តែបើមិនជួយទេ …
ឌែនីស អ៊ី ស៊ីមិន្ស
ក្នុងកូរ៉ុមទីពីរនៃពួកចិតសិបនាក់
បុរសសម្រេចបានការណ៍ដ៏អស្ចារ្យជាច្រើន តាមរយៈការទុកចិត្តលើព្រះអម្ចាស់ និងការកាន់តាមព្រះបញ្ញត្តិទាំងឡាយរបស់ទ្រង់—តាមរយៈការអនុវត្តសេចក្ដីជំនឿ ទោះជាពេលពួកគេមិនដឹងពីរបៀបដែលព្រះអម្ចាស់កំពុងដុសខាត់ពួកគេក្ដី ។
កាលនៅជាយុវជន ខ្ញុំបានត្រឡប់មកផ្ទះវិញពីការប្រកួតបាល់បោះថ្នាក់ទីប្រាំបីទាំងស្រពាប់ស្រពោន អន់ចិត្ត និងភាន់ច្រឡំ ។ ខ្ញុំបានរបូតមាត់និយាយទៅម្ដាយរបស់ខ្ញុំថា « កូនមិនដឹងថា ហេតុអ្វីយើងចាញ់នោះទេ—កូនបានមានសេចក្ដីជំនឿថា យើងនឹងឈ្នះ ! »
ឥឡូវនេះ ខ្ញុំដឹងថា ពេលនោះខ្ញុំមិនបានដឹងថា តើសេចក្ដីជំនឿគឺជាអ្វីនោះទេ ។
សេចក្ដីជំនឿមិនមែនជាការសម្ដែងសេចក្ដីក្លាហាន មិនមែនគ្រាន់តែជាការប៉ងប្រាថ្នា ឬគ្រាន់តែជាសេចក្ដីសង្ឃឹមនោះទេ ។ សេចក្ដីជំនឿដ៏ពិតគឺជាសេចក្ដីជំនឿលើព្រះអម្ចាស់ព្រះយេស៊ូវគ្រីស្ទ—ទំនុកចិត្ត និងការទុកចិត្តលើព្រះយេស៊ូវគ្រីស្ទ ដែលដឹកនាំបុគ្គលម្នាក់ឲ្យធ្វើតាមទ្រង់ ។១
ជាច្រើនសតវត្សរ៍កន្លងទៅ ដានីយ៉ែល និងមិត្តភក្ដិវ័យក្មេងរបស់លោកត្រូវបានរុញចេញពីសុខសុវត្ថិភាពភ្លាមៗ ចូលទៅពិភពលោកមួយ—ជាពិភពដែលមិនស្គាល់ និងមានការគំរាមកំហែង ។ នៅពេល សាដ្រាក់ មែសាក់ និង អ័បេឌ-នេកោ បានបដិសេធមិនព្រមឱនក្បាល ហើយថ្វាយបង្គំរូបសំណាកមាស ដែលបានតំឡើងដោយស្ដេច នោះនេប៊ូក្នេសាដ៏ពិរោធបានប្រាប់ពួកគេថា ប្រសិនបើពួកគេមិនព្រមថ្វាយបង្គំតាមការបញ្ជាទេ នោះពួកគេនឹងត្រូវបោះចូលទៅក្នុងគុកភ្លើងដែលកំពុងឆេះយ៉ាងសន្ធោសន្ធៅភ្លាម ។ « តើមានព្រះឯណាដែលអាចនឹងដោះឯងរាល់គ្នា ឲ្យរួចពីកណ្តាប់ដៃយើងបាន ? »២
