Mukenji wa ku Ngondu Bua Dikankamika dia Bansonga , Ngondu wa Kumpala 2026
Enda Nanyi
Tshiena Bualu tshia Bansonga 2026 netshiambuluisha bua kukuvuluija ne pawudi ushala pabuipi ne Nzambi, Naenda neba—misangu yonsu.
Kumbukila ku dia bakaji kuya ku dia baluma: Tamara W. Runia, Mubedi wa kumpala; Emily Belle Freeman, Mulombodi Mukulu ne Andrea Muñoz Spannaus, Mubedi Muibidi
Kuena Nkayeba To
Ukatu mulombibua bua kuenza bualu buwudi kuyi mumanya ne udi mua kubuenza anyi? Pamuapa uvua udiumvua ne kuena ne bukola bukumbana anyi ne meji makumbana, anyi uvua ne bôwa bua ne bakuabu bavua mua kukuseka ne kukulumbuluisha. Biwikala ukatu mudiumvua mushindu ewu, kuena nkayeba to.
Kukadi bidimu binunu ne binunu, kuvua muntu mukuabu dina dienda Henoka. Nzambi uvua mulomba Henoka bua kuyisha bantu ditonda dia bubi—bamua ba ku bena tshikisu tshikola bavua buloba kabuyi buanji kumona.
Henoka kavua wela meji ne uvua mua kuenza bualu ebu to. Wakambila Nzambi ne utshivua tshitenda, muntu nansha umua kavua mumunanga, ne “uvua ne lutatu mu diakula” (tangila Mose 6:31).
Kadi Nzambi wakapesha Henoka mulayi. Wakambila muntu uvua ne bôwa ne, “ndaku wenza bu mundi mukulomba” ne mikuna neinyema kumpala kueba, ne misulu neikudimuna mbangilu wayi; ne wushala mu mema ne mema mu wewa, nanku enda nanyi” (Mose 6:32, 34).
“Enda Nanyi.” Didi dibikila dimpa ne dipepela.
Nzambi wakalaya Henoka ne yeya muleja dikima ne muangata dipangadika dia kutuadija, Nzambi uvua ne bua kuikala nenda mu tshitupa tshionsu tshia luendu. Nzambi uvua ne bua kupesha Henoka bukokeshi ne kumupesha bukola bua kuenza malu a bungi ne kuikala muntu mupita muvuaye wela meji.
Dimua dia ku mêna a bungi a Mupandishi Emanuela anyi “Nzambi udi netu” (Matayo 1:23). Bidi mu dîna ne bumuntu bua Mukalenga bua kuenda netu. Disungula didi kutudi—netuenda petu nenda anyi?
Lelu, tudi tuangata Henoka bu muntu wa ditabuja ne muprofete ne mulombodi munena. Kadi kumpala kua muprofete Henoka , kuvua nsonga Henoka uvua walakana, kadi uvua musungula bua kuenda ne Nzambi.
Padi malu akola, pawudi umvua ne kuena mukumbana, vuluka mulayi wa Mukalenga kudi Henoka, ne kuwudi. Naenda neba. Kakukulekela nkayeba, nansha bua tshitupa tshikesa to.
Emmanuel. Nzambi udi netu. Nzambi udi netu!
Bulombodi Bukulu Bunena bua Bansonga Bakaji
Kumbukila ku dia bakaji kuya ku dia baluma: David J. Wunderli, Mubedi wa kumpala; Timothy L. Farnes, Mulombodi Mukulu ne Sean R. Dixon, Mubedi Muibidi
Ku Diambuluisha Dienda, Udi mua Kuenza Malu Onsu
Bu nuenu bansongaluma, Mukalenga wakalomba Henoka bua kukumbaja majitu manena a buakuidi. Mudimu wenda uvua wa kuyisha ditonda bubi kudi bantu batshikisu. Henoka wakaleja dielakana dienda. “[Ndi] anu muana mukesa,” muakambaye. “Bantu bonsu mbankina … ndi ne lutatu lua muakulu; bua tshinyi ndi muena mudimu weba?” (Mose 6:31).
Mukalenga wakandamuna ne bukola ne dituishibua. “Ndaku wenza bu mundi mukuambila. … Bulula mukana mueba, nemuwujibua. … Nyuma wanyi udi pamutu peba … ; mikuna neinyema kumpala kueba … ; nanku enda nanyi” (Mose 6:32, 34).
Henoka wakalonga ne padi Nzambi utupesha mudimu, katuena ne bua kuwenza nkayetu to. Patudi tuenza ne tulama bipungidi ne Kilisto, tuenda nenda ne tutangalaja mu bukola buenda—tudi tulua biamu mu bianza bienda.
Anu bu Henoka, udi ne mudimu wa mushinga mukola wa kuenza: kuyisha, kuenza mudimu mu ntempelo, kufila biakudia bia tshijila, kulonga mifundu, kutumikila mikenji ya lumu luimpa, kutonda bubi, kudilongolola bua mudimu wa bumisionere , ne bikuabu. Bidi mua kumueneka bikola. Udi mua kudimona kuyi mukumbana. Bidi bimpa. Kabiena bitangila kubienza nkayeba to. Bidi bitangila kusungula lelu—dituku edi ne matuku onsu—bua kuenda ne Nzambi.
Ku diambuluisha dienda, udi mua kuenza malu onsu. Yeye neakukolesha, neakufuila lusa, ne neakuambuluisha bua kuenza malu kupita muwudi mua kuenza. Mmukunanga! Bu Bulombodi Bukulu Bunena bua Bansonga Baluma, tudi banunanga ne tudi tukeba lukasa bua kudisangisha nenu bua kujandula tshiena bualu tshia 2026: “Enda Nanyi.”
Bulombodi Bukulu Bunena bua Bansonga Baluma
© 2026 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly For the Strength of Youth Message, January 2026. Tshiluba. 19934 760