O Le Togiola:
O Lo Tatou Faamoemoega Sili
James E. Faust
E faalagolago lo tatou faaolataga i le talitonu i le, ma le taliaina o le Togiola. O lena taliaina e manaomia ai se taumafaiga faifaipea ia malamalama atoatoa i ai.
O’u uso e ma tuafafine ma uo pele, ua ou sau ma le lotomaualalo i lenei pulelaa i lenei taeao ona ou te manao e talanoa atu e uiga i le mea aupito silisili na tupu i le talafaasolopito uma. O lena mea e tasi na tupu o le Togiola le mafaatusalia lea a lo tatou Alii ma le Faaola, o Iesu Keriso. O le galuega sili lenei ona taua ua faataunuuina, ae o le mea aupito sili foi lea ona malamalama i ai. O la’u mafuaaga o lo’u manao e aoao mea uma e mafai ona ou faia e uiga i le Togiola, o sona vaega o le manatu faapito: E faalagolago lo tatou faaolataga i le talitonu i le, ma le taliaina o le Togiola.1 O lena taliaina e manaomia ai se taumafaiga faifaipea ia malamalama atoatoa i ai. O le Togiola e faalautele ai la tatou kosi i le olaga faitino o le aoaoina e ala i le faia ia mafai e o tatou natura ona atoatoa.2 O i tatou uma lava ua agasala ma e manaomia ona salamo ina ia totogi atoa ai la tatou vaega o le aitalafu. Pe a tatou salamo ma le faamaoni, e totogi e le Togiola matagofie a le Faaola mea o totoe o lena aitalafu.3
Na tuuina mai e Paulo se faamalamalamaga faigofie o le manaomia o le Togiola: “Aua faapei ona oti uma ia Atamu, e faapea foi ona faaolaina uma ia Keriso.”4 Sa filifilia ma muai faauuina Iesu Keriso e avea ma o tatou Faaola a o lei faavaeina le lalolagi. Faatasi ai ma Lona tulaga o le alo paia, Lona soifua e aunoa ma se agasala, o le faamaligiina o Lona toto i le Faatoaga o Ketesemane, o Lona maliu matautia i luga o le satauro ma le Toetu mai i le tuugamau i le tino mulimuli ane, na avea ai o Ia ma mata’isau o lo tatou faaolataga ma faia ai se Togiola atoatoa mo tagata uma.5
O le malamalama i mea tatou te mafaia e uiga i le Togiola ma le Toetu o Keriso e fesoasoani ia i tatou e maua ai se malamalama e uiga ia te Ia ma Lana misiona.6 Soo se faateleina o lo tatou malamalama i Lana taulaga Togiola, tatou te latalata atili atu ai ia te Ia. I se tulaga moni lava, o le Togiola o lona uiga o le ia “tasi” ma Ia. O le natura o le Togiola ma ona aafiaga e faavavau, e le mafuatiaina, ma e loloto lava e sili atu nai lo le iloa ma le malamalama o le tagata soifua. Ou te matua faafetai mo le mataupu faavae o le alofa tunoa laveai. E toatele tagata e mafaufau e na ona manaomia lava o lo latou ta’uta’u atu o Iesu o le Keriso ona laveaiina ai lea o i latou i le na o le alofa tunoa. E le mafai ona faaolaina i tatou e ala i le na o le alofa tunoa, “ona ua matou iloa e faaolaina i tatou i le alofa tunoa, pe a uma mea uma e mafai ona tatou faia.”7
I ni nai tausaga ua mavae, na faamatala ai e Peresitene Gordon B. Hinckley “se tala e pei o se faataoto” e uiga “i se aoga e tasi le potu i atumauga o Virginia lea e matua’i vaogata ia tamaiti ma e leai se faiaoga na mafai ona taulimaina i latou.
“Ona oo lea i se tasi aso sa talosaga i ai se faiaoga talavou e leai se poto masani. Sa ta’u atu ia te ia o faiaoga uma lava na fasi leaga, ae sa talia lava e le faiaoga le tulaga lamatia. O le aso muamua i le aoga, sa talosagaina ai e le faiaoga ia tama e fai a latou lava tulafono ma le faasalaga mo le solia o tulafono. Na faia e le vasega ni tulafono e 10, ia na tusia i luga o le laupapa. Ona fesili lea o le faiaoga, ‘O le a se mea e tatau ona tatou faia i le tagata e solia ia tulafono?
“‘Ia sasa faasefulu lona papatua ae aveese lona ofu,’ o le tali lea na sau.
“Pe tasi le aso pe a mulimuli ane, … na gaoia ai le meaai a se tamaitiiti lapoa e igoa ia Toma. ‘Na maua le gaoi—o se tamaitiiti fiaai pe tusa ma le sefulu tausaga le matua.’