យុវជនទាំងបីនាក់បានឆ្លើយតបភ្លាម និងដោយមានទំនុកចិត្តថា « បើជាយ៉ាងនោះមែន [ ប្រសិនបើទ្រង់បោះយើងទៅក្នុងគុកភ្លើងមែន ] នោះព្រះនៃយើងខ្ញុំ ដែលយើងខ្ញុំគោរពប្រតិបត្តិតាម ទ្រង់អាចនឹងជួយឲ្យខ្ញុំរួចពីគុកភ្លើង ដែលឆេះយ៉ាងសន្ធៅបានហើយ បពិត្រព្រះករុណា ព្រះអង្គនោះក៏នឹងជួយឲ្យយើងរួចពីព្រះហស្តទ្រង់ដែរ » ។ ការណ៍នោះស្ដាប់ទៅដូចជាប្រភេទនៃសេចក្ដីជំនឿកាលថ្នាក់ទីប្រាំបីរបស់ខ្ញុំ ។ ប៉ុន្ដែ ពេលនោះពួកគេបានបង្ហាញថា ពួកគេបានយល់ដឹងយ៉ាងច្បាស់លាស់ថា តើសេចក្ដីជំនឿគឺជាអ្វី ។ ពួកគេបានបន្ដថា « តែបើមិនជួយទេ … យើងខ្ញុំមិនព្រមគោរពតាមព្រះរបស់ទ្រង់ឡើយ ក៏មិនព្រមថ្វាយបង្គំដល់រូបមាស ដែលទ្រង់បានតាំងឡើងនោះដែរ » ។៣ នោះគឺជាសេចក្ដីថ្លែងនៃសេចក្ដីជំនឿដ៏ពិតប្រាកដ ។
ពួកគេបានដឹងថា ពួកគេអាចទុកចិត្តលើព្រះបាន—ទោះបីជាបើរឿងមិនកើតតាមរបៀបដែលពួកគេបានសង្ឃឹមក្ដី ។៤ ពួកគេបានដឹងថា សេចក្ដីជំនឿគឺហួសពីការយល់ព្រមខាងផ្លូវចិត្ត ហួសពីការទទួលស្គាល់ថា ព្រះមានព្រះជន្មរស់ ។ សេចក្តីជំនឿគឺជាការទុកចិត្តទាំងស្រុងទៅលើទ្រង់ ។
សេចក្ដីជំនឿគឺជាការជឿថា ទោះបីជាយើងមិនយល់គ្រប់កិច្ចការទាំងអស់ក្ដី ប៉ុន្ដែទ្រង់ញាណដឹង ។ សេចក្ដីជំនឿគឺជាការដឹងថា ទោះបីជាអំណាចរបស់យើងមានដែនកំណត់ក្ដី ប៉ុន្ដែព្រះចេស្ដាទ្រង់គឺគ្មានដែនកំណត់នោះទេ ។ សេចក្ដីជំនឿទៅលើព្រះយេស៊ូវគ្រីស្ទរួមមាននូវការពឹងផ្អែកទាំងស្រុងទៅលើទ្រង់ ។
សាដ្រាក់ មែសាក់ និង អ័បេឌ-នេកោ បានដឹងថា ពួកគេអាចពឹងផ្អែកលើទ្រង់បានជានិច្ច ដោយសារពួកគេបានដឹងពីផែនការរបស់ទ្រង់ ហើយពួកគេបានដឹងថា ទ្រង់មិនផ្លាស់ប្ដូរឡើយ ។៥ ពួកគេបានដឹង ដូចដែលយើងដឹងដែរថា ជីវិតរមែងស្លាប់មិនមែនជារឿងចៃដន្យនៃធម្មជាតិនោះទេ ។ វាគឺជាផ្នែកដ៏ខ្លីមួយនៃផែនការដ៏ធំ៦ របស់ព្រះវរបិតាជាទីស្រឡាញ់របស់យើងដែលគង់នៅស្ថានសួគ៌ ដើម្បីធ្វើឲ្យវាកើតឡើងបានសម្រាប់យើង ដែលជាបុត្រា និងបុត្រីរបស់ទ្រង់ ដើម្បីទទួលបានពរជ័យដូចគ្នានឹងពរជ័យដែលទ្រង់សព្វព្រះទ័យ ប្រសិនបើយើងស្ម័គ្រចិត្តនោះ ។
