ពេលអ្នកសង្គ្រោះក្មេងស្រីម្នាក់ អ្នកសង្គ្រោះដល់ជំនាន់ជាច្រើន
ដោយ ម៉ារី អិន ឃុក
ទីប្រឹក្សាទីមួយក្នុងគណៈប្រធានយុវនារីទូទៅ
ជីវិតប្រកបដោយគុណធម៌របស់អ្នកនឹងប្រទានពរដល់ដូនតាអ្នក គ្រួសារអ្នកពេលនេះ និងសមាជិកគ្រួសារនាពេលអនាគត ។
ខ្ញុំមានកិត្តិយសណាស់ក្នុងការនិយាយទៅអ្នករាល់គ្នា ជាយុវនារីស្មោះត្រង់នៃសាសនាចក្រនេះ ។ យើងឃើញអ្នកកំពុងរីកចម្រើនលើផ្លូវរបស់អ្នកដែលគោរពដល់សេចក្ដីសញ្ញាខ្លួន ហើយយើងដឹងថាជីវិតប្រកបដោយគុណធម៌របស់អ្នកនឹងប្រទានពរដល់ដូនតាអ្នក គ្រួសារអ្នកពេលនេះ និងសមាជិកគ្រួសារនាពេលអនាគត ត្បិតដូចជាប្រធាន ហ្គរដុន ប៊ី ហ៊ិងគ្លី បានថ្លែងថា « ពេលអ្នកសង្គ្រោះក្មេងស្រីម្នាក់ អ្នកសង្គ្រោះជំនាន់ជាច្រើន » ។1
ផ្លូវនៃសេចក្ដីសញ្ញាអ្នកបានចាប់ផ្ដើមក្នុងពេលតែមួយនឹងពេលអ្នកបានជ្រមុជទឹក ហើយទទួលអំណោយទាននៃព្រះវិញ្ញាណបរិសុទ្ធ ។ វាបន្តជារៀងរាល់សប្ដាហ៍ក្នុងការប្រជុំសាក្រាម៉ង់ ជាទីបរិសុទ្ធមួយដែលអ្នករំឭកចាំសេចក្ដីសញ្ញាបុណ្យជ្រមុជទឹកអ្នក ។ ពេលនេះជាពេលដែលអ្នករៀបចំខ្លួនធ្វើសេចក្ដីសញ្ញាក្នុងព្រះវិហារបរិសុទ្ធ ។ « ពិធីបរិសុទ្ធ និងសេចក្ដីសញ្ញាពិសិដ្ឋនានាដែលមាននៅក្នុងព្រះវិហារបរិសុទ្ធអាចធ្វើឲ្យបុគ្គលម្នាក់ៗត្រលប់ទៅកាន់ទីវត្តមាននៃព្រះវិញ ហើយដើម្បីឲ្យក្រុមគ្រួសារអាចត្រូវបានរួបរួមគ្នាដ៏នៅអស់កល្បជានិច្ច » ។2
សូមឈរក្នុងទីបរិសុទ្ធសម្រាប់ដូនតាអ្នក ។ « មនុស្សគ្រប់រូបដែលមកកាន់ផែនដីនេះជាលទ្ធផលនៃជំនាន់នានានៃឪពុកម្ដាយ ។ យើងមានក្ដីប្រាថ្នាមួយពីធម្មជាតិដើម្បីជួបគ្នានឹងដូនតាយើង » ។3 ពេលអ្នកធ្វើកិច្ចការព្រះវិហារបរិសុទ្ធនិងពង្សប្រវត្តិ អ្នកភ្ជាប់ជីវិតអ្នកនឹងជីវិតនៃដូនតាអ្នកដោយការផ្ដល់ពិធីការសង្គ្រោះដល់ពួកគាត់ ។
សូមឈរក្នុងទីបរិសុទ្ធសម្រាប់ខ្លួនឯង និងគ្រួសារ ។ គំរូសុចរិតរបស់អ្នកនឹងក្លាយជាប្រភពមួយនៃក្ដីអំណរដ៏ធំ មិនថាស្ថានភាពគ្រួសារអ្នកបែបណានោះទេ ។ ការជ្រើសរើសដ៏សុចរិតរបស់អ្នកនឹងធ្វើឲ្យមានគុណសម្បត្តិក្នុងការធ្វើ ហើយនិងរក្សាសេចក្ដីសញ្ញាពិសិដ្ឋដែលនឹងចងភ្ជាប់គ្រួសារអ្នករួមគ្នាជានិច្ច ។
