“Pito ka Adlaw sang Pagpaambit,” Para sa Kusog sang mga Lamharon, Hulyo 2023.
Bulanan nga Mensahe sang Para sa Kusog sang mga Lamharon, Hulyo 2023
Pito ka Adlaw sang Pagpaambit
Pwede mo ipaambit ang ebanghelyo sa normal kag natural nga mga paagi. Handa ka na bala sa sini nga panghangkat?
Kon istoryahan naton ang parte sa pagpaambit sang aton mga testimonya, pirme naton ginapanumdom ang paghambal sang aton mga testimonya sa sakramento nga miting ukon sa iban nga pormal nga aktibidades. Pero ginapaisog kita nga “magpangita sang mga oportunidad nga maistoryahan ang inyo pagtuo sa natural kag normal nga mga paagi.”1
Sa pito-ka-adlaw nga hangkat sa idalom, pwede mo ipaambit ang imo testimonya sa lainlain nga paagi kada adlaw sa sulod sang isa ka semana. Pwede mo ini himuon nga indi pasunod, ukon pwede ka man maghimo sang imo kaugalingon nga mga ideya! Handa ka na bala sa sini nga panghangkat?
Mga drowing ni Emily Davis
Adlaw 1: Simbahan
Pamensara nga ipaambit ang imo testimonya sa miting sang puasa kag testimonya sa simbahan kon komportable ka nga himuon ini. Kon indi, pwede mo man ipaambit ang imo testimonya sa simbahan paagi sa pagpartisipar sa imo mga klase kon Domingo kag sa seminary. Ang mga komento nga imo ihambal didto mahimo nga makapapagsik sang iban kag makapabakod sang ila mga testimonya kag sang imo man.
Adlaw 2: Mga Abyan
Ano ang imo natun-an sa simbahan sining Domingo? Nanamian ka bala sang ginhambal sang manughambal sa sakramento nga miting ukon sa diskusyon sa inyo klase? Basi ang pangbukas nga kanta isa sa paborito mo nga mga himno. Ihambal ini sa isa mo ka abyan! Dayon pamangkuta man sila kon kumusta ang ila Sabado kag Domingo.
Adlaw 3: Social Media
Ang social media isa ka maayo nga lugar sa pagpaambit sang espirituhanon nga mga butang sing normal kag natural. Para sa sining adlaw sang hangkat, pamensara nga mag-post parte sa:
-
Imo paborito nga bersikulo sang balaan nga mga kasulatan.
-
Isa ka makapapagsik nga sinambit sa pangkabilogan nga komperensya.
-
Isa ka espirituhanon nga panghunahuna ukon eksperiyensya.
-
Butang nga nanamian mo ukon ginapasalamatan sa Manluluwas.
-
Paagi nga ginbuligan ka Niya sining nagligad lang ukon sang kalidad nga nanamian mo sa Iya kag ngaa.
Adlaw 4: Text ukon Video
Magpadala sang makapapagsik nga mensahe sa isa ka abyan paagi sa text ukon video. Pwede ka magpadala sang mensahe sa komperensya nga pamatyag mo manamian nila, sugiri sila sang imo nanamian sa ila, ukon ipaambit ang imo pagtuo kay Jesucristo. Halimbawa, basi kinahanglan nila nga mahibal-an ang pagpalangga sang Amay nga Langitnon sa ila. Pwede mo man sila hambalan sing personal!
Adlaw 5: Pagserbisyo
Basi matingala ka kon paano ang pagserbisyo sa iban pamaagi man gale sa pagpaambit sang imo testimonya. Si Apostoles Pablo nagsiling kay Timoteo, “Magmanginhuwaran ka sa mga nagatuo, sa pulong, sa paggawi, sa gugma, sa espiritu, sa pagtuo, sa kaputli” (1 Timoteo 4:12). Gani pwede mo ipakita ang imo mga ginapatihan paagi sa imo ehemplo, paagi sa pagserbisyo sa iban pareho sang pagserbisyo sang Manluluwas sa ila.
Adlaw 6: Art
Kon kaisa ginagamit sang mga tawo ang art bilang lain nga pamaagi sa pagpaambit sang ila mga panghunahuna kag balatyagon. Pwede ka maggamit sang mga larawan, iskultura, binalaybay, musika, ukon iban pa nga klase sang art para ipakita ang imo nabatyagan parte kay Jesucristo kag sa Iya ebanghelyo.
Adlaw 7: Kaswal nga Paghinambalanay
Indi mahadlok sa pagsambit sang imo mga ginapatihan sa kaswal nga mga okasyon, pareho sang paghambal sang imo mga panghunahuna sa isa ka topiko.
Siyempre, pwede mo ihambal ang parte sa mga aktibidades sang Simbahan ukon balaan nga kasulatan nga imo ginbasa sang nagligad, pero pwede man nga indi ini pormal katama. Halimbawa:
-
Kon daw natandog ka gid sang natural nga palibot, ipahayag ang imo pagpasalamat parte sa mga gintuga sang Dios sa isa ka tawo.
-
Basi may manami ka nga espirituhanon nga eksperiyensya sining nagligad lang. Iistorya ini sa isa ka abyan kon daw indi ini personal katama.
-
Magpangita sang paanggid sang ebanghelyo sa libro ukon sine nga nanamian mo, kag iistorya ang imo mga panghunahuna.
Normal kag Natural
Samtang nagapangita ka sang lainlain nga pamaagi sa pagpaambit sang imo mga ginapatihan, mangin mas natural ini sa imo nga himuon. Mahimo nga daw masaw-a ini sa primero, pero okay lang ina! Tandai, ang imo testimonya mismo natural na sa imo—bahin ini sang kon sin-o ka. Ang pagpaambit sini pwede man nga mangin natural. Kinahanglan lang ini ipahayag pa gid kada adlaw.
Paano mo ipaambit ang imo testimonya karon?
© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, July 2023. Language. 19045 861