“Pagpati kay Cristo antes Sia Mag-abot Liwat,” Para sa Kusog sang mga Lamharon, Abr. 2024.
Bulanan nga Mensahe sa Para sa Kusog sang mga Lamharon, Abril 2024
Pagpati kay Cristo antes Sia Mag-abot Liwat
Ang mga Nefinhon may pagtuo antes nag-abot ang Manluluwas, kag makaangkon kita sang pagtuo antes Sia mag-abot liwat.
Napamensar bala ninyo kon ano ayhan ang magpati sa Manluluwas antes Sia nag-abot sa duta? Ang mga Nefinhon sang una kinahanglan maghimo sang amo gid sina —“[magpaabot] gid sa Mesias, kag magpati sa iya nga magaabot nga daw yara na sia” (Jarom 1:11).
Sa karon, may mga rekord kita sa balaan nga mga kasulatan kag kasaysayan nga nagapamatuod nga si Jesucristo nagkabuhi, napatay, kag nabanhaw. Nagapati kita sa Manluluwas nga nag-abot na. Pero nagapati man kita sa Manluluwas nga magaabot liwat.
Antes si Jesucristo Nag-abot, ang mga Nefinhon May Pagtuo Nga:
Mapatawad sang ila mga sala.
“Ang bisan sin-o nga magpati nga si Cristo magaabot, ang amo man mahimo nga makabaton sang kapatawaran sang ila mga sala, kag magkasadya sa tuman kadako nga kalipay, nga daw pareho nga nag-abot na sia sa ila” (Mosias 3:13; emphasis gindugang).
Mapatawad ang ila mga kaugalingon.
Kag may nag-abot nga isa ka tingug sa akon, nga nagasiling: Enos, ang imo mga sala ginpatawad na. … Gani, ang akon kabasulanan nadula na. Kag nagsiling ako: Ginuo, paano ini nahimo? Kag nagsiling sia sa akon: Tungod sang imo pagtuo kay Cristo, nga wala pa gid nimo sadto nabatii ukon nakita. Kag madamo nga tinuig ang magalabay antes niya ipakita ang iya kaugalingon sa unod; … ang imo pagtuo ang nagpaayo sa imo” (Enos 1:5-8; emphasis gindugang).
Maghimo sang mga milagro.
“Nakahibalo kami parte kay Cristo, kag nakaangkon kami sing paglaum sang iya himaya madamo nga ginatos ka tuig antes sang iya pagkari. … Sa bagay nga matuod gid nga makasugo kami paagi sa ngalan ni Jesus kag ang mga kahoy mismo nagatuman sa amon, ukon ang mga bukid, ukon ang mga balod sang dagat” (Jacob 4:4, 6; emphasis gindugang).
Magbaton sang rebelasyon.
“Kag may madamo nga ang ila pagtuo tuman kabakod, bisan antes sang pagkari ni Cristo, nga indi mapunggan sa pagsulod sa belo, kundi matuod gid nga [nakakita] paagi sa ila mga mata” (Eter 12:19; emphasis gindugang).
Antes si Jesucristo Mag-abot Liwat, Sarang Kita Makaangkon sang Pagtuo Nga:
Mapatawad (sang aton mga sala), magpatawad sa aton mga kaugalingon, maghimo sang mga milagro, kag magbaton sang rebelasyon (pareho sa mga Nefinhon).
Ihanda ang aton mga kaugalingon sa Iya pag-abot.
Kon nagatinguha kita nga tumanon ang aton mga kasugtanan, nagahanda kita nga magpangabuhi sa selestiyal nga ginharian. “Kay tan-awa, ini nga kabuhi amo ang tion nga maghanda ang mga tawo agud mag-atubang sa Dios; huo, tan-awa ang adlaw sini nga kabuhi amo ang adlaw nga maghikot ang mga tawo sang ila mga pagpangabudlay.” (Alma 34:32).
Ihanda ang kalibutan para sa Iya pag-abot.
Gin-agda kita ni Pangulong Russell M. Nelson nga mangin kabahin sang “pinakadaku nga buluhaton sa kalibutan”—ang pagtipon sang Israel. “Ang aton Amay nga Langitnon nagtigana sang madamo sang Iya pinakadungganon nga mga espiritu—ayhan, makasiling ako, ang Iya pinakaali nga guban—para sa sining katapusan nga tion. Inang pinakadungganon nga mga espiritu—inang pinakaali nga guban, inang mga baganihan—amo kamo!”1
Makaangkon sang paglaum sa tion sang mabudlay nga mga panahon.
Kon mag-abot liwat ang Manluluwas, ang mga matarong magakabuhi sa kalinong. Ang Manluluwas magahari, kag ang pagdi-alalangay pagatadlongon. “Kay ang Ginuo mangin yara sa tunga nila, kag ang iya himaya mangin yara sa ila, kag sia mangin ila hari kag ila manughatag sang kasugoan” (Doktrina kag mga Kasugtanan 45:59).
Magsalig sa Pagkabanhaw.
Ang tanan nga tawo mabanhaw. Makaangkon kita sang perpekto, imortal nga mga lawas. Makita naton liwat ang aton mga pinalangga nga napatay na. “Ang espiritu kag ang lawas magatingob liwat sa iya perpekto nga dagway; ang tiil, kamot kag lutalutahan igapanumbalik sa iya kinaandan nga lawas nga pareho sa aton subong sa sini nga tion” (Alma 11:43).
Ang mga Nefinhon sang una may pagtuo sa Manluluwas antes Sia nag-abot. Makaangkon kita sang pagtuo nga ang Manluluwas magaabot liwat—kon makita [naton] [Sia] sa mga panganod sang langit nga may gahum kag dako nga himaya” (Doktrina kag mga Kasugtanan 45:44; tan-awa man sa Mga Binuhatan 1:11). Paano ang paghibalo nga maabot Sia liwat magabag-o sang imo himuon subong?
© 2024 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, April 2024. Language.19353 861