kerea me vukei me kila na ivakarau me vukea kina na nona itokani ka se qai takali walega na tamana. Oqori e dua na gauna uasivi me vakavulici kina vua ni nona gagadre me vakaceguya nona itokani e dua na sala me maroroya kina na nona veiyalayalati ni papitaiso. Me da lai namaka vakacava vei ira na gonelalai me ra cakava ka maroroya na veiyalayalati ni valetabu kevaka eda sega ni namaka vei ira me ra maroroya na imatai ni nodra veiyalayalati—nodra veiyalayalati ni papitaiso?

E dikeva toka vaqo o Elder Richard G. Scott, “E dua na veivakalougatataki levu e rawa ni da wasea ki vuravura sai koya na kaukauwa ni matavuvale ka vakaliuci kina na Karisito, na vanua e vunautaki kina na kosipeli, maroroi kina na veiyalayalati ka sinai tu ena loloma.”¹¹ Na cava eso na sala e rawa ni da tauyavutaka kina na vuvale vakaoqo me ra vakarautaki kina na luveda me ra cakava ka maroroya na veiyalayalati ni valetabu?

E rawa ni da raica vata na kena ibalebale me da kilikili kaya e dua na ivolatara ni valetabu.
E rawa ni da raica vata na ivakarau me da vakarorogo kina ki na Yalo Tabu. Me vaka ni ciqomi ena ivakatakila na edaumeni ni valetabu, eda na gadreva me da vulica na taledi bibi oya.
E rawa ni da raica vata na ivakarau me da vuli kina mai na ivakatakarakara, tekivu mai na ivakatakarakara tabu ni papitaiso kei na sakaramede.
E rawa ni da raica vata na cava e ka tabu kina na yago, na cava na vuna e dau vakatokai kina ena so na gauna me valetabu, kei na sala cava e sema kina na isulusulu rakorako kei na irairai ki na ivakarau tabu na isulu ni valetabu.
E rawa ni da raica vata na ituvatuva ni marau ena ivolanikalou. Na kena matata ga vei keda na ituvatuva ni Tamada Vakalomalagi kei na Veisorovaki ena ivolanikalou, na kena vakaibalebale vakalevu cake vei keda na sokalou ni valetabu.
E rawa ni da vulica vata na kedra italanoa na tubuda, dikeva na tuvakawa, ituvatuva vakamatanivola, ka cakava na veicakacaka vakaveisosomitaki ena vukudra na noda daulomani era sa takali.
E rawa ni da raica vata na ibalebale ni vosa me vaka na edaumeni, cakacaka vakalotu, veivauci, matabete, idola, kei na vosa tale eso e veiwekani ki na sokalou ena valetabu.
E rawa ni da vakavuvulitaka ni da lako ki na valetabu me da caka veiyalayalati kei na Tamada Vakalomalagi—ka da lesu mai vale me da mai maroroya!¹²

Me da nanuma dei na vakasama ni “vinaka, vinaka cake, kei na vinaka sara” ni da veivakavulici.¹³ E vinaka me da vakavulici ira na luveda me baleta na valetabu. E vinaka cake me da vakarautaki ira ka namaka vei ira me ra cakava ka maroroya na veiyalayalati. E vinaka sara me da vakaraitaka vei ira mai na noda ivakaraitaki ni da kukuva toka na noda veiyalayalati ni papitaiso kei na valetabu ena yalomarau! Kemuni na taciqu, eda sa kila tiko li na noda itavi bibi ena cakacaka ni veivakabulai ena gauna eda susuga, vakavulica, ka vakarautaki ira tiko kina na gone me ra lakova na sala ni veiyalayalati? Na kaukauwa me rawati kina ena yaco mai ni da rokova ka maroroya tiko noda veiyalayalati.

2. E gadrevi na maroroi veiyalayalati ena rawati ni marau dina.

E vakavuvulitaka o Peresitedi Thomas S. Monson, “Na veiyalayalati tabu e dodonu me da doka, kei na noda yalodina kina e gadrevi ki na bulamarau.”¹⁴ Ena 2 Nifai eda wilika kina, “Keimami sa tiko marau.”¹⁵ Ena itekivu ni iwase oqo eda kila kina ni ra se qai tara oti e dua na valetabu o Nifai kei ira na nona tamata. E ka dina ni ra dau maroroya na nodra veiyalayalati ena yaloreki! Ia ena Alama eda wilika kina, “Raica e sega mada na gauna era marau vakalevu tu kina na Nifai me vaka na gauna i Moronai.”¹⁶ Baleta na cava? Eda vulica tale ena dua na tikina e liu ni ra a “yalodina ka muria tiko na ivunau ni Turaga.”¹⁷ O ira na dau maroroya na nodra veiyalayalati era dau maroroya na ivakaro!

Au dau taleitaka na ivolanikalou ka tukuni kina: “Ia ni ra sa rogoca na vosa oqo, [ka kena ibalebale na vosa ka vakamacalataki kina na veiyalayalati ni papitaiso], era sa vakasausau ena marau ka ra kailavaka: Io oqori sara ga na ka sa lomai keimami tiko.”¹⁸ Au taleitaka na gagadre ni lomadra. Era gadreva ena yalomarau me ra cakava ka maroroya na nodra veiyalayalati!

Ena dua na Sigatabu a kailavaka mai ena marau e dua na goneyalewa, “Au na vakayagataka na sakaramede nikua!” Na cava na iotioti ni gauna eda rekitaka kina na galala dokai oya? Ka da dau vakaraitaka beka vakacava? Eda dau vakayacora oqo ena noda dau nanuma tikoga na iVakabula ka maroroya tikoga na Nona ivakaro, oka kina na vakatabui ni Siga ni Vakacecegu. Eda vakayacora ena noda nanumi Koya tikoga ena masu yadua kei na masu vakamatavuvale, vuli ivolanikalou e veisiga, kei na lotu vakamatavuvale tikoga e veimacawa. Ni da vagolei tani ka taura vakamamada na veika bibi oqo, eda veivutuni ka tekivu tale.