សូមឈរក្នុងទីបរិសុទ្ធសម្រាប់គ្រួសារអ្នកនាពេលអនាគត ។ សូមតាំងចិត្តធ្វើការផ្សារភ្ជាប់នឹងស្វាមីអ្នកដោយបព្វជិតភាពបរិសុទ្ធក្នុងព្រះវិហារបរិសុទ្ធ ពេលអ្នកចាប់ផ្ដើមក្រុមគ្រួសារអស់កល្បមួយ ។ កូនចៅអ្នកនឹងបានពរជាមួយនឹងការពិត ពេលអ្នកតភ្ជាប់គំរូប្រកបដោយគុណធម៌ និងទីបន្ទាល់ដ៏រឹងមាំរបស់អ្នកក្នុងជីវិតពួកគេ ហើយបង្ហាញផ្លូវដល់ពួកគេទៅកាន់ផ្លូវសេចក្ដីសញ្ញា ។
ខ្ញុំបានឃើញគោលការណ៍អស់កល្បទាំងនេះនៅឯការប្រកួតគំនូរអន្តរជាតិសម្រាប់យុវវ័យថ្មីៗនេះ ។ មេហ្គាន វ៉ននើរ ថៃលើរ បានបង្កើតរូបភាពឌីជីថលមួយ ដោយរៀបរៀងតាមបែបសម័យទំនើបនូវរឿងប្រៀបធៀបរបស់ព្រះគ្រីស្ទពីស្ត្រីព្រហ្មចារីដប់នាក់ ។4 ខ្ញុំបានជួប មេហ្គាន ហើយនាងបានពន្យល់ពីនិមិត្តរូបនៃស្ត្រីព្រហ្មចារីទីដប់ ដោយនាងរៀបរាប់ថាជាយុវនារីម្នាក់នៃគុណធម៌ និងក្ដីជំនឿបានរៀបចំខ្លួនធ្វើ ហើយនិងរក្សាសេចក្ដីសញ្ញាពិសិដ្ឋក្នុងព្រះវិហារបរិសុទ្ធ ។ ដូចគ្នានឹងស្ត្រីដ៏ឈ្លាសវៃទាំងនោះដែរ ការរៀបចំផ្ទាល់ខ្លួនរបស់នាងកើតមានដោយនាងបានបន្ថែមប្រេងក្នុងចង្កៀងនាងមួយតំណក់ម្ដងៗ ដោយការរស់នៅសុចរិតជានិច្ច ។ ខ្ញុំបានសង្កេតឃើញនាងមានសក់ក្រងដ៏ស្រស់ស្អាត ។ មេហ្គាន បានពន្យល់ថា សក់ក្រងនោះតំណាងឲ្យការតភ្ជាប់នៃជីវិតរបស់យុវនារីរូបនេះនឹងជំនាន់ដទៃទៀតរាប់មិនអស់ ។ផ្នត់ទីមួយតំណាងឲ្យការតភ្ជាប់ក្ដីស្រឡាញ់ និងការគោរពរបស់នាងចំពោះដូនតា ផ្នត់ទីពីរជាការតភ្ជាប់ឥទ្ធិពលសុចរិតរបស់នាងនឹងគ្រួសារបច្ចុប្បន្ន និងផ្នត់ទីបីជាការតភ្ជាប់ការរៀបចំជីវិតនាងនឹងជីវិតនៃជំនាន់នាអនាគត ។
ខ្ញុំបានជួបយុវនារីម្នាក់ទៀតដែលការរៀបចំខ្លួនខាងវិញ្ញាណតាំងពីក្មេងរបស់នាងបានតភ្ជាប់ជីវិតសុចរិតមួយនឹងជំនាន់ជាច្រើន ។
