Mga Lugar halin sa Balaan nga mga Kasulatan

Getsemani

Magtuon sing dugang parte sa lugar kon diin nagsugod ang mga pag-antos sang Manluluwas para sa aton.

kakahoyan sang olivo

Sa Diin Ini?

Sa dulhugon sang Bukid sang mga Olivo, sa este sang Jerusalem (sa tuo sang ilustrasyon, nga namarkahan sang dako nga kahoy).

mapa sang dumaan nga Jerusalem

Ilustrasyon sang mapa sang Jerusalem ni Jim Madsen

Ano ang Ato Didto?

Kakahoyan sang olivo kag basi pulugaan sang lana halin sa mga olivo.

pulugaan sang olivo

Ano ang Natabo Diri?

Pagkatapos sang Katapusan nga Panyapon, naglakat si Jesucristo upod ang onse sang Iya mga Apostoles sa Getsemani. Dayon nagpalayo-layo Sia para mangamuyo kag gin-upod sanday Pedro, Santiago, kag Juan.

Sia “nagsugod sa pagkakugmat kag pagkalisang sing tama gid.” Siling Niya, “Ang akon kalag masinulub-on sing tama, tubtub sa kamatayon” (Marcos 14:33–34).

Nagpangamuyo Sia: “Amay, kon buot mo, ipahilayo sa akon ining tagayan: apang indi ang akon kabubut-on, kundi ang imo, paghimuon.

“Kag nagpahayag sa iya ang isa ka [anghel] gikan sa langit, nga nagapabakod sa iya.

“Kag sa kasakit nagpangamuyo sia sing hanuot gid; kag ang iya balhas nangin kaangay sang dalagkung tinolo sang dugo nga nagatupa sa duta” (Lucas 22:42–44).

Pagkatapos sining grabe nga pag-antos sang Manluluwas, gintraydor sia ni Judas kag gindakop sang mga opisyales nga Judio kag sang grupo sang mga soldado sang Roma.

Nakahibalo Ka Bala?

Ini nga hardin sa Bukid sang mga Olivo amo ang lugar nga pirme ginakadtuan ni Jesus (tan-awa sa Lucas 22:39; Juan 18:2).

“Sa Aramaic, ang tinaga nga gethsemane nagakahulugan nga ‘pulugaan sang olivo.’”¹

Sa primero nga pagdunot sang mga olivo sa pulugaan, ang lana nga nagagwa pula, daw pareho sang dugo.

Sang panahon sang Manluluwas, ang pagpagwa sang lana sang olivo ginahimo paagi sa pagdugang sang presyur sa tagsa ka proseso para mapuga ang tanan nga lana:

1. Ginadunot ang mga olivo sa dako nga bato.

2. Ginabutang ang dinunot nga mga olivo sa ginhabi nga mga basket, kag ginasampaw-sampaw ang mga basket.

3. Ginabutangan sang dako nga tambala ukon tablon sa ibabaw sang ginsampaw-sampaw nga mga basket.

4. Ginabutangan sang mga bato nga pabug-at ang mga punta sang tambala.²

Ang lana nga olivo ginagamit sadto para sa lampara, pagluto, pagkaon, habon, relihiyoso nga mga seremonya, kag haplas para sa mga pilas.

Madamo nga tinuig antes sang pag-abot ni Cristo, ginhambal sang isa ka anghel kay Haring Benjamin ang parte sa pag-antos ni Cristo sa Getsemani, nga nagasiling, “Ang dugo magagwa gikan sa tagsa ka buho-buho sang panit, sapagkadako sang iya kagha” (Mosias 3:7).

Ang pag-antos sang Manluluwas para sa aton nagalakip sang Iya pag-antos sa Getsemani kag sa krus, kon diin Sia napatay. Ginpas-an Niya sa Iya kaugalingon ang tanan naton nga mga sala, mga kasakit, mga pag-antos, mga tentasyon, mga balatian, kag mga kasablagan (tan-awa sa Alma 7:11–12).

Si Jesucristo sa Getsemani

Gethsemane [Getsemani], ni Michael T. Malm

Tandai ang Getsemani

“Tandai, pareho sang bunga sang olivo, nga ginpuga para sa lana nga nagahatag sang kasanag, sa amo man ang Manluluwas ginpuga. Halin sa tagsa ka buho-buho sang panit naggwa ang dugo sang aton Manunubos. … Kon mag-awas ang imo tagayan sang kalipay, tandai ang Iya tagayan sang kapait nga naghimo sina nga posible. Kag kon mag-abot ang malala nga mga pagtilaw, tandai ang Getsemani.”

Pangulong Russell M. Nelson, “Why This Holy Land?” Ensign, Dis. 1989, 18.

© 2023 by Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, June 2023. Language. 19026 861

Mga Tanda

1. Giya sa Balaan nga mga Kasulatan, “Getsemani.”

2. Tan-awa sa D. Todd Christofferson, Okt. 2016 pangkabilogan nga komperensya (Ensign ukon Liahona, Nob. 2016, 50).