Na caka kei na maroroi ni veiyalayalati ena yalomarau ena vakabau ka vakabulai kina na veicakacaka tabu bibi vakalotu ni veivakabulai eda gadreva me da ciqoma me da rawata kina na “ka kecega sa tu vei Tamada.”¹⁹ Na cakacaka vakalotu kei na veiyalayalati erau veika “bibi vakayalo” a tukuna o Peresitedi Henry B. Eyring ena nona vakavuvulitaka: “O ira na Yalododonu Edaidai era tamata ni veiyalayalati. Mai na siga ni papitaiso ki na veigauna bibi ni noda bula, eda sa veiyalayalati kina kei na Kalou ka veiyalayalati vata kei keda o Koya. E dau maroroya tikoga o Koya na nona yalayala era solia na Nona italai vakadonui, ia na vakatovolei bibi ni noda bula me da raica se da na cakava ka maroroya na noda veiyalayalati vata kei Koya.”²⁰

3. Noda maroroya noda veiyalayalati e vakaraitaka na noda loloma vua na iVakabula kei na Tamada mai Lomalagi.

Ena inaki taucoko e dodonu me da gumatuataka kina na noda maroroya noda veiyalayalati, na inaki oqo e kaukauwa duadua vei ira kece—na loloma. E dua na tikina mai na Veiyalayalati Makawa e lauta na yaloqu ni da vakasamataka na ivakavuvuli ni loloma. O cei vei keda e sega ni yavalati koya na italanoa vakaivolatabu ni nodrau veilomani o Rejeli kei Jekope ni da wilika, “A sa qaravi koya ko Jekope ka yabaki vitu me nona ko Rejeli; a sa vaka sa bogi vica walega vua ena vuku ni nona loloma vua”?²¹ Kemuni na taciqu eda dau maroroya beka na noda veiyalayalati ena mataqali loloma titobu ka yalodina vakaoya?

Na cava na vuna a tu vakarau kina na iVakabula me maroroya na Nona veiyalayalati kei Tamana ka vakacavara na nona ilesilesi vakalou me sorovaka na ivalavala ca ni vuravura? Na Nona lomana na Tamana mai Lomalagi kei na Nona lomani keda. Na cava na vuna e solia kina na Tamana na Luvena uasivi sara e Duabau Ga me mai sotava na mosi e sega ni vakamacalataki rawa me colata kina na ivalavala ca, na mosi ni yalo, tauvimate, kei na malumalumu ni vuravura, na veika kece oqori e sega ni dodonu ena bula oqo? Eda kunea na kena isau ena vosa oqo: “Ni sa lomani ira na kai vuravura vakaoqo na Kalou me solia kina na Luvena e duabau ga.”²²

“Kevaka eda vakavinavinakataka vakaidina sara na veivakalougatataki kece sara e noda ena vuku ni veivueti sa vakayacori ena vukuda, ena sega ni dua na ka e kerea vei keda na Turaga me da na sega ni cakava ena yalodina kei na lomasoli.”²³ Me vaka na itukutuku oqo nei Peresitedi Joseph Fielding Smith, na maroroi ni veiyalayalati e dua na ivakarau eda vakaraitaka kina na noda lomana na Veisorovaki sega ni vakasamataki rawa ka sega ni vakaiyalayala ni noda iVakabula ka Dauveisereki kei na loloma uasivi sara ni Tamada mai Lomalagi.

E vakatura ena yaloluluvu o Elder Holland, “Au sega ni kila deivaki sara se na vakacava na veika eda na sotava ena Siga ni Veilewai, ia au na kidacalataka sara kevaka ena sega ni taroga vei keda na Kalou ena dua na gauna ena loma ni veivosaki oqori na taro vata sara ga a taroga na Karisito vei Pita: ‘O a lomani au li?’”²⁴ Ena bogi nikua au sureti keda yadua me da dikeva tale mada se vakaivei na levu ni noda lomana na iVakabula, ena noda vakayagataka me kena ivakatakilakila na ivakarau ni noda maroroya ena yaloreki na noda veiyalayalati. E kaya na iVakabula, “Ko koya sa nanuma na noqu ivunau ka talairawarawa kina, sai koya oqo sa lomani au: ia ko koya sa lomani au ena lomani koya ko Tamaqu, ia kau na lomani koya ka vakatakilai au vua.”²⁵ Eda gadreva vakalevu taucoko me dau vakatakilai na iVakabula ena noda bula e veisiga!

Me da nanuma tiko ni o ira sara mada ga era dau muri lomadra ena veigauna e liu se o ira era sotava tiko na dredre ena gauna oqo e rawa ni ra vakila na ligana na iVakatawa Vinaka e uludra ka rogoca na Domona ni kaya: “Lako mai. O sa sega ni vesu tu. O sa sereki.” Na iVakabula a kaya, “Oi au na ivakatawa vinaka, sa solia na nona bula na ivakatawa vinaka ena vukudra na nona sipi.”²⁶ E rawa Vua me tukuna oqori baleta ni a maroroya na Nona veiyalayalati ena loloma. Sa na qai tarogi kina, o keda? Me da lako yani ena vakabauta, yalo mamarau, kei na gagadre levu me da dau maroroi veiyalayalati. Oqo na ivakarau eda vakaraitaka kina na noda loloma ena vukuna na Tamada mai Lomalagi kei na noda iVakabula, kau vakadinadinataki rau ruarua ena loloma ena yaca i Jisu Karisito, emeni.