នៅថ្ងៃរសៀលដ៏ស្រស់ស្អាតមួយក្នុងខែកញ្ញា ស្វាមីខ្ញុំ និងខ្ញុំនៅក្នុងព្រះវិហារបរិសុទ្ធរង់ចាំចូលរួមក្នុងពិធីការនៃព្រះវិហារបរិសុទ្ធ ។ គ្រីស ជាមិត្តម្នាក់របស់យើង បានដើរចូលមកក្នុងបន្ទប់ ។ វាជាក្ដីរីករាយដោយបានជួបនឹងយុវជនរូបនេះ ដែលទើបត្រលប់ពីបេសកកម្មនៅរុស្សី ។
កាលការជួបជុំគ្នារៀបនឹងចាប់ផ្ដើម មានយុវនារីស្រស់ស្អាតម្នាក់បានមកអង្គុយក្បែរខ្ញុំ ។ នាងមានទឹកមុខញញឹមប្រិមប្រិយ ។ ខ្ញុំចង់ស្គាល់នាង ដូច្នេះខ្ញុំក៏បានណែនាំខ្លួនភ្លាម ។ នាងបានខ្សឹបប្រាប់ថានាងឈ្មោះ ខេត ហើយខ្ញុំស្គាល់ត្រកូលនាងជាគ្រួសារមួយរស់នៅ រដ្ឋមីជីហ្គែន ជាកន្លែងដែលគ្រួសារខ្ញុំធ្លាប់រស់នៅ ។ ខេត ជាកូនស្រីនៃគ្រួសារនោះ ជាអ្នកដែលត្រលប់ពីបេសកកម្មនៅអាល្លឺម៉ងមុនប្រាំសប្ដាហ៍ ។
ក្នុងការប្រជុំរួមគ្នានោះគំនិតមួយបានផុសក្នុងចិត្តខ្ញុំ « ណែនាំ ខេត ឲ្យស្គាល់ គ្រីស » ។ ខ្ញុំទុកការបំផុសគំនិតនេះមួយអន្លើ ហើយគិតថា « តើពេលណា នៅទីណា និងតាមវិធីណា ? » ពេលយើងរៀបចំខ្លួនចេញ គ្រីស បានមកជម្រាបលាយើង ហើយខ្ញុំក៏ចាប់យកឱកាសនោះ ។ ខ្ញុំបាននាំ ខេត មក ហើយខ្សឹបប្រាប់ថា « អ្នកទាំងពីរជាក្មេងល្អដែលគួរតែស្គាល់គ្នា » ។ ខ្ញុំបានចេញពីព្រះវិហារបរិសុទ្ធដោយចិត្តរីករាយថា ខ្ញុំបានធ្វើតាមការបំផុសគំនិតនោះ ។
តាមផ្លូវត្រលប់មកផ្ទះវិញ ស្វាមីខ្ញុំ និងខ្ញុំបានពិភាក្សាពីការចងចាំយើងពីឧបសគ្គដែលបានកើតមានចំពោះគ្រួសាររបស់ ខេត ។ តាំងពីពេលនោះមកខ្ញុំស្គាល់ ខេត កាន់តែច្បាស់ ហើយនាងបានជួយខ្ញុំយល់ពីហេតុផលលើទឹកមុខដ៏រីករាយដែលខ្ញុំបានឃើញក្នុងព្រះវិហារបរិសុទ្ធនាថ្ងៃនោះ ។
ខេត តែងព្យាយាមដើរលើផ្លូវនៃសេចក្ដីសញ្ញានាងដោយការស្វែងរកទីបរិសុទ្ធ ។ នាងត្រូវបានចិញ្ចឹមបីបាច់ក្នុងផ្ទះមួយដែលមានរាត្រីជួបជុំគ្រួសារ ការអធិស្ឋានរួមគ្នា ហើយការសិក្សាព្រះគម្ពីរបានធ្វើឲ្យផ្ទះនាងក្លាយជាទីបរិសុទ្ធមួយ ។កាលពីក្មេង នាងបានរៀនពីព្រះវិហារបរិសុទ្ធ ហើយចម្រៀងបទ « ខ្ញុំចូលចិត្តមើលព្រះវិហារបរិសុទ្ធ » ជាចម្រៀងពិសេសមួយក្នុងរាត្រីជួបជុំគ្រួសារ ។5 កាលពីក្មេង នាងបានមើលពីគំរូដ៏ល្អរបស់ឪពុកម្ដាយនាងក្នុងការស្វែងរកទីបរិសុទ្ធ ពេលពួកគាត់ទៅព្រះវិហារបរិសុទ្ធនៅពេលល្ងាចនៃថ្ងៃចុងសប្ដាហ៍ ជាជាងចេញទៅមើលកុន ឬហូបអាហារពេលយប់ ។