“A o savali mai i luga ia Simi e avatu i ai ana sasa, sa ia aioi atu ina ia fai pea lona peleue. ‘Aveese lou peleue,’ o le tala lea a le faiaoga. ‘Na e fesoasoani i le faiga o tulafono!’
“Na aveese e le tamaitiiti lona peleue. Sa leai nei se ofutino ae ua aliali mai na o si tino paee ma le iviivia. A o tau le mautonu le faiaoga i le sasa, ae oso mai Toma Lapoa ma ofo mai na te tauaveina ia ta a le tamaitiiti.
“‘Ia ua lelei, e i ai se tulafono patino lea e mafai ai e se tasi ona suitulaga i le isi. Ua outou malilie uma i ai?’ sa fesili atu ai le faiaoga.
“Ina ua uma ta e lima i le papatua o Toma, sa gau le laau. Sa masusu le vasega. ‘Na aapa a’e le tamaitiiti o Simi ma opo limalua le ua o Toma. “Toma, malie lou loto sa ou gaoia lau meaai ona sa ou matua fiaai lava. Toma, o le a ou alofa ia te oe seia oo ina ou oti ona o lou tauaveina o le sasa mo a’u! Ioe, o le a ou alofa ia te oe e faavavau!”8
Ona sii mai lea e Peresitene Hinckley o le tusi a Isaia:
“E moni, ua na tauave o tatou tiga, ma na tauave o tatou faanoanoa. …
“… Sa manu’a o Ia mo a tatou soligatulafono, sa momomo o ia mo a tatou amioletonu; sa i ona luga le aoaiga mo lo tatou filemu; ma o ona faalavalava ua faamaloloina ai i tatou.”9
E leai se tasi na te iloaina le mamafa atoa o le mea na tauaveina e lo tatou Faaola, ae o le mana o le Agaga Paia e mafai ai ona tatou iloa se mea e uiga i le meaalofa mamana na Ia tuuina mai ia i tatou.10 I upu o la tatou viiga o le faamanatuga:
Sa matua mafatia o Ia i tiga, “mafatia e le mafaamatalaina,” ma “puapuaga lofituina”12 ona o i tatou. O mafatiaga ogaoga i le Faatoaga i Ketesemane, lea na Ia tauaveina ai i Ona lava luga agasala a isi tagata uma i le olaga nei, na afua ai ona “faagateteina ai Ia lava ona o le tiga, ma na maligi ai le toto mai pu laiti uma lava o le tino, ma tiga le tino atoa ma le agaga.”13 “Ma o le i ai i se tiga matuitui sa ia tatalo faatauanau ai,”14 ma faapea atu, “Lo’u Tama e, afai e le mafai ona aveese o lenei ipu ia te a’u seia ou inu ai, ia faia lou finagalo.”15 Sa faalataina o Ia e Iuta le Sekara, ma sa faafitia e Peteru. Sa tauemuina o Ia e faitaulaga sili ma taitai; Sa saeia Ona ofu, sasaina, tuufeanu i ai, ma sasaina i le fale faamasino.16
Sa taitai atu o Ia i Kolokota, i le mea na tutu’i ifo ai fao i Ona lima ma Ona vae. Sa faatautau o Ia ma le tiga mo ni itula i luga o se satauro laau sa tusia ai le faaupuga na tusia e Pilato: O IESU LE NASARETA O LE TUPU O TAGATA IUTAIA”17 Na oo mai le po, ma “pe tusa o le ituaso e iva na alaga ai Iesu ua leotele, ua faapea atu, Eloi, Eloi, lama sapatani? o lona uiga pe a faamatalaina, Lo’u Atua e, se a le mea ua e tuulafoai mai ai a’u?”18 Sa leai se tasi e mafai ona fesoasoani ia te Ia; sa Ia solia le soligavine na o Ia lava.19 Ona “toe alaga leotele ai lea o Iesu, ua to lana manava.”20 Ma “o se tasi o fitafita sa tu’ia lona itu i le tao, ma sa puna mai ai le toto ma le vai.”21 “Na luluina le eleele” ma “o le taitai o le toaselau ma e na leoleo ia Iesu faatasi ma ia, na latou iloa le mafuie ma mea uma na faia, ona latou matua matatau ai lea, ua faapea ane, E moni, o le Alo lava lenei o le Atua.”22 I upu o le viiga, “Ia le galo ia te a’u, Lo’u Faaola e, Na maligi Lou toto ma maliu mo a’u.”23 Ou te le iloa pe fia ni mataua na faamaligiina mo a’u.
