សារលិខិតប្រចាំខែ ដើម្បីកម្លាំងនៃយុវជន ខែមេសា ឆ្នាំ២០២៥

ជំនួយមកពី ព្រះយេស៊ូវគ្រីស្ទ ៖ មូលហេតុ និង របៀប

ដោយ ប្រិន វីងហ្គឺល័រ

ទស្សនាវដ្ដីសាសនាចក្រ

យល់ពីមូលហេតុដែលព្រះយេស៊ូវគ្រីស្ទគឺជាចម្លើយ និងរបៀបដែលទ្រង់ជួយដល់ប្អូន ។

« ខ្ញុំមានអារម្មណ៍ថាខ្ញុំចេះតែធ្វើខុសរហូត ។ វាពិបាកណាស់ក្នុងការបន្តព្យាយាមធ្វើ » ។

« ស្ថានភាពរបស់ខ្ញុំគឺលំបាកណាស់ ។ ខ្ញុំមិនប្រាកដថាត្រូវឆ្ពោះទៅមុខដោយរបៀបណានោះទេ » ។

« ខ្ញុំព្រួយបារម្ភអំពីអនាគត ។ ខ្ញុំមិនដឹងថាតើខ្ញុំមានអ្វីដែលត្រូវការដើម្បីទទួលបានជោគជ័យនោះទេ » ។

« ខ្ញុំអស់កម្លាំងណាស់ ប៉ុន្តែនៅតែមានរឿងជាច្រើនទៀតដែលត្រូវធ្វើ » ។

តើអ្នកអាចយល់ពីបញ្ហាទាំងនេះទេ ? ប្រធាន រ័សុល អិម ណិលសុន បាន បង្រៀន ថា « មិនថា សំណួរ ឬបញ្ហា អ្វីនោះទេ ចម្លើយ គឺត្រូវបានរកឃើញនៅក្នុងព្រះជន្ម និងការបង្រៀនរបស់ព្រះយេស៊ូវគ្រីស្ទជានិច្ច » ( « ចម្លើយគឺព្រះយេស៊ូវគ្រីស្ទជានិច្ច » » សន្និសីទទូទៅ ខែមេសា ឆ្នាំ២០២៣ [ លីអាហូណា ខែឧសភា ឆ្នាំ២០២៣ ទំព័រ ១២៧ ] ) ។

វាងាយស្រួលក្នុង ការនិយាយ ថា « ព្រះយេស៊ូវគ្រីស្ទគឺជាចម្លើយ » ។ វាត្រូវការការខិតខំប្រឹងប្រែងបន្តិចបន្ថែមទៀត ដើម្បីយល់ពី មូលហេតុ និង របៀប ដែលទ្រង់គឺជាចម្លើយ ។

ហេតុអ្វីបានជាព្រះគ្រីស្ទគឺជាចម្លើយ ?

នៅពេលដែលទ្រង់ទ្រាំទ្រនឹងពលិកម្មដ៏ធួនរបស់ទ្រង់ ព្រះអង្គសង្គ្រោះបានធ្វើរឿងសំខាន់បីយ៉ាង ៖

ទ្រង់បានយកឈ្នះសេចក្តីស្លាប់ ដែលអនុញ្ញាតឲ្យយើងត្រូវបានរស់ឡើងវិញ ។
ទ្រង់បានបង់ថ្លៃសម្រាប់អំពើបាបទាំងអស់ ធ្វើឲ្យវាអាចទៅរួចសម្រាប់យើងដើម្បីប្រែចិត្ត រីកចម្រើន និងត្រឡប់ទៅរកព្រះវិញ ។ ការណ៍នោះក៏ជួយយើងឲ្យអភ័យទោសដល់អ្នកដទៃនៅពេលដែលពួកគេធ្វើអំពើបាប ដោយសារព្រះគ្រីស្ទបានទទួលយកអំពើបាបរបស់ពួកគេមកដាក់លើអង្គទ្រង់ផ្ទាល់ ។
ទ្រង់បានទទួលរងការឈឺចាប់ ការរងទុក្ខ ការល្បួង ជំងឺ និងជំងឺឈឺចាប់ទាំងអស់ ( សូម មើល អាលម៉ា ៧:១១–១៣ ) ។ នោះមានន័យថា ទ្រង់ជ្រាបយ៉ាងច្បាស់ពីរបៀបជួយ និងព្យាបាលប្អូន ហើយអាចពង្រឹងប្អូនឲ្យស៊ូទ្រាំនឹងការសាកល្បង ហើយខិតខំដើម្បីក្លាយជាមនុស្សកាន់តែប្រសើរឡើង ។