ពួកគេបានដឹង ដូចដែលយើងដឹងដែរថា នៅក្នុងជីវិតមុនជីវិតលើផែនដីរបស់យើង យើងត្រូវបានណែនាំដោយទ្រង់ អំពីគោលបំណងនៃជីវិតរមែងស្លាប់នេះ ៖ « យើងនឹងធ្វើផែនដី ដើម្បីឲ្យពួកគេទាំងនេះអាចរស់នៅលើ ហើយយើងនឹងសាកល្បងពួកគេមើល បើសិនជាពួកគេនឹងប្រព្រឹត្តនូវអ្វីៗគ្រប់យ៉ាង ដែលព្រះអម្ចាស់ដ៏ជាព្រះរបស់ពួកគេ នឹងបញ្ជាដល់ពួកគេ » ។៧
ដូច្នេះ យើងមានចម្លើយហើយ—វាគឺជាការសាកល្បង ។ ពិភពលោកនេះគឺជាទីកន្លែងនៃការសាកល្បងសម្រាប់បុរស និងស្ដ្រីនៃជីវិតរមែងស្លាប់ ។ នៅពេលយើងដឹងថា គ្រប់យ៉ាងគឺជាការសាកល្បង ដែលបានគ្រប់គ្រងដោយព្រះវរបិតាសួគ៌របស់យើង ដែលសព្វព្រះទ័យចង់ឲ្យយើងទុកចិត្តលើទ្រង់ ហើយដើម្បីអនុញ្ញាតឲ្យទ្រង់ជួយយើងបាន នោះយើងអាចមើលឃើញអ្វីៗគ្រប់យ៉ាងបានកាន់តែច្បាស់ថែមទៀត ។
ទ្រង់បានមានបន្ទូលមកយើងថា កិច្ចការរបស់ទ្រង់ និងសិរីល្អរបស់ទ្រង់គឺ « ដើម្បីនាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ។៨ ទ្រង់សម្រេចបានភាពជាព្រះរួចហើយ ។ ឥឡូវនេះ ព្រះរាជបំណងតែមួយគត់របស់ទ្រង់គឺដើម្បីជួយយើង—ឲ្យយើងអាចត្រឡប់ទៅកាន់ទ្រង់វិញ ហើយក្លាយដូចជាទ្រង់ និងរស់នៅជីវិតដ៏អស់កល្បជានិច្ចដូចជាទ្រង់ដែរ ។
ដោយដឹងពីអ្វីទាំងអស់នេះ នោះវាមិនពិបាកសម្រាប់បុរសហេព្រើរវ័យក្មេងទាំងបីនាក់នេះធ្វើការសម្រេចចិត្តនោះទេ ។ ពួកគេបានធ្វើតាមព្រះ ហើយពួកគេបានអនុវត្តសេចក្ដីជំនឿទៅលើទ្រង់ ។ ទ្រង់បានដោះលែងពួកគេ តែបើមិនជួយទេ—ហើយយើងដឹងដំណើររឿងនេះទាំងប៉ុន្មានទៀត ។
ព្រះអម្ចាស់បានប្រទានសិទ្ធិជ្រើសរើសដល់យើង ជាសិទ្ធិ និងការទទួលខុសត្រូវដើម្បីសម្រេចចិត្ត ។៩ ទ្រង់សាកល្បងយើង តាមរយៈការអនុញ្ញាតឲ្យយើងទទួលនូវឧបសគ្គ ។ ទ្រង់ធានាយើងថា ទ្រង់នឹងមិនធ្វើឲ្យយើងរងទុក្ខនឹងការល្បួង ខ្លាំងជាងសមត្ថភាពរបស់យើងដើម្បីទ្រាំទ្រវាបាននោះទេ ។១០ ប៉ុន្ដែយើងត្រូវយល់ថា ឧបសគ្គធំធ្វើឲ្យមនុស្សខ្លាំងអស្ចារ្យ ។ យើងមិនហៅរកទុក្ខវេទនានោះទេ ប៉ុន្ដែប្រសិនបើយើងឆ្លើយតបដោយសេចក្ដីជំនឿ នោះព្រះអម្ចាស់នឹងពង្រឹងយើង ។ ពាក្យ តែបើមិនជួយទេ អាចក្លាយជាពរជ័យដ៏អស្ចារ្យបាន ។
