Tej Lus Qhia Los ntawm Exethaws

Los ntawm Madelyn Maxfield

Lub Koom Txoos cov Ntawv Xov Xwm

Yog li cas Phau Qub thiaj pab tau koj kov yeej koj tej teeb meem niaj hnub no?

Tej zaum koj xav hais tias koj yeej tsis zoo li cov neeg nyob hauv Phau Qub hlo li.

Muaj tej yam uas koj xav yog lawm. Tej teeb meem uas koj raug niaj hnub no los tej zaum tsis zoo li lawv tej teeb meem.

Tiam sis puas yog li ntawd tiag?

Puas muaj ib lub sij hawm uas koj yuav tsum tiv thaiv koj txoj kev ntseeg? Koj puas tau ua ib yam dab tsi zoo rau ib tug neeg uas tsis hais ua tsaug rau koj? Puas muaj ib lub sij hawm thaum koj npau taws rau ib tug neeg? Yog tias koj hais tias “muaj” rau ib lo lus nug twg, ces tej zaum koj zoo li cov neeg nyob hauv zaj dab neeg hauv Phau Qub uas hais txog Exethaws.

Zaj Dab Neeg

Tom qab Ixayees raug puas tsuaj thiab cov neeg Ixayees tawg ri niab, Vaj Ntxwv Xawxes ntawm Pawxias nrhiav ib tug poj niam tshiab. Ib tug ntxhais hluas uas lawv coj tuaj rau nws yog Exethaws, ib tug me nyuam ntsuag uas nws txiv ntxawm, Maudekhais tu. Xawxes nyiam Exethaws thiab xaiv nws los ua nws tus poj niam. Yeej zoo rau Exethaws lub neej. (Saib Exethaws 2.)

Tiam sis muaj ib hnub, Hamas uas yog tus uas vaj ntxwv tsa ua ib tug nom, npau taws thaum Maudekhais tsis kawm txhos caug pe nws. Nws ntxias Xawxes kom tsim kev cai hais tias yuav tsum muab Maudekhais thiab tag nrho cov neeg Yudais hauv lub nceeg vaj ntawd tua tuag. Thaum Maudekhais kawm li no, nws thov Exethaws mus hais tus vaj ntxwv kom rhuav txoj kev cai ntawd. (Saib Exethaws 3–4.)

Thaum xub thawj, Exethaws ntshai heev—yog yus mus ntsib tus vaj ntxwv thaum nws tsis tau hais kom yus tuaj ces tej zaum yus yuav raug tua tuag, tsis hais niam vaj ntxwv los yog. Tiam sis nws thov kom cov neeg Yudais yoo mov rau nws thiab mus ntsib Xawxes. Nws muaj hmoov zoo uas tus vaj ntxwv cia nws los. Exethaws qhia tus vaj ntxwv hais tias nws yog neeg Yudais thiab Hamas lub tom txwv yuav ua rau nws raug puas tsuaj thiab. Xawxes chim siab rau Hamas txoj kev ntxias thiab txib kom nws raug tua tuag, thiab cawm cov neeg Yudais dim. Cov neeg Yudais muaj kev xyiv fab, thiab neeg coob tau los ntseeg li cov Yudais thiab. (Saib Exethaws 4–8.)

Nyaj koj yuav tsis raug xwm txheej zoo li no. Tiam sis koj tseem kawm tau ntau yam yog koj paub tias tib neeg ua li cas thaum lawv raug kev sim siab.

Xaiv Kev Ntseeg

Vim nws yog ib tug neeg Ixayees nyob hauv pej kum teb chaws, tib neeg tsis tshua nyiam Exethaws txoj kev ntseeg. Maudekhais kuj hais kom nws tsis txhob qhia tias nws yog neeg dab tsi thaum nws yuav tus vaj ntxwv (saib Exethaws 2:10). Tiam sis, thaum nws cov neeg yuav raug xwm txheej phem, Exethaws tsis tau tso nws txoj kev ntseeg tseg. Nws xaiv coj raws li Vajtswv hais tsis tu tsis tseg.