នាងស្រឡាញ់ឪពុកនាងខ្លាំងណាស់ ហើយគាត់បានប្រើសិទ្ធិអំណាចបព្វជិតភាពរបស់គាត់ជួយនាងឲ្យធ្វើសេចក្ដីសញ្ញាដំបូងនៃបុណ្យជ្រមុជទឹកនាង ។ រួចនាងត្រូវបានគេដាក់ដៃលើក្បាល ហើយបានទទួលព្រះវិញ្ញាណបរិសុទ្ធ ។ ខេត បាននិយាយថា « ខ្ញុំមានចិត្តរីករាយនឹងទទួលព្រះវិញ្ញាណបរិសុទ្ធណាស់ ហើយខ្ញុំបានដឹងថា វានឹងជួយខ្ញុំឲ្យដើរលើផ្លូវឆ្ពោះទៅជីវិតអស់កល្ប » ។
ជីវិតរបស់ ខេត បានបន្តលើផ្លូវដែលមានពរ ហើយរីករាយ ។ ពេលនាងអាយុ 14 ឆ្នាំ នាងបានចូលរៀនវិទ្យាល័យ ហើយចូលចិត្តថ្នាក់សិក្ខាសាលា ជាទីបរិសុទ្ធមួយទៀតដើម្បីរៀនពីដំណឹងល្អ ។ មានថ្ងៃមួយគ្រូនាងបានចាប់ផ្ដើមនិយាយពីការសាកល្បង ហើយបានអះអាងថាយើងគ្រប់រូបនឹងជួបរឿងនោះ ។ នាងបាននិយាយទៅខ្លួនឯងថា « ខ្ញុំមិនចង់បានការសាកល្បងនេះទេ ហើយក៏មិនចង់ឮពីវាដែរ » ។
លុះប៉ុន្មានសប្ដាហ៍ក្រោយមក ឪពុកនាងបានក្រោកឡើងពីដំណេកនៅថ្ងៃអាទិត្យនៃបុណ្យអ៊ីស្ទើរ ស្រាប់តែធ្លាក់ខ្លួនឈឺធ្ងន់ ។ ខេត និយាយថា ៖ « ឪពុកខ្ញុំជាមនុស្សមានសុខភាពល្អណាស់ គាត់ជាអ្នករត់អត្តពលកម្មម្នាក់ ។ ដោយបារម្ភខ្លាំងពីជំងឺឪពុកខ្ញុំ ម្ដាយខ្ញុំក៏នាំគាត់ទៅមន្ទីរពេទ្យ ។ ក្នុងរយៈពេល 36 ម៉ោងប៉ុណ្ណោះគាត់ក៏មានជំងឺដាច់សរសៃក្នុងខួរក្បាលដ៏ធ្ងន់រហូតធ្វើឲ្យគាត់ស្ទើររើខ្លួនមិនរួច ។គាត់អាចព្រិចភ្នែក តែផ្នែកផ្សេងទៀតមិនអាចកម្រើកបានឡើយ ។ ខ្ញុំនឹកចាំពីការមើលឃើញគាត់ ហើយគិតថា ‹ ទេ វាកើតឡើងហើយ ។ គ្រូថ្នាក់សិក្ខាសាលាខ្ញុំនិយាយត្រូវណាស់ ។ ខ្ញុំកំពុងជួបនឹងការសាកល្បង › » ។ ក្នុងរយៈពេលតែប៉ុន្មានថ្ងៃ ឪពុក ខេត ក៏បានចែកឋាន ។
