Zaj Lus hauv Ntxiv Dag Zog rau cov Tub Hluas Ntxhais Hluas Txhua Hli, Ib Hlis Ntuj 2025
Ntsia Ntsoov Yexus Khetos
Lus Qhuab Qhia thiab Kev Khi Lus 6:36
Cov Tub Hluas Ntxhais Hluas lub Ntsiab Lus rau xyoo 2025 yuav pab koj xaiv kev tso siab thiaj tsis ua xyem xyav thiab xaiv kev ntseeg thiaj li tsis ntshai.
Kailey muaj kaum xya xyoo thiab yog ib tug cheerleader mus txog thaum nws raug xwm txheej ua rau nws lub hlwb raug mob. Nws txoj kev kho mob tsis pub nws mus kawm ntawv, thiab nws pib kho siab xav tias tsis muaj leej twg nco nws. Nws nyuaj siab thiab tsis paub tig mus qhov twg kom txais kev pab. Ib tug phooj hais kom nws mloog ob tug tub txib. Nkawd qhia nws txog Yexus Khetos txoj kev Theej Txhoj. Txoj kev kawm ntxiv txog Yexus Khetos ua rau nws muaj kev cia siab, thiab nws xav tias zoo li Vajtswv tau ncav tes rau nws.
Kailey qhia nws niam, “Kuv yeej tsis xav tias Vajtswv hlub kuv. Tiam sis tsam no kuv paub tias Nws hlub kuv.”
Nws niam, Michelle, xav tsis thoob me ntsis. Nws thiab nws tus txiv, Brock, tau tawm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg thaum Kailey muaj xya xyoo rau qhov nkawd muaj tej lus nug thiab tej yam uas nkawd ua xyem xyav thiab txhawj txog. Nkawd xav tias nkawd tus ntxhais yuav zoo siab dua yog tias tsis tas mus rau tej kev sib ntsib thiab ua raws li cov lus txib. Nkawd tsis tau xav tias nkawd txoj kev xaiv yuav ua rau Kailey tsis muaj kev sib raug zoo nrog Vajtswv. Thaum Michelle thiab Brock saib seb Kailey tau hloov li cas, nkawd paub tias tau ntev lawm nkawd tsis tshua muab siab npuab Vajtswv, thiab nkawd xav rov qab muaj kev xav li ntawd dua.
Nkawd tau ntsib nkawd tus npisov thiab tsis ntev ces nkawd tsev neeg, suav Kailey tus nus Braeden, rov mus lub koom txoos. Txoj kev nyob ze Vajtswv thiab rov sib raug zoo nrog Nws—los ntawm kev thov Vajtswv—tau kho lawv txoj kev ntseeg. Txoj kev rov mus lub koom txoos tsis tau daws tag nrho nkawd cov lus nug los teeb meem, tiam sis nkawd kawm tias txoj kev nrog Vajtswv sib raug zoo tseem ceeb tshaj nkawd txoj kev tsis ntseeg.
Tag nrho tej no pib thaum ib tug phooj ywg—ib tug neeg hluas li koj—caw kom Kailey ntsia ntsoov Khetos. Thiab nws tau ua li ntawd tiag!
Yexus Khetos tau hais tias, “Ntsia ntsoov kuv nrog txhua txoj kev xav; tsis txhob xyem xyav, tsis txhob ntshai” (Lus Qhuab Qhia thiab Kev Khi Lus 6:36). Nov yog txoj kev tshoov siab ntawm cov Tub Hluas Ntxhais Hluas lub Ntsiab Lus rau xyoo 2025. Cia peb qhia seb koj yuav ua li cas kom xaiv kev tso siab thiaj tsis ua xyem xyav thiab xaiv kev ntseeg thiaj li tsis ntshai.
Sab laug mus rau sab xis: Muam Runia, Thawj Tswj Hwm Freeman, Muam Spannaus
Tamara W. Runia
Thaum kuv raug tej yam nyuaj, yeej pab kuv thaum kuv xav txog Yexus Khetos nrog nws txhais tes ncav tes tawm. Thaum kuv ntsia ntsoov rau Nws, kuv nco tej lus ntawm zaj nkauj, “Kuv Yuav Nrog Yexus Mus”: “Nws yuav tsis tso kuv tseg, txawm tias kuv ntog.”
Emily Belle Freeman
Thaum kuv nyeem nqe vaj lug kub rau lub ntsiab lus no, kuv xav txog Petus hauv Dej Hiav Txwv Kalilais. Thaum nws xav txog nag xob nag cua ces nws txoj kev ntshai thiab kev tsis ntseeg loj tuaj, ces nws pib tog rau hauv tej nthwv dej. Tiam sis thaum nws ntsia ntsoov tus Cawm Seej ces Nws txawj ua ib yam uas nws tsis tau ua dua: nws mus ko taw saum nplaim dej! Yeej zoo kawg nkaus tiag. Koj yuav txawj ua dab tsi thaum koj ntsia ntsoov rau Nws?
Andrea Muñoz Spannaus
Thaum kuv pib ntshai, txawm tias kuv nyob qhov twg, kuv xav txog kuv txoj kev sib raug zoo nrog Leej Txiv Saum Ntuj Ceeb Tsheej thiab Yexus Khetos. Kuv rov hais dua hauv kuv lub siab ob peb zaug: KUV YOG VAJTSWV IB TUG NTXHAIS. Kuv yeej meem ua li no mus txog thaum kuv zoo lawm. Ua li no yeej pab tau kuv!
Sab laug mus rau sab xis: Tij Laug Wilcox, Thawj Tswj Hwm Lund, Tij Laug Nelson
Bradley R. Wilcox
Nug koj tus kheej seb leej twg hlub koj tshaj. Puas yog koj niam koj txiv thiab cov thawj coj hauv lub Koom Txoos? Puas yog cov neeg uas siv social media uas xav tias koj yog ib tug neeg hauv ib pawg loj heev? Ntsia ntsoov Leej Txiv Saum Ntuj Ceeb Tsheej thiab Yexus Khetos. Nkawd hlub koj tiag tiag!
Steven J. Lund
Nco ntsoov tej yam uas koj xav txog thaum koj hais tej ntsiab lus ntawm Pawg Pov Thawj Hwj Aloos thiab Koom Haum Ntxhais Hluas: Koj yog Vajtswv ib tug ntxhais los sis tus tub. Muaj kev ntseeg tias peb Leej Txiv muaj ib txoj hau kev rau koj. Ntsia ntsoov Khetos txhais tias yus pom tias Nws txoj kev Theej txhoj yog lub hauv paus ntawm txoj hau kev ntawd.
Michael T. Nelson
Nyeem vaj lug kub yog txoj kev ntsia ntsoov Khetos! Txoj kev tsis ntseeg thiab txoj kev ntshai ploj mus thaum peb xav txog Yexus tej txuj ci tseem ceeb thiab Nws tej lus qhia. Peb muaj hmoov vim peb muaj Nws cov lus. Nws cov lus los muaj nqis siv rau txhua qhov xwm txheej hauv peb lub neej.
© 2025 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly For the Strength of Youth Message, January 2025. Hmong. 19615 295