Zaj Lus hauv phau For the Strength of Youth Txhua Hli, Xya Hli Ntuj 2026
3 lo Lus Dag txog Yawg Suab cov Koob Hmoov
Yawg suab txoj koob hmoov yog ib lub txiaj ntsim zoo kawg los ntawm Leej Txiv Saum Ntuj Ceeb Tsheej.
Cov duab los ntawm Jarom Vogel
Kev txais koj yawg suab txoj koob hmoov yog ib lub cim fim zoo kawg. Thaum ib tug yawg suab tso tes saum koj taub hau, nws foom ib txoj koob hmoov rau koj kom pab koj paub tias Leej Txiv Saum Ntuj Ceeb Tsheej hlub koj npaum li cas thiab xav kom koj tau tej yam zoo.
Ib txhia neeg txhawj txog lawv yawg suab txoj koob hmoov. Nov yog peb lo lus dag uas tej zaum ua rau tib neeg txhawj, thiab tej txoj kev uas zoo dua xav txog.
Lus Dag: Yog hais nyob hauv yawg suab txoj koob hmoov ces yeej yuav muaj li ntawd xwb.
Lus Tseeb: Koj yawg suab txoj koob hmoov yog ib txoj kev pab coj koj lub neej.
Koj yawg suab txoj koob hmoov muaj tej lus ntuas thiab tej lus cog tseg. Tej zaum yuav hais txog tej yam uas koj muaj peev xwm ua thiab cov koob hmoov uas koj txais tau yog koj rau siab ntseeg, tiam sis yeej yuav tsis hais txhua yam uas koj yuav txais hauv koj lub neej.
Yog tias xav kawm ntau tshaj los ntawm koj yawg suab txoj koob hmoov, cia li nyeem ntau thiab xav txog txoj koob hmoov no ntau thiab. Yeej yuav tsis hais txog txhua yam rau koj, tiam sis lub ntsiab thiab qhov uas koj siv li cas hauv koj lub neej yuav hloov thaum koj loj hlob tuaj thiab kawm tej yam tshiab. Kev nyeem ntau zaus yuav pab koj txais kev tshwm sim thiaj muaj cib fim pab koj hauv koj lub neej.
Lus Dag: Koj yeej yuav tsis txais ib txoj koob hmoov yog tias tsis tau hais li ntawd nyob hauv koj yawg suab txoj koob hmoov.
Lus Tseeb: Yeej tsis muaj ciaj ciam uas txwv Leej Txiv Saum Ntuj Ceeb Tsheej tsis foom koob hmoov rau koj thaum koj rau siab ntseeg.
“Qhov uas ib tug neeg yawg suab txoj koob hmoov tsis hais txog ib lub sij hawm tseem ceeb hauv nws lub neej, xws li kev mus ua tub txib los sis kev sib yuav, los yeej tsis qhia tias yuav tsis muaj cib fim ua tej ntawd.”
Leej Txiv Saum Ntuj Ceeb Tsheej yeej yuav foom koob hmoov rau koj txawm tsis hais txog tej koob hmoov ntawd nyob hauv koj yawg suab txoj koob hmoov. Qhov uas tej zaum koj yuav tsis txais ib txhia ntawm cov koob hmoov ntawd nyob hauv lub neej no los kuj muaj tseeb thiab (saib Lus Qhuab Qhia thiab Kev Khi Lus 58:3–4). Txawm yog koj tau koob hmoov tam sim no los sis thaum yav tom ntej los Leej Txiv Saum Ntuj Ceeb Tsheej yeej yuav ua raws li Nws tau cog lus lawm.
Lus Dag: Qhov uas koj yawg suab txoj koob hmoov ntev li cas qhia tias koj tsim nyog npaum li cas los yog koj npaj siab npaum li cas kom txais tau.
Lus Tseeb: Koj yawg suab txoj koob hmoov los twb hais raws li tej yam uas koj yuav tsum paub.
Thaum ib tug yawg suab foom koob hmoov rau yus, tus Vaj Ntsuj Plig Dawb Huv tshoov nws lub siab kom paub tias yuav tsum hais li cas thiab Leej Txiv Saum Ntuj Ceeb Tsheej xav kom koj paub dab tsi. Ib feem ntawm cov koob hmoov yeej tsis ntev tiam sis muaj hwj chim; muaj lwm cov koob hmoov uas ntev zog thiab hais lus ntau dua. Qhov uas txoj koob hmoov no ntev los luv npaum li cas yeej tsis qhia tias koj tsim nyog, npaj siab, los sis koom siab nrog Leej Txiv Saum Ntuj Ceeb Tsheej.
Yawg suab txoj koob hmoov muaj nqis tiag tiag los ntawm txoj kev coj koj sab ntsuj plig thiab tej lus cog tseg, tsis muaj nqis vim txoj koob hmoov ntawd ntev heev. Leej Txiv Saum Ntuj Ceeb Tsheej txoj kev hlub thiab tej lus cog tseg los yeej ntsuas tsis tau los sis hais tau thaum siv ob peb lo lus xwb.
Yawg suab txoj koob hmoov yog ib lub txiaj ntsim zoo kawg los ntawm Leej Txiv Saum Ntuj Ceeb Tsheej. Kev nyeem, kev kawm, thiab kev xav txog txoj koob hmoov no yuav txhawb koj lub zog thiab pab koj hloov los ua tus neeg uas Leej Txiv Saum Ntuj Ceeb Tsheej xav kom koj ua.
© 2026 los ntawm Intellectual Reserve, Inc. All rights reserved. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, July 2026. Hmong. 20042 295