iTukutuku Vakavula ni Me iSakisaki ni iTabagone, Feperueri 2024

2 Nifai 5

Au sa bula tiko beka “ena iValavala ni Bula Marau”?

Mai vei Eric D. Snider

Mekasini ni Lotu

Oqo eso na vakasama mo bulataka kina na sala a kaya o Nifai ni ra a bula tu kina na nona tamata.

itabagone

iVakaraitaki mai vei Alyssa Gonzalez

Ni oti ga vakalailai na nodra veitawasei mai vei ira na Leimanaiti, a kaya o Nifai ni ra a “bula ena ivalavala ni bula marau” na nona tamata (2 Nifai 5:27). Oqori e rawa ni veivakurabuitaki, ni vakasamataki ni a tiko tale e dua na ilawalawa tamata era a vinakata me ra vakamatei ira (raica na 2 Nifai 5:1–6, 14). Ena rawa vakacava vua e dua me marau tu ena ituvaki vakaoqo?

Taumada, me kilai ni “da sa bula ena ivalavala ni bula marau” e sega ni kena ibalebale ni “o ira yadua kece na Nifaiti era a marau tu me 24/7.” E kena ibalebale ni ra a bula ena mataqali ivakarau, ka cakava na mataqali veika eso, ka dau vakavuna na bula marau. Vakararaba, veitalia na nodra bolebole, a sa dua na gauna marautaki.

Ia na cava sara mada “na ivalavala ni bula marau”? Eda na vakayagataka beka vakacava ena noda bula, ka tu talega na kena bolebole? Meda raica mada!

• Mo talairawarawa. “Keimami sa raica me keimami muria … na ivakaro ni Turaga” (2 Nifai 5:10).

  Na bulataki ni kosipeli sai koya nai ka 1 ni Kalawa. O na rairai marau tu beka vakalailai ena ivalavala ca, ia ena sega ni dede. Na nakiti ni talaidredre vua na Kalou e sega ni “ivalavala ni bula marau” (raica na Alama 41:10).

• Vakasaqaqara ena ivolanikalou “Ka’u a kauta … mai , koi au ko Nifai, na itukutuku ka ceuti tu ena peleti parasa” (2 Nifai 5:12). “Keirau … vakawilika ka kunea ni sa talei sara; io, ka sa yaga vakalevu sara vei keimami” (1 Nifai 5:21) .

  A tu vei ira na tamata i Nifai na ivolanikalou. Ka sega walega ni tu vei ira—era a vakawiliki ira.

• Vakarorogo vei ira na iliuliu vakauqeti. “[Au] sa vakatabui rau ko Jekope kei Josefa, koi au ko Nifai, me rau bete ka ivakavuvuli [vei ira] … na noqu tamata” (2 Nifai 5:26).

  O rau na ivakavuvuli oqo a vakayagataka na ivolanikalou me nodrau idusidusi (raica na 2 Nifai 4:15; 6:4).

• Lako ki na valetabu (kei na veivanua tabu tale eso). “Koi au ko Nifai, au [a] tara e dua na valetabu” (2 Nifai 5:16).

  Sa ka bibi me tu na veivanua tabu me vaka na veivalenisoqoni kei na valetabu me baleti ira na tisaipeli me ra soqoni vata ka sokalou kina. (Eda rawa ni kaya beka ni o ira na Nifaiti a sega walega ni tu e dua nodra valetabu—era a vakayagataka sara ga.) Kevaka o sega ni rawa ni lako vakataki iko ki na valetabu, sa rawa mo cakava ga na cakacaka ni tuva kawa.

• Mo dau vuavuai vinaka. “[Au a] vakavulici ira na noqu tamata me ra tara vale, ka me ra cakacaka. … [Au a] vakaroti ira na noqu tamata … me ra cakacaka vagumatua, ka dau cakacaka e ligadra” (2 Nifai 5:15, 17).

  E tiki ni “ivalavala ni bula marau” sai koya me tiko e dua na ka me caka! E dua na ilesilesi, dua na cakacaka, dua na itavi—e dua na ka e solia vei iko na vakanamata kei na inaki (ni salavata kei na gauna veiganiti ni vakacegu, e dina sara). E ka dredre mo marau kevaka o vucesa voli ga e veigauna kece.

O na kaya beka ni o sa bula tiko ena gauna oqo ena ivalavala ni bula marau? Kevaka e sega, ena rawa ni solia vei iko na ivakaraitaki nei Nifai eso na vakasama mo vakavinakataka cake kina.

© 2024 mai na Intellectual Reserve, Inc. Dodonu taucoko e taqomaki. Tabaki e Amerika. Vakadonui me vakaValagi: 6/19. Vakadonui me vakadewataki: 6/19. iVakadewa ni Monthly For the Strength of Youth Message, February 2024. Language. 17464 858