ជ្រើសរើសបញ្ហាណាមួយ ហើយប្អូនអាចភ្ជាប់ដំណោះស្រាយទៅនឹងសេចក្តីពិតមួយ ឬច្រើននៅក្នុងចំណោមសេចក្តីពិតទាំងបីនោះ ។

ភាពក្រីក្រឬ ? ដោយសារតែព្រះយេស៊ូវគ្រីស្ទបានដកពិសោធន៍អ្វីៗទាំងអស់ នោះទ្រង់ជ្រាបដឹងយ៉ាងច្បាស់ថាវាយ៉ាងម៉េច ។ ទ្រង់មិនតែងតែយកឧបសគ្គនោះចេញទេ ប៉ុន្តែទ្រង់អាចពង្រឹងមនុស្សដែលកំពុងមានបន្ទុកនោះបាន ( សូមមើល ម៉ូសាយ ២៤:១៥ ) ។

ការបរាជ័យឬ ? ដោយសារព្រះគ្រីស្ទបានយកឈ្នះលើអំពើបាប នោះភាពបរាជ័យរបស់យើងមិនជាអចិន្ត្រៃយ៍នោះទេ ។ ការប្រែចិត្តរួមមានការធ្វើឲ្យប្រសើរឡើង និងការក្លាយជាមនុស្សដែលទ្រង់ជ្រាបដឹងថាយើងអាចក្លាយជាកាន់តែច្រើន ។

ជំងឺឬ ? ដោយសារទ្រង់បានយកឈ្នះលើសេចក្តីស្លាប់ នោះយើងនឹងបានរស់ឡើងវិញជាមួយនឹងរូបកាយដ៏ល្អឥតខ្ចោះ ដោយពុំមានជំងឺ និងការឈឺចាប់ឡើយ ។ ព្រះគ្រីស្ទក៏បាន « [ លើកដាក់ ] លើខ្លួនទ្រង់ … ជំងឺទាំងឡាយ » ( អាលម៉ា ៧:១១ ) ធ្វើឲ្យទ្រង់ជាមនុស្សល្អឥតខ្ចោះដើម្បីផ្តល់ការលួងលោម និងការគាំទ្រផងដែរ ។

តើព្រះគ្រីស្ទអាចជួយដោយរបៀបណា ?

ប៉ុន្តែសូម្បីតែនៅពេលដែលយើងដឹងពី មូលហេតុ ដែលព្រះអង្គសង្គ្រោះគឺជាចម្លើយក្តី ( ដោយសារតែទ្រង់ជានរណា និងអ្វីដែលទ្រង់បានធ្វើសម្រាប់យើង ) យើងនៅតែត្រូវការដឹងពី របៀប ដែលយើងទទួលបានជំនួយ និងកម្លាំងមកពីទ្រង់ ។ ទាំងនេះគឺជាវិធីមួយចំនួន ៖

ការអធិស្ឋាន ។ តាមរយៈការអធិស្ឋានក្នុងព្រះនាមរបស់ព្រះយេស៊ូវគ្រីស្ទ មនុស្សដែលមិនល្អឥតខ្ចោះដូចជាយើងអាចនិយាយជាមួយព្រះដែលល្អឥតខ្ចោះបាន ។ យើងអាចអធិស្ឋានទូលសុំកម្លាំងដែលយើងត្រូវការក្នុងស្ថានភាពណាមួយ ហើយព្រះនឹងឆ្លើយតប—មិនមែនតាមរបៀបដែលយើងចង់បាន ឬរំពឹងទុកនោះទេ ប៉ុន្តែតាមរបៀបដែលនឹងប្រទានពរដល់យើងជានិច្ច ។ ការអញ្ជើញរបស់ព្រះអង្គសង្គ្រោះគឺពិតប្រាកដ ៖ « ចូរសូម ហើយអ្នកនឹងបានទទួល » ( យ៉ូហាន ១៦:២៤; នីហ្វៃទី ៣ ២៧:២៩; គោលលទ្ធិ និង សេចក្ដីសញ្ញា ៤:៧ ) ។