សាវកប៉ុលបានរៀនមេរៀនដ៏សំខាន់នេះ ហើយបន្ទាប់ពីរាប់ទសវត្សរ៍នៃកិច្ចការផ្សព្វផ្សាយសាសនាដ៏ស្មោះត្រង់មក លោកបានប្រកាសថា « យើងនៅតែអួតក្នុងកាលដែលមានទុក្ខលំបាកដែរ … ដោយដឹងថា សេចក្តីទុក្ខលំបាកបង្កើតឲ្យមាន សេចក្តីទ្រាំទ្រ សេចក្តីទ្រាំទ្របង្កើតឲ្យមានសេចក្តីស៊ាំថ្នឹក សេចក្តីស៊ាំថ្នឹកបង្កើតឲ្យមានសេចក្តីសង្ឃឹម ឯសេចក្តីសង្ឃឹមក៏មិនដែលនាំឲ្យយើងមានសេចក្តីខ្មាសឡើយ » ។១១
ទ្រង់បានបញ្ជាក់ដល់លោកថា « គុណរបស់យើងល្មមដល់ឯងហើយ ដ្បិតកម្លាំងយើងបានពេញខ្នាតដោយសេចក្តីកម្សោយ » ។១២
ប៉ុលបានឆ្លើយតបថា « ដូច្នេះ ខ្ញុំនឹងស៊ូអួតពីសេចក្តីកម្សោយរបស់ខ្ញុំ ដោយអំណរជាខ្លាំង ដើម្បីឲ្យព្រះចេស្តានៃព្រះគ្រីស្ទបានសណ្ឋិតនៅនឹងខ្ញុំ ។ … ហេតុនោះបានជាខ្ញុំអរសប្បាយក្នុងកាលដែលមានសេចក្តីកម្សោយ ក្នុងកាលដែលគេត្មះតិះដៀល ក្នុងសេចក្តីលំបាក កាលគេធ្វើទុក្ខបៀតបៀន ហើយក្នុងសេចក្តីដែលខ្ញុំត្រូវចង្អៀតចង្អល់ ដោយយល់ដល់ព្រះគ្រីស្ទ ដ្បិតកាលណាខ្ញុំខ្សោយ នោះខ្ញុំមានកំឡាំងយ៉ាងចំណានវិញ » ។១៣ នៅពេលប៉ុលបានជួបនឹងឧបសគ្គរបស់លោកតាមរបៀបរបស់ព្រះអម្ចាស់ នោះសេចក្ដីជំនឿរបស់លោកបានកើនឡើង ។
« ដោយសារសេចក្តីជំនឿ នោះអ័ប្រាហាំបានថ្វាយអ៊ីសាក ក្នុងកាលដែលទ្រង់ល្បងលលោក » ។១៤ ដោយសារតែសេចក្ដីជំនឿដ៏មហិមារបស់លោក នោះអ័ប្រាហាំទទួលបានសន្យាឲ្យមានកូនចៅច្រើនជាងចំនួនផ្កាយនៅលើមេឃទៅទៀត ហើយថាកូនចៅទាំងនោះនឹងកើតមានតាមរយៈអ៊ីសាក ។ ប៉ុន្ដែ អ័ប្រាហាំបានធ្វើតាមការបង្គាប់របស់ព្រះអម្ចាស់ភ្លាម ។ ព្រះបានរក្សាសេចក្ដីសន្យារបស់ទ្រង់ តែបើមិនជួយទេ តាមរបៀបដែលអ័ប្រាហាំបានរំពឹងទុក នោះលោកនៅតែទុកចិត្តលើទ្រង់ទាំងស្រុងដដែល ។
