“Disipulo Ako ni Jesucristo,” Para sa Kusog sang mga Lamharon, Ene. 2024.
Bulanan nga Mensahe sang Para sa Kusog sang mga Lamharon, Enero 2024
Disipulo Ako ni Jesucristo
Mahimo mo sundon ang Manluluwas kag ipalapnag ang Iya pulong sa iban.
Natingala bala kamo ngaa, pagkatapos paayuhon ang mga tawo, si Jesus nagtugon sa pila sa ila nga indi sila magpanugid bisan kay sin-o (Tan-awa sa Marcos 7:36)? Isa sa mga rason mahimo tungod sa klase sang mga sumulunod nga Iya ginakinahanglan. Ayhan mapensar mo nga kon ang mga tawo manugid sang ila mga pagpang-ayo mangin maayo ini nga paagi para kay Jesus nga magganyat sang mga sumulunod. Ugaling, si Jesus wala lamang basta nagakinahanglan sang mga sumulunod. Nagkinahanglan Sia sang mga disipulo.
Si Jesus nagsiling kay Pedro kag Andres, “Sunod Kamo sa Akon” (Mateo 4:19). Ang Joseph Smith Translation sang amo nga bersikulo mabasa, “Ako amo ang ginsulat sang mga propeta; magsunod kamo sa akon” (Joseph Smith Translation, Mateo 4:18 [sa Mateo 4:19, footnote a]). Ang pangagda indi nga mag-upod lamang sa Iya sing makadali. Gusto Niya nga sila mangin Iya mga disipulo sa katubtuban.
Indi Niya gusto nga magtan-aw lang sila nga nagatudlo Sia sa mga tawo, nagapalangga sa mga tawo, kag nagahikot sang mga milagro. Gusto Niya nga himuon man nila ini. Gusto Niya nga ang Iya buluhaton mangin ila man buluhaton. Ang pilion si Cristo nagakahulugan nga tun-an nila nga mag-alagad pareho sang Iya pag-alagad kag paghunahuna pareho sa Iya ginhunahuna. Nga mangabuhi sila kon paano Sia nangabuhi, kag tudloan Niya sila kag buligan sila nga mangin mas pareho sa Iya.
Ang pulong nga Griego para sa disipulo amo ang mathetes. Buot silingon labaw pa sa sumulunod ukon estudyante. Masami ini ginalubad bilang kabulig [apprentice]. Sa panahon ni Cristo, kinaandan nga ang mga disipulo nagapili kon kay sin-o nga agalon sila gusto magtuon nga nagahandum nga mangin agalon man sa pila ka adlaw. Wala ginsunod ni Jesus ang ila kinaandan nga gawi. Ginbaliskad Niya ini kag sa baylo, nangita sang Iya mga disipulo. Karon, si Jesucristo nagatawag sa aton nga magpalapit sa Iya. Ginatawag niya kita nga mangin Iya mga disipulo sa pagpahayag sang Iya pulong sa tunga sang iya katawhan agud nga makaangkon sila sang kabuhi nga dayon (tan-awa sa 3 Nefi 5:13).
Isa ka dalagita halin sa Haiti sa Caribbean nagpakita sang iya handom nga mangin disipulo ni Cristo paagi sa pag-agda sang iya abyan nga indi miyembro sang Simbahan nga mag-upod sa iya sa komperensya sang FSY. Sang primero indi magpasugot ang amay sang iya abyan. Ang mga lider sang Simbahan nagpaathag sang positibo nga mga eksperiensya nga nagahulat sa iya kag sang manami nga young adult counselors nga magabantay sa iya. Ginpasugtan sang amay ang iya bata, kag sang makita ang ginhimo sini nga kinalain sa iya kabuhi, ginpasugtan man niya nga magkadto ini sa mga miting sa Simbahan kag—pagligad sang anum ka bulan—mabunyagan.
Isa ka solterito halin sa Argentina sa South America ang nagpakita sang iya handom nga mangin disipulo ni Cristo paagi sa paghatag sang iban niya nga dulse sa isa ka abyan samtang nagasakay sila sa bus pakadto sa eskwelahan. Sang makita niya ang dulse nga sabor-kape, iya ginpaathag nga wala gid sia nanamian sang sabor sina tungod wala ni isa sa iya pamilya ang nagainom sang kape. Nagresulta ina sang paghambalanay parte sa Simbahan, nga nagresulta sa pag-agda sa pagkadto sa mga miting, nga sang ulihi nagresulta sang pagpamiyembro sang iya abyan sa Simbahan kag pagserbe sang misyon sa Chile.
Indi tanan nga imo ginasugilanon parte sa Simbahan ukon ginaagda sa aktibidades sang Simbahan gusto magpamiyembro. OK lang ina. Indi man tanan nga ginsugilanon ni Cristo sang panahon sang Iya dutan-on nga pagpangalagad nagpamiyembro. Sa gihapon, kon aton pilion ang mangin mga disipulo ni Jesucristo kag ipahayag ang Iya pulong, Iya kita hatagan sang kaisog kag diosnon nga bulig. Matun-an naton kon paano mangin mas pareho sa Iya, kag amo ina ang ginahimo sang mga disipulo.
© 2024 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, January 2024. Language. 19273 861