“O le mea sa Ia faia sa na o le Atua lava e mafai ona faia. I le avea ai ma Alo Pele e Toatasi o le Tama i le tino, sa maua ai e Iesu uiga auaumama paia. Sa na o Ia le tagata ua fanau mai i le tino e mafai ona faatinoina lenei aga e sili ona taua ma silisiliese. I le na o le pau lea o le Tagata sa soifua i le lalolagi e leai se agasala, o lea sa le mafai ai ona oo ia te ia le oti faaleagaga. Ona o Lona tulaga faaleatua, sa ia te Ia foi le mana e pulea ai le oti faaletino. O lea na Ia faia ai mo i tatou le mea sa le mafai ona tatou faia mo i tatou lava. Sa Ia faatoilaloina le oti faaletino, Sa Ia faia foi ia mafai e i tatou ona maua le mafanafana maoae toafilemu o le meaalofa a le Agaga Paia.24”
O le Togiola ma le Toetu ua faataunuuina ai mea e tele. O le Togiola ua faamama ai i tatou mai agasala i luga o le tuutuuga o lo tatou salamo. O le Salamo o le tulaga lea e tuuina mai ai le alofa mutimutivale.25 Pe a uma mea uma e mafai ona tatou fai e totogi ai tupe uma ma faasa’o o tatou sese, ona aoga lea o le alofa tunoa o le Faaola i o tatou olaga e ala i le Togiola, lea e faamamaina ai i tatou ma mafai ai ona faaatoatoaina.26 O le Toetu o Keriso na faatoilalo ai le oti ma tatou maua ai le faamautinoaga o le ola pe a mavae le oti. Na Ia fetalai: “O a’u nei o le toetu ma le ola: o lē faatuatua mai ia te a’u, e ui lava ina oti, a e ola lava ia.”27 O le Toetu e leai ni tuutuuga ma e faatatau i tagata uma na ola ma o le a ola ai.28 O se meaalofa e leai se tau. Sa faamatalaina lelei e Peresitene Ioane Teila lenei mea ina ua ia saunoa: “O le a talaia tuugamau ma o le a faalogo e ua oti i le siufofoga o le Alo o le Atua, ma o le a latou o mai i fafo, o i latou na faia mea lelei i le toetutu o e amiotonu, ma o i latou na amioleaga, i le toetutu o e amioletonu.”29
E tusa ai ma a tatou faatinoga i le olaga nei ma le Togiola, na tuuina mai ai e Peresitene J. Reuben Clark Jr. le malamalamaaga taua lenei ina ua ia saunoa:
“Ou te lagona o le a tuuina mai [e le Faaola] lena faasalaga, lea o se mea faatauvaa lava o le a tauamiotonuina ai la tatou solitulafono. Ou te talitonu o le a ia aumaia i totonu o lona faamasinogatonu le alofa atoa e le muta, ma faamanuiaga ma le alofa mutimutivale ma le agalelei ma le malamalama ua ia te ia. …
“Ma i le isi itu, ou te talitonu a oo loa i le faia o taui mo a tatou amio lelei, o le a ia tuuina mai ia i tatou le maualuga e mafai ona tuuina mai, a’o i ai pea i le mafaufau le agasala sa tatou faia.”30
E pei ona tusia e Isaia, afai o le a tatou foi mai i le Alii, o le a ia matua faamagaloina.”31
Ua poloaiina i tatou ia manatua mea taua na tutupu i le va o le Atua ma tagata, le Faasatauroga, ma le Togiola e ala i le aai ma feinu i le faamanatuga i vaiaso taiasi. I le agaga o tatalo o le faamanatuga, tatou te aai ai i le areto ma feinu i le vai e manatua ai le tino ma le toto na ositaulagaina mo i tatou, ma e tatau ona manatua pea o Ia, ma tausi Ana poloaiga ina ia tatou maua pea Lona Agaga e faatasi ma i tatou.
Na tauaveina e lo tatou Alii lava Ia agasala uma, o tiga, puapuaga, ma ma’i o i latou uma ua soifua pe o le a soifua mai.32 E leai se tasi na puapuagatia e pei ona sa i ai o Ia. Ua Ia silafia o tatou tofotofoga i le tino e ala i Lona lava poto masani. E tali faapei o tatou taumafai e fe’a’ei i le Mauga o Evaresi ma na o ni nai futu muamua tatou te ausia. Ae sa Ia a’ea uma le 29,000 futu e oo i le tumutumu o le mauga. Sa Ia puapuagatia e sili atu nai lo le mea e mafai e se isi lava tagata soifua.
