Staðir í ritningunum

Getsemane

Lærið meira um staðinn þar sem þjáningar frelsarans í okkar þágu hófust.

ólífutrjálundur

Hvar er þetta?

Í hlíð Olíufjallsins, austur af Jerúsalem (hægra megin á myndinni, merkt með risavöxnu tré).

kort af hinni fornu Jerúsalem

Kortamynd af Jerúsalem, eftir Jim Madsen

Hvað var þar?

Ólífutrjálundur og líklega pressa til að ná olíu úr ólífunum.

ólífupressa

Hvað gerðist þar?

Eftir síðustu kvöldmáltíðina fór Jesús Kristur með ellefu postulum sínum til Getsemane. Hann fór síðan afsíðis til að biðjast fyrir og tók Pétur, Jakob og Jóhannes með sér.

„[Að honum] setti … ógn og angist.“ Hann sagði: „Sál mín er hrygg allt til dauða“ (Markús 14:33–34).

Hann bað: „Faðir, ef þú vilt, þá tak þennan kaleik frá mér! En verði þó ekki minn heldur þinn vilji.

Þá birtist honum engill af himni sem styrkti hann.

Og hann komst í dauðans angist og baðst enn ákafar fyrir en sveiti hans varð eins og blóðdropar er féllu á jörðina“ (Lúkas 22:42–44).

Eftir þessar miklu þjáningar frelsarans, var hann svikinn af Júdasi og handtekinn af leiðtogum Gyðinga og hópi rómverskra hermanna.

Vissuð þið?

Garður þessi við olíufjallið var staður sem Jesús fór oft á (sjá Lúkas 22:39; Jóhannes 18:2).

„Á arameísku þýðir orðið getsemane ‚ólífupressa.‘“¹

Þegar ólífur eru fyrst kramdar í ólífupressu er olían sem rennur út rauð eins og blóð.

Á tímum frelsarans var framleiðsla á ólífuolíu ferli þar sem þrýstingur var aukinn í hverju skrefi til að kreista út eins mikla olíu og mögulegt var:

1. Ólífur voru kramdar undir stórum steini.

2. Krömdu ólífurnar voru settar í ofnar körfur og þeim stafað hver ofan á aðra.

3. Stór bjálki var settur ofan á hinar stöfluðu körfur.

4. Steinar voru síðan settir á annan enda bjálkans.²

Ólífuolía var til forna notuð sem lampaolía, matarolía, sápa, fyrir trúarathafnir og sem smyrsl til að bera á sár.

Mörgum árum fyrir komu Krists greindi engill Benjamín konungi frá þjáningum Krists í Getsemane og sagði: „Blóð drýpur úr hverri svitaholu, svo mikil verður angist hans“ (Mósía 3:7).

Þjáningar frelsarans í okkar þágu fela í sér þjáningar hans í Getsemane og á krossinum, þar sem hann dó. Hann tók á sig allar syndir okkar, sársauka, þrengingar, freistingar, sjúkdóma og vanmátt (sjá Alma 7:11–12).

Jesús Kristur í Getsemane

Getsemane, eftir Michael Malm

Munið eftir Getsemane

„Munið, á sama hátt og ólífurnar voru pressaðar til að ná út olíunni til að kveikja ljós, svo og var okið þungt á frelsaranum. Úr hverri svitaholu streymdi lífsins blóð lausnara okkar. Þegar gleðibikar ykkar tæmist, munið þá eftir hinum bitra bikar hans sem gerði hann mögulegan. Og þegar sárar raunir sverfa að, munið þá eftir Getsemane.

Russell M. Nelson forseti, „Why This Holy Land?“ Ensign, des. 1989, 18.

© 2023 Intellectual Reserve, Inc. Allur réttur áskilinn. Printed in USA. Samþykkt á ensku: 6/19. Þýðing samþykkt: 6/19. Þýðing á Monthly For the Strength of Youth Message, June 2023. Language. 19026 000

Heimildir

1. Leiðarvísir að ritningunum, „Getsemane.“

2. Sjá D. Todd Christofferson, aðalráðstefna, október 2016 .