ខេត បានបន្តទៀតថា « វាជារឿងពិបាកណាស់ ។ អ្នកមិនចង់បាត់បង់វីរបុរសក្នុងជីវិតអ្នកឡើយ ។ ខ្ញុំបានដឹងថា ខ្ញុំអាចធ្វើឲ្យរឿងជួយខ្ញុំឲ្យរីកចម្រើន ឬបណ្ដោយឲ្យវាបង្អាក់ដល់ការរីកចម្រើនខ្ញុំ ។ ខ្ញុំមិនចង់ឲ្យវាបំផ្លាញជីវិតខ្ញុំដោយសារខ្ញុំមានអាយុត្រឹមតែ 14 ឆ្នាំ នោះទេ ។ ខ្ញុំបានព្យាយាមខិតជិតព្រះអម្ចាស់តាមដែលអាចធ្វើទៅបាន ។ ខ្ញុំអានព្រះគម្ពីរយ៉ាងច្រើន ។ អាលម៉ាជំពូក 40 បានអះអាងចំពោះខ្ញុំថា ការរស់ឡើងវិញមានពិត ហើយតាមរយៈដង្វាយធួននៃព្រះគ្រីស្ទ ខ្ញុំអាចជួបឪពុកខ្ញុំម្ដងទៀត ។ ខ្ញុំបានអធិស្ឋានយ៉ាងច្រើន ។ ខ្ញុំសរសេរក្នុងកំណត់ហេតុខ្ញុំតាមដែលអាចធ្វើទៅបាន ។ ខ្ញុំរក្សាទីបន្ទាល់ខ្ញុំឲ្យរស់រវើកដោយការសរសេរវាទុក ។ ខ្ញុំទៅព្រះវិហារ ហើយចូលថ្នាក់យុវនារីរាល់សប្ដាហ៍ ។ ខ្ញុំមានមិត្តល្អនៅជុំវិញខ្លួន ។ខ្ញុំព្យាយាមនៅជិតនឹងគ្រួសារ ជាពិសេសគឺម្ដាយខ្ញុំដែលជាកម្លាំងដ៏រឹងមាំក្នុងគ្រួសារ ។ ខ្ញុំស្វែងរកពរជ័យបព្វជិតភាពពីជីតាខ្ញុំ និងអ្នកកាន់បព្វជិតភាពផ្សេងទៀត » ។
ដូចគ្នានឹងស្ត្រីព្រហ្មចារីដ៏ឈ្លាសវៃទាំងនោះដែរ ការជ្រើសរើសទាំងនេះបានបន្ថែមប្រេងក្នុងចង្កៀងរបស់ ខេត ។ នាងត្រូវបានលើកទឹកចិត្តដោយក្ដីប្រាថ្នាចង់ជួបឪពុកនាងម្ដងទៀត ។ ខេត បានដឹងថា ឪពុកនាងដឹងពីការជ្រើសរើសនាង ហើយនាងមិនចង់ធ្វើឲ្យគាត់ខកចិត្តឡើយ ។ នាងចង់បានទំនាក់ទំនងមួយអស់កល្បជាមួយគាត់ ។ ហើយនាងយល់ថាការបន្តដើរលើផ្លូវនៃសេចក្ដីសញ្ញានាងនឹងចងភ្ជាប់ជីវិតនាងនិងគាត់ ។
តែការសាកល្បងមិនទាន់ចប់ទេ ។ ពេល ខេត អាយុ 21 ឆ្នាំ ហើយបានដាក់ពាក្យបេសកកម្មនាង ម្ដាយនាងត្រូវរកឃើញថាមានជំងឺមហារីក ។ ខេត ត្រូវធ្វើការសម្រេចចិត្តដ៏សំខាន់មួយក្នុងជីវិតនាង ។ តើនាងគួរតែនៅផ្ទះមើលម្ដាយនាង ឬទៅបេសកកម្ម ? ម្ដាយនាងបានការប្រសិទ្ធពរពីបព្វជិតភាពដោយសន្យាថាគាត់នឹងរួចផុតពីជំងឺនេះ ។ ដោយមានការអះអាងពីការប្រសិទ្ធពរនេះ ខេត បានដើរឆ្ពោះទៅមុខដោយក្ដីជំនឿ ហើយបានបន្តផែនការនាងក្នុងការបម្រើបេសកកម្ម ។
