Vakabauta—E Nomu na Digidigi

Bisopi Richard C. Edgley

First Counselor in the Presiding Bishopric

iVakatakilakila

Digitaka na vakabauta mai na vakatitiqa, digitaka na vakabauta mai na taqaya, digitaka na vakabauta mai na ka e sega ni kilai se sega ni laurai, ka digitaka na vakabauta mai na vakanuinuicala.

Eda bula donuya tiko na itabagauna cecere duadua ni veigauna—na gauna era a tatadrataka tu na parofita, era a parofisai kina, kau vakabauta ni ra a mateca tu mai. Ia, dina ga, ni da sa vakalougatataki tu mai lagi, o Setani, sa qai dina ga, na nona sasagataka tiko vakaukauwa me na yanaraki keda taucoko ena veimataqali itukutuku veivakacalai ka veisaqasaqa. A vakasalataka na Parofita gone o Josefa Simici na agilosi o Moronai, ni yacana ena dau taleitaki ka na dau vosacataki talega ena veiyasai vuravura, (raica na Josefa Simici—Ai Tukutuku) ka sa vakadinadinataki sara tu ga nikua. E a solia na nona bula na Parofita baleta na nona ivakadinadina ka se vakacacani tikoga nikua na Lotu vakakina na iVakabula. Na dina, ni tiko na iVakabula, na Nona vakacabori me isoro, kei na kena tatara ena veivanua, sa bolei sara tu ga ka vakalasui me vaka ga e dua na itukuni, se vakanuinui cala ni dua na vakasama e malumalumu ka sega ni vuli. Kena ikuri, na dina ni kena vakalesui mai na kosipeli, sa bolei tale tikoga ena gauna sara ga oqo. Ena veivakacalai na kena sa bula tikoga mai na kaburaki ni itukutuku vakaoqori ka na vakavuna na lomatarotaro, na lomalomarua, kei na kena sa na lailai mai na vakanuinui kei na kena saqati na yavu ni dina ka da vakabauta, na noda vakabauta na Kalou, kei na vakanuinui ki na veisiga ni mataka.

Sa ikoya beka oqo na ka dina me baleta na noda vuravura, ia e sa rawa tikoga ni da digitaka na noda na vakatulewa. Ena gauna sa bolei kina na noda ivunau vakamareqeti kei na vakabauta, sa kena gauna sara ga oqo meda sa toso voleka sara vua na Kalou ena kena iveta sara e cake. Oqo na gauna ni noda digidigi.

Ni sa vakatu o ya na bolebole eda sa sotava tiko e vuravura nikua au gadreva meu vakatura e dua na ka meda digitaka—na digidigi ni vakacegu ka isasabai, kei na digidigi ka na ganiti keda kece. Na digidigi ni vakabauta. Qarauna na vakabauta e sega ni isolisoli ka soli wale tu ga me sega ni vakasamataki, gadrevi se sasagataki. Ena sega ni yaco mai me vaka na tegu mai lagi. E kaya na iVakabula, “Dou lako mai vei au” (Maciu 11:28) ka “Tukituki, ka na dolavi vei kemudou” (Maciu 7:7). O ira oqo na vosa cakacaka—lako mai, tukituki. Era vosa ni digidigi. Au kaya kina, digitaka na vakabauta. Digitaka na vakabauta mai na vakatitiqa, digitaka na vakabauta mai na taqaya, digitaka na vakabauta mai na ka e sega ni kilai se sega ni laurai, ka digitaka na vakabauta mai na vakanuinuicala

Na itukutuku matanidavui ni vakabauta ka volai tu ena ivola i Alama ena iVola i Momani e tu kina na veimataqali digidigi ka na vakadeitaka na vakatorocaketaki ka maroroi ni noda vakabauta. Solia vei keda o Alama na ivakaro ni digidigi. Na nona vosa e vosa ni cakacaka ka vakavu mai na digidigi. Vakayagataka o koya na vosa yadra, vakabula, vakatovotovotaka, gadreva, cakacaka, kei na teitei. Sa qai tukuna o Alama ni kevaka meda cakava na digidigi oqo, ka sega ni viritaka ki tautuba, ena sega ni vakabauta, ia, “ni ko sa kila ni sa tubu e [lomada]” (Alama 32:28).

