“4 ka Pamaagi nga Ginapabakod Ka ni Jesucristo,” Para sa Kusog sang mga Lamharon, Ene. 2023.
Bulanan nga Mensahe sang Para sa Kusog sang mga Lamharon, Enero 2023
4 ka Pamaagi nga Ginapabakod Ka ni Jesucristo
Mahimo ko ang tanan nga butang paagi kay Cristo.
Mga Taga-Filipos 4:13
Sa bilog nga kalibutan, ang mga Kristiyano nagakasadya sa sining balaan nga kasulatan: “Mahimo ko ang tanan nga butang paagi kay Cristo nga nagapabakod sa akon” (Mga Taga-Filipos 4:13).
Kon mabatian ini sang mga tawo, ang iban sa ila mahimo nga nagapamensar nga mapasaran nila ang bisan ano nga test, madaog ang bisan ano nga hampang, kag mabaton ang katumanan sang tagsa ka handum. Pero indi amo sina ang ginatudlo sang sini nga balaan nga kasulatan.
Ginsulat ini ni Apostoles Pablo samtang ara sia sa prisuhan. Bilang priso, kadamo sang mga butang nga indi mahimo ni Pablo, pero nahibal-an niya nga mahimo sia pabakuron ni Jesucristo para himuon kon ano gid ang pinakaimportante.
Amo man ina sa imo!
1 Si Cristo Nagapabakod sa Imo sa Paghibalo
Ginhatagan ka ni Jesucristo sang pila ka importante nga pamaagi para mahibal-an mo kon ano ang matuod. Gintudloan Niya kita tanan nga magpangamuyo pirme (tan-awa sa 3 Nefi 18:18) kag magpangayo para mahibal-an kon ano ang matuod (tan-awa sa Moroni 10:4–5). Makita mo man kag mahibal-an kon ano ang matuod paagi sa imo pagtuon sang balaan nga mga kasulatan.
Ang pangamuyo kag pagtuon sang balaan nga mga kasulatan nagadala sang Espiritu sa imo kabuhi. Ang Espiritu mahimo nga maghambal sa “imo panghunahuna kag … sa imo tagipusuon” (Doktrina kag mga Kasugtanan 8:2), “magpuno sang imo kalag sang kalipay,” kag “magapasanag sang imo panghunahuna” (Doktrina kag mga Kasugtanan 11:13).
Sa sining mga paagi , mahimo mo nga “pamatian Sia”—kag mabatian ang mga pulong sang Manluluwas kag sundon ang Iya ginsiling. Si Pangulong Russell M. Nelson nagtudlo nga amo ini “ang sulundan sang kadalag-an, kalipayan, kag kasadya sa sining kabuhi.”1
2 Si Cristo Nagapabakod sa Imo sa Paghimo
Ang kusog nagaabot sa imo samtang nagatinguha ka nga tumanon ang mga kasuguan kag maghimo sang maayo nga mga pagpili nga nagadala sang kalinong kag kalipay. Si Jesucristo nagapabakod sa imo nga himuon ini bisan pa nga inang mga pagpili mabudlay himuon. Kon kaisa makahimo ka sang sayop nga pagpili. Maayo lang, ang Pagbayad-Sala sang Manluluwas nagatugot nga mangin posible ang paghinulsol. Bangud kay Jesucristo, mahimo ka nga mangin matinlo kag makakita sang kalipay. Sarang ka Niya pabakuron sa “paghimo sing mas maayo kag mangin mas maayo”2 kada adlaw.
3 Si Cristo Nagapabakod sa Imo sa Paglampuwas
Samtang ara sa prisuhan, si Pablo nagsulat: “Natun-an ko ang pagkakontento sa bisan ano nga kahimtangan ako ”
“Makahibalo ako magpakakubos, kag makahibalo man ako magpakabugana: sa bisan ano kag sa tagsa ka kahimtangan” (Mga Taga-Filipos 4:11–12).
Buot silingon, natun-an ni Pablo nga, paagi kay Cristo, mahimo niya nga maglampuwas kag magtuon sa iya mga pagtilaw kag mga hangkat. Mahimo ni Jesucristo nga pabakuron ka nga maghimo sang amo man.
Ang Manluluwas, nag-antos sang “mga kasakit kag mga kapipit-an kag mga pagsulay sang tagsa ka sahi.” Gindala Niya sa Iya Kaugalingon ang aton mga kahuyangan para “mahimo niya nga mahibal-an … kon paano magtabang [nga buot silingon magbulig] sa iya katawhan suno sa ila mga kahuyangan” (Alma 7:11–12). Bisan ano ang imo ginaatubang, mahimo ka pabakuron ni Jesucristo para magpadayon kag maghimo sang mga butang nga indi mo kuntani masarangan nga ikaw lang.
4 Si Cristo Nagapabakod sa Imo agud Mangin
Ginhimo ni Jesucristo nga realidad ang pagkabanhaw para sa aton tanan, kag ginahimo Niya ang kabuhi nga wala katapusan nga mangin posible para sa mga nagahinulsol, nagabaton sang kinahanglanon nga mga ordinansa, kag nagahimo kag nagatipig sang mga kasugtanan nga mahiangot sa mga ini. Kon wala si Cristo, indi naton matuman ang gusto gid sang Amay nga Langitnon—nga kita mangin mas pareho sa Iya kag sa Iya Anak, nga si Jesucristo, kag magpuyo upod sa Ila sa walay katapusan.
Sarang ka nga mangin mas pareho kay Jesucristo samtang nagatuon ka parte sa Iya, nagasandig kag nagasalig sa Iya, kag nagasunod sa Iya ehemplo. Giyahan ka sini sa pagpangabuhi nga may mas dugang nga pagtuo, paglaum, gugma sa isigkatawo, pagkamapainubuson, katinlo, kag pagkamasinulundon. Ini tanan mga kinaiya sang Manluluwas.
Samtang nagatinguha ka nga sundon si Jesucristo, Sia ang mangin imo paglaum kag imo kasanag nga magagiya sa imo para mangin tanan nga nahibal-an Niya nga ikaw sarang mangin. Kag, upod ni Pablo, mahimo ka nga makasiling, “Mahimo ko ang tanan nga butang paagi kay Cristo nga nagapabakod sa akon.”
© 2023 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, January 2023. Language. 18904 861