Malongesha a kudi Esetê

Kudi Madelyn Maxfield

Makazina a Ekelezia

Mushindu kayi udi Dipungila Dikulukulu mua kukuambuluisha ku malu eba a lelu?

Nudi mua kuela meji ne kanuena ne bintu bia momumua ne bantu ba mu Dipungila Dikulukulu.

Ne mu mishindu mikuabu, nudi ne kabingila. Malu anudi nututakena nawu kaena afuanangana menamena neabu to.

Anyi ke momu?

Nukadiku bakuila ditabuja dienu anyi? Nukatu benzela muntu tshintu tshimpa yeya kubenga kunuela tuasakidila anyi? Nukatu bafikila muntu tshiji? Pikala diandamuna dieba didi “eyowa” ku lumua lua nkonku yonsu ayi, udi ne bia bungi bia momumua biwudi kuyi welela meji ne muyuki wa Esetê mu Dipungila Dikulukulu.

Muyuki

Mutantshi mula mupita bua dibutula dia Isalele ne ditangalaja Bena Isalele, Mfumu Ahashawelosha wa Pelese uvua ukeba Mukaji wa Mfumu mupia-mupia. Umua wa ku bansonga bakaji bavuabu bamutuadila kuvua Esetê, muana wa nshiya wa Bena Juda mukolesha kudi muanabu, Môdekai. Ahashawelosha wakakemeshibua kudi Esetê ne wakamusungula yeya bu mukaji wenda. Bintu kumueka bimpa bua Esetê. (Tangila Esetê 2.)

Kadi dituku dikuabu, Hamana mubedi wa mfumu, wakafika tshiji pavua Môdekai mubenga bua kuinama kudiye. Wakibishisha Ahashawelosha bua angata dipangadika bua kabiyi anu Môdekai kadi Bena Yuda bonsu ba mu musoko bikala ne bua kushipibua. Pakumvua Môdekai, wakalomba kudi Esetê bua asuisha mfumu bua akudimuna dipangadika . (Tangila Esetê 3–4.)

Ku mbangilu, Esetê uvua ne bowa—bua kukumbula mfumu kakuyi dibikila bivua ne dinyoka dia lufu, nansha mukaji wa mfumu. Kadi wakalomba kudi Bena Yuda bonsu bua bajila biakudia buenda ne wakaya kudi Ahashawelosha. Diakalenga, wakamuakidila. Esetê wakamubuluila ne uvua Muena Yuda ne tshifufu tshia Hamana tshivua mua kumubutula penda. Ahashawelosha wakafikila Hamana tshiji bua dishima ne wakamushipa, ne Bena Yuda bakapanda. Bena Yuda bakasanka, ne bantu bungi bakalua Bena Yuda. (Tangila Esetê 4–8.)

Pamuapa kanuakututakena ne bualu bu ebu. Kadi tudi mua kulonga bia bungi pa kumona mushindu udi bantu benza mu makenga abu.

Sungula Ditabuja

Bu Muena Isalele mu buloba bua benda, tshitendelelu tshia Esetê katshivua tshia bungi to. Nansha Môdekai wakamubela bua kusokoka tshisamba tshienda pakaluaye mukaji wa mfumu (tangila Esetê 2:10). Kadi, pavua bantu benda bikala mu njiwu Esetê kakalekela ditabuja dienda to. Wakasungu bua kulonda Nzambi mu mishindu yonsu.

Mulombodi Mukulu M. Nelson (1924–2025) wakalongesha musangu mukuabu, “Muntu nansha umua kena ne bua kumbusha, kushintulula, anyi kufila mushinga wa bungi pamutu pa bibikidila bia dinanukila bisatu ebi: ‘muaba wa Nzambi,’ ‘muana wa tshipungidi,’ ne ‘muyidi wa Yezu Kilisto.’” Esetê wakafila tshilejilu tshia lungenyi elu biakana. Nansha pikala dilonda Nzambi katshiuvua disungula diteketa anyi dia bukua bantu, wakasungula bua kuikala muyidi wa lulamatu ne wakateka dieyemena dienda mu Yeya.

Sungula buimpa

Ku mbangilu kua muyuki, Môdekai wakapandisha Mumfu Ahashawelosha ku dienyanga dia tshifufu tshimuelela bua kumupangila. Kadi kakapeta ditapishi nansha dimua bua tshienzedi etshi. Pa mutu pa etshi, “wakafutshibua” ne lukinu ne tshibawu tshia lufu bia Hamana bua tshisamba tshienda.

Bivua mua kuikala bipepela bua Môdekai kudiumvua mupangila anyi mulekela kudi Nzambi. Kadi wakatunguluka kueyemena kudiyi. Ne mu diba dia Nzambi, mfumu wakamanya tshivua Môdekai muenza (tangila Esetâ 6:1–3). Môdekai wakapeta kanemu kanena, ne bantu benda bakapandishibua.

Misangu mikuabu, bienzedi bimpa biwudi wenza kabiena mua kumanyibua. Katshiena tshiumvuija ne katshiena ne mushinga to. Disungula bua kusadila bakuabu ne kuikala bu Kilisto didi misangu yonsu dituala mabenesha, nansha pawikila kuyi wuâmona diambedi. Nanku pawudi ne mushindu wa kuikala ne bulenga, wukuata—nansha muntu yeya mumona anyi to.

Sungulula Dibuikidila

Ku luseka lukuabu, muntu umua udi uleja tshidi katshiyi tshia kuenza.

Nsombelu wa Hamana uvua umueneka muimpa ku mbangilu kua muyuki. Uvua ne mudimu munena wa kanemu, bubanji bua bungi, ne dîku dia nsongu. Kadi, wakasungula bua kukuma mutshima ku tshivuaye kayi natshi. Wakashipibua ku tshiji ku dibenga dia Môdekai bua kuinama kumpala kuenda. Tshifufu tshia disombola dia Hamana tshiakalombola ku dipona dienda.

Yezu Kilisto wakalongesha ne, “udi ne nyuma wa dikokangana kena wanyi to” (3 Nefi 11:29). Wakatuelela kabidi mukenji, “suai badi nenu lukuna, lombelai badi banukengesha Nzambi” (Matthew 5:44). Pawudi umvuila muntu tshiji, teta bua kubenga kuenzela mu tshiji. Nanku, sambila Tatu wa mu Diûlu bua akuambuluisha bua kubuikidila bakuabu ne kuenza ne dinanga.

Kadi Wewa?

Musangu walua uwatutakena ne bualu bua dikenga, udi mua kupeta makanda ne buludiki pawudi “ufuanyikija mifundu yonsu” (1 Nefi 19:23) kuwudi. Pawudi ukeba mapetangana pankatshi pa mulubu wabu ne mulubu weba, newujandula ne mifundu eyi ya mutantshi mula idi mua kuikala ne mandamuna awudi nawu dijinga.

© 2026 by Intellectual Reserve, Inc. All rights reserved. Bipatula mu USA. Dianyisha mu: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, August 2026. Tshiluba. 20077 760