អំណោយទាននៃព្រះវិញ្ញាណបរិសុទ្ធ ។ ព្រះវរបិតាសួគ៌ ព្រះយេស៊ូវគ្រីស្ទ និង ព្រះវិញ្ញាណបរិសុទ្ធគឺរួបរួមគ្នាក្នុងគោលបំណងតែមួយ ។ ពួកទ្រង់ធ្វើការជាមួយគ្នា ! គ្រប់ពេលដែលប្អូនទទួលអារម្មណ៍នៃ ការណែនាំ ឬការលួងលោមមកពីព្រះវិញ្ញាណបរិសុទ្ធនោះប្អូនអាចដឹងបានថាដូចជាព្រះគ្រីស្ទកំពុងជួយប្អូនផងដែរ ។

ការរក្សាសេចក្តីសញ្ញា ។ អែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់ បានបង្រៀនថា « ពាក្យ ផ្លូវនៃសេចក្តីសញ្ញា សំដៅទៅលើសេចក្ដីសញ្ញាជាបន្តបន្ទាប់ ពេលយើងមកចំពោះព្រះគ្រីស្ទ ហើយភ្ជាប់ទៅនឹងទ្រង់ ។ តាមរយៈចំណងនៃសេចក្ដីសញ្ញានេះ យើងមានសិទ្ធិទទួលបានព្រះចេស្តាដ៏អស់កល្បជានិច្ចរបស់ទ្រង់ » ( សន្និសីទទូទៅ ខែមេសា ឆ្នាំ២០២៣ [ លីអាហូណា ខែឧសភា ឆ្នាំ២០២៣ ទំព័រ ៣៦ ] ) ។

ព្រះគុណ ។ នៅពេលដែលយើងអនុវត្តសេចក្តីជំនឿលើព្រះយេស៊ូវគ្រីស្ទ ហើយប្រែចិត្ត នោះយើងអាចទទួលបានជំនួយ និងកម្លាំងបន្ថែម ( ហៅផងដែរថាជាព្រះគុណ ) ដើម្បីសម្រេចអ្វីដែលយើងនឹងមិនអាចធ្វើបានដោយខ្លួនឯង ( សូមមើល សេចក្តីណែនាំដល់បទគម្ពីរទាំងឡាយ « ព្រះគុណ » ) ។ កម្លាំង ឬព្រះគុណនេះអាចមកតាមរបៀបជាច្រើន ៖ ជាអារម្មណ៍មកពីព្រះវិញ្ញាណបរិសុទ្ធ មិត្តភ័ក្តិ ជនចម្លែក ។ ជាទូទៅ អ្វីក៏ដោយដែលល្អគឺមកពីព្រះគ្រីស្ទ ( សូមមើល ម៉ូរ៉ូណៃ ៧:២២ ) ។ នៅពេលប្អូនឃើញថាប្អូនមានការអត់ធ្មត់ មានថាមពល មានកម្លាំងបន្ថែមបន្តិចទៀតដើម្បីស៊ូទ្រាំ ចូរទទួលស្គាល់ថានោះជាព្រះគ្រីស្ទកំពុងជួយប្អូនហើយ ។

ចងចាំពីមូលហេតុ និងរបៀប

ដូច្នេះនៅពេលក្រោយប្អូនត្រូវការចម្លើយចំពោះសំណួរ ឬបញ្ហាមួយ ចូរមើលទៅឯព្រះគ្រីស្ទ ។ សូមចងចាំថាដោយសារតែជ័យជម្នះរបស់ទ្រង់លើអំពើបាប ការស្លាប់ និងបញ្ហានៃជីវិតរមែងស្លាប់ទាំងអស់ នោះគ្មានអ្វីដែលពុំអាចទៅរួចនោះទេ ។ រកមើលពីរបៀបដែលទ្រង់អាចប្រទានពរដល់ប្អូន ហើយប្អូននឹងមើលឃើញឥទ្ធិពលរបស់ទ្រង់នៅក្នុងជីវិតរបស់ប្អូន ។ ទ្រង់ស្រឡាញ់ប្អូនយ៉ាងខ្លាំង !

© ឆ្នាំ២០២៥ ដោយ Intellectual Reserve, Inc. All rights reserved ។ បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly For the Strength of Youth Message, April 2025. Cambodian. 19625 258