2010–2019
Ena Noda Mai Sota Vata Tale
Okotova 2010


Ena Noda Mai Sota Vata Tale

Na veiqaravi vakadaukaulotu e itavi ni matabete—e dua na itavi e namaki vei keda, oi keda ka sa solia vakalevu sara na ka vei keda na Turaga.

Kemuni na taciqu kei na ganequ lomani, keimami kidavaki kemuni mai ki na koniferedi raraba, ka na rogoci ka saravi tiko ena veisala duidui eso e vuravura raraba. Eda vakaraitaka na noda vakavinavinaka vei ira era qarava na veicakacaka dredre me rawa kina na itavi cecere oqo.

Me tekivu mai na iotioti ni noda a sota ena Epereli, sa toso tikoga ki liu na cakacaka ni Lotu ka sega ni vakataotaki. A noqu na madigi meu vakatabuya e va na valetabu vovou. E rau a tomani au na noqu daunivakasala kei ira tale eso na Vakaitutu Raraba, ena noqu lako ki na Gila Valley, Arizona; ki Vancouver, mai British Columbia; ki Cebu City ena Yatu Filipaini; kei Kyiv, e Ukraine. E vakasakiti na kedra totoka na valetabu ena veivanua eso oqo. Era sa dui vakalougatataka tiko na nodra bula na noda lewenilotu ka sa veivakayarayarataki tiko kina vinaka vei ira era sega ni lewe ni noda vakabauta.

Ena yakavi ni se bera na siga me vakatabui kina na valetabu, keimami a sarava e dua na veivakamarautaki ni itovo vakavanua, ka ra vakaitavi kina na noda itabagone kei ira eso era sega soti ni gone sara. Na veisoqoni oqori era a vakayacori ena veivalenisarasara lelevu, ka dina ga e Kyviv keimami a soqo ena dua na vale vakatui totoka. E vakasakiti na meke, lagasere, kei na vakatasuasua vakaivakatagi. Au vakaraitaka na noqu vakacaucau kei na noqu loloma vei ira kece era a vakaitavi kina.

Na vakatabui ni veivaletabu yadua oqo e gauna ni veivakabulabulataki vakayalo. Keimami vakila ena veisoqoni yadua oqori na Yalo ni Turaga.

Ena vula mai oqo eda na vakatabuya tale kina na Valetabu mai Laie e Awai, e dua vei ira na noda valetabu makawa, ka sa vakayacori kina e so na cakacaka lelevu me vakavoui ka sa vica vata na vula. Eda sa vakanamata tu ki na soqo bibi oqori.

Eda tomana tikoga na tara valetabu. Ena mataka nikua au marautaka meu mai vakaraitaka ni sa vakarautaki oti tu na veivanua me baleta e lima tale na valetabu, ka na tara tiko ena veivula kei na veiyabaki e tarava mai: Lisbon, e Potukali; Indianapolis, e Indiana; Urdaneta, ena Yatu Filipaini; Hartford, e Connecticut; kei Tijuana, e Mexico.

Na veicakacaka vakalotu e vakayacori ena loma ni veivaletabu era sa ka bibi sara ki na noda vakabulai kei na nodra vakabulai na noda daulomani era sa takali yani. Me da yalodina tikoga ena kena lakovi na valetabu, ka ra sa tara voleka sara yani vei ira na noda lewenilotu.

Ni bera ni da rogoci ira era na vosa vei keda ena mataka oqo, meu tukuna mada e dua na ka e koto voleka sara e yaloqu ka gadrevi kina vakalevu sara na noda cakacaka. Au tukuna tiko na cakacaka ni kaulotu.

Taumada, vei kemuni na cauravou ena Matabete i Eroni kei kemuni na cauravou ko ni sa yacova tiko na italatala qase, au na tokaruataka na veika era sa vakavuvulitaka tiko mai vakabalavu na parofita eso—ni o ira na cauravou bula kilikili yadua, ituvaki vinaka e dodonu me ra laki kaulotu. Na veiqaravi vakadaukaulotu e itavi ni matabete—e dua na itavi e namaki vei keda, oi keda ka sa solia vakalevu sara na ka vei keda na Turaga. Kemuni na cauravou au vakauqeti kemuni mo ni vakarautaki kemuni ki na veiqaravi vakadaukaulotu. Ni maroroya na nomuni savasava ka dodonu mo ni kilikili mo ni matataka na Turaga. Ni tomana na kemuni ituvaki bulabula kei na nomuni igu.Vulica na ivolanikalou. Ena veivanua e tu kina, ni vakaitavi ena semineri se yavulotu. Ni vakamatautaki kemuni ki na ivolavakarau ni daukaulotu, na Vunautaka na Noqu Kosipeli.

E dua na vosa vei kemuni na ganequ gone: me vaka ni sega ni tu vei kemuni na itavi vata oqo vakamatabete me vakataki ira na cauravou me ra veiqaravi vakadaukaulotu tudei, o ni sa dau cau sara talega vakavinaka vakadaukaulotu, ka keimami marautaka na nomuni veiqaravi.

Oqo vei kemuni na taciqu kei na ganequ sa qase toka: eda gadreva e vuqa vakavuqa na veiwatini qase. Vei kemuni na veiwatini yalodina o ni veiqaravi tiko ena gauna oqo se o ni sa veiqaravi oti e liu, keimami vakavinavinakataka na nomuni vakabauta kei na nomuni yalodina ki na kosipeli i Jisu Karisito. O ni dau veiqaravi vakavinaka ena lomasoli ka levu sara na ka vinaka o ni sa rawata.

Vei kemuni o ni se bera ni yacova yani na gauna ena nomuni bula mo ni veiqaravi kina vakaveiwatini daukaulotu, au vakauqeti kemuni mo ni vakavakarau ena gauna oqo ki na siga mo ni na vakayacora vakakina kei na watimuni. Ke sa vakakina ena ituvaki ni nomuni bula, ni sa yaco mai na gauna ni cegu mai na cakacaka, ka vinaka tu na nomuni bula, ni soli kemuni mo ni biuta na vale ka laki veiqaravi vakadaukaulotu tudei. E vica wale na gauna ena nomuni bula ko ni na sotava kina na yalo e taleitaka kei na vakacegu e dau yaco mai ena noda solia vata na veiqaravi tudei ena nona cakacaka na iVakavuvuli.

Kemuni na taciqu kei na ganequ, mo ni vakila na Yalo ni Turaga ni da vakarorogo vei ira na Nona italai ena loma ni rua na siga mai oqo. Mo ni na vakalougatataki yadudua, ni oqo na noqu masu malumalumu-, ena yaca i Jisu Karisito, emeni.