បុរសសម្រេចបានការណ៍ដ៏អស្ចារ្យជាច្រើន តាមរយៈការទុកចិត្តលើព្រះអម្ចាស់ និងការកាន់តាមព្រះបញ្ញត្តិទាំងឡាយរបស់ទ្រង់—តាមរយៈការអនុវត្តសេចក្ដីជំនឿ ទោះជាពេលពួកគេមិនដឹងពីរបៀបដែលព្រះអម្ចាស់កំពុងដុសខាត់ពួកគេក្ដី ។
« ដោយសារសេចក្តីជំនឿ កាលម៉ូសេ … មិនព្រមឲ្យគេហៅខ្លួន ជាកូនរបស់បុត្រីផារ៉ោនទេ ។
« លោកស៊ូរងទុក្ខលំបាកជាមួយនឹងរាស្ត្ររបស់ព្រះ ជាជាងមានសេចក្តីអំណរខាងអំពើបាប ដែលនៅតែ១ភ្លែតនោះវិញ ។
« ដោយបានរាប់សេចក្តីដំនៀលដែលគេតិះដៀលដល់ព្រះគ្រីស្ទ ទុកជាទ្រព្យសម្បត្តិប្រសើរជាងអស់ទាំងរបស់ថ្លៃវិសេសនៅស្រុកអេស៊ីព្ទ ។ …
« ដោយសារសេចក្តីជំនឿ នោះលោកក៏ចេញពីស្រុកអេស៊ីព្ទទៅ ឥតកោតខ្លាចដល់សេចក្តីកំហឹងនៃស្តេចឡើយ ។ …
« ដោយសារសេចក្តីជំនឿ នោះគេបានដើរកាត់សមុទ្រក្រហម ដូចជាដើរលើដីគោក ។ …
« ដោយសារសេចក្តីជំនឿ នោះកំផែងទីក្រុងក៏រលំទៅ » ។១៥
ដែល « ដោយសារសេចក្តីជំនឿ នោះគេបានឈ្នះនគរដទៃ … បានទទួលសេចក្តីសន្យា បានបិទមាត់សិង្ហ
« បានពន្លត់អំណាចភ្លើង បានរួចពីមុខដាវ បានមានកម្លាំងក្នុងកាលដែលកំពុងតែខ្សោយ ក៏ត្រឡប់ជាពូកែក្នុងចម្បាំង » ។១៦
ប៉ុន្ដែនៅក្នុងចំណោមលទ្ធផលដ៏រុងរឿងទាំងអស់នោះ ដែលអ្នកចូលរួមបានសង្ឃឹម និងរំពឹងទុក នោះតែងមានឃ្លា តែបើមិនជួយទេ ជានិច្ច ។
« ខ្លះទៀតត្រូវសេចក្តីល្បង ដោយមានគេចំអកឲ្យ ទាំងវាយនឹងរំពាត់ … ទាំងជាប់ចំណង និងជាប់គុកផង ។
« ត្រូវគេចោលនឹងថ្ម ល្បួង ហើយអារបណ្តាច់ ក៏ត្រូវស្លាប់នឹងដាវ ត្រូវដើរវីមវាម ទាំង … ត្រូវកំសត់ទុគ៌ត ត្រូវគេសង្កត់សង្កិន ហើយធ្វើបាប … ១៧
« ព្រះបានផ្គត់ផ្គង់សេចក្តីប្រសើរជាងមួយចំនួន សម្រាប់ពួកគេតាមរយៈការរងទុក្ខរបស់ពួកគេ ដោយសារបើមិនមានការរងទុក្ខទេ នោះពួកគេមិនអាចបានគ្រប់លក្ខណ៍ឡើយ » ។១៨
