Na Vulici kei na Vakavulici ni Kosipeli

David M. McConkie

First Counselor in the Sunday School General Presidency

iVakatakilakila

Na ka bibi duadua ga o ya na ivakarau kei na yalo e veivakavulici kina o qasenivuli.

Me vaka e dua na lewe ni mataveiliutaki raraba ni Matawilivola ni Sigatabu, au nanuma meu na tekivu vosa ena mataka nikua ena noqu kaya, “Ni yadra vinaka, na lewe ni kalasi.”

Na noqu itukutuku nikua sa baleti kemuni taucoko ko ni sa kacivi mo ni veivakavulici, ena mataisoqosoqo cava ga ko ni qarava tiko se o ni curuvou mai ki na Lotu se o ni dua na qasenivuli sa vakayabaki toka na nomuni veiqaravi.

Au na sega ni tukuna eke na veika e baleta na “iwalewale” ni veivakavulici ia sa baleta ga na “iwalewale” ni vulica. Ena rawa me levu sara na duidui ni veika ena tukuna o qasenivuli kei na veika era na rogoca se vulica o ira na lewe ni kalasi.

Mo vakasamataka mada e dua na qasenivuli a veisautaka sara ga na nomu bula. Na cava beka a tu vua ka vakavuna mo nanuma kina na veika a vakavulici, mo gadreva kina mo kila vakataki iko na dina, ka mo vakayagataka kina na nomu galala ni digidigi ka cakava sara ka sega ni tuberi tale tiko? Na cava beka e tiko vua na qasenivuli oqo e duatani kina o koya mai vei ira na kena vo?

E dua na qasenivuli gugumatua ka dauvolaivola a kaya: “Na ka bibi duadua ena vuli o ya na nomu ivakarau. Na ivakarau nei qasenivuli.”¹

Me kilai tiko ni ka bibi duadua ena vuli e sega ni levu ni yabaki sa lewena tu mai kina na Lotu o qasenivuli se na levu ni veika e sotava na tamata o ya ena veivakavulici se nona buta vinaka tu o qasenivuli ena kosipeli se iwalewale ni veivakavulici. Na ka bibi duadua ga o ya na ivakarau kei na yalo e veivakavulici kina o qasenivuli.

Ena dua na soqoni ni vuli veiliutaki e vuravura raraba, a tukuna kina o Elder Jeffrey R. Holland na italanoa oqo: “Ena vuqa na yabaki, au dau taleitaka tu na italanoa nei Peresitedi Packer me baleta na qasenivuli ni Matawilivola ni Sigatabu nei William E. Berrett ena gauna ni nona gonetagane kina. E dua na turaga ka sa qase toka mai Denmark a kacivi me veivakavulici ena dua na nodra kalasi na gonetagane vakadrecike. E sega toka ni kila vakavinaka na vosa ni vanua o ya; ka se rogorogo tu ga vaka-Denmark na domona; sa qase sara toka o koya, ka liga lelevu daucakacaka. Ia sa mai veivakavulici vei ira na gonetagane kiva oqo yabaki 15. Na veika e nanumi kina kei na kena inaki taucoko, sa vaka me sega kina ni veiraurau na ka oqo. Ia e dau kaya o Baraca Berrett—oqo na tikina e lavetaka mai o Peresitedi Packer—ni a vakavulici ira rawa ga na turaga oqo; se cava ga na ka a vakataotaki kina, curuma yani na veika e yalani tu vua, e a tara yani na turaga oqo na yalodra na gone yabaki 15 vakadrecike oqo ka veisautaka na nodra bula. Me vaka na ivakadinadina nei Baraca Berrett ‘Sa rawa sara ga me keimami vakatakatara na ligai keimami ena katakata ni nona vakabauta.’”²

O ira na qasenivuli ni kosipeli gugumatua era lomana na kosipeli. Era dau marautaka. Baleta ga ni ra lomani ira na nodra gonevuli, era vinakata me ra vakila na veika era vakila ka sotava na veika era sotava. Na vakavulica na kosipeli sai koya na nomu wasea na nomu lomana na kosipeli.

Kemuni na taciqu kei na ganequ, na ivakarau nei qasenivuli e sega ni vakavulici, e toboki.³

O koya gona, meda sa qai tauyavutaka rawa vakacava na ivakarau e gadrevi meda qasenivuli gugumatua kina? Au gadreva meu vakamacalataka mada e va na ivakavuvuli taumada ni vakavulici ni kosipeli.

iMatai, wilika vagumatua na ivolanikalou. Eda na sega ni taleitaka rawa na ka eda sega ni kila. Mo tauyavutaka e dua na itovo ni vulici ivolanikalou ena veisiga, me duatani ka sega ni tiki ni nomu vakarautaka na lesoni. Ni bera ni da vakavulica na kosipeli, e dodonu meda sa kila tiko na kosipeli.

E dau vakananuma voli o Peresitedi Monson na nona qasenivuli ni Matawilivola ni Sigatabu ena gauna e se gonetagane lailai kina. “Au a sotava niu se gonetagane lailai na noqu vakayarayarataki mai vua e dua na qasenivuli gugumatua sara ka dauveivakauqeti ka dau vakarorogo vei keimami ka dau lomani keimami. Na yacana o Lucy Gertsch. Ena neimami kalasi ni Matawilivola ni Sigatabu, a vakavulica vei keimami na Buli ni vuravura, na Lutu nei Atama, na veisorovaki kei na solibula i Jisu. A kauti iratou mai o Mosese, Josua, Pita, Tomasi, Paula, kei na Karisito ki na nona kalasi me ratou mai vulagi dokai. E dina ga ni keimami sega ni raici iratou, keimami taleitaka me keimami lomana, doka, ka itovo vakataki iratou.”⁴

A rawa me sureti iratou na vulagi dokai oqo ki na nona kalasi o Lucy Gertsch baleta ni kilai iratou. Eratou nona itokani vakamareqeti sara. Ena vuku ni ka oqo, sa vulica talega na nona kalasi me ra “lomana, doka, ka itovo vakataki iratou.”

A kaya na Turaga vei Hyrum Smith, “Mo kakua mada ni vunautaka na noqu vosa, ia mo vulica taumada mo kila.”⁵ Sa voqataki na veivunauci oqo kivei keda yadudua.

Sa vakarota vei keda na Turaga meda vakasaqaqara ena ivolanikalou,⁶ meda tugana ki lomada⁷ ka meda muria na nona vosa.⁸ Ni da vakasaqara vakaidina ka tugana na vosa ni Turaga, ena dau tiko vata kei keda na Nona Yalotabu. Eda na kila vakavinaka na voqa ni Domona.⁹

Vakalailai ga niu sa mai kacivi meu peresitedi ni iteki, keitou a tuberi sara na mataveiliutaki ni iteki mai vua e dua na Vitusagavulu ni iWasewase. Ena gauna ni vuli oqo, au a taroga kina e dua na taro ka sauma mai o koya, “E taro vinaka oqori. Me tou raica mada na kena isau mai na iVoladusidusi ni Lotu.” Keitou sa rai sara ki na ivoladusidusi, ka raici sara kina na isau ni noqu taro. Ni toso tiko na neitou vuli, au a taro tale. A kaya tale mai o koya, “Taro vinaka.Tou rai mada ki na ivoladusidusi.” Au sa sega tale ni qai taro. Au nanuma ni sa vinaka ga meu wilika na ivoladusidusi.

Au nanuma kina ni sa rawa talega vua na Turaga me sauma mai vaka o ya vei keda yadua ni da lako yani Vua ena lomaleqa se vakatataro. Ena rawa ni kaya mai, “E taro vinaka. Kevaka mo na raica mada na Alama wase 5 se Vunau kei na Veiyalayalati wase 76, ko na kila niu sa tukuna oti vei iko na veika oqo.”

Kemuni na taciqu kei na ganequ, e veisaqasaqa kei na lawa cecere kei lomalagi me dau tokaruataka tiko na Turaga vei keda yadudua na veika sa vakatakila raraba oti tu mai o Koya. Na ivolanikalou sa tu kina na vosa i Karisito. Oqori na domo ni Turaga. Ni da vulica na ivolanikalou sa na vakavukui keda meda rogoca na domo ni Turaga.

iKarua, mo na bulataka na veika o sa vulica. Ena gauna sa gadreva kina o Hyrum Smith me vakaitavi talega ena cakacaka cecere ni gauna oqo, a kaya na Turaga vua, “Raica, mo gumatua sara ni muria na noqu vunau ena yalomu taucoko, ena nomu kaukauwa taucoko kei na lomamu taucoko.”¹⁰ Oi keda na qasenivuli, na noda cakacaka taumada ka bibi, o ya meda maroroya na vunau ena yaloda, nanuma, kei na kaukauwa taucoko.

iKatolu, kerea na veivuke vakalomalagi. Kerea vua na Turaga na Nona Yalotabu, mai na vu ni yalomu taucoko. E tukuna na ivolanikalou, “Ia mo dou vunau walega ena veivakauqeti ni Yalo Tabu.”¹¹ Sa kena ibalebale kevaka mada ga mo vakayagataka na iwalewale dodonu kece ni veivakavulici, ka sega kina na Yalotabu ena sega ni dua na ka ena vulici rawa.

Na itavi ni qasenivuli o ya me “vukei ira yadudua na tamata me ra vakaitavi ena nodra vulica na kosipeli—me vakauqeta vei ira na yalo ni vuli lesoni, na kila vakavinaka, kei na bulataki ni kosipeli.”¹² Sa kena ibalebale oqo vei keda na qasenivuli meda kakua ni rai vakabibi ki na iwalewale ni noda veivakavulici ia na nodra vukei ga me ra vulica rawa ka laki bulataka na kosipeli.¹³

Na iotioti ni gauna cava beka o a tekiduru kina ena masu ka kerea vua na Turaga me sega walega ni vukei iko ena nomu lesoni ia me vukei iko talega mo sotava rawa na nodra gagadre na gonevuli yadua ena nomu kalasi? E sega ni dua na kalasi e vakaitamera meda sega ni rawa ni masulaka na veivakauqeti me tarai na yalo yadudua ni gonevuli.

Sa itovo ni bula me ra dau yalolailai na qasenivuli. Sa dodonu me kilai tiko ni “yabaki ni bula kei na yalomatua kei na vakavulici ni vakasama era sa sega sara ni sala se dua na ivakatagedegede me rawati rawa kina na veikilai kei na Turaga kei na Nona Yalotabu.”¹⁴

Na yalayala ni Turaga ena yaco ga. Kevaka mo na vakasaqara vagumatua na ivolanikalou ka vakaiyautaka tikoga ki na nomu vakasama na vosa ni bula, kevaka mo qai maroroya na vunau ena yalomu taucoko ka masulaki ira na gonevuli yadua, ko na taleitaka na veitokani kei na Yalo Tabu, ko na qai ciqoma kina na ivakatakila.¹⁵

iKava, kemuni na taciqu kei na ganequ, sa ka bibi dina kina meda vakayagataka na noda galala ni digidigi ka vakayacora sara, kakua tale ni wawa, me vaka eda sa vakauqeti kina vakayalo.

E vakavulica o Peresitedi Thomas S. Monson: “Eda vakatawa. Eda wawa. Eda vakarorogo ki na domo lailai ka rogo vinaka o ya. Ni sa vosa mai, mo ni vakarorogo na tagane kei na yalewa vuku. Na veivakauqeti ni Yalotabu e sega ni dau lokuyarataki.”¹⁶

Mo kakua ni rerevaka mo vakayagataka na nomu galala ni digidigi ka cakava na vakasama kei na kila sa vakaraitaka mai ki yalomu na Yalo ni Turaga Taumada o na rairai vakawalena, ia au sa yalataka vei kemuni ni gauna kamikamica ka veivakacegui duadua o na sotava vaka-qasenivuli o ya na nomu vakaio ki na lewa ni Turaga ka vakamuria na veivakauqeti o ciqoma mai vua na Yalo Tabu. Na veika o sotava ena vaqaqacotaka na nomu vakabauta ka solia vei iko e dua na kaukauwa e levu cake mo na cakacaka kina ena veisiga ni mataka.

Kemuni na qasenivuli lomani, sai kemuni e dua vei ira na cakamana cecere ni Lotu oqo. Sa ka vakalou na nomuni ilesilesi. Keimami lomani kemuni ka nuitaki kemuni tiko. Au kila ni gauna eda vakasaqaqara kina ena ivolanikalou ka bulataka me rawa ni da kilikili kaya meda itokani ni Yalo Tabu, ena vaqaqacotaki keda na Turaga ena noda veikacivi kei na ilesilesi me rawa ni da vakayacora kina na noda itavi mai vua na Turaga. Sa noqu masu meda sa na vakayacora vakakina, ena yaca i Jisu Karisito, emeni.