O le Togiola e le gata ina manuia ai le tagata agasala ae e manuia ai foi i latou na agasala fua---o lona uiga, o e na afaina fua. E ala i le faamagalo atu o i “latou o e agaleaga mai ia te i tatou” (FIS. Mata. 6:13) e aumaia e le Togiola se fuataga o le filemu ma le mafanafana ia i latou na afaina fua ae mama i agasala a isi. O le faapogai faavae mo le faamalologa o le agaga o le Togiola a Iesu Keriso. E moni lea mea pe mai le tiga o se puapuaga faaletagata po o se mala matuia faaleatunuu e pei ona tatou iloa talu ai nei i Niu Ioka ma Uosigitone, D.C., ma le nuu tuaoi o Pittsburgh.
Sa tusia e se tuafafine sa oo i se tete’aga tiga, lona aafiaga i le utuvai mai le Togiola. Fai mai a ia: “O la ma tete’aga … e lei faamatuu mai ai a’u mai le matafaioi o le faamagalo atu. Sa ou manao moni e fai, ae sa peiseai na poloaiina a’u e faia se mea sa ou le mafaia.” Na tuu atu e lana epikopo ni nai fautuaga poto: “Teu i lou loto se nofoaga mo le lotofaamagalo, ma a oo ina sau, ia e faaulufaleina i totonu.” Sa mavae ni masina se tele a o faifai pea lenei tauiviga e faamagalo. Sa ia tomanatu: “I na taimi uumi, o le lototatalo, … sa ou tapa i se punavai ola o le faamafanafanaga mai lo’u Tama Faalelagi alofa. Sa ou lagonaina e le o tu lata mai ma sioa mai ia te au i lo’u le ausiaina lava o le lotofaamagalo; ae sa faanoanoa o ia ma a’u a o ou tagi. …
“I le faavasegaga mulimuli, o le mea na tupu i lo’u loto e mo a’u, o se faamaoniga ofoofogia ma faavavega o le Togiola a Keriso. Sa ou vaai pea e le aunoa i le Togiola o se auala e galue ai le salamo i le tagata agasala. Ou te lei iloaina na te faia ai foi ia mafai mo le tagata e agasala ia taliaina i lona loto le filemu matagofie o le lotofaamagalo.”33
O e manunua e tatau ona faia le mea latou te mafaia e galulue ai i o latou tofotofoga, ma o le a “fesoasoani le Faaola i ona tagata e tusa ma o latou vaivaiga.”34 O le a Ia fesoasoani ia i tatou e tauaveina a tatou avega. O nisi manua e matua tiga lava ma loloto e le mafai ona faamaloloina e aunoa ma le fesoasoani mai se mana sili atu ma le faamoemoe mo le faamasinoga tonu ma le faaatoatoaina i le olaga a sau. Talu ai ona sa mafatia le Faaola i soo se mea ma mea uma lea e mafai ona tatou oo i ai,35 e mafai ona Ia fesoasoani i e vaivai ia malolosi. Na Ia oo i ai i nei mea uma. E malamalama o Ia i o tatou tiga ma o le a savavali faatasi ma i tatou e oo lava i o tatou taimi sili ona pogisa.
Tatou te matuai mananao mo faamanuiaga tupito o le Togiola—ina ia tasi ma Ia, ina ia i ai i lona afioaga paia, ina ia valaauina taitoatasi i igoa a o Ia faafeiloaia i tatou i le aiga ma se laufofoga fiafia, ma talotalo mai ia i tatou ma aao o loo faaloaloa mai ina ia fusia i Lona alofa e le mavae.36 E maeu le faagaeetia o lenei mea o le a i ai pe afai e mafai ona tatou lagonaina le agavaa e i ai i Lona afioaga! O le meaalofa na tuuina fua mai o Lana taulaga togiola mo i tatou uma taitoatasi e na o le pau lea o le ala e mafai ai ona lava lo tatou faaeaina ina ia tutu atu ai i Ona luma ma vaai atu i Ona fofoga. O le savali laualuga o le Togiola o le alofa atoatoa lea o le Faaola mo i tatou uma taitoatasi. O se alofa e tumu i le alofa mutimutivale, onosai, faapalepale, ma le sili o na mea uma o le faamagalo atu.
“O uunaiga faatiapolo a Satani o le a faaumatiaina soo se faamoemoe o loo ia i tatou e faatoilaloina a tatou mea sese. O le a ia taumafai ina ia tatou lagonaina o loo se i tatou, ma ua leai se faamoemoe. O le eseesega, na afio ifo Iesu i lalo ia i tatou ma sii a’e tatou i luga. O lo tatou salamo faapea ma le meaalofa o le Togiola, e mafai ai ona tatou saunia ina ia agavaa e tutu atu i Lona afioaga. Ou te molimau atu ai i le suafa o Iesu Keriso, amene.