បទគម្ពីររបស់យើង និងប្រវតិ្តសាស្ដ្ររបស់យើងមានពោរពេញទៅដោយដំណើររឿងនៃបុរស និងស្ដ្រីដ៏អស្ចារ្យរបស់ព្រះដែលបានជឿថា ទ្រង់នឹងរំដោះពួកគេ តែបើមិនជួយទេ នោះពួកគេក៏បានបង្ហាញថា ពួកគេនឹងទុកចិត្ត ហើយស្មោះត្រង់នឹងទ្រង់ដែរ ។
ទ្រង់មានព្រះចេស្ដា ប៉ុន្ដែវាគឺជាការសាកល្បងរបស់យើង ។
តើព្រះអម្ចាស់រំពឹងឲ្យយើងធ្វើអ្វីខ្លះ ទាក់ទងទៅនឹងឧបសគ្គរបស់យើង ? ទ្រង់រំពឹងចង់ឲ្យយើងធ្វើឲ្យអស់ពីលទ្ធភាពដែលយើងអាចធ្វើទៅបាន ។ ទ្រង់ធ្វើកិច្ចការដែលនៅសេសសល់ទាំងប៉ុន្មានទៀត ។ នីហ្វៃបាននិយាយថា « ដ្បិតយើងដឹងថា មានតែដោយព្រះគុណទេ ទើបយើងបានសង្គ្រោះ បន្ទាប់ពីអ្វីៗទាំងអស់ដែលយើងអាចធ្វើបាន » ។១៩
យើងត្រូវតែមានសេចក្ដីជំនឿដូចជាសាដ្រាក់ មែសាក់ និងអ័បេឌ-នេកោដែរ ។
ព្រះរបស់យើងនឹងរំដោះយើងចេញពីការសើចចំអក និងការបៀតបៀន តែបើមិនជួយទេ ។… ព្រះរបស់យើងនឹងរំដោះយើងចេញពីជំងឺ និងរោគា តែបើមិនជួយទេ ។… ទ្រង់នឹងដោះលែងយើងចេញពីភាពឯកោ បាក់ទឹកចិត្ត ឬភាពភ័យខ្លាច តែបើមិនជួយទេ ។ … ព្រះរបស់យើងនឹងដោះលែងយើងចេញពីការគំរាមកំហែង ការចោទប្រកាន់ និងអសន្តិសុខ តែបើមិនជួយទេ ។ … ទ្រង់នឹងរំដោះយើងចេញពីសេចក្ដីស្លាប់ ឬការបាត់បង់មនុស្សជាទីស្រឡាញ់ តែបើមិនជួយទេ… ក៏យើងនឹងទុកចិត្តលើព្រះអម្ចាស់ដែរ ។
ព្រះរបស់យើងនឹងទតឃើញថា យើងទទួលភាពយុត្តិធម៌ និងត្រឹមត្រូវ តែបើមិនជួយទេ ។ … ទ្រង់នឹងប្រាកដថា យើងត្រូវបានស្រឡាញ់ និងបានទទួលស្គាល់ តែបើមិនជួយទេ ។ … យើងនឹងទទួលដៃគូដ៏ល្អឥតខ្ចោះ និងសុចរិតព្រមទាំងកូនដែលគោរពប្រតិបត្តិតាម តែបើមិនជួយទេនោះ … យើងនឹងមានសេចក្តីជំនឿលើព្រះអម្ចាស់យេស៊ូវគ្រីស្ទ ដោយដឹងថា ប្រសិនបើយើងធ្វើអស់ពីសមត្ថភាពរបស់យើង នោះតាមពេលវេលា និងរបៀបរបស់ទ្រង់ យើងនឹងត្រូវបានដោះលែង និងទទួលអ្វីៗទាំងអស់ដែលទ្រង់មាន ។២០ ខ្ញុំថ្លែងទីបន្ទាល់ដូច្នោះ ក្នុងព្រះនាមនៃព្រះយេស៊ូវគ្រីស្ទ អាម៉ែន ៕