ខេត និយាយថា ៖ « វាដូចជាការឈានជើងចូលក្នុងភាពងងឹត តែនៅក្នុងបេសកកម្មខ្ញុំ ជាភ័ព្វសំណាងល្អពន្លឺក៏បានរះឡើង ហើយបានទទួលដំណឹងថាការប្រសិទ្ធពរដល់ម្ដាយខ្ញុំបានក្លាយជាការពិត ។ ខ្ញុំរីករាយជាខ្លាំងដែលខ្ញុំមិនបានបោះបង់ការបម្រើព្រះអម្ចាស់ ។ ពេលរឿងលំបាកកើតឡើង ខ្ញុំគិតថាវាងាយនឹងធ្វើឲ្យយើងនៅទ្រឹងមួយកន្លែង ហើយមិនចង់ដើរទៅមុខទៀតឡើយ តែបើអ្នកគិតដល់ព្រះអម្ចាស់មុន នោះទុក្ខលំបាកអាចនាំទៅរកពរជ័យដ៏ប្រពៃ ។អ្នកអាចឃើញព្រះហស្តទ្រង់ និងអព្ភូតហេតុ » ។ ខេត បានជួបនូវជីវិតដូចជាពាក្យប្រធាន ថូម៉ាស អេស ម៉នសុន បានលើកឡើងថា ៖ « ឱកាសដ៏សំខាន់បំផុតរបស់យើងនឹងត្រូវបានរកឃើញក្នុងគ្រាដ៏លំបាកបំផុត » ។6
ខេត មានក្ដីជំនឿបែបនេះដោយសារនាងយល់ពីផែនការសង្គ្រោះ ។ នាងដឹងថាយើងបានរស់នៅពីមុន ថាផែនដីជាពេលមួយនៃការសាកល្បង ហើយថាយើងនឹងរស់ម្ដងទៀត ។ នាងមានក្ដីជំនឿថា ម្ដាយនឹងបានពរ តែដោយបទពិសោធន៍នាងជាមួយនឹងឪពុកនាង នាងដឹងថាបើម្ដាយនាងចែកឋានទៅ នាងនឹងមិនអីទេ ។ នាងនិយាយថា ៖ « ការស្លាប់របស់ខ្ញុំមិនត្រឹមតែអាចធ្វើឲ្យខ្ញុំរស់នៅបាននោះទេ តែវាបានក្លាយជាផ្នែកនៃអត្តសញ្ញាណខ្ញុំសម្រាប់រឿងល្អ ហើយកាលដែលម្ដាយខ្ញុំនឹងឃ្លាតចេញទៅ វានឹងក្លាយជារឿងដូចគ្នាដែរ ។ វានឹងចងភ្ជាប់ទីបន្ទាល់មួយដ៏អស្ចារ្យក្នុងជីវិតខ្ញុំ » ។7
ខេត កំពុងស្វែងរកទីបរិសុទ្ធមួយនៅយប់ដែលខ្ញុំជួបនាងក្នុងព្រះវិហារបរិសុទ្ធ ។ ដោយមានប្រាថ្នាចង់ចងភ្ជាប់ទំនាក់ទំនងអស់កល្បដែលកើតតាមរយៈការបម្រើក្នុងព្រះវិហារបរិសុទ្ធ នាងបានធ្វើតាមគំរូដែលឪពុកម្ដាយនាងបានធ្វើ ដោយការចូលព្រះវិហារបរិសុទ្ធជាទៀងទាត់ ។
នៅយប់នោះពេលខ្ញុំណែនាំ ខេត ឲ្យស្គាល់ គ្រីស គឺគ្មានអ្វីច្រើនកើតឡើងទេ តែក្នុងការស្វែងរកទីបរិសុទ្ធមួយទៀត នៅថ្ងៃអាទិត្យ ខេត បានឃើញ គ្រីស ក្នុងចំណោមមនុស្សពេញវ័យរាប់រយនាក់នៅឯការប្រជុំថ្នាក់វិទ្យាស្ថាន ។ នៅទីនោះពួកគេបានព្យាយាមស្គាល់គ្នាបន្ថែមទៀត ។ ប៉ុន្មានសប្ដាហ៍ក្រោយមក គ្រីស បានអញ្ជើញនាងទៅមើលសន្និសីទទូទៅជាមួយគាត់ ។ពួកគេបានបន្តស្វែងរកទីកន្លែងដែលអញ្ជើញព្រះវិញ្ញាណអំឡុងពេលពួកគេស្រឡាញ់គ្នា