Mukenjiwa ku Ngondu Bua Dikankamika dia Bansonga, Ngondu Muinayi 2026
Panyima pa Bilema Bieba—Nansha bia Binena
Tudi mua kulonga bia bungi kudi Mupostolo Petelo pa Mupandishi, Bupikudi buenda, ne kuteta kabidi.
Peter’s Denial [Divila dia Petelo], kudi Carl Bloch
Tuetu bonsu tudi ne tshivulikulu nansha tshimua tshitudi tujinga bua kupua moyo kashidi. Nansha pikalatshi tshivua tshikondu tshia difuishibua bundu dikola, njiwu ya mubidi ya busami, anyi diakula pawuvua muamba mêyi awudi ujinga kupingajilula, kudi bikondu bivula mu moyo mudi mbota wa “enzulula” anyi nansha mbota wa “kupula” muikala umvuika mukola.
Dîyi dia Buprofete Dibi Dikumbana
Mupostolo Petelo uvua muntu wa nsongo mu Dihungila Dipia-dipia. Wakapeta ditabuja ne dikima dia kuenda pa mâyi mutangila kudi Yezu, kadi bikondu bipita pashisha wakalekela bowa buenda kumutshimunabu ne wakabangisha kudina, wela mbila kudi Mukalenga bua diambuluisha (tangila Matayo 14:28–31). Patudi katuyi bamanya mumvuija a bungi pa moyo wa Petelo, katuena bamanya tshikondu tshiakadilayi bikola.
Anu meba makesa kumpala kua Yezu Kilisto kubika ku lufu, wakafila dîyi dia buprofete ne Petelo uvua ne bua kumupidia misangu isatu kumpala kua tshitala kusama misangu ibidi. Petelo wakabenga bua kuitaba dîyi dia buprofete bu edi ne “wakamba ne bulobo ne, Bikala bualu bunkuata bua kufua n’ebe, tshiena nkuhidia.” (Mâko 14:31).
Bushuwa, dîyi dia buprofete dia Mupandishi diakenzeka bulelela. Ne luzakalu ne bowa binyunguluka dikuata dia Mupandishi, bukitu bua Petelo buakamupangila. Panyima pa mumana kupidia ne kavua mumanya Mupandishi misangu ibidi, ne pabuipi ne kutshienza bua musangu muisatu, Petelo “wakabanga kudiela mulau ne kuditshiha ne, Tshiena mumanye muntu eu unudi nuamba” (Mâko 14:71).
Pakadila tshitala misangu ibidi ne Petelo kuvulukayi dîyi dia buprofete dia Mupandishi, “ …wakadila bikole” (Matayo 26:75).
Kadi atshi katshiena ndekelu wa muyuki to!
Dikudimuka, bua Kashidi
Ku bionsu bitudi mua kulonga mu mifundu, bowa bua Petelo kabuvua bumbusha bujadiki buvua nabu Petelo bua Yezu Kilisto to. Wakajadika ne dikima dionsu bua Mupandishi ku tshipolu tshionsu, kabiyi kulonda njiwu ya nkaya ivuayi mua kupeta mu kutshienza. Vuluka, Petelo uvua ulongesha bantu bavua anu bapopela Yezu Kilisto pa mutshi mutshiamakana! Njiwu ivua milelela.
Pakondopa Petelo muntu uvua mulema wa kutshileledi, mu kumuambila, “Mu dina dia Yezu Kilisto wa ku Nazaleta, enda biebe” (Bienzedi 3:6), wakakuatshibua pamua ne Yone ne kuedibuayi nkonku pa mushindu uvuayi muenza tshishima etshi.
Petelo wakanduma ne dikima, “Buonso buenu ne Bena Isalele bonso numanye ne, Mu dina dia Yesu Kilisto wa ku Nazaleta, unuakushiha ku mutshi mutshiamakane, wakabisha Nzambi ku lufu, mu dina edi mene mudi muntu eu, udi muimane ku mpala kuenu, mukoleshibue.
“Yezu udi dibue diakahidiabo kunudi nuenu bibaki ba nsubu, kadi diakatekabo ku mutu kua ditumba. Mu munga muntu yonso kamuena luhandu, bualu bua kakuena dinga dina munshi mua diulu, diba bantu, didi dimanye mua kusungila” (Bienzedi 4:10–12).
Diandamuna kayi dia dikima! Ne tshimanyinu tshilelela tshia matuishibua enda.
Basadidi Badi Kabayi Bakana, Bakumbana biakana bua Kusadila
Yonsu wa kutudi nêenza bubi mu moyo ewu. Pakumbusha madienzeja etu mashema, netukuluka kakesa ku matekemena ne meji bietu ku diba ne diba. Bu muakalongesha musangu mukuabu Mulombodi Mukulu Jeffrey R. Holland (1940–2025), Mulombodi Mukulu wa Mpuilu wa Bapostolo Dikumi ne Babidi, “Pakumbusha bua Muanenda Umuepela Muakana, Nzambi mmukuata mudimu anu ne bantu bavua kabayi bakana.”
Bupuangana bueba bua mu nyuma kabuena bujadikibua kudi bilema bieba—nansha bia binena to! Bualu wakakudimuna mutshima ne Kilisto wakamufuila lusa, divila dia Petelo dia Kilisto kadiakamupangisha bua kujadika pashisha, kulongesha ne kukudimuna mitshima ne bukola bunena to. Mifundu idi miûla tenta ne bilejilu bia bayidi bakuabu bavua benza bubi, bakudimuna mutshima, ne batungunuka dienda ne Kilisto.
Satana neateta misangu yonsu bua kukutuishisha ne bilema bieba biakupita bungi ne kuakuikala mukumbana bua kubitshimuna. Benga mashimi enda!
Muanetu Mukaji Tamara W. Runia, Mubedi Wakumpala mu Bulombodi Bukulu Bunena bua Bansonga Bakaji, wakalongesha: “Nudi ne bua kuteleja etshi, nunku nengamba mêyi â ne dîyi dikola: Kuena dîyi mu mutu weba anyi bilema biwudi muenza to. Udi mua kujinga bua kutshiamba ne dîyi dikola. Ambila Satana, ‘Lelu To.’ Muela panyima peba.
“Umvua dibikila adi, kanyinganyinga ka bunzambi kadi kakupingaja kudi Mupandishi weba, ne tangila ngâsa wenda ubuela mu moyo weba ne mioyo ya aba bawudi munanga. Ndi nkulaya ne tusunsa tukesa tutudi tutuala mutshima wetu mutshibuka kudiyi mu dikima, udi koku pa lukasa.”
Christus Consolator [Kilisto Musambi], kudi Carl Bloch
Matuku Malenga Makuindila
Mu tshikondu tshia Pâsaka etshi, pawudi unana meji onsu pa Bupikudi bua Mupandishi, vuluka ne bukola bua kukudimuna mutshima ne kuteta kabidi budi dipa dinena dia ku onsu awudi mua kupeta. Kupitshila ku Yezu Kilisto, bilema bieba bionsu bidi mua kubuikidibua ne kumbushibua bu nkanu ya bujitu.
“Mupandishi udi bukenka bua kashidi kupita muidima wa bundu,” mudi Muanetu wa Bakaji Runia mulongesha.
Kupitshila ku Yezu Kilisto, ditekemena didi misangu yonsu dikenka bikola ditangila kumpala pawudi ushala mushindamena pa Yeya.
© 2026 by Intellectual Reserve, Inc. All rights reserved. Bipatula mu USA. Dianyisha mu: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, April 2026. Tshiluba. 20064 760