Thawj Tswj Hwm Russell M. Nelson (1924–2025) qhia hais tias, “Yeej tsis muaj ib yam twg uas yuav pauv, hloov, los sis kov yeej peb yam tseem ceeb tshaj plaws ntawm peb: ‘Vajtswv tus me nyuam,’ ‘tus me nyuam khi lus,’ thiab ‘Yexus Khetos tus thwj tim.’” Exethaws coj yam ntxwv txog lub tswv yim no zoo tag nrho. Txawm yog txoj kev coj raws li Vajtswv tsis yog ib qho yooj yim los sis tsis yog ib qho uas sawv daws pom zoo, nws xaiv los ua ib tug thwj tim rau siab ntseeg thiab tso siab rau Vajtswv.

Xaiv Kev Ua Siab Zoo

Nyob hauv zaj dab neeg no, Maudekhais cawm Vaj Ntxwv Xawxes lub neej thaum nws kawm txog luag lub tom txwv ntxeev siab rau tus vaj ntxwv. Tiam sis nws tsis tau txais nqi zog rau nws txoj kev ua zoo no. Ntshe nws tsuas txais tau Hamas txoj kev ntxub ntxaug thiab raug kev txiav txim yuav muab nws cov neeg tuag xwb.

Yeej yuav yooj yim rau Maudekhais xav hais tias Vajtswv ntxeev siab rau nws los sis tau tso nws tseg. Tiam sis nws tseem tso siab rau Vajtswv. Thiab raws li Vajtswv lub sij hawm, tus vaj ntxwv kawm tias Maudekhais tau ua dab tsi lawm (saib Exethaws 6:1–3). Thaum kawg Maudekhais txais nws nqi zog, thiab nws haiv neeg txais kev cawm seej.

Tej lub sij hawm, tib neeg yuav tsis pom tej yam zoo uas koj ua. Qhov no tsis txhais hais tias tej ntawd tsis muaj nqi hlo li. Thaum yus xaiv pab lwm tus thiab ua li Yexus Khetos ua ces yeej yuav tau koob hmoov, txawm yog yus tsis pom tam sim ntawd. Yog li ntawd, thaum koj muaj cib fim ua zoo rau lwm tus, cia li ua li ntawd—tsis hais lwm tus pom los tsis pom los yog.

Xaiv Kev Zam Txim

Nyob hauv zaj dab neeg no kuj muaj ib tug neeg uas coj yam ntxwv kom yus paub tias yus yuav tsum tsis txhob ua dab tsi.

Nyob hauv zaj no thaum xub thawj Hamas lub neej yeej zoo heev. Nws muaj ib txoj hauj lwm uas sawv daws saib rau nqi, nws muaj nyiaj txiag, thiab ib tsev neeg uas vam meej. Tiam sis, nws xaiv kom ntshaw tej yam uas nws tsis muaj. Nws chim siab vim Maudekhais tsis kam txhos caug pe hawm nws. Hamas txoj kev tsim tom txwv ua pauj ua rau nws raug poob mus.

Yexus Khetos qhia hais tias, “Tus uas muaj siab xav sib cav sib ceg twb tsis yog los ntawm kuv” (3 Nifais 11:29). Nws kuj txib peb hais tias, “Hlub nej cov yeeb ncuab, foom koob hmoov rau cov uas foom tsis zoo rau nej, ua zoo rau cov uas ntxub nej, thiab thov Vajtswv rau cov uas txhob txwm siv nej thiab tsim txom nej” (Mathais 5:44). Thaum koj chim siab rau leej twg, cia li tswj koj lub siab kom txhob ua tej yam thaum koj npau taws. Tiam sis, thov Leej Txiv Saum Ntuj Ceeb Tsheej pab koj zam txim rau nws thiab hlub nws.

Koj Nev?

Lwm lub sij hawm koj raug ib yam dab tsi nyuaj, koj txais tau dag zog thiab kev pab thaum koj “muab tag nrho tej vaj lug kub coj los piv” (1 Nifais 19:23) rau koj tus kheej. Thaum koj nrhiav tej yam uas zoo ib yam los ntawm lawv zaj dab neeg thiab koj zaj dab neeg, koj yuav kawm hais tias tej zaj thaum ub los tej zaum muaj tej lus teb rau koj niaj hnub nim no.

© 2026 los ntawm Intellectual Reserve, Inc. All rights reserved. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, August 2026. Hmong. 20077 295