ហើយទីបំផុតក៏បានផ្សារភ្ជាប់ក្នុងព្រះវិហារបរិសុទ្ធ ជាទីបរិសុទ្ធដែលពួកគេបានស្គាល់គ្នា ។ ឥឡូវពួកគេទាំងពីរពេញដោយទំនួលខុសត្រូវជាឪពុកម្ដាយ ដោយភ្ជាប់ទីបន្ទាល់ពួកគេពីផែនការសង្គ្រោះនឹងជីវិតនៃកូនប្រុសបីនាក់តូចៗរបស់គេ ដោយបង្ហាញពួកគេពីផ្លូវនៅលើផ្លូវសេចក្ដីសញ្ញា ។
« ពេលអ្នកសង្គ្រោះក្មេងស្រីម្នាក់ អ្នកសង្គ្រោះជំនាន់ជាច្រើន » ។ ការសម្រេចចិត្តរបស់ ខេត កាលពីអាយុ 14 ឆ្នាំ ដើម្បីបន្តដើរលើផ្លូវនោះ បានបន្ថែមប្រេងជាបន្តបន្ទាប់ក្នុងចង្កៀងនាង ហើយការឈរក្នុងទីបរិសុទ្ធបាន ហើយនឹងជួយសង្គ្រោះដល់ជំនាន់ជាច្រើន ។ ការស្វែងរកដូនតានាង ហើយនិងការបម្រើក្នុងព្រះវិហារបរិសុទ្ធបានចងភ្ជាប់ចិត្តនាងនឹងពួកគាត់ ។ ដូចគ្នានេះដែរ ការធ្វើពង្សប្រវត្តិ និងកិច្ចការព្រះវិហារបរិសុទ្ធនឹងចងភ្ជាប់ចិត្តអ្នករួមគ្នា ហើយផ្ដល់ឱកាសនៃជីវិតអស់កល្បដល់ដូនតាអ្នក ។
ការរស់នៅតាមដំណឹងល្អក្នុងផ្ទះអ្នក ក៏នឹងបន្ថែមប្រេងក្នុងចង្កៀងអ្នកដែរ ហើយវានឹងចងភ្ជាប់កម្លាំងខាងវិញ្ញាណ និងផ្ទះអ្នកនៅពេលនេះ ហើយប្រទានពរដល់គ្រួសារអ្នកនាអនាគតតាមរបៀបរាប់មិនអស់ ។ ជាងនេះទៀត ដូចអែលឌើរ រ៉ូបឺត ឌី ហែល មានប្រសាសន៍ថា « បើគំរូដែលយើងបានទទួលពីឪពុកម្ដាយយើងមិនល្អ វាជាទំនួលខុសត្រូវយើងដើម្បីផ្លាស់ប្ដូរវា … ហើយបង្រៀនទម្លាប់ត្រឹមត្រូវសម្រាប់ជំនាន់ក្រោយធ្វើតាម » ។8
សូមសម្រេចចិត្តនៅពេលនេះដើម្បីធ្វើអ្វីៗដែលអ្នកអាចធ្វើបានដើម្បីបំពេញចង្កៀងអ្នក រហូតដល់ទីបន្ទាល់ និងគំរូដ៏រឹងមាំរបស់អ្នកអាចចងភ្ជាប់នឹងជីវិតនៃជំនាន់ជាច្រើនទាំងអតីតកាល បច្ចុប្បន្ន និងអនាគត ។ ខ្ញុំថ្លែងទីបន្ទាល់ថា ជីវិតប្រកបដោយគុណធម៌របស់អ្នកនឹងពុំគ្រាន់តែសង្គ្រោះដល់ជំនាន់នានានោះទេ តែវានឹងសង្គ្រោះជីវិតអស់កល្ប របស់អ្នក ព្រោះវាជាវិធីមួយគត់ដើម្បីត្រលប់ទៅព្រះវរបិតាសួគ៌យើងវិញ ហើយរកឃើញក្ដីអំណរពិតនាពេលនេះ និងជីវិតអស់កល្ប ។ ក្នុងព្រះនាមនៃព្រះយេស៊ូវគ្រីស្ទ អាម៉ែន ។