Io, na vakabauta e digidigi ka sa dodonu me vaqarai ka vakatorocaketaki. Ka sa noda itavi meda maroroya na noda dui vakabauta. Sa noda itavi talega meda vakalevutaka kevaka e lailai na noda vakabauta. Sa nomuni na digidigi.

Levu sara na ka au sega ni kila. Au sega ni kila na matailalai ni kena vakacokotaki na veika eso me buli kina na vuravura totoka eda bula tiko kina oqo. Au sega ni kila na kena vereverea na Veisorovaki, ena kena rawa ni veivakasavasavataki vei ira sa veivutuni na nona a sorovaki na iVakabula se ena rawa vakacava vua na iVakabula me colata “na nodra rarawa na tamata kecega” (V&V 18:11). Au sega ni kila na vanua e tiko kina o Saraemala ka tukuni tiko ena iVola i Momani. Au sega ni kila se cava na vuna e dau veisaqasaqa kina na noqu vakabauta kei na kila e vulici ena vakadidike kei na kila ka vakayago. Koya beka oqo na ka e vakamacalataka na Tamada mai Lomalagi me, “veika vuni ni matanitu vakalomalagi” (V&V 107:19) ka na qai vakatakilai ena dua na siga mai muri.

Dina niu sega ni kila na veika kece, ia au kila na veika e bibi. Au kila na rawarawa kei na veika matata ni dina ni kosipeli ka na veimuataki yani kina veivakabulai kei na bula vakacerecerei. Au kila ni a vakararawataki na iVakabula baleta na nodra mosi na tamata kei na nodra rawa ni vakasavasavataki o ira era sa veivutuni. Na ka au sega ni kila se vakatikina ga na noqu kila ena veivuke kina na noqu vakabauta, sa ikoya na noqu semata na kena sa kavida ka toso ki liu ena noqu vakayagataka na yalayala kei na veivakalougatataki ni kosipeli. Vakakina na ka e a tukuna o Alama ni na kauti keda na noda vakabauta ena kena kilai vinaka (raica na Alama 32:34). Ni da toso ki liu ki na vanua e tawakilai ka vakaiyaragi ena vakanuinui kei na gadreva, eda vakaraitaka kina na ivakadinadina ni noda vakabauta kei na dina vua na Turaga.

Ni da sa muria na ituvatuva i Alama, meda sa na digidigi. Meda sa digitaka na vakabauta.

Kevaka sa vesuki na nomu vakasama ena veilecayaki kei na nuinuicala, digitaka mo “yadra, ka vakadreta na nomu vakasama.” (Alama 32:27). Ni da toso vua na Turaga ena yalomalumalumu kei na yalo sa raramusumusu ka bibivoro, sa ikoya na sala ki na dina, kei na sala ni Turaga ki na rarama, kila ka, kei na vakacegu.
Kevaka e se bera ni matua na nomu ivakadinadina, sega ni vakatovolei, ka sega ni dei, digitaka mo “vakatovotovotaka e [dua mada ga] na tiki ni vakabauta”; digitaka mo “rogoca na [Nona] vunau” (Alama 32:27). E vakamacalataka na iVakabula, “Kevaka e dua na tamata sa via cakava na lomai koya, ena kila se sa ka mai vua na Kalou na ivakavuvuli, seu sa vosa vakaiau ga” (Joni 7:17).
Ni sa mai veisaqasaqa na vakatataro, na vuna, se kila vakaikoya ga kei na veivakavulici bibi kei na ivunau se itukutuku e veisaqasaqa kei na nomu vakabauta vaka na gasauvidi ka a tukuna o Paula na iApositolo (raica na Efeso 6:16), digitaka mo kua ni biuta laivi na sore ni kau mai yalomu ena sega ni vakabauta. Nanuma ni na vakatovolei taumada na nomudou vakabauta dou na qai raica e muri na kena ivakadinadina (raica na Ica 12:6).
Kevaka sa vakatovolei ka sa matua na nomu vakabauta, digitaka mo susuga sara “vakamatau” (Alma 32:37). Me vaka ga na kaukauwa ni noda vakabauta kei na kena vakatovolei mai na itukutuku veicurumaki sa na rawarawa sara na kena vorolaki. Sa na gadrevi kina me sa na bucini cake vakamatau ena vuli ivolanikalou, masumasu, kei na kena bulataki na Nona vosa.

Ni ratou tarogi Jisu na tisaipeli se cava eratou sega ni cemuria laivi rawa kina na tevoro me vaka e dau cakava o koya, sauma o Jisu ka kaya, “Kevaka e tu vei kemudou na vakabauta vaka na sore ni mosita, dou na kaya ki na ulunivanua oqo, Lako tani ki kea ka na lako tani” (Maciu 17:20). Au se bera mada ni raica me tokitaki e dua na ulunivanua. Ia, au sa raica ni vakavuna na vakabauta na kena tokitaki e dua na ulunivanua ni vakatitiqa kei na taqaya ka vakaisosomitaki ena vakanuinui kei na yalodei. Au sa raica ni vakavuna na vakabauta me vakaisosomitaka na ulunivanua ni ivalavala ca na veivutuni kei na veivosoti. Au sa raica ni vakavuna na vakabauta na ulunivanua ni mosi me sosomitaka na vakacegu, vakanuinui, kei na vakavinavinaka. Io, au sa raica na veiulunivanua ni ra sa tokitaki.

Au sa vakayadrata na kaukauwa ni matabete ena noqu vakabauta ka sa ciqoma na kamikamica ni kosipeli ka vakamareqeta na kena cakacaka vakalotu veivakabulai.
Au sa cakacakataka na sasaga kei na dredre au sotava ena noqu vakabauta ena bula oqo kei na vakacegu kei na veivakadeitaki.
Au sa vukica na vakatataro kei na vakatitiqa ki na yalodei kei na kila ka mai na noqu vakabauta.
Au sa sotava na veika tawakilai, veika sega ni laurai, ka sega ni namaki kei na yalo ni veivakadeitaki ena noqu vakabauta.
Ena gauna dredre duadua—au sa raica kina ena vakacegu kei na vakavinavinaka ni ka dina e yaco sa gauna vinaka duadua sara ga ena noqu vakabauta—.

Ia ni da sa digitaka na vakabauta ka qai vakabulabulataka na vakabauta oqori me yaco me kila ka ena veika ni Turaga, ka da qai vakayagataka na vosa “Au vakadinadinataka” se “Au kila.” Au sa teivaka oti na itei o ya e yaloqu, ia ena noqu bula taucoko au sa tovolea tiko meu vakabulabulataka na sore ni itei oqori meu kila vakavinaka sara. Ia nikua, niu tu oqo ena itutu ni vunau, au vakdinadinataka ni o Jisu na Karisito, na Dauveivueti ni vuravura. Au vakadinadinataka talega ni o Josefa Simici e parofita ni Kalou ka sa ivakadinadina bula me vakayagataka na Turaga me kauta lesu mai ki vuravura na taucoko kei na dina ni kosipeli i Jisu Karisito. Au vakadinadinataka ni o Peresitedi Thomas S. Monson e parofita ni Turaga nikua. Sa vakakina na kena nomu ka noqu na veidigidigi ni vakabauta. Meda sa digitaka na vakabauta. Ena yaca i